Read Samba Leko GBANTUMSӘ̀ BƏD TÙSÁ 7 Bible Online

GBANTUMSӘ̀ BƏD TÙSÁ 7 - Samba Leko bible

GBANTUMSӘ̀ BƏD TÙSÁ 7

¹*Láŋsə́ gààd gbà'á dɛ̀d Etiyɛn: «In bəd taàì kàan vɛ́nà wa?»

²Etiyɛn kè' í' bàà: «Níí bərá, kə̀ báá bəd tá, ìì zɛ̀ŋ bə́ŋ̀ túŋ máá naà ge. Vɛnɛ́b kaŋsɛ́l laa nyɛdkè bə̀ yaà ì' yíl oò doo bə́n Abraham núùrú, sɛŋ aa ləə Mesopotamiya yɛ́b bəroó, bɔ̀b bə́ŋ̀ nyɛ́ŋ ɛ̀m Haran bìlə́ sé.

³Vɛnɛ́b bààù: ‹Zá' ǹ dàà yɛ́b ḿ da, kə̀ kun ḿ bərá, bít zá' ǹ ɛ̀m yɛ́b aa máá n mɔɔ̀m də ba.›

⁴Kàanyée gə́, Abraham zá' dàà taà Kalde bəd yɛ́bá, bít yaà ləə taà Haran bìlú. Bòórú val kò' Abraham bóò gə́, Vɛnɛ́b pà' zá'ùwà taà Haran bìlú, ààùwà taà yɛ́b aa bə́ŋyée íí ləə bə yóo.

⁵Yɛ́b aa bə kɔ̀ Vɛnɛ́b piiù zɔ̀ŋ wàà nə́ŋ̀má sé; kóó zɔ̀ŋ aa dá dun náàn bərə má, piiù sé. Zá Vɛnɛ́b bàà dààù gə́, bəǹ dáù yɛ́b aarə kíìn piinàá, bít yɛb kàá oò bəd ìì dá sə̀n yɛ́b də ko'ǹ oò bòórú. Zá sɛŋ də kɔ̀, Abraham kə̀ wàà nə́ŋ̀má naà sé.

⁶Ìì kìì nwɔŋ aa Vɛnɛ́b bààù roó: ‹Yɛb kàá ḿ bəd dáráàn kuùm sɛ̀ɛ́n yɛ́b ba, bít nɛ́b yɛ́b bə̀ bəd bə̀ dá bə̀ bí'ǹ kɔ̀sá, bít bə̀ dá bə̀ búúd í'ǹ zèd laa núnà zɔ̀ŋ naara.›

⁷Vɛnɛ́b bàà: ‹Nɛ́b aa bə̀ bí' bə̀ kɔ̀' yérə, má bə̀ búúd í'nàá, bít bòórú gə́, nɛ́b aa bə̀ bí' bə̀ kɔ̀' rə, bə̀ dákíìn zá'ǹ wərà, bít yaà bə̀ dá mə́ pɔ̀bm̀ zɔ̀ŋ aa yée ba.›

⁸Mə́ dúg gúsì kə̀ Abraham da. In aa ì' gə́ mə́ dúg gúsì kə̀ oòrə, gàb naànmbìá. Bít kàanyée gə́, lɛ̀b wàà váàndo oò Isiyaku gə́, náù gàb sɛŋ dàgwà ba, Isiyaku kɔ̀ yaà mà' nɛɛ̀n aarə rú, kə̀ wàà váàndo oò Yakubu ra. Bít Yakubu kɔ̀ mà' nɛɛ̀n də rú, kə̀ yɛb vɔ̀ɔ̀m oò bəraa kób zè iirə roó, kun bə́n bəd doo boò bəd doó.

⁹«Yɛb vɔ̀ɔ̀m bəraa rə, doo bə́n bərá; boò ra ìì mà' sə̀n kisɛ̀l kə̀ kudvɛɛ̀l boò Yusufu ra, kò' bə̀ lɛ́bə̀, gùb boò ɛ̀mə̀ kə̀ Misra yɛ́b ba, kìínmbə̀ kɔ̀' kíin. Zá Vɛnɛ́b kùm kə̀ oò tá.

¹⁰Gbò'kè bəraa bɔ̀bə̀ rə, Vɛnɛ́b dìŋ vúŋ̀ kíìn dú wərə̀ kóólé, piiù ingabké sɔ̀ɔ̀ná. Firaona gààd Misra yɛ́b bə bə̀ í' Yusufu gbàákù, bít ləəù kúnú, ingabké aa Vɛnɛ́b piiù rə bòórú. Zígə̀ gɔ̀mnà Misra yɛ́b bə bìá, kə̀ ligə̀ oò bìá.

