Read Samba Leko GBANTUMSӘ̀ BƏD TÙSÁ 25 Bible Online

GBANTUMSӘ̀ BƏD TÙSÁ 25 - Samba Leko bible

GBANTUMSӘ̀ BƏD TÙSÁ 25

¹*Festus yaà wə́ə́ yɛ́b aarə ba, mà' sɛŋ toorə gə́, zá' Kaisara bìlú, ɛ̀mà Urusalima bìlú.

²Urusalima bìlú wərà, *láŋsə́ gààd bəd kə̀ Yahudu bəd nɛ́b gbàád tá, bə̀ bàà *Festus: «Nɛ́ŋ váàndo aa nə́gə́l oò Pol yée, mà' invaksə́ tə́ kúnú.» Bə̀ nyɛ̀m *Festus bə̀ bàà:

³«Ń í'ì gə́, ǹ àà báà Pol Urusalima bìlú.» Ìì gám kàandə, ìì wúúà nwɔŋá, ìì mə́' kpaŋú, oò bə̀ yaàn lo'ǹmbìá.

⁴Zá *Festus kè' í' gə́, bàà Pol tə́ Kaisara bìlú, bə̀ kò'ù tə́ wərà, bít obəǹ kɔ̀ kid bəǹ dá bídǹ wərə̀ kə̀ báŋ.

⁵Bít bàà zəg sɔ̀ŋ: «Ogə́, nɛ́b gbàád íí bəd boò ɛ̀m kə̀ máá tá, Kaisara bìlú, dá boò luu Pol wərà, mà' invaksə́ nə́ŋ̀ tə́ kíìn gə́ roó.»

⁶*Festus ləə Urusalima bìlú wərà, sɛŋ dàgwà sínkɔ̀ sɛŋ kób, bít kidbírà kíìn Kaisara bìlú. Nwúndù oòrə, yaà kùm fágə́n zɔ̀ŋú, bít tùm nwɔŋ boò àà bəǹnà Pol la.

⁷Zɔ̀ŋ aa Pol yaà wə́ə́ gə́, *Yahudu bəraa ɛ̀mà kə̀ *Festus tá, Urusalima bìlə́ rə, láŋ yaà bə̀ pááù tə́ŋú, bít bə̀ luù taà kə̀ nwɔŋ gbàád bərá. Zá nɛ́ŋə̀ nə́ŋ̀má bán i'ǹmbə̀ gə́, nwɔŋ bəraa bənə́ gáamnə́ oò yílə́ rə, tə́ vɛ́nà sé.

⁸Zá Pol gám kè' yíl oòra, bàà: «Mə́ mà' invaksə́ nə́ŋ̀má *Yahudu bəd indaŋ̀mbə̀ yílə́ sé, mə́ mà' invaksə́ nə́ŋ̀má láŋsə́ wúl yílə́ sé, sínkɔ̀ gààd gbà'á Roma bə̀ yílə́ sé.»

⁹Nɛ́ɛ̀m *Festus í' *Yahudu bəd tɛ́m nyɛ́'ǹmbə̀ yée gə́, dɛ̀d Pol: «Ń í' ɛɛ̀mbə̀ Urusalima bìlú, dáàn ma'ǹmbə̀ fágə́n máá númú wərə̀ nwɔŋ ḿ bòórúì?»

¹⁰Pol kè' í': «Mə́ dìì tə́ gààd gbà'á Roma bə̀ fágə́n zɔ̀ŋ ba. Mə́ í' dá boò fág mə́ wərà. Mə́ mà' invaksə́ nə́ŋ̀má kə̀ *Yahudu bəd sé, ám kɔ̀ ń gàbì kə̀ yíl ám bìá.

¹¹Dáà mə́ mà' inyɛlké nə́ŋ̀ yàá, mə́ mà' invaksə́ nə́ŋ̀ aa dá də́ŋ̀ máá bə̀ lo'ǹmbə̀ rəì gə́, mə́ dàŋ ii máá bə̀ lo'ǹmbə̀ sé. Zá nwɔŋ bəraa bə̀ tə́ udǹ máá yílə́ yée, nwɔŋ sɔ̀ɔ̀n nə́ŋ̀má rú wərə̀ síngə́, nɛ́ŋə̀ nə́ŋ̀má bán máá bə̀ ko'ǹ piìnmbə̀ boò naà gá. Mə́ dɛ̀d ɛɛ̀mbə̀ gààd gbà'á Roma bə̀ númú.»

¹²Kàanyée gə́, *Festus gám nwɔŋ kə̀ *dam oò bəd gə́, kè' í': «Ń dɛ̀rà ɛɛ̀mbə̀ gààd gbà'á Roma bə̀ númú, ń dá ɛɛ̀m gààd gbà'á Roma bə̀ númú.»

¹³Bòórú sɛŋ taà zɔ̀gɔ̀ gə́, gààd *Agripa ɛ̀mà kə̀ kun kéèn oò *Berenika tá, bə̀ yaà Kaisara bìlú, *Festus dɔ̀ɔ̀mbìá.

