Read Samba Leko GBANTUMSӘ̀ BƏD TÙSÁ 9 Bible Online

GBANTUMSӘ̀ BƏD TÙSÁ 9 - Samba Leko bible

GBANTUMSӘ̀ BƏD TÙSÁ 9

¹Sɛŋ də bərə, Sol dìì Báátììkpɛ̀ŋ *nɛ́b sáànmbə̀ bəd búúd í'ǹmbìá, bít bàà bə̀ gə́, bəǹ dá bə̀ kíìn loràá. Sol zá' ɛ̀m dá bɔ̀b *láŋsə́ gààd gbà'á.

²Í' *láŋsə́ gààd gbà'á oò pii bəǹ kpaŋ̀ ɛɛ̀mbə̀ kə̀ Damas bìlú, bɔ̀b dáàn bɔbm̀bə̀ nɛ́b aa tə́ Yéésù kpaŋ̀ bagǹ doó. Bəǹ bɔ̀b bə̀ì gə́, vɔ̀ɔ̀m kə̀ kɛ́ɛ̀m tá, bəǹ dá bə̀ kodǹ aàn Urusalima bìlú.

³Zɔ̀ŋ aa tə́ ɛɛ̀m kpaŋ́ dáàn wə́ə̀nmbə̀ kə̀ Damas bìlə́ gə́, kə̀ nwɔŋ aa nuù yée kíinní, laa nyɛdkè ib vúgà lɛgə́ poú, yaà pááù tə́ŋú.

⁴Sol yi' yɛ́b ba, kìì pə̀gə̀lib nə́ŋ̀ tə́ù baàn: «Sol, Sol, kə̀ níìbə̀ ń tə́ mə́ taà búúd í'ǹ gú?»

⁵Sol kɔ̀ dɛ̀rə̀: «Ám gə́, ń nɛ́ɛ̀réè, Báátììkpɛ̀ŋá?» Bít pə̀gə̀lib nwɔŋ də kè' í'ù: «Máára mə́ kùmsə̀n Yéésù, màn aa ń tə́ù búúd í'ǹ doó.

⁶Zá zá' ǹ ɛ̀m bìlú, ń wə́ə́ì wərə̀ gə́, bə̀ dá n taà in aa ń dá ma'ǹ də baanàá.»

⁷Nɛ́b aa ìì ɛ̀mà kə̀ Sol tə́ rə, bə̀ dìì kúnú, bə̀ gám nwɔŋ nə́ŋ̀má sé, bə̀ kìì pə̀gə̀lib nwɔŋ yàá, zá bə̀ bé' nɛ́ŋə̀ nə́ŋ̀má sé.

⁸Sol zá' dìì lɛgú, bít kèd núùá. Zá bán in nə́ŋ̀má bé'ǹmbə̀ sé. Bə̀ kò'ù nɛɛ̀n ba, gùb bə̀ ààù taà Damas bìlú.

⁹Sol kùm zɔ̀ŋ aarə bə sɛŋ toora, bán núù bé'ǹmbə̀ sé, líí in sé, bít nyəə wəl sé.

¹⁰Damas bìlə́ rə, *nɛ́d sánán nə́ŋ̀ kùm wərà, nə́gə́l oò Ananiyas. Báátììkpɛ̀ŋ kèrə̀ núùá, bít bààù: «Ananiyas!» Kè' í'ù: «Mə́ yóo, Báátììkpɛ̀ŋá.»

¹¹Báátììkpɛ̀ŋ bààù: «Ǹ zá' lɛgú, ǹ ɛ̀m kpaŋ̀ aa bə̀ dɛ̀d kpaŋ̀ dììkè rə ba, bít ǹ ɛ̀m nɛ́ŋə̀ aa nə́gə́l oò Yudas də yiilú, sàà dá ǹ dɛ̀d nɛ́ŋ váàndo nə́ŋ̀ nə́gə́l oò Sol, nɛ́d Tarsus bìlə́ bìá. Bə́ŋyée tə́ Vɛnɛ́b nyɛɛ̀m naú.

