Read Samba Leko GBANTUMSӘ̀ BƏD TÙSÁ 23 Bible Online

GBANTUMSӘ̀ BƏD TÙSÁ 23 - Samba Leko bible

GBANTUMSӘ̀ BƏD TÙSÁ 23

¹Pol ɛ̀g wád núù *Dam bəd Wálke Gbà'á yílú zé kə́rúm, bít bàà: «Ɔ̀dkudvɛɛ̀l í'sɛ̀lbə̀ bərá, Vɛnɛ́b númú, tɛ́m mə́ tə́ nyɛdkèá, kə̀ gɔ̀ŋsə́ mə́ tə́ kóólé, yaà wə́ə́ nyà'aa yóo.»

²*Láŋsə́ gààd gbà'á Ananiyas bàà nɛ́b aa kùm pe' kə̀ Pol tə́ rə gə́, boò zìb Pol gú' ba.

³Zɔ̀ŋ aa gám kàanyée gə́, Pol bààù: «Vɛnɛ́b dá n zibm̀ kɔ̀, ń wúl kùlàm biído aa yóo. Ń kùm zɔ̀ŋə, ḿ bə̀ bəǹ tə́ mə́ kíìn fágàá, Musa indaŋ̀mbə̀ bòórú, bít ń kɛ̀d Musa indaŋ̀mbə̀, ḿ bàà boò zìb mə́ kúnú.»

⁴Nɛ́b aa ìì dìì Pol səǹ də, bə̀ bààù: «Ń dúú *láŋsə́ gààd gbà'á wa?»

⁵Pol kè' í': «Mə́ gàb sé, ɔ̀dkudvɛɛ̀l bərá, gabm̀bə̀ aarə *láŋsə́ gààd gbà'á roó. Núúboòd Gìdń bàà: ‹Ǹ gám nwɔŋ vaksə́ nɛ́b ḿ bəd gààd yílə́ sí.› »

⁶Sɛŋ də, Pol gàb yàá, *Dam bəd Wálke Gbà'á aa wərə̀ rə, nɛ́b kambəd Saduki bərá, kambəd kɔ̀ *Farisa bərá. Kə̀ taàbìá, páá taà kpə̀ə́ǹá, bàà: «Ɔ̀dkudvɛɛ̀l mə́ í'sɛ̀lbə̀ bərá, mə́ *Farisa, báá mə́ kɔ̀ *Farisa, mə́ zíg tɛ́m val bəd dákíìn díìm də, ìì àà máà taà fágə́n zɔ̀ŋ aa ba.»

⁷Zɔ̀ŋ aa Pol bàà nwɔŋ aa kàangə́, *Farisa bəd gə̀b kə̀ *Saduki bəd gə̀b tá, ìì sɔ̀d álǹmbìá, bít wálke pɛd taà gə̀b iira.

⁸(Saduki bəd gə́, ìì bàà bə̀ val bəd díím gá, *malaika bəd kɔ̀ bə̀ sé, nwul bəd kɔ̀ sé. Zá *Farisa bəd gə́, ìì bàà nyɛdkè dág, in bəraa toorə yée kóólé túrú.)

⁹Zɔ̀ŋ aa nwɔŋ tóó tə́ dáàn númú kàangə́, *nɛ̀n indaŋ̀mbə̀ kambəd kùm *Farisa bəd gə̀bú, ìì zá' lɛgú, bə̀ nyá' nwɔŋá, ìì bàà: «Bə́ bɔ̀b inyɛlké nə́ŋ̀má nɛ́ŋ váàndo aa naà sé. Kam nə́ŋ̀ gə́, *malaika, sínkɔ̀ Nwul nə́ŋ̀ gámə̀wà sə̀n nwɔŋì gə́?»

¹⁰Nɛ́ɛ̀m álsɛ̀l tə́ dáàn númú kə̀ kpɛŋsɛ́l yée gə́, Roma bəd sóózè gààd gbà'á nùù boò gú' Pol yaàn seèlǹmbə̀ nə́ŋ̀ nə́ŋ̀. Kə̀ taàbìá, zá'à sóózè oò bərá, bít bàà bə̀: «Ìì ɛ̀m nɛ́b zùúm tə́ŋú, pà' dáì vúŋà Pol la, ìì ààù sóózè bəd wúl kpɛŋsɛ́l bə̀ rú.»