¹⁴Nɛ́ɛ̀m ləə bə̀ tá' sɛŋ wərə̀ zùúm yée gə́, *Festus bàà ì' taà gààd nwɔŋ aa Pol yílə́ roó. Bààù: «*Felik zá' dàà nɛ́ŋ váàndo nə́ŋ̀ tə́ wúltígə́l bə̀ rú.

¹⁵Zɔ̀ŋ aa mə́ dáá Urusalima bìlə́ gə́, *láŋsə́ gààd bəd kə̀ *dam bəd tá, yaaì luuù máá naú. Bə̀ nyɛ̀m mə́ fág máà kò'ù kúnú.

¹⁶«Zá kè' mə́ í' bə̀, mə́ bàà, Roma bəd indaŋ̀mbə̀ rú gə́, fág bə̀ kò' nɛ́ŋə̀ bə́ŋ̀ gá, nɛ́b aa bə̀ luuù rə bə̀ dá sína wə́ə́nàá; bít dá yíl oò tágǹ nɛ́b aa luuù rə númú.

¹⁷Boò kóólé, bə̀ yaà taà zɔ̀ŋə; máá kɔ̀ mə́ náŋ sé, nwúndù oòrə, mə́ kùm fágə́n zɔ̀ŋ ba, mə́ bàà boò àà máà Pol la.

¹⁸Nɛ́b aa bə̀ pè'ù kə̀ gúsuúm nwɔŋ də, zá' bə̀ gám nwɔŋá. Zá bə̀ àà nwɔŋ vaksə́ aa mə́ sèl bə̀ dáà aànnà rə sé.

¹⁹Bít zá' bə̀ mà' pìrə̀ kə̀ oòra, Vɛnɛ́b bagǹmbə̀ nwɔŋ boò yílú, bít nɛ́ŋə̀ nə́ŋ̀ yílú. Nɛ́ŋə̀ rə, nə́gə́l oò Yéésù, val kò'ù yàá. Zá Pol bàà gə́, tə́ kə̀ gɔ̀ŋsá.

²⁰Máá kɔ̀, nɛ́ɛ̀m mə́ bɔ̀b nɛɛ̀n aa má nwɔŋ də saànvúŋ̀ də sín yée gə́, mə́ bàà Pol gə́, oò kè'ì ɛɛ̀mbə̀ Urusalima bìlú, dá boò mà'ù fágə́n də wərèì?

²¹Zá Pol dɛ̀d mə́ gə́, bàà boò kò' bəǹ naà ní, gààd gbà'á Roma bə̀ oò fág bəǹ zé. Kə̀ taàbìá, mə́ bàà taà boò kò'ù naàní, yaà oò wə́ə́ sɛŋ aa tùm máù aàn gààd gbà'á Roma bə̀ númú rə bə zé.»

²²*Agripa bàà *Festus: «Máá kɔ̀ mə́ í' nwɔŋ aa nɛ́ŋə̀ aa dá gáàm də kiìnmbə̀ kɔ̀.» *Festus kè' í' bàà: «Nwúndù ń dá taà nwɔŋ oò bə̀ kiinàá.»

²³Nwúndù oòrə, *Agripa kə̀ *Berenika tá, bə̀ ɛ̀mà gààd duná, nɛ́b zùúm tə́ bə̀ káŋàá. Yaà bə̀ pìì táad gbà'á bìlə́ bə̀ rú, kə̀ sóózè bəd gààd tá, kə̀ nɛ́b gbàád bìlú bə̀ bəd tá. *Festus tùm nwɔŋ boò àà bəǹnà Pol la, bít pà' bə̀ ààùwà taá.

²⁴Bítsɔ̀ŋ, *Festus bàà: «Gààd *Agripa, íí kə̀ nɛ́b aa íí wál máá númú yée tə́ kóólé, íí bé' nɛ́ŋ váàndo aa yàá. *Yahudu bəraa vúgà Urusalima bìlə́ rə kóólé, kə̀ aa bəraa zɔ̀ŋə də tá, bə̀ luuù máá númú, bə̀ bàà máà dààù kə̀ gɔ̀ŋsə́ sí.

²⁵Zá máá gə́, mə́ bɔ̀b in yɛlké nə́ŋ̀ aa dá də́ŋ̀ oò bə̀ lo'ǹmbə̀ rə sé. Èè, oò gə́, kə̀ yíl oò bìá, sàà gààd gbà'á Roma bə̀ oò fág bəǹ sùnú. Kə̀ yíl máá bə̀ máá, mə́ sèl gə́, tùm máù aàn wərà.

²⁶Zá mə́ gàb in aa bád má gààd gbà'á Roma bə̀ piìn oò yílə́ rə sé. Kə̀ taàbìá, mə́ ààùwà taà aí númú, aarə àà mə́ pɛ̀rə̀wà tə́ ám númú, gààd *Agripa, bɔ̀b dɛ̀d ń kùrə̀wì gə́, máà bɔ̀b in aa máá bádǹ oò yílə́ roó.

²⁷Kə̀ tɛ́m máá bə̀ gə́, mə́ kè' nɛ́d wúltígə́lə́ bə̀ tuùm aànmbə̀ fágə́nú gá, nwɔŋ aa və̀d ìì làù yílə́ rə, nyɛd síngə́ roó.»