¹²Bít Sol núù keèd gə́, bé' nɛ́ŋ váàndo nə́ŋ̀ nə́gə́l oò Ananiyas, pìì yaà tə́ù nɛɛ̀n zígǹ yílú, bɔ̀b bíd oò bé' kə̀ núù sɔ̀ŋ.»

¹³Ananiyas kè' í'ù: «Báátììkpɛ̀ŋ Yéésù, nɛ́b bəd zùúm bə̀ ùd mə́ nɛ́ŋ váàndo aa nwɔŋ yàá. Ìì bàà mə́ nɛɛ̀n aa í' Vɛnɛ́b nɛ́b gìdń bəd búúd dú, Urusalima bìlə́ rəì kóólé.

¹⁴Bít ɛ̀mà tə́ zɔ̀ŋ aa bə kə̀ kpɛŋsɛ́l aa bɔ̀bà *láŋsə́ gààd bəd naà roó, bɔ̀b nɛ́b aa tə́ nə́gə́l ń dɛdǹ də kóólé, ko'ǹ tabm̀bə̀ kə̀ sɛ̀gsɛ́gá.»

¹⁵Zá Báátììkpɛ̀ŋ bààù: «Ǹ ɛ̀m kúnú, kàandə, sàà mə́ vúŋà nɛ́ŋə̀ aarə kúnú, bít máù ma'ǹ dá nɛ́b aa bàg Vɛnɛ́b síndoó, gààd gbàád bəd kə̀ nɛ́b Israila bə̀ bəd tá, nwɔŋ udǹ máá nə́gə́lú.

¹⁶Máára, kə̀ yíl máá bìá, máù nɛɛ̀n aa dá búúd bé'ǹ dú gbàákù máá nə́gə́lú rə i'nàá.»

¹⁷Kàanyée gə́, Ananiyas zá' ɛ̀m kúnú. Zɔ̀ŋ aa ɛ̀m yaà pìì wúu gə́, zíg nɛɛ̀n Sol yílú, bít bààù: «Ɔ̀dkudvɛɛ̀l mə́ Sol, Báátììkpɛ̀ŋ Yéésù aa yaà vúg ám səǹ kpaŋ̀ aa ḿ bàgà bə yérə, oòra tùm máà sùnú, bɔ̀b m̀ bé' núùá, bít ǹ nyìì kə̀ Nwul Gìdńná.»

¹⁸Kə̀ nwɔŋ aa nuù yée kíinní, in wəd pílà Sol núùrú kìínmbə̀ díb pɛ́'pɛ̀' bəd kíin, bít bán taà núù bé'ǹmbə̀ puu ní sɔ̀ŋ. Bít zá' lɛgú, bə̀ piiù taà baptisma.

¹⁹Zɔ̀ŋ aa líí in gə́, bɔ̀b taà kpɛŋsɛ́lá. Sol kùm sɛŋ zɔ̀gɔ̀ Damas bìlú, kə̀ *nɛ́b sáànmbə̀ bəraa wərə̀ rə tá.

²⁰Kə̀ nwɔŋ aa nuù yée kíin, sɔ̀d nɛ́b bəd nwɔŋ udǹmbə̀ Yéésù yílú, *Yahudu bəd wúlwáàlbə̀ bərú, bàà bə̀: «Yéésù kùmsə̀n Vɛnɛ́b Wàá.»

²¹Nɛ́b aa kìì nwɔŋ oò aarə kóólé, kò' bə̀ yíl yàá, bít ìì dɛ̀d: «Máàn nɛ́ŋ váàndo aa í' sáá sə̀n nɛ́b aa tə́ Yéésù nə́gə́l bagǹ Urusalima bìlə́ rə búúd kə̀ tɛ́m yɛ̀ɛ́lì? Bít yaà zɔ̀ŋə də, máàn í' bə̀ kodǹmbìá, bít aànmbə̀ *láŋsə́ gààd bəd səǹ Urusalima bìlíì?»

²²Zá sɛŋ də, Sol ùd dáá Vɛnɛ́b nwɔŋ sɛŋ gə́ kóólé númú númú, kə̀ váàndoá. *Yahudu bəraa bə̀ ləə Damas bìlə́ rə, ìì gàb nɛɛ̀n aa kè' ìì dáù í'ǹ dú rə gá, màìgə́, zìb tə́ bə̀ i'ǹ Yéésù kùmsə̀n *Nɛ́ŋə̀ aa Vɛnɛ́b tɔ̀bə̀ gààd kílə́m yílə́ rə gə́ roó.

