Read Samba Leko GBANTUMSӘ̀ BƏD TÙSÁ 24 Bible Online

GBANTUMSӘ̀ BƏD TÙSÁ 24 - Samba Leko bible

GBANTUMSӘ̀ BƏD TÙSÁ 24

¹Sɛŋ taà núnə̀ gə́, Ananiyas *láŋsə́ gààd gbà'á yaà wə́ə́ Kaisara bìlú, ɛ̀mà kə̀ *dam kambəd tá, bít kə̀ Tertulus tá. Tertulus də, nɛ́ŋə̀ nə́ŋ̀á, gàb Roma bəd fágə́n indaŋ̀mbə̀ yàá. Zɔ̀ŋ aa yaà bə̀ wə́ə́ Gɔ̀mnà *Felik númú gə́, bə̀ luu Pol wərà.

²Zɔ̀ŋ aa dɛ̀d bə̀ zá' Pol gə́, Tertulus sɔ̀d taà oò bə̀ pe'ǹmbə̀ kə̀ gúsuúm kə̀ aa kíin: «Gbàáro *Felik, ám bòórú, nɛ́b bəd bə̀ bɔ̀b taà tɛbàá. Kə̀ ingabké ám bìá, indaŋ̀mbə̀ bəd pɛ́n taà zɔ̀ŋə obə́n yɛ́b ba, bít yɛ́b aa yée sɔ̀ɔ̀n ɛ̀m taà númú.

³In bəraa rə kóólé, ám bòórú, bə́ bɔ̀b taá, sɛŋ gə́ kóólé, bít zɔ̀ŋ gə́ kóólé. Bə́ mɔ̀' n tə́ gbàákù.

⁴Zá mə́ í' n sɛŋ bɔ̀'ǹmbə̀ gbàákù sé. Mə́ tàŋ n nɛɛ̀ná, mə́ nyɛ̀m tɛ́m buurúm ám bìá, ǹ zɛ̀ŋ nwɔŋ obə́ bə̀ zɔ̀gɔ̀.

⁵«Bə́ bɔ̀bà nɛ́ŋ váàndo aa yée, nɛ́d nwɔŋ saasɛ́l bìá, tóó nə́gə̀d tə́ kíìn *Yahudu bəraa yɛ́b bərə tə́ŋú. Bít oòra kùmsə̀n nɛ́d Nazaratu bə̀ gə̀b luùm puu gààrá.

⁶Bít yaà sɔ̀d láŋsə́ wúl díŋm̀bìá. Zá mà' kàanyée gə́, obə́ kɔ̀ bə́ kò'ù taá. [Bə́ í'ù fágǹmbə̀ kə̀ nɛɛ̀n aa indaŋ̀mbə̀ bə́ bàà rə kíin.

⁷Zá Lisias, Roma bəd sóózè gààd nyá' yaà kè'ù obə́ nɛɛ̀n tɛ́mú, kə̀ kpɛŋsɛ́lá.

⁸Kàanyée gə́, Lisias bàà taà nɛ́b aa luuù rə, boò yaà ám númú.] Ń dɛ̀rə̀wì sɔ̀ŋ gə́, ń dá in aa bə́ luuù kə̀ kùrú rə kíìn gabm̀ vɛ́nà.»

⁹*Yahudu bəd bə̀ bàà, nwɔŋ aa Tertulus gám yée, nwɔŋ sɔ̀ɔ̀n vɛ́nà.

¹⁰Gɔ̀mnà *Felik yàl Pol nɛɛ̀ná, oò gám nwɔŋá, bít Pol bàà: «Mə́ gàb yàá zèd zùúm, ámda ń kùmsə̀n nɛ́ŋə̀ fágə́n bə̀ zɔ̀ŋə yɛ́b ba. Kə̀ aakíin də, kə̀ tɛ́m zígkeá, mə́ yaà taà yíl mə́ gáàm ke'ǹmbə̀ ám númú.

¹¹Taà sɛŋ kób zè iirə sé, mə́ dáà taà Urusalima bìlú, Vɛnɛ́b dáàn pɔ̀bm̀bìá. Dáà zìb ḿ sàà nwɔŋ aaì gə́, ń dá bɔbm̀ tə́ kàani.

¹²Kóó nɛ́ŋə̀ nə́ŋ̀má bɔ̀b bèd mə́ tə́ pìrə̀ ma'ǹ kə̀ nɛ́ŋə̀ láŋsə́ wúu sé, sínkɔ̀ mə́ tə́ nɛ́b zùúm yíl wá'ǹ *Yahudu bəd wúlwáàlbə̀ bərú sé, sínkɔ̀ mə́ tə́ nwɔŋ tó'ǹ kə̀ nɛ́b bəd bìl tə́ŋə́ sé.

¹³Bít nɛ́b aa yée bə̀ bán in aa bə̀ luu mə́ kə̀ kùrú rə i'ǹmbə̀ nyɛdkè boò tə́ŋə́ bə́ŋyée gá.

¹⁴Zá bàà mə́ tə́ ii nwɔŋ aa yée nyɛ́'nàá' Mə́ tə́ Yéésù kpaŋ̀ bagàá. Bə̀ bàà gə́, aarə kpaŋ̀ luùm puu gúsuúm bìá. Mə́ tə́ doo bə́n bəd Vɛnɛ́b pɔ̀bàá, kə̀ bagǹmbə̀ nwɔŋ aa bə̀ bád Musa indaŋ̀mbə̀ rú, bít kə̀ *Vɛnɛ́b gbantumsə̀ bəd núúboòrú rə kə̀ zɔ̀ŋtá.