¹¹«Zá gulùm nə́ŋ̀ yaà pí' kə̀ búúd gbà'á tá, Misra yɛ́b bə kóólé, kə̀ Kanan yɛ́b tá, bít doo bə́n bəd ìì bɔ̀b in nə́ŋ̀má líìnmbə̀ gá.

¹²Zɔ̀ŋ aa Yakubu kììà, bə̀ bàà inlíìnmbə̀ aa bə̀ dɛ̀d blé rə tə́ Misra yɛ́b bə yée gə́, sɔ̀d tùm doo bə́n bəd sɛŋ nə́ŋ̀.

¹³Bə̀ dáà dun iirúb də gə́, Yusufu mà' níí bə́n bəd boò gàb bəǹ kúnú, bít bòórú oòrə, Firaona gàb taà Yusufu kun bərá.

¹⁴Kàanyée gə́, Yusufu tùm dá boò pà'à báá bəǹ Yakubu kə̀ kun oò bəd tə́ kóólé, boò yaà zɔ̀ŋə Misra yɛ́b ba. Ká'sɛ́l boò mà'ì nɛ́b bəd laa toora zè kób zè núnà.

¹⁵Kàanyée gə́, Yakubu sím ɛ̀mà taà Misra yɛ́b ba, kə̀ kun kambəd tá. Bít oòra kə̀ doo bə́n bəd tá, val kòd bə̀ taà wərà.

¹⁶Pà' bə̀ ɛ̀m kə̀ val boò bəd də naú, bít dá bə̀ lə̀ə̀ Sikɛm bìlú, sàà aa Abraham lɛ́b kə̀ ba' Hamor yɛb naà rə rú.

¹⁷«Nɛ́ɛ̀m nwɔŋ aa Vɛnɛ́b bàà dàà bəǹ dá Abraham ma'ǹ də, sɛŋ oò wə́ə́ yaà dá bɛ́dǹ gə́, nɛ́b bə́n bəd ká' bə̀ zəgì Misra yɛ́b ba.

¹⁸Bít sɛŋ də bərə, gààd puu ɔ̀d nə́ŋ̀ yaà kùmsə̀n gààd gbà'á Misra yɛ́b ba. Gààd puu aarə, gàb Yusufu sé.

¹⁹Gààd aarə, záá doo bə́n bəd kúnú, bít í' bə̀ búúrá, mà' bə̀ bɔ̀b záá boò dàà yɛb boò bərá, bɔ̀b val oò kòd bə̀ kúnú.

²⁰«Sɛŋ aarə ba, bə̀ lɛ̀b taà Musa ra. Musa kùm wàà váàndo sɔ̀ɔ̀nkè Vɛnɛ́b númú. Bə̀ zànə̀ sòò toora báá, oò yiilú.

²¹Nɛ́ɛ̀m sɛŋ aa lɛ́' bə̀ dààù rə, Firaona wàà kéèndo yaà pà'ù sùnú, bít dáá zànə̀ oò yiilú, kìínmbə̀ wàà oò bə̀ kíin.

²²Kàanyée gə́, yaà sán Musa in bəraa nɛ́b Misra yɛ́b bə bə̀ bəd gàb də gə́ kóólé, bít Musa yaà bíl nɛ́d kpɛŋsɛ́l bìá, nwɔŋ bəraa tə́ gáàm də rú, kə̀ tù' oò bərú.

²³«Zɔ̀ŋ aa Musa kàŋ wə́ə́ zèd laa iirə gə́, sèl oò tɛ́mú gə́, bəǹ dáráàn kun bəǹ nɛ́b Israila bə̀ bəd dáàn ɛgàá.

²⁴Bé' nɛ́d Misra yɛ́b bə bə̀ nə́ŋ̀ tə́ nɛ́ŋə̀ boò nə́ŋ̀ búúd í'nàá, yaà kè' nɛ́ŋə̀ Israila bə̀ aa bə̀ tə́ù búúd í'ǹ də yílá. Musa í' nɛɛ̀n pɛ́ɛ̀nmbə̀ yée gə́, zìb lò' nɛ́d Misra yɛ́b bə bə̀ rə kúnú.

²⁵Musa sèl bàà nyà'aa nɛ́b bəǹ bəd bə̀ dákíìn gabàá, kə̀ nɛɛ̀n bəǹ da, Vɛnɛ́b dá bə̀ taà súúnàá. Zá nɛ́b oò bəd sèl ìì gàb aarə sé.

