Read Samba Leko GBANTUMSӘ̀ BƏD TÙSÁ 22 Bible Online

GBANTUMSӘ̀ BƏD TÙSÁ 22 - Samba Leko bible

GBANTUMSӘ̀ BƏD TÙSÁ 22

¹«Íí nɛ́b gbàád bərá, ɔ̀b mə́ bərá, ìì zɛ̀ŋ mə́ bə́ŋ̀ gè, má ii nwɔŋ baanàá. Máá gə́, mə́ í' yíl mə́ tágǹmbə̀ aí númú.»

²Nɛ́ɛ̀m Ibraniŋko bəd bə̀ kìì tə́ nwɔŋ gáàm kə̀ boò nwɔŋú gə́, bə̀ kùm dìímsə̀ní, zɛ̀ŋ bə̀ kùrú kúnú. Pol bàà:

³«Máá mə́ *Yahudu, bə̀ lɛ̀b mə́ Tarsus bìlú, Silikiya yɛ́b ba. Zá yaà mə́ kàŋ Urusalima bìlú. *Gamaliyɛl sán mə́ sə̀n *dam bə́n bəd indaŋ̀mbə̀, bagm̀bə̀ kə̀ nyɛdkèá. Mə́ bàg Vɛnɛ́b kə̀ kpɛŋsɛ́lá, kìínmbə̀ nɛɛ̀n aa íí tə́ bagǹ nyà'aa yérə kíni.

⁴Mə́ í' nɛ́b aa tə́ Yéésù kpaŋ̀ bagǹ də búúrá, kam wə́ə́ val bìá. Mə́ kòd nɛ́b vɔ̀ɔ̀m bəd kə̀ nɛ́b kɛ́ɛ̀m bəd tá, mə́ páál bə̀ wúltígə́l bə̀ rú.

⁵*Láŋsə́ gààd gbà'á kə̀ Yahudu *dam bəd tá, boò kóólé, bə̀ dákíìn báàn ke'ǹmbìá, nwɔŋ aa mə́ bàà yée nwɔŋ sɔ̀ɔ̀ná. Bád bə̀ pii mə́ núúboòd bərá, máà àà nɛ́b bə́n Yahudu bəraa Damas bìlə́ roó, bɔ̀b máà kòd nɛ́b aa tə́ Yéésù kpaŋ̀ bagǹ doó, máà àà bà zɔ̀ŋə Urusalima bìlú, bɔ̀b nɛ́b gbàád bəd boò í' bə̀ búúrá.»

⁶«Nɛ́ɛ̀m mə́ tə́ ɛɛ̀m Damas bìlə́ yée gə́, dá mə́ wə́ə́ bìl kàrú. Zɔ̀ŋ aa nyàm gə̀n yíltə́ŋ yée gə́, laa yɛdkè vúgà lɛgə́ poú, nyɛd páá mə́ tə́ŋú.

⁷Mə́ yi' yɛ́b ba, mə́ kìì pə̀gə̀lib nwɔŋ nə́ŋ̀ dɛ̀d mə́: ‹Sol, Sol, kə̀ níìbə̀ ń í' mə́ taà búúd gú?›

⁸Mə́ dɛ̀rə̀: ‹Ám gə́, ń nɛ́ɛ̀réè, Báátììkpɛ̀ŋá?› Bít kè' í' mə́: ‹Máára mə́ kùmsə̀n Yéésù nɛ́d Nazaratu bə̀ aa ń tə́ù búúd í'ǹ doó.›

⁹Nɛ́b aa ìì ɛ̀m kə̀ máá tə́ rə, ìì bé' laa nyɛdkè gə́ yàá, zá ìì kìì pə̀gə̀lib aa gám mə́ nwɔŋ də sé.

