Read Samba Leko GBANTUMSӘ̀ BƏD TÙSÁ 3 Bible Online

GBANTUMSӘ̀ BƏD TÙSÁ 3 - Samba Leko bible

GBANTUMSӘ̀ BƏD TÙSÁ 3

¹Nyàm nyɛ́g gə́, Piyɛr kə̀ Yohana tá, bə̀ ɛ̀m Vɛnɛ́b aa nyɛ̀m bə̀ sáá ba' toorə rə nyɛɛ̀mbə̀ láŋsə́ wúuú.

²Nɛ́ŋ váàndo nə́ŋ̀ nuù lɛ̀bə̀ dun valá, kùm sáá láŋsə́ wúlwaàl aa bə̀ dɛ̀d: «Wúlwaàl sɔ̀ɔ̀nkè» rə ba. Nyàm gə́ kóólé, pà' zíg yaà bə̀ dààù wərà, bɔ̀b oò nyɛ̀m ba' nɛ́b bəraa yaà bə̀ tə́ piìn láŋsə́ wúu rə naú.

³Nɛ́ŋ váàndo aarə, bé' Piyɛr kə̀ Yohana tá, ɛ̀m yaà bə̀ tə́ piìn wúu wərə̀ gə́, dɛ̀d bə̀ boò pii bəǹ in nə́ŋ̀á.

⁴Piyɛr kə̀ Yohana tá, ɛ̀g bə̀ wárə̀ zé kə́rə́m, bít Piyɛr bààù: «Ǹ ɛ̀g bə́ kúnú.»

⁵Bít nɛ́ŋ váàndo aarə, ɛ̀g wád bə̀ zé kə́rə́m; kàandə, nwán in nə́ŋ̀ bɔbm̀bə̀ boò naú.

⁶Kàanyée gə́, Piyɛr bààù: «Mə́ kə̀ ba' naà sé, mə́ kə̀ bəŋzɔ' naà sé. Zá in aa mə́ kə̀ naà rə, má n taà piinàá. Yéésù Krístù Nazaratu bə̀ nə́gə́lú, ǹ zá' lɛgú, bít ǹ ɛ̀m kúnú!»

⁷Bít kò'ù nɛɛ̀n váàn ba, pà' zá'ù lɛgú. Kə̀ nwɔŋ aa nuù yée kíinní, dun tɛ́m oò bəd kə̀ dun núù yɛ́b oò bəd tá, wɔ̀d bəd yàá.

⁸Za' sə́d, bít dìì lɛgú, kə̀ dun oòra, pìì ɛɛ̀mbə̀ kə̀ yíl oòra. Pìì láŋsə́ wúuú kə̀ *Yéésù gbantumsə̀ bəd tá, ɛ̀m kúnú, sə́d lɛgú, bít káŋ Vɛnɛ́bá.

⁹Nɛ́b bəd kóólé bə̀ bé'ù tə́ kíìn ɛmàá, bít tə́ Vɛnɛ́b káŋàá.

¹⁰Zɔ̀ŋ aa ɛ̀g bə̀ gàbə̀, oòra kùmsə̀n nɛ́d dun val aa kùm sáá láŋsə́ Wúlwaàl Sɔ̀ɔ̀nkè ba, bít nyɛ̀m sáá in də yée gə́, nɛ́b bəd kóólé, in aarə kò' bə̀ yíl yàá, bít nyágə́l bə̀ tɛ́m yàá.

¹¹Nɛ́ɛ̀m nɛ́ŋ váàndo aarə zá' dàà Piyɛr kə̀ Yohana tə́ sín yée gə́, kò' nɛ́b bəd kóólé yíl yàá. Wál nùù ìì yaà boò sunú, zɔ̀ŋ aa bə̀ dɛ̀d «Salomon gbàg dùù rə ba.»

¹²Zɔ̀ŋ aa Piyɛr bé' nɛ́b zùúm bəd gə́, bàà bə̀ kə̀ aakíin: «Íí nɛ́b Israila bə̀ bərá, kə̀ níìbə̀ gáŋke nɛ́ŋə̀ aa si' bə̀ kò' ii taà yíl gú? Kə̀ níìbə̀ íí ɛ̀g bə́ taà núù bə gú? Íí sèl lə, íí bàà kə̀ kpɛŋsɛ́l obə́ bìá, bə́ gáŋ taà nɛ́ŋ váàndo aa sisì? Sínkɔ̀ íí sèl lə, íí bàà bə́ kùm tə́ kə̀ nɛɛ̀n aa Vɛnɛ́b í' rə kíin, bə́ gáŋ taà nɛ́ŋ váàndo aa yée sisì? Ə́ùwə́.

¹³Abraham Vɛnɛ́bá, Isiyaku Vɛnɛ́bá, Yakubu Vɛnɛ́bá, kə̀ doo bə́n bəd Vɛnɛ́bá, yaà káŋ sə̀n nɛ́d tù' bə̀ ma'ǹ oòra. Aíra kə̀ yíl aí bìá, kò' íí piiù sə̀n Pilatu naú, bít məə íí dààù sə̀n Pilatu númú. Zá Pilatu kə̀ yíl oò gə́, í'ù biìn lɛ́'ǹmbìá.