²³Bòórú sɛŋ bəd taà zɔ̀gɔ̀ gə́, *Yahudu bəd wál ìì wúú nwɔŋá, Sol bə̀ lo'ǹná.

²⁴Zá nwɔŋ aa bə̀ wúú rə, bɔ̀n yaà bə̀ bàà Sol naàní. Kùm bə̀ nwán bìl waàl tígə́lə́ kə̀ nyàámbərə̀ tá, bɔbm̀ oò bə̀ lo'ǹmbìá.

²⁵Tígə́l nə́ŋ̀ kàani, Sol *nɛ́b sáànmbə̀ bəd bə̀ í'ù láŋ̀mbə̀ ba, bɔ̀b nùù oò súú kíìn bìlə́ wərà. Bə̀ pááù pìlə̀mú, bít dá bə̀ táù mawol libú, bə̀ sí'ù taà yɛ́b ba.

²⁶Sol zá' ɛ̀m Urusalima bìlú. Zɔ̀ŋ aa dáá wə́ə́ wərə̀ gə́, dáá wál kə̀ *nɛ́b sáànmbə̀ bəd tá. Zá boò kóólé, də́dǹ mà' bə̀ kúnú. Kə̀ aakíin də, bə̀ kè' baànmbə̀ Sol bíl nɛ́d sánán vɛ́nà bə̀ì rə sé.

²⁷Kàanyée gə́, Barnabas pà' ɛ̀mə̀wà kə̀ naú, bít ààùwà *Yéésù gbantumsə̀ bəd sunú. Ùd bə̀ nɛɛ̀n aa Sol bé'à Báátììkpɛ̀ŋ dú kpaŋ̀ tɛ́mú roó, bít kə̀ nɛɛ̀n aa Báátììkpɛ̀ŋ gámə̀wà nwɔŋ dú roó. Bàà bə̀ nɛɛ̀n aa Sol ùrà nɛ́b bəd nwɔŋ Yéésù nə́gə́lú, də́dǹ kɔ̀ mà'ù gá, Damas bìlə́ roó.

²⁸Sɔ̀d sɛŋ aarə ba, Sol gəə̀l ɛ̀m kúnú, bít bírà kúnú, kə̀ boò tá, Urusalima bìlú. Ùd Vɛnɛ́b nwɔŋ kə̀ váàndoá, Báátììkpɛ̀ŋ nə́gə́lú.

²⁹Sol bàà *Yahudu bəraa gám Grɛg nwɔŋ də Vɛnɛ́b nwɔŋ kɔ̀, bít mà' pìrə̀ kə̀ boò ra. Bít boò kɔ̀ bə̀ sàà oò bə̀ ko'ǹ lo'ǹmbìá.

³⁰Nɛ́ɛ̀m nɛ́b bagké kambəd ìì kìì nwɔŋ aa gə́, pà' bə̀ àà Sol Kaisara bìlú. Dáá wə́ə́ Kaisara gə́, bít tá' bə̀ tùmə̀ Tarsus bìlú.

³¹Kàanyée gə́, *Eklisiya bəd kùm kə̀ tɛbə̀ Yahudiya yɛ́b ba, Galili yɛ́b ba, bít kə̀ *Samariya yɛ́b ba. Bə̀ bɔ̀b kpɛŋsɛ́l yàá, bít ləə bə̀ dáá Báátììkpɛ̀ŋ kə̀ númú. Tóó bə̀ dáá númú, kə̀ Nwul Gìdń kpɛŋsɛ́lá.

³²Zɔ̀ŋ aa Piyɛr gəə̀l tə́ nɛ́b gìdń bəd ɛgǹ yée gə́, zá' ɛ̀m nɛ́b bagké kam bəraa ìì ləə Lida bìlə́ rə kàrú.

³³Dáá wə́ə́ Lida bìlə́ gə́, bɔ̀b nɛ́ŋ váàndo nə́ŋ̀ wərà, nə́gə́l oò Ene. Nɛ́ŋə̀ aarə, si' oò vàd yàá, ləə mad kilə̀ bə zèd dàgwà, bán zá'ǹmbə̀ lɛgə́ sé.

