Read Samba Leko GBANTUMSӘ̀ BƏD TÙSÁ 5 Bible Online

GBANTUMSӘ̀ BƏD TÙSÁ 5 - Samba Leko bible

GBANTUMSӘ̀ BƏD TÙSÁ 5

¹Nɛ́ŋ váàndo nə́ŋ̀ kàani, nə́gə́l oò Ananiyas, kéèn oò kɔ̀ bə̀ nə́gə́l oò Safira. Gám ìì dúg gú' lɛ' boò gə́ə̀l lɛ́bm̀bìá.

²Bít pɛ̀d ba'saa gə́l lɛ́b kə̀ lɛ' roó, zíg oò bìá; aa nyɛ́d də, yaà pii *Yéésù gbantumsə̀ bəd nɛɛ̀n tɛ́mú. Kéèn oò kɔ̀ gàb yàá.

³Zá Piyɛr bààù: «Ananiyas, kə̀ níìbə̀ ń dàà *Satan pìì nyìì taà ám tɛ́mú gú? Ń dùg Nwul Gìdń gúsuúmá. Və̀d ń nyɛ́rà basaa gə́l ń lɛ́b kə̀ lɛ' rə yàá.

⁴Sɛŋ aa bə́ŋ̀ pà' ń lɛ́b síndə gə́, ámbə̀ géè? Bə́ŋyée pà' gə́l ń lɛ́b yérə, ba' oòrə, ámbə̀ géè? Kə̀ níìbə̀ ń sèl taà tù' vaksə́ ma'ǹmbə̀ kàan gú? Gúsuúm aarə, ń dùg tə́ kə̀ Vɛnɛ́bá, ń dùg kə̀ nɛ́b bəd gá.»

⁵Zɔ̀ŋ aa Ananiyas kìì nwɔŋ aa kàanyée ní, wəd yi' yɛ́b ba, gɔ̀ŋsə́ oò bɛ́d kúnú. Yɛb vɔ̀ɔ̀m bəd bə̀ zá' lɛgú, pà' yaà bə̀ dàbə̀ gɔ̀sú, bít ɛ̀m dá bə̀ lə̀ə̀ù kúnú. Nɛ́b aa kìì nwɔŋ aarə kóólé, lɔ̀b bə̀ tɛ́m yàá.

⁶

⁷Bòórú ba'wà taà toorə gə́, kéèn oò yaà wə́ə́ kɔ̀. Zá oò gə́, gàb in aa taà váàn oò yílə́ rə sé.

⁸Piyɛr dɛ̀rə̀: «M̀ bàà mə́ kúnú, lɛsaa gə́l íí lɛ́b də, dùm oòrə kə̀ aakíin wa?» Kè' í' bàà: «Èè, dùm də kàani.»

⁹Kàanyée gə́, Piyɛr bíd bààù: «Kə̀ níìbə̀ íí iirə kóólé, wál íí dúg taà gú' Báátììkpɛ̀ŋ Nwul də́'ǹ ɛgǹmbə̀ gú? Ǹ kìì kúnú, yɛb vɔ̀ɔ̀m bəraa pà' dáá ìì lə̀ə̀à váàn ń də, ìì dìì tə́ waàl ba. Bə́ŋyóo, bə̀ dá n kíìn pa'ǹ kɔ̀.»

¹⁰Kə̀ nwɔŋ aa nuù yée kíinní, wəd yi' yɛ́b ba, val kò'ù kúnú. Yɛb vɔ̀ɔ̀m bərì bírà gə́, yaà bə̀ bɔ̀bə̀ valá, pà' dá bə̀ lə̀ə̀ù váàn oò sàà kàd ba.

¹¹*Eklisiya kə̀ zɔ̀ŋtá, bít kə̀ nɛ́b kam bəraa ìì kìì nwɔŋ aarə tə́ kóólé, də́dǹ mà' bə̀ì gbà'ákù.

¹²*Yéésù gbantumsə̀ bəd bə̀ mà' inkɔrə bəd zùúm kə̀ in də́dǹ bə̀ tó'ǹ bəd tá, nɛ́b zùúm tə́ŋú. Nɛ́b bagké bəd kóólé, wál ìì sáá zɔ̀ŋ aa bə̀ dɛ̀d Salomon gbàg dùù rə ba.