¹⁴Məə íí dàà nɛ́ŋə̀ *gìdńná, bít nɛ́ŋə̀ sɔ̀ɔ̀ná. Zá íí dɛ̀d Pilatu, íí bə̀ bìn oò lɛ́' bənə́ nɛ́d yíl bə̀ lo'ǹ Barabas da.

¹⁵Bít íí lò' nɛ́ŋə̀ aa tə́ nɛ́b bəd gɔ̀ŋsə́ piìn doó. Zá Vɛnɛ́b díímə̀ùwì valú. Obə́ra bə́ kùmsə̀n sedako oò bərá.

¹⁶Yéésù kpɛŋsɛ́l gáŋ sə̀n nɛ́ŋ váàndo aaú. Tɛ́mbagké aa Yéésù bərə mà' sùnú, in aa ma'míìn taà kàani. Íí bé' nɛ́ŋ váàndo aarə yàá, bít íí gàbə̀ yàá. Tɛ́mbagké aa Yéésù bərə bòórú, si' oò gág taà sɔ̀ɔ̀nkè. Íí kóólé íí bé' yàá, sɛŋ aa in aa tə́ taàn doó.

¹⁷«Ɔ̀dkudvɛɛ̀l mə́ í'sɛ̀lbə̀ *Yahudu bərá, bə́ŋyée mə́ gàb yàá, in aa íí gàb síndə, íí mà'à taà Yéésù yílú, kə̀ gààd íí bəd tá.

¹⁸Zá Vɛnɛ́b gə́, mà' in aa gám dàà nyàamdoorú *gbantumsə̀ oò bəd gú' bərə yàá. Bàà bə̀, *Nɛ́ŋə̀ aa bəǹ tɔ̀bə̀ gààd kílə́m yílə́ rə, dá búúd bé'nàá, bít yaà bé' búúd də yàá.

¹⁹Ìì sɔ̀g kúnú, lìb ìì bí'à núù Vɛnɛ́b naú, bɔ̀b lɛ́' oò dàà ii invaksə́ íí bərá.

²⁰Kàanyée gə́, Báátììkpɛ̀ŋ dáiyà taà sɛŋ nyi'ǹmbə̀ bəd aanàá, bít dáiyà taà Krístù aa zígiyà rə tuùm piinàá, Krístù rə, Yéésù ra.

²¹Bə́ŋyée gə́, Yéésù dáà kuùmmà lɛgə́ paà ní, sɛŋ aa Vɛnɛ́b yaà dá in bəd kóólé ma'ǹ bí'ǹ puu rə, yaà dáá wə́ə̀n zé, kìínmbə̀ bàà dàà gbantumsə̀ oò bəd gú' bə nyàam doorú kpɔ̀ɔ̀m də kíin. Gbantumsə̀ oò bəraa rə, bə̀ nɛ́b gìdń bərá.

²²Musa bàà dàà nwɔŋ aa yóo: ‹Báá íí Tììkpɛ̀ŋ Vɛnɛ́b dáiyà *gbantumsə̀ oò nə́ŋ̀ tuùmmà kìínmbə̀ máá kíin; gbantumsə̀ aarə, dáà vúgǹnà aí kunú. Ìì kìì nwɔŋ bəraa dá ii baàn də kíìn kóólé.

²³Bít kóó nɛ́ɛ̀réè, zɛ̀ŋ *Vɛnɛ́b gbantumsə̀ aa nwɔŋ síngə́, bə̀ dáù kíìn vú'nàá, bít bə̀ dáù kíìn lo'ǹ dúŋ̀ Vɛnɛ́b nɛ́b bəd tə́ŋú.›

²⁴Sɔ̀d Samuel ba, yaà wə́ə́ *Vɛnɛ́b gbantumsə̀ kam bəraa yaà oò bòórú rə ba, boò kóólé, bə̀ gám nwɔŋì sɛŋ bəraa yée yílú.

²⁵Nwɔŋ aa Vɛnɛ́b bàà dàà gbantumsə̀ oò bəd gú' bərə, bàà kə̀ aíra, bít íí tə́ gú'dúgke aa Vɛnɛ́b naà rə rú. Vɛnɛ́b mà'à gú'dúgke aarə kə̀ doo íí bərá, sɛŋ aa bàà Abraham: ‹Nɛ́b kun bəraa yɛ́b bərə gə́ kóólé, má bə̀ nɛɛ̀n zígǹ yílú, yɛb kàá ḿ bəd bòórú.› roó.

²⁶Kə̀ aakíin də, Vɛnɛ́b sààvúŋà nɛ́d tù' bə̀ ma'ǹ oò Yéésù, bít éèn tùmə̀wà aí nə́gə́lú. Tùmə̀wà yaà oò zígi nɛɛ̀n tɛbə̀ yílú, bɔ̀b ìì dàà kə̀ tù' vaksə́ bəraa íí tə́ ma'ǹ doó.»