Read Samba Leko GBANTUMSӘ̀ BƏD TÙSÁ 6 Bible Online

GBANTUMSӘ̀ BƏD TÙSÁ 6 - Samba Leko bible

GBANTUMSӘ̀ BƏD TÙSÁ 6

¹Nɛ́b bagké bəd ká'sɛ́l tóó dáá númú. Sɛŋ bəraa rə bərə, *Yahudu bəraa gám Grɛg nwɔŋ də, bə̀ mà' nɔ̀m kə̀ Yahudu kam bərá. Yahudu bəraa gám Grɛg nwɔŋ də, ìì bàà gə́, val kɛ́ɛ̀m bəní bəd ìì bɔ̀b inlíìnmbə̀ aa pɛ̀l ìì pii nyàm gə́ kóólé rə boò bə̀ kɔ̀ sé.

²Kàanyée gə́, Yéésù gbantumsə̀ bəd boò kób zè iira, dɛ̀d bə̀ wál *nɛ́b sáànmbə̀ bəd gə̀b kə̀ zɔ̀ŋtá, bít ìì bàà: «Sɔ̀ɔ̀n obə́ bə̀ Vɛnɛ́b nwɔŋ aa bə̀ tə́ nɛ́b bəd sáàn də zá'ǹ daànmbìá, bít inlíìnmbə̀ tù' dáàn ma'ǹmbə̀ sé.

³Kə̀ taàbìá, ɔ̀dkudvɛɛ̀l bərá, sàà ìì vúŋ nɛ́b vɔ̀ɔ̀m bəd nə́ŋsínà aí tə́ŋú, boò kùm nɛ́b sɔ̀ɔ̀n bəraa nɛ́b bəd gàb doó. Boò nyìì kə̀ Nwul Gìdńná, kə̀ ingabkéá, bít báá n tùsaa piìn boò nɛɛ̀n tɛ́mú.

⁴Bítsɔ̀ŋ, obə́n kɔ̀, báá n taà báàn sɛŋ bə́n kóólé tá'ǹmbə̀ Vɛnɛ́b nyɛɛ̀mbìá, bít Vɛnɛ́b nwɔŋ udǹmbìá.»

⁵Gə̀b boò kə̀ zɔ̀ŋtá, wál ìì kè' nwɔŋ aa yàá. Sàà bə̀ vúŋ Etiyɛn, nɛ́ŋ váàndo aa nyìì kə̀ tɛ́mbagkéá, bít kə̀ Nwul Gìdń doó. Sàà bə̀ vúŋ Filip da, Prokorus da, Nikanor ra, Timon da, Parmenas da, bít kə̀ Nikola Antakiya bìlə́ bìá, nɛ́ŋə̀ aa yaà bàg *Yahudu bəd Vɛnɛ́b pɔ̀bm̀bə̀ roó.

⁶Bə̀ dí' nɛ́b vɔ̀ɔ̀m bəraa rə Yéésù gbantumsə̀ bəd númú. Bə̀ nyɛ̀m Vɛnɛ́b gə́, bə̀ zíg bə̀ nɛɛ̀n yílú.

⁷Vɛnɛ́b nwɔŋ sa' ɛ̀m númú, *nɛ́b sáànmbə̀ bəd kɔ̀ tóó bə̀ kàn nɛɛ̀n Urusalima bìlú, bít *nɛ́b láŋsə́ bə̀ ma'ǹ bəd zùúm bə̀ kè'ì *Nwɔŋ Puu Sɔ̀ɔ̀nkè bagǹmbìá.

⁸Vɛnɛ́b zíg Etiyɛn nɛɛ̀n yílú. Etiyɛn nyìì kə̀ kpɛŋsɛ́lá, tə́ in də́dǹ bə̀ tó'ǹ bəd ma'ǹ kə̀ inkɔrə bəd tá, nɛ́b zùúm tə́ŋú.

⁹*Yahudu kambəd bə̀ kè' nwɔŋ oò sé. Boò rə, bə̀ tə́ *Yahudu bəd wúlwáàlbə̀ nə́ŋ̀ú; wúlwáàlbə̀ aa nɛ́b bəd dɛ̀d: «Kɔ̀' káàn ke'ǹ bəd bə̀» roó. Nɛ́b aa dáá bə̀ sáá wərə̀ rə, bə̀ vúgə́là Sirena bìlú, kə̀ Alekzandriya bìlú. Yahudu kam Silikiya yɛ́b bə bə̀, kə̀ Aziya yɛ́b bə bə̀ tá, yaà bə̀ wál kə̀ boò tá, bít nɛ́b aarə kóólé yaà bə̀ yi' pìrə̀ kə̀ Etiyɛn kɔ̀.

¹⁰Zá bə̀ bán kpɛŋ̀ də́ŋ̀mbə̀ kə̀ ingabké oò sé. Kàandə, gám nwɔŋ kə̀ kpɛŋsɛ́l aa Nwul Gìdń piiù roó.

¹¹Bít bɔ̀n dáì lɛ́b nɛ́b kam kə̀ basá, boò bàà: «Bə́ kììà nɛ́ŋ váàndo aa tə́ nwɔŋ vaksə́ gáàm Musa yílú, kə̀ Vɛnɛ́b yílú.»

¹²Bə̀ páá nɛ́b zùúm laá, bə̀ páá *dam bəd laá, kə̀ *nɛ̀n indaŋ̀mbə̀ bəd tá, yaà bə̀ kò'ù kə̀ kpɛŋsɛ́lá, bít bə̀ ààù *Dam bəd Wálke Gbà'á rú.

¹³Ɛ̀m dáá bə̀ wə́ə́ wərə̀ gə́, bə̀ bɔ̀b sedako bərá, zá' dìì ìì və̀d gúsuúmá, ìì bàà: «Nɛ́ŋ váàndo aa yée, lɛ́' dàà nwɔŋ vaksə́ gáàmbə̀ zɔ̀ŋ gìdń yílə́ sé, bít lɛ́' dàà nwɔŋ vaksə́ gáàmbə̀ Musa Indaŋ̀mbə̀ bə́n yílə́ sé.»

¹⁴Bə́ kìì tə́ baàn: «Yéésù Nazaratu bə̀ dá láŋsə́ wúl aa kíìn zibm̀ yi'nàá, bít dá láŋsə́ bəraa Musa pii bə́nnà rə kíìn pɛ́ɛ́nàá.»

¹⁵Nɛ́b bəraa kùm *Dam bəd Wálke Gbà'á wúu wərə̀ rə kóólé, ìì lə́' núù bəd Etiyɛn naà gə́, bít ìì bé' gbə̀' oò sáá nyɛd kìínmbə̀ *malaika nə́ŋ̀ gbə̀' kíin.