¹³Zá nɛ́ŋə̀ ɔ̀d nə́ŋ̀má bɔ̀b váàndo dáàn wáàlǹmbə̀ kə̀ boò tə́ sé, zá nɛ́b bəd káŋ bə̀ sɔ̀ɔ̀n.

¹⁴Sɛŋ gə́ kóólé, nɛ́b vɔ̀ɔ̀m bəd kə̀ nɛ́b kɛ́ɛ̀m bəd tá, yaà bə̀ tə́ wáàl zəgǹ nɛ́b bagké bəd gə̀bú. Nɛ́b aarə, nɛ́b aa bə̀ tə́ Báátììkpɛ̀ŋ bagǹ doó.

¹⁵In aa Yéésù gbantumsə̀ bəd tə́ ma'ǹ də bòórú, nɛ́b bəd pú'à nɛ́b mad bə̀ bərá, ìì àà bà kpaŋ̀ ba. Ìì lə́' bə̀ leso ba, kə̀ kilə̀ ba, bɔ̀b Piyɛr tə́ taàn wərə̀ gə́, nyìsə̀ oò oò pig nɛ́b kambəd boò tə́ŋú.

¹⁶Nɛ́b zùúm vúgà bìl bəraa pɛ́ŋ Urusalima bìl kàd bərə ba, wál pú' ìì àà nɛ́b mad bə̀ boò bəd, kə̀ aa bəraa kə̀ nwul vaksə́ bəd naà rə tá, bít boò kóólé bə̀ gág yàá.

¹⁷Kàanyée gə́, *láŋsə́ gààd gbà'á kə̀ nɛ́b aa bə̀ mà' tù' kə̀ oò tə́ rə tá, taà kùmsə̀n baànmbə̀ *Saduki bəd gə̀bá, bə̀ nyìì kə̀ kisɛ̀l kə̀ *Yéésù gbantumsə̀ bərá. Bə̀ zíg in nə́ŋ̀ dáàn ma'ǹmbìá.

¹⁸Bə̀ kòd Yéésù gbantumsə̀ bəd kúnú, bít bə̀ páál bə̀ wúltígə́l bə̀ rú.

¹⁹Zá tígə́l ká' gə́, Báátììkpɛ̀ŋ malaika nə́ŋ̀ yaà kèd wúltígə́l bə̀ waàl bərá, vúŋ *Yéésù gbantumsə̀ bəd kúnú. Bít bàà bə̀:

²⁰«Ìì ɛ̀m *láŋsə́ wúuú, bít dá ìì bàà nɛ́b zùúm gɔ̀ŋsə́ puu nwɔŋ aa kíìn kóólé.»

²¹Yéésù gbantumsə̀ bərì zɛ̀ŋ nwɔŋ aa gə́, kə̀ limtə́ pít, zá' ìì ɛ̀m láŋsə́ wúuú, bít ìì pìì nɛ́b bəd zùúm in dáàn sáànmbìá. *Láŋsə́ gààd gbà'á kə̀ nɛ́b aa kùm kə̀ oò tə́ rə tá, yaà ìì wə́ə́ gə́, dɛ̀d ìì wál dam bəd ɔ̀dba, kə̀ *Dam bəd Wálke Gbàád tə́ kóólé. Ìì tùm nɛ́b bəd wúltígə́l bə̀ rú, dɛ̀d dá boò pà' Yéésù gbantumsə̀ bərá.

²²Zá nɛ́ɛ̀m nɛ́b bəd də ɛ̀m dá bə̀ wə́ə́ wərə̀ gə́, bə̀ bɔ̀b bà wúltígə́l bə̀ rú sé. Kid ìì bírà bòórú, bít yaà bə̀ ùd bə̀ in aa taà roó.