¹⁰Mə́ dɛ̀rə̀: ‹Má níì ma'nì, Báátììkpɛ̀ŋá?› Báátììkpɛ̀ŋ bàà mə́: ‹Ǹ zá' lɛgú, ǹ ɛ̀m Damas bìlú. Ń wə́ə́ì wərə̀ gə́, bə̀ dá n in aa Vɛnɛ́b í' m̀ mà' rə taà baàn kóólé.›

¹¹Nɛ́ɛ̀m laa nyɛdkè gbà'á yaà lè' mə́ núù yée gə́, nɛ́b aa ɛ̀mà kə̀ máá tə́ rə, ìì kò' mə́ nɛɛ̀n ba, gùb bə̀ àà mə́ Damas bìlú.

¹²«Sɛŋ də, nɛ́ŋə̀ nə́ŋ̀ Damas bìlə́ wərà, nə́gə́l oò Ananiyas. Oòrə, nɛ́d Vɛnɛ́b bə̀ nuùn gbà'á, bít bàg Musa indaŋ̀mbə̀ sɔ̀ɔ̀nkè. *Yahudu bəraa kùm Damas bìlə́ wərə̀ rə gə́ kóólé, bə̀ gám nwɔŋ sɔ̀ɔ̀nkè oò yílú.

¹³Ɛ̀m gbarà yaà dìì máá sunú, bít bàà mə́: ‹Ɔ̀dkudvɛɛ̀l mə́ í'sɛ̀lbə̀ Sol, núù ḿ bíd oò keèd kúnú!› Kə̀ nwɔŋ aa nuù yée kíinní, núù mə́ keèd yàá, mə́ bé'ù yàá.

¹⁴«Ananiyas bàà mə́: ‹Doo bə́n bəd Vɛnɛ́b sàà vú'nnà sə̀n nyàam númú, bɔ̀b ǹ gàb in aa í' roó, bɔ̀b m̀ bé' nɛ́d wɔ̀ɔ̀lə̀ nə́ŋ̀ tù' bə̀ ma'ǹ oòra, bít ǹ kìì nwɔŋ aa dá n gáàm kə̀ gú' oò roó.

¹⁵Kə̀ taàbìá, ń dáráàn sedako ma'ǹ oò nə́gə́lú, nɛ́b aa zɔ̀ŋə yɛ́b bərə kóólé númú, in aa ḿ bé'à rə yílú, bít kə̀ in aa ń kììà rə yílú.

¹⁶Bə́ŋyée dìì ń nwán níì sɔ̀ŋ gú? Ǹ zá' lɛgú, boò pii n baptisma kə̀ Báátììkpɛ̀ŋ nə́gə́l dɛdǹmbìá, bɔ̀b Vɛnɛ́b lò' oò dàà n invaksə́ ḿ bərá.› »

¹⁷«Sɛŋ taà zɔ̀gɔ̀ gə́, bít mə́ bírà Urusalima bìlú, mə́ tə́ Vɛnɛ́b nyɛɛ̀m láŋsə́ wúu gə́, Vɛnɛ́b kèd mə́ núùá.

¹⁸Mə́ bé' Báátììkpɛ̀ŋá, bít bàà mə́: ‹Ǹ zá' kə̀ báŋ, ǹ vúg kíìn Urusalima bìl aa yée rú. Nɛ́b oò bəd də, bə̀ kè' sedako aa ń dá ma'ǹ máá yílə́ rə gá.›

¹⁹«Bít mə́ bàà: ‹Báátììkpɛ̀ŋá, ìì gàb yàá kə̀ yíl boò bìá, nyàam də, dáá mə́ sáá *Yahudu bəd wúlwáàlbə̀ bərú, mə́ kòd nɛ́b bagké kam bərá, mə́ páál bə̀ wúltígə́l bə̀ rú, bít kambəd kɔ̀ mə́ zibə̀l bə̀ kúnú.