¹⁵Máá kɔ̀ mə́ zíg tɛ́m tə́ Vɛnɛ́b naú, dá nɛ́b sɔ̀ɔ̀n bəd díìm valú, kə̀ nɛ́b vaksə́ bəd tá, kìínmbə̀ boò kɔ̀ ìì zíg tɛ́m də kíin.

¹⁶Kə̀ taàbìá, mə́ nɔ̀ŋ taà kuùmbə̀ sɛŋ gə́ kóólé, kə̀ tɛ́m nyɛdkèá Vɛnɛ́b númú, kə̀ nɛ́b bəd númú.

¹⁷«Bòórú vúg mə́ dàà Urusalima bìl, dá mə́ gəlà gbaarú zèd zùúm yée gə́, bə́ŋyée kid mə́ bírà yàá. Mə́ yaà nɛ́b mə́ bəd láŋ̀mbə̀ kə̀ basá, bít kə̀ Vɛnɛ́b sadaka piìnmbìá.

¹⁸Zɔ̀ŋ aa mə́ tə́ ma'ǹ kàanyée gə́, yaà ìì bɔ̀b mə́ láŋsə́ wúuú, ìì bɔ̀b mə́ mà' mə́ bɛ́' láŋsə́, bɔbm̀ kuùmbə̀ gìdń Vɛnɛ́b númú bə̀ yàá. Nɛ́b zùúm wál kə̀ máá tə́ sé, nwɔŋ kpaàmbə̀ ma'míìn sé.

¹⁹Zá sɛŋ də, *Yahudu Aziya yɛ́b bə bə̀ bəd bə̀ tə́ wərà, dáà boò ra bə̀ dáà sə̀n yaànà ám númú, bɔ̀b máá bə̀ luùnmbìá, dáà bə̀ tə́ kə̀ nwɔŋ nə́ŋ̀ gáàmbə̀ máá yílə́ gə́ roó.

²⁰Sínkɔ̀, ogə́ nɛ́b aa ìì tə́ zɔ̀ŋə bə́ŋyée rə, ìì dàà bə̀ boò ì' invaksə́ aa *Dam bəd Wálke Gbà'á bɔ̀b mə́ mà', sɛŋ aa mə́ dìì boò númú, Urusalima bìlə́ roó.

²¹Zá mə́ mà' in nə́ŋ̀, mə́ kpàm nwɔŋ lɛgú, sɛŋ aa mə́ dìì boò númú roó, mə́ bàà: ‹Íí fág mə́ nyà'aa yée, díímke valú bə̀ nwɔŋ aa mə́ bàg də bòórú wa!› »

²²Zá *Felik gàb Yéésù kpaŋì sɔ̀ɔ̀nkè, bàà bə̀: «Sɛŋ aa Lisias sóózè bəd gààd yaaì rə, má taà fágə́n íí rə vəràá.» Bít vəd dàà fágə́ná, bàà boò sa' kúnú.

²³Bàà sóózè bəd yíl bə̀ gbà'á aa nwán Pol lə, oò nwánə̀ kíìn sɔ̀ɔ̀nkè. Zá boò dààù sɛŋ zɔ̀gɔ̀, boò dàŋ ɔ̀dzéd oò bəd oò bə̀ yaàn láŋ̀mbə̀ bə sí, oò pii bə̀ kpaŋ̀ kúnú.

²⁴Sɛŋ taà zɔ̀gɔ̀ gə́, *Felik ɛ̀mà kə̀ kéèn oò Durusila tá. Durusila rə, *Yahudu. Tùm nɛ́b bəd dá boò dɛ̀rà Pol la. *Felik yaà kìì Pol tə́ nwɔŋ gáàm nɛɛ̀n aa nɛ́ŋə̀ dá tɛ́mbagké bɔbm̀ dú Yéésù Krístù naà roó.

²⁵Zá Pol gám nwɔŋ nɛɛ̀n aa nɛ́ŋə̀ dá in wɔ̀ɔ̀lə̀ ma'ǹ dú roó, nɛɛ̀n aa nɛ́ŋə̀ dá yíl oò wuùn dú roó, si' ko'ǹmbə̀ nwɔŋá, bít kə̀ fágə́n nyàm nwɔŋ yée gə́, *Felik də́dǹ mà'ù yàá, bàà: «Bə́ŋyée gə́, də́ŋ yàá. Màìgə́, mə́ bɔ̀b sɛŋì gə́, máá n taà bídǹ dɛràá.»

²⁶Zíg tɛ́m bə̀ Pol dá bəǹ ba' piinàá; kə̀ taàbìá, líb dɛ̀rə̀ taà sɛŋ gə́ kóólé, oò yaà bənə́ gáamnə́ nwɔŋá.

²⁷Bòórú zèd taà iirə gə́, Porkius *Festus pɛ́n sə̀n *Felik da. Zá *Felik í' *Yahudu bəd tɛ́m nyɛ́'ǹmbə̀ yée gə́, məə Pol lɛ́'ǹmbə̀ bée.