³⁴Piyɛr bààù: «Ene, Yéésù Krístù tə́ən si' gáŋàá! Ǹ zá' lɛgú, bít ǹ kùd kilə̀ ń da.» Kə̀ nwɔŋ aa nuù yée kíinní, Ene tɔ̀d zá'ì lɛgú.

³⁵Nɛ́b aa Lida bìlú kə̀ Sarona bìlú rə tə́ kóólé, ìì bé'ù gə́, lìb ìì bí'à núù boò Báátììkpɛ̀ŋ naú.

³⁶Sɛŋ də, nɛ́ŋ kéèndo nə́ŋ̀ Yope bìlú, nə́gə́l oò Tabita. Nɛ́d kéèndo aarə, nɛ́d sánán nə́ŋ̀á. (Nə́gə́l aarə, kə̀ Grɛg nwɔŋú gə́, bə̀ dɛ̀d: «Dorkas», taà kùmsə̀n baànmbə̀ «Namtáàá.») Dìì sɔ̀ɔ̀nkè ma'ǹmbə̀ ní sɛŋ gə́ kóólé, bít láŋ nɛ́b búúd bə̀ bəd kúnú.

³⁷Sɛŋ aarə bərə, ləə mará, bít val kò'ù kúnú. Bə̀ nyíŋ̀ wəl gə́, bít dá bə̀ lə́'ù wúl bàgə̀l nə́ŋ̀ú, lɛgə́ poú.

³⁸*Nɛ́b sáànmbə̀ bəraa ləə Yope bìlə́ rə, bə̀ kììà Piyɛr tə́ Lida, bìl aa pe' kə̀ Yope bìl tə́ roó. Bə̀ tùmə̀wà nɛ́b vɔ̀ɔ̀m bəd iira kə̀ nwɔŋ aa yóo: «Bə́ tə́ən kíìn nyɛmàá, ǹ yaà obə́ sunú, ǹ náŋà sí.»

³⁹Piyɛr zá' ɛ̀m kə̀ báŋ kə̀ nɛ́b vɔ̀ɔ̀m bəraa iirə rə tá. Zɔ̀ŋ aa ɛ̀m dáá wə́ə́ gə́, pà' bə̀ ààù wúl bàgə̀l nə́ŋ̀ú, lɛgə́ poú. Val kɛ́ɛ̀m bəd kóólé, wál yaà bə̀ pááù tə́ŋú, kə̀ kpə̀ə́ǹá. Bə̀ ì'ù gɔ̀' yɛb sisú bə̀ bəraa tə́l loó, kə̀ dàál bəraa tə́l bɔ̀b bə́ŋ̀ tə́ kə̀ gɔ̀ŋsə́ roó.

⁴⁰Piyɛr vúŋ nɛ́b bəd kóólé gbaarú, kùm kə̀ dunlígə̀rá, bít nyɛ̀m Vɛnɛ́bá. Bítsɔ̀ŋ, lìbbìd núù val sunú, bít bàà: «Tabita, ǹ zá' lɛgú!» Tabita kèd núùá, bít zɔ̀ŋ aa bé' Piyɛr gə́, tɔ̀dzá' kùm lɛgú.

⁴¹Piyɛr kò'ù nɛɛ̀n ba, bít láŋ̀ bə zá'ǹmbə̀ lɛgú. Bòórú gə́, dɛ̀rà Vɛnɛ́b nɛ́b gìdń bəd kə̀ val kɛ́ɛ́m bəd tá, bít yaà ì' bə̀ gə́, Tabita tə́ kə̀ gɔ̀ŋsá.

⁴²Nɛ́b aa Yope bìlə́ rə kóólé, bə̀ gàb nwɔŋ aarə yàá, bít nɛ́b bəd zùúm ìì bàg Báátììkpɛ̀ŋ yàá.

⁴³Piyɛr kùm Yope bìlú sɛŋ zùúm, nɛ́ŋ váàndo nə́ŋ̀ kúl bə̀ wéèn kàrú. Nɛ́ŋə̀ rə, nə́gə́l oò Simon.