²⁶Nwúndù oòrə, Musa ɛ̀m yaà sáŋ kə̀ nɛ́b Israila bə̀ bəd iira, bə̀ tə́ ɔ̀dnə́ŋ̀ zibàá. Bít í' bə̀ pɛdǹmbìá, boò kùm kə̀ tɛbàá; dɛ̀d bə̀: ‹Ɔ̀b mə́ bərá, íí kun nə́ŋ̀ní. Kə̀ níìbə̀ íí tə́ taà ɔ̀dnə́ŋ̀ búúd í'ǹ gú?›

²⁷«Zá nɛ́ŋə̀ aa tə́ ɔ̀d oò nə́ŋ̀ búúd í'ǹ də, sùd bí' Musa bòórú, bít bààù: ‹Nɛ́ɛ̀réè zíg n sə̀n gɔ̀mnà, bít nɛ́d fágə́n bə̀ ma'ǹ bə gú?

²⁸Ń í' mə́ zibm̀ lo'ǹmbə̀, kìínmbə̀ níìn zìb ḿ lò' nɛ́d Misra yɛ́b bə bə̀ nə́ŋ̀ də kíniì?›

²⁹Zɔ̀ŋ aa Musa kìì nwɔŋ bəraa kàangə́, zá' nùù, ɛ̀m dá kùm kìínmbə̀ sɛ̀ɛ́n kíin, Madiyan yɛ́b ba. Sɛŋ aa ləə wərə̀ rə, lɛ̀b yɛb vɔ̀ɔ̀m iira.

³⁰«Bít nɛ́ɛ̀m zèd laa iirə taà gə́, Musa bé' laa kò' téé nyìì wàà nə́ŋ̀ ba, *malaika nə́ŋ̀ yaà ì' yíl oò Musa núùrú, laarú wərà. In aarə taà fɔ̀gú, Sinai kɔ̀l dun ba.

³¹Musa bé' in aarə kàangə́, kò'ù yíl yàá. Nɛ́ɛ̀m ɛ̀m gbad yaà tə́ diìn ɛgǹ kudǹ gə́, kìì Báátììkpɛ̀ŋ pə̀gə̀lib bààù:

³²‹Máára mə́ kùmsə̀n doo ḿ bəd Vɛnɛ́bá' Abraham Vɛnɛ́bá, Isiyaku Vɛnɛ́bá, bít kə̀ Yakubu Vɛnɛ́bá.› Musa pìì niŋ̀mbə̀ kə̀ də́dǹná, bít í' núù ɛgǹmbə̀ wərə̀ sé.

³³«Báátììkpɛ̀ŋ bààù: ‹Ǹ nyàd tábə́ ḿ bəraa dunú yéroó, zɔ̀ŋ aa ń dìì bə̀ yérə, yɛ́b *gìdńná.

³⁴Mə́ bé'à nɛɛ̀n aa Firaona tə́ nɛ́b mə́ bəd búúd í'ǹ dú Misra yɛ́b bərə yàá. Mə́ kììà dəə̀nmbə̀ boò bəd yàá, bít mə́ yaà bà taà súùnmbìá. Bə́ŋyée gə́, ǹ yaà kúnú, má n tuùm Misra yɛ́b ba.›

³⁵«Musa rə ní, kùmsə̀n nɛ́ŋə̀ aa nyàam nɛ́b Israila bə̀ bəd məə bə̀ dààù, sɛŋ aa bə̀ bàà: ‹Nɛ́ɛ̀réè zíg n sə̀n gɔ̀mnà, bít nɛ́d fágə́n bə̀ ma'ǹ bə́ gú?› roó. Bít Vɛnɛ́b tùmà oòra, yaà oò kùmsə̀n gààd boò ra, bít nɛ́d súúke boò ra, kə̀ láŋke *malaika bìá. Aarə *malaika aa yaà ì' yíl oò téé nyìì laa bərú roó.

³⁶Oòra vúŋ bà sə̀n Misra yɛ́b ba. Mà' in də́dǹ bə̀ tó'ǹ zùúm kə̀ inkɔrə bəd tá, Misra yɛ́b ba, nwuu aa bə̀ dɛ̀d nwuu yɛ̀ɛ́l gbà'á rə ba, bít kə̀ fɔ̀gú. Aarə náŋ wə́ə́ zèd laa iira.