²³Bə̀ bàà: «Bə́ bɔ̀bà wúltígə́l bə̀ waàl ke'kèní kə̀ kɔ̀msə̀wàá, bít nɛ́b nwáànmbə̀ bəd kɔ̀ ìì tə́ diìn nwáàn waàl ba. Zá zɔ̀ŋ aa bə́ kèd waàl gə́, kóó nɛ́ŋə̀ nə́ŋ̀má bə́ bɔ̀b dú wərə̀ sé.»

²⁴Zɔ̀ŋ aa *nɛ́b láŋsə́ wúl bə̀ nwáàn bəd gààd kə̀ *láŋsə́ gààd tá, bə̀ kìì nwɔŋ bəraa kàangə́, nyágə́l bə̀ tɛ́m yàá. Bít bə̀ dɛ̀d yíl boò gə́, níì wə́ə́ sə̀n ma'míìnmbə̀ kə̀ aakíin gú?

²⁵Kàanyée gə́, nɛ́ŋə̀ nə́ŋ̀ yaà wə́ə́ gə́, bàà bə̀: «Ìì ɛ̀ga, nɛ́b bəraa íí páál bə̀ wúltígə́l bə̀ rú rə, dìì bə̀ tə́ nɛ́b bəd in sáàn láŋsə́ wúuú.»

²⁶Bít *nɛ́b láŋsə́ wúl bə̀ nwáàn bəd gààd kə̀ nɛ́b oò bəd tá, ìì ɛ̀m, bít dáá ìì kòd bà taá. Zá sɛŋ aarə gə́, ìì pà' bà kə̀ kpɛŋsɛ́l sɔ̀ŋ sé. Kàandə, bə̀ nùù nɛ́b bəd dá bə̀ kíìn laàl lodǹ kə̀ bəŋ bərá.

²⁷Dɛ̀d bə̀ pà' bà gə́, bít yaà bə̀ dí' bə̀ *Dam bəd Wálke Gbà'á númú. *Láŋsə́ gààd gbà'á dɛ̀d bə̀ nwɔŋ,

²⁸bít bàà bə̀ kə̀ kpɛŋsɛ́lá: «Bə́ dàŋ ii kíìn nə́gə́l aarə nɛ́b bəd sáànmbìá. Ìì ɛ̀g in aa íí mà' roó. Íí nyíí Urusalima bìl kə̀ in aa íí tə́ nɛ́b bəd sáàn doó. Bít íí í' zígǹmbə̀ gə́, obə́ra bə́ lò' sə̀n Nɛ́ŋ Váàndo aa yóo, bít nyɛ̀lə́m oòrə, oò bíd obə́ yílə́ ní!»

²⁹Zá Piyɛr kə̀ *Yéésù gbantumsə̀ kambəd tá, kè' bə̀ í' bə̀: «Báà ləə̀n Vɛnɛ́bá, kə̀ nɛ́ŋə̀ ləə̀nmbə̀ gə́ roó.

³⁰Íí lò' Yéésù yàá, kə̀ oò bə̀ bágǹmbə̀ téélɛŋké ba. Zá doo bə́n bəd Vɛnɛ́b díímə̀wàì valú,

³¹bít kúmə̀wì oò nɛɛ̀n váànú, kìínmbə̀ gààd wàà kíin, bít kə̀ Nɛ́d Nɛ́ŋə̀ bə̀ Súùn kíin, bɔ̀b oò pii nɛ́b Israila bə̀ kpaŋ̀, boò sɔ̀g kúnú, bít boò bɔ̀b daaké invaksə́ boò bəd bìá.

³²Obə́ra, kə̀ Nwul Gìdń aa Vɛnɛ́b piià nɛ́b aa tə́ nwɔŋ oò ləə̀n də tə́ kóólé, bə́ kùmsə̀n sedako in bəraa taà yérə bìá.»

³³Zɔ̀ŋ aa wálke nɛ́b gbàád Yahudu bəd bə̀ kìì nwɔŋ bəraa kàangə́, ìì nyìì bəd kə̀ nɔ̀má, bít ìì í' *Yéésù gbantumsə̀ bəd lodǹmbìá.