¹¹Tígə́l aa zəg də, Báátììkpɛ̀ŋ yaà dìì Pol sunú, bít bààù: «Ǹ nùù də́dǹ sí, ḿ mà' sedakoì máá yílú, zɔ̀ŋə Urusalima bìlú, bít ń dááráàn ma'ǹ Roma bìlə́ kɔ̀.»

¹²Nwúndù kə̀ limtə́ rə, *Yahudu kambəd wál ìì wúú nwɔŋá, ìì nwɔ̀m inná, bənə́ líinnə́ in gá, bənə́ nyəənə́ wəl gá, bənə́ dáánnə́ sína Pol lo'nàá.

¹³Nɛ́b aa wál ìì wúú nwɔŋ də, ìì kàn laa iirə yàá.

¹⁴Ɛ̀m dá bə̀ bɔ̀b *láŋsə́ gààd bərá, kə̀ *dam bərá, bít ìì bàà bə̀: «Bə́ nwɔ̀mà in kə̀ kpɛŋsɛ́lá, bə́ bàà bə́ líí in gá, bá sína Pol lo'nàá.

¹⁵Bə́ŋyée aí kɔ̀, íí kə̀ *Dam bəd Wálke Gbà'á tá, dáá ìì dɛ̀d Roma bəd sóózè gààrá, oò ààiyà Pol la. Ìì mà' kìínmbə̀ íí í' in aa mà' rə ɛgǹkudǹmbə̀ nyɛdkè sɔ̀ŋ kíin. Obə́ kɔ̀ bə́ŋ̀ yaà dá wə́ə̀n zɔ̀ŋə gə́, bɔ̀b bə́ lò'ù yàá.»

¹⁶Zá Pol kunkéèn wàà váàndo kìì nwɔŋ aa bə̀ wúú Pol bə̀ lo'ǹ də yàá. Zá' ɛ̀m dáá pìì sóózè bəd wúl kpɛŋsɛ́l bə̀ rú, dáá ùd Pol nwɔŋ doó.

¹⁷Kàanyée gə́, Pol dɛ̀d nɛ́ŋə̀ nə́ŋ̀ sóózè gbàád bəd tə́ŋú, bààù: «Ǹ àà wàà váàndo aa Roma bəd sóózè gààd sunú, tə́ kə̀ nwɔŋ nə́ŋ̀ naú, oò bə̀ baànmbìá.»

¹⁸Sóózè yíl bə̀ rə, pà' wàà váàndo aarə ɛ̀m kə̀ oò tá, ààù Roma bəd sóózè gààd sunú, bít bààù: «Nɛ́d wúltígə́l bə̀ aa nə́gə́l oò Pol lə, nyɛ̀m máà, máà àànnà wàà váàndo aaú, tə́ kə̀ nwɔŋ nə́ŋ̀ naú, ámbə̀ baànmbìá.»

¹⁹Roma bəd sóózè gààd kò' wàà váàndo aarə nɛɛ̀n ba, ɛ̀m gbad kàrú kə̀ oò tá, bít dɛ̀rə̀: «Ń í' mə́ níì nwɔŋ baànmbə̀ gú?»

²⁰Wàà váàndo rə kè' í'ù, bàà: «*Yahudu bəd wúú nwɔŋá, ámbə̀ dɛdǹmbə̀ nwúndùá, pà' ǹ àà bənáà Pol *Dam bəd Wálke Gbà'á númú. Bə̀ dá n baàn bənə́ í'nnə́ nwɔŋ gáàmbə̀ oò yílú sɔ̀ŋ.

²¹Zá ǹ kè' bə̀ nwɔŋ sí. Kàandə, nɛ́b nwɔŋ bə̀ wúùn bəd kàn laa iirə yàá, mə́' ləə bə̀ dáù nwáàn kpaŋú. Boò kóólé, bə̀ nwɔ̀mà in yàá, bənə́ líinnə́ in gá, bənə́ nyəənə́ wəl gá, bənə́ dáánnə́ sína Pol lo'nàá. Bə́ŋyée gə́, bə̀ tab si' boò yàá, in aarə ma'ǹmbìá, bít bə̀ tə́ nwɔŋ aa kè' ń dá bə̀ í'ǹ də nwánàá.»