³⁷Musa rə ní, bàà sə̀n nɛ́b Israila bə̀ bəd: ‹Vɛnɛ́b dáiyà *gbantumsə̀ oò nə́ŋ̀ tuùmmà kìínmbə̀ máá kíin, kun íí bəd tə́ŋú.›

³⁸Musa aarə, oòra kùmsə̀n kə̀ nɛ́b Israila bə̀ bəd tá, sɛŋ aa bə̀ mà' wálke gbà'á fɔ̀gú roó. Kùm wərə̀ kə̀ doo bə́n bəd tá, bít kə̀ *malaika aa gám nwɔŋ Sinai kɔ̀l bərə tá. Kè' àà sə̀n Vɛnɛ́b nwɔŋ aa tə́ gɔ̀ŋsə́ piìn doó, bít bàà yaà bí' bə́n taá.

³⁹«Zá doo bə́n bəd bə̀ məəù bée nwɔŋ ke'ǹmbìá, sùd bə̀ bí'ù kàrú. Boò gə́, bə̀ í' bídǹmbə̀ Misra yɛ́b bəní.

⁴⁰Nɛ́b bəd bàà *Aruna: ‹Musa vúŋ báà Misra yɛ́b ba. Zá bə́ŋyée bə́ gàb in aa tə́ù ma'ǹ kɔ̀l yílə́ wərə̀ rə sé. Ogə́ tə́ kàangə́, ǹ kùd bə́ Vɛnɛ́b bəraa dá bə́ kpaŋ̀ ké'ǹ doó.›

⁴¹Sɛŋ aarə bərə, bə̀ kùd vɔɔm boò ra, kìínmbə̀ nàà kíin, bə̀ mà'ù sadaka. Bə̀ mà' wálke gbà'á kə̀ tɛ́m làmkèá, in aa ìì kùd kə̀ nɛɛ̀n tɛ́m boò rə bòórú.

⁴²Kàanyée gə́, Vɛnɛ́b lìbbí' bə̀ pɛŋá, bít lɛ́' dàà bə̀ ìì pɔ̀b taà nyàmá, sòá, kə̀ dùdù yɛbá, kìínmbə̀ bád bə̀ dàà *Vɛnɛ́b gbantumsə̀ bəd núúboòrú rə kíin: ‹Íí nɛ́b Israila bə̀ bərá, sɛŋ aa íí kùmà zèd laa iira fɔ̀gú rə, íí wél mə́ ingalə̀ bəd, bít íí mà' máà *láŋsə́ bəd yèè? Ə́ùwə́, íí mà' sé.

⁴³Zá pà' íí ɛ̀m kə̀ dìí aa bə̀ pɔ̀b vɛnɛ́b Molok dú rə naú, kə̀ vɛnɛ́b aa bə̀ dɛ̀rə̀ Refan də dùdùwà tá. In bəraa rə, vɔɔm bəraa íí kùd pɔ̀bm̀bə̀ roó. Kàanyée gə́, máá kɔ̀ máá ii pa'ǹ aàn yɛ́b gɔ̀ŋ ba,› Babiloniya bìl bòórú.

⁴⁴«*Dìí aa Vɛnɛ́b gám sáá nwɔŋ kə̀ nɛ́b oò bəd dú rə, bə̀ kə̀ naà fɔ̀gú wərà. Vɛnɛ́b bàà Musa oò kùd *dìí kə̀ aarə kíin. Bít kùd də́' kə̀ nɛɛ̀n aa bé'à rə kíin.

⁴⁵*Dìí aarə, doo bə́n bərì pà'à báá boò bəd naú, sɛŋ aa nyá' bə̀ tə́ kə̀ nɛ́b aa bàg Vɛnɛ́b síndə yɛ́b ke'ǹ, Yosuwa kùm nɛ́d yíl bə̀ boò roó. Vɛnɛ́b nìŋ nɛ́b bəraa bə̀ kè' bə̀ yɛ́b də boò númú. Sɛŋ aa bə̀ tə́ ɛɛ̀m yɛ́b aarə bərə, bə̀ pà' *dìí aarə naú. *Dìí aarə ləə boò naú, yaà wə́ə́ Dauda sɛŋ ba.

⁴⁶Dauda bɔ̀b Vɛnɛ́b pə̀dkè gə́, bít nyɛ̀m kpaŋ̀ bəǹ dá Vɛnɛ́b wúl gbà'á wə'nàá. Vɛnɛ́b aarə, Yakubu Vɛnɛ́bá.

⁴⁷Zá Salomon bít yaà wə̀ə̀ sə̀n Vɛnɛ́b wúl loó.