²⁰Bít sɛŋ aa bə̀ tə́ Etiyɛn, sedako ń lo'ǹ də, máá kɔ̀ mə́ wərà. Mə́ bé' nɛ́b aa bə̀ tə́ù lo'ǹ də yàá, máára mə́ nwán sə̀n gɔ̀' boò bəd doó. Máá kɔ̀ mə́ kè' yàá, boò lò'ù kúnú.›

²¹«Báátììkpɛ̀ŋ bàà mə́: ‹Ǹ ɛ̀m kúnú, má n tuùm zɔ̀ŋ bùúd ba, nɛ́b aa bàg Vɛnɛ́b síndə sunú.› »

²²Nɛ́b zùúm zɛ̀ŋ Pol, yaà wə́ə́ sɛŋ aa gám kə̀ nwɔŋ nɛ́b kun bəraa bə̀ bàg Vɛnɛ́b síndə yílə́ zé. Bə̀ kìì kàanyée gə́, ìì páál bəd kpə̀ə́ǹá, ìì bàà: «Kò' ìì lò' nɛ́ŋə̀ luùm aarə kúnú! Oò kùm kə̀ gɔ̀ŋsə́ sí!»

²³Sɛŋ də, bə̀ kpàm nwɔŋá, bə̀ nyàd gɔ̀' boò bərá, bít bə̀ dù' yɛ́b məsə́g lɛgú.

²⁴Roma bəd sóózè gààd bàà sóózè oò bəd, boò àà Pol sóózè bəd wúl kpɛŋsɛ́l bə̀ rú, boò zìbə̀ kúnú, bɔ̀b oò bàà sáaraa *Yahudu bəd tə́ nwɔŋ zùúm kpaàm oò yílə́ kàan də́d doó.

²⁵Zá zɔ̀ŋ aa bə̀ tabə̀ kə̀ kaasə́, bɔ̀b oò bə̀ zibm̀bə̀ yée gə́, Pol bàà sóózè yíl bə̀ aa wərə̀ rə: «Indaŋ̀mbə̀ déè pii ii sə̀n kpaŋ̀, nɛ́d Roma bə̀ aa bə́ŋ̀ fágə́n kò'ù síndə zibm̀bèì?»

²⁶Zɔ̀ŋ aa sóózè bəd nɛ́d yíl bə̀ kìì nwɔŋ aa gə́, ɛ̀m dáá bàà Roma bəd sóózè gààd: «Ń gàb in aa ń tə́ ma'ǹ də yèè? Nɛ́ŋ váàndo aa yée, nɛ́d Roma bìá!»

²⁷Roma bəd sóózè gààd ɛ̀m yaà Pol sunú, bít dɛ̀rə̀: «M̀ bàà mə́ kúnú, ám də ń nɛ́d Roma bə̀ wa?» Pol kè' í'ù: «Èè, mə́ nɛ́d Roma bìá.»

²⁸Kàanyée gə́, Roma bəd sóózè gààd bàà: «Mə́ káá ba' zùúm, mə́ bíl taà nɛ́d Roma bìá.» Bít Pol kè' í'ù: «Zá máá gə́, bə̀ lɛ̀b mə́ Roma.»

²⁹Kə̀ nwɔŋ aa nuù yée kíinní, sóózè bəraa dáà bə̀ dáù nwɔŋ dɛdǹ də, zá' bə̀ dààù kə̀ báŋ. Roma bəd sóózè gààd kə̀ yíl oò máá, zɔ̀ŋ aa kìì Pol nɛ́d Roma bìá, bít tabə̀ kə̀ sɛ̀gsɛ́g yée gə́, də́dǹ mà'ù yàá.

³⁰Nwúun nyɛd gə́, nɛ́ɛ̀m Roma bəd sóózè gààd í' sáaraa *Yahudu bəd luu kə̀ Pol lə gabm̀bə̀ nyɛdkè yée gə́, bə̀ bìnə̀ sɛ̀gsɛ́g bəraa bə̀ tabə̀ kə̀ kùrú rə kúnú. Dɛ̀d wálà *láŋsə́ gààd bərá, kə̀ *Dam bəd Wálke Gbà'á tə́ kóólé, bít pà' yaà dí' Pol boò númú.