³⁴Zá *Farisa nə́ŋ̀ wálke nɛ́b gbàád Yahudu bəd bə̀ rú, nə́gə́l oò *Gamaliyɛl, oòra kùmsə̀n nɛ̀n indaŋ̀mbìá, nɛ́b bəd kóólé bə̀ ləəù kúnú. Zá' lɛgú, *Dam bəd Walke Gbà'á númú, bít bàà boò vúŋ nɛ́b vɔ̀ɔ̀m bəd də gbaarú, sɛŋ wàà zɔ̀gɔ̀.

³⁵Bàà bə̀: «Nɛ́b Israila bə̀ bərá, kùm ìì sèl in aa íí dá nɛ́b vɔ̀ɔ̀m bəraa iirə yée ma'ǹ də kíìn sɔ̀ɔ̀nkè.

³⁶Kə̀ aakíin də, bə́ŋ̀ sɛŋ bùùd sé, Teudas yaà vúg zɔ̀ŋə, zíg yíl oò bə̀ bəǹ nɛ́ŋ gbàároá, bít nɛ́b bəd mà'ì laa núnà zɔ̀ŋ naara, yaà ìì wál kə̀ oò tá. Bòórú oòrə, bə̀ lò'ù yàá, bít nɛ́b bəraa bàgə̀ rə kóólé, nìŋsa' ìì dúŋ bə̀ kúnú, bít nwɔŋ oò bə̀ kɔ̀ vàd dùg bəní.

³⁷Bə̀ bé' nɛ́ŋə̀ nə́ŋ̀ vúgàì sɔ̀ŋ, nə́gə́l oò Yudas, nɛ́ŋə̀ Galili bìá. Nə́gə́l bádǹmbə̀ sɛŋú, yaà mà' bɔ̀b nɛ́b bəd boò bàg bəǹ kúnú, oò kɔ̀ val dáá kò'ù yàá. Bít nɛ́b bəraa bàgə̀ rə, boò kɔ̀ nùù bə̀ sa' yàá.

³⁸Bít bə́ŋyée gə́, mə́ tə́ ii kíìn baanàá, ìì mà' nɛ́b vɔ̀ɔ̀m bəraa yée in nə́ŋ̀má sí. Ìì dàà bə̀ kàaní. Kàandə, tùsaa rə, nɛ́b bəd tə́ sə̀n ma'ǹ gə́, dáá zɔ̀ŋ bùúd gá, dákíìn dugàá.

³⁹Zá aarə, Vɛnɛ́b zígà tə́ sə̀n gə́, nɛ́ŋə̀ nə́ŋ̀má bán ko'ǹ dí'ǹmbə̀ gá. Nɛ́ŋə̀ aa bààì kò' bəǹ dákíìn dí'ǹ də, dá nə́gə̀d nə́'ǹ kə̀ Vɛnɛ́bá.» Boò kóólé, ìì kè' nwɔŋ oò yàá.

⁴⁰Bə̀ dɛ̀d *Yéésù gbantumsə̀ bərá, bít zìb bə̀ kúnú, bít bə̀ bàà bə̀ kə̀ kpɛŋsɛ́lá: «Ìì gám nɛ́b bəd nwɔŋ kə̀ Yéésù nə́gə́l sɔ̀ŋ sí.» Bít ìì dàà bə̀ ìì ɛ̀m kúnú.

⁴¹Yéésù gbantumsə̀ bəd ìì zá' *Dam bəd Wálke Gbà'á rú wərə̀ gə́, bə̀ nyìì kə̀ tɛ́m làmkèá, nɛɛ̀n aa Vɛnɛ́b ɛ̀g bé' bə̀ ìì də́ŋì boò bə̀ búúd í'ǹmbə̀ Yéésù nə́gə́lə́ rə bòórú.

⁴²Bít sɛŋ gə́ kóólé, bə̀ tə́ láŋsə́ wúuú, bít ligə̀ kə̀ ligàá, bə̀ dìì nɛ́b bəd nwɔŋ sɔ̀ɔ̀nkè baànmbə̀ gə́, Yéésù kùmsə̀n *Nɛ́ŋə̀ aa Vɛnɛ́b tɔ̀bə̀ gààd kílə́m yílə́ roó.