⁴⁸«Zá Vɛnɛ́b lɛgə́ paà bə̀ ləə wúl aa nɛ́b bəd wə̀ə̀ kə̀ nɛɛ̀n də rú gá, kìínmbə̀ *Vɛnɛ́b gbantumsə̀ bàà rə kíin. Báátììkpɛ̀ŋ bàà:

⁴⁹‹Lɛg kùmsə̀n gààd mə̀ə̀d mə́ra, bít yɛ́b kɔ̀ zɔ̀ŋ dun bə̀ náàn mə́ra. Níì wúl luùm íí dá mə́ taà wəə̀n gú? Zɔ̀ŋ déè bə, má taà báàn kuùm nyi'ǹmbə̀ gú?

⁵⁰Máàn máára mə́ séé sə̀n in bəraa yée kóóléì?›

⁵¹«Íí nɛ́b yíl kpɛŋké bə̀ bəraa yóo, tɛ́m íí tə́ kìínmbə̀ nɛ́b aa kè' Vɛnɛ́b nwɔŋ síndə kíin, bít túŋ íí kɔ̀ nib yàá! Aí gə́, sɛŋ gə́ kóólé, íí məə Nwul Gìdń kíìn kiìnmbìá! Doo íí bəd mà'à kàani, aí kɔ̀ íí mà' tə́ kə̀ boò kíin!

⁵²Nɛ́ɛ̀réè *Vɛnɛ́b gbantumsə̀ bəd tə́ŋú, doo íí bəd ìì í'ù taà búúd sín gú? Boò kóólé, bə̀ í' bə̀ búúd yàá. *Vɛnɛ́b gbantumsə̀ bəraa nyàam də, bə̀ bàà: ‹Nɛ́ŋə̀ wɔ̀ɔ̀lə̀ nə́ŋ̀ dáà kíìn yaanàá!› Zá doo íí bəd bə̀ lòd *Vɛnɛ́b gbantumsə̀ bəraa rə yàá. Bít bə́ŋyée aí kɔ̀, Nɛ́ŋə̀ wɔ̀ɔ̀lə̀ rə, íí lɛ́b, bít íí lò'ù yàá.

⁵³Aíra íí kè'à sə̀n Vɛnɛ́b indaŋ̀mbə̀ *malaika bəd nɛɛ̀n tɛ́mú, bít íí ləə indaŋ̀mbə̀ rə sé!»

⁵⁴Zɔ̀ŋ aa nɛ́b gbàád Yahudu bəd bə̀ kìì nwɔŋ bəraa kàangə́, bə̀ nyìì kə̀ nɔ̀má, bít ìì fù' bəd nə́gə́lá, kə̀ Etiyɛn da.

⁵⁵Zá oò gə́, nyìì kə̀ Nwul Gìdń gə́, zá' núù lɛgú, bé' Vɛnɛ́b kaŋsɛ́l laa nyɛdkèá, bít Yéésù kɔ̀ dìì tə́ Vɛnɛ́b nɛɛ̀n váànú.

⁵⁶Bít bàà: «Ìì Ɛ̀ga! Mə́ bé' lɛg tə́ kíìn keràá, nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə kɔ̀, dìì tə́ Vɛnɛ́b nɛɛ̀n váànú!»

⁵⁷Kàanyée ní, bə̀ páál bəd kpə̀ə́ǹ gbàád bərá, bə̀ nìb bəd túŋ dú, bít wál yaà bə̀ kə́d oò yílú.

⁵⁸Wál yaà bə̀ kə́d oò yílə́ boò kóólé yée gə́, dìŋ bə̀ vúŋ̀ bìl bòórú, bít bə̀ sɔ̀rə̀ taà laàlǹmbə̀ kə̀ bəŋ bərá. Sedako bəd ìì zúm gɔ̀' boò wàà váàndo nə́ŋ̀ dun dùú; wàà váàndo rə, nə́gə́l oò Sol.

⁵⁹Zɔ̀ŋ aa ìì tə́ Etiyɛn laàl kə̀ bəŋ yée ní, Etiyɛn nyɛ̀m Vɛnɛ́bá, bàà: «Báátììkpɛ̀ŋ Yéésù, ǹ pà' nyì' mə́ra!»

⁶⁰Kàanyée ní, Etiyɛn pí' kùm kə̀ dunlígə̀rá, páá kpə̀ə́ǹ lɛgú, bàà: «Báátììkpɛ̀ŋ Vɛnɛ́bá, ǹ dàà invaksə́ aa bə̀ mà' yée boò yílə́ sí!» Bòórú bàà nwɔŋ aa kàan ní, gɔ̀ŋsə́ oò bɛ́d kúnú.