²²Roma bəd sóózè gààd tɔ̀g wàà váàndo rə gə́, bààù: «Ǹ gú' nɛ́ŋə̀ nə́ŋ̀ baànmbə̀ bəǹ ùd máà nwɔŋ aarə yàá, bít zígə̀ oò ɛ̀m kúnú.»

²³Kàanyée gə́, sóózè gààd dɛ̀d sóózè yíl bə̀ bəd iira, bàà bə̀: «Ìì wál sóózè laa kób, bítsɔ̀ŋ sóózè laa toora zè kób kə̀ yaa yílú. Sóózè laa kób kə̀ díŋ yɛ́ràá, boò tab sisá, boò ɛ̀m Kaisara bìlú, ba' dàànə́ŋ̀ní, tígə́lú.

²⁴Sàà ìì bɔ̀b Pol yaa bərá, bɔ̀b oò bə̀ aànmbə̀ Gɔ̀mnà *Felik sunú, in nə́ŋ̀má oò mà'ù sí.»

²⁵Bít bád núúboòrá, nwɔŋ aa rú wərə̀ rə yóo:

²⁶«Klodiya Lisias tùm pii *Felik Gɔ̀mnà gbà'á dɔ̀msɛ̀l aa yóo.

²⁷«Nɛ́ŋ váàndo aa yée, *Yahudu bəd kò' bə̀ í'ù lo'ǹmbìá. Zɔ̀ŋ aa mə́ kìì ìì bàà nɛ́d Roma bə̀ yée gə́, mə́ yaà taà kə̀ sóózè mə́ bəd tá, yaà mə́ súúù taá.

²⁸Mə́ í' gabm̀bìá, kə̀ níìbə̀ bə̀ luuù taàì? Kə̀ taàbìá, mə́ ààù taà *Dam bəd Wálke Gbà'á númú.

²⁹Mə́ bɔ̀b mà' invaksə́ nə́ŋ̀má páànmbə̀ oò bə̀ wúltígə́l bə̀ rú sé, sínkɔ̀ oò bə̀ lo'ǹmbə̀ sé. Bə̀ luuù indaŋ̀mbə̀ boò bəd bòórú.

³⁰Zɔ̀ŋ aa mə́ kìì *Yahudu bəd wál ìì wúú nwɔŋá, bə̀ nwɔ̀m in bənə́ dáánnə́ù kíìn lo'ǹ yée gə́, mə́ tùmə̀ taà kə̀ báŋ ám sunú. Mə́ bàà nɛ́b aa bə̀ luuù rə, boò àà nwɔŋ oòrə ám númú.»

³¹Kə̀ aakíin, sóózè bəd pà' taà Pol kìínmbə̀ nɛɛ̀n aa gààd boò bàà rə kíni. Bə̀ àà Pol Antipatrus bìlú, tígə́l aarə bəní.

³²Nwúndù rə, sóózè kam bəraa ìì ɛ̀m kə̀ dun də, kid bə̀ bírà kíìn sóózè bəd wúl kpɛŋsɛ́l bə̀ rú. Zá nɛ́b yaa yílə́ bə̀ bəd gə́, ìì ɛ̀m kə̀ Pol tá.

³³Zɔ̀ŋ aa dá bə̀ wə́ə́ Kaisara bìlú, bə̀ pii Gɔ̀mnà núúboòd də gə́, bít pii bə̀ dàà Pol oò nɛɛ̀n tɛ́mú.

³⁴Gɔ̀mnà gád núúboòd doó, dɛ̀d Pol oò tə́ yɛ́b déè beè? Nɛ́ɛ̀m kìì Pol nɛ́d Silikiya yɛ́b bə bə̀ gə́,

³⁵bàà: «Nɛ́b aa ìì luu n də, yaà ìì wə́ə́ì gə́, má taà in aa ḿ mà' bə̀ rə kiinàá, bít má n taà fágàá.» Bít bàà sóózè bəd boò nwán Pol gààd *Hirudus yiilú.