Read Samba Leko Roma 1 Bible Online

Roma 1 - Samba Leko bible

Roma 1

¹Núúboòraa vúgà máá, mə́ Pol naú, Yéésù Krístù kɔ̀'váàná. Vɛnɛ́b dɛ̀d máà rə, bɔ̀b máà kùm *Yéésù gbantumsàá, bít sààvúŋ máà, bɔ̀b máà bàà *Nwɔŋ Puu Sɔ̀ɔ̀nkè bəǹ da.

²Vɛnɛ́b bàà dàà *Nwɔŋ Puu Sɔ̀ɔ̀nkè aarə nyàamdoorú kpɔ̀ɔ̀m, kə̀ *gbantumsə̀ oò bəd gúsá, bít bád bə̀ dàà tə́ Núúboòd Gìdń bərú.

³Nwɔŋ Puu Sɔ̀ɔ̀nkè aarə, bə̀ gám tə́ Wàà oò Báátììkpɛ̀ŋ Yéésù Krístù yílú. Bə̀ lɛ̀bə̀ kə̀ nɛ́ŋə̀ kíin. Oòra kùmsə̀n Dauda gààd gbà'á wàà kuná.

⁴Zá kə̀ Nwul Gìdńná, yaà bíl taà Vɛnɛ́b Wàà kə̀ kpɛŋsɛ́l gbà'á, kə̀ díímke oò bə̀ valú.

⁵Kə̀ oòra, mə́ bɔ̀b taà pə̀dkè kuùmbə̀ *gbantumsə̀ oòra, bɔ̀b máà mà' Krístù tùsá, bɔbm̀ aànmbə̀ nɛ́b aa bə̀ bàg Vɛnɛ́b síndə gə́ kóólé boò bagə̀ kúnú, bít boò ləəù kúnú.

⁶Aí kɔ̀ íí tə́ nɛ́b aarə tə́ŋú, íí nɛ́b aa Vɛnɛ́b dɛ̀riyà, bɔ̀b ìì kùm Yéésù Krístù nɛ́b bəd doó.

⁷Mə́ bári núúboòraa, nɛ́b aa íí ləə Roma bìlə́ roó; íí nɛ́b aa Vɛnɛ́b tə́ ii í'ǹ, bít dɛ̀riyà ìì kùm nɛ́b gìdń bəǹ bəd də gə́ kóólé. Mə́ nyɛ̀m Báá bə́n Vɛnɛ́b, kə̀ Báátììkpɛ̀ŋ Yéésù Krístù tá, boò mà' ii pə̀dkèá, bít boò pii ii tɛbàá.

⁸Bə́ŋ̀ mə́ tə́ Vɛnɛ́b mɔ̀'ǹ kə̀ Yéésù Krístù ra, íí kóólé yílú. Mə́ mɔ̀' Vɛnɛ́b kàandə, bə̀ gám nwɔŋ tə́ tɛ́mbagké íí bòórú, zɔ̀ŋə yɛ́b bə kóólé.

⁹Vɛnɛ́b sə̀n sedako mə́ra, mə́ bàà nwɔŋ sɔ̀ɔ̀ná, nɛ́ŋə̀ aa mə́ tə́ù tù' ma'ǹ kə̀ tɛ́m mə́ tə́ kóólé, kə̀ *Nwɔŋ Puu Sɔ̀ɔ̀nkè aa mə́ tə́ baàn wàà oò yílə́ roó. Vɛnɛ́b gàb yàá, mə́ dàà ii seèlǹmbə̀ sé,

¹⁰sɛŋ aa mə́ tə́ù nyɛɛ̀m də gə́ kóólé. Mə́ nyɛ̀m Vɛnɛ́b gə́, dáà í'ì gə́, oò pii mə́ kpaŋ̀, dáànmbə̀ kə̀ tɛ́m làmkè aí kàrú.

¹¹Mə́ í' tə́ aí bə̀ dáàn bé'ǹmbə̀ gbàákù, bɔ̀b máà àà ii pə̀dkè aa vúgà Nwul Gìdńnú roó, bɔ̀b ìì kùm də̀gə̀mkè tɛ́mbagké rú.

¹²Bítsɔ̀ŋ, mə́ í' kuùmbə̀ aí tə́ŋú, bɔ̀b báà bɔbm̀ tɛ́m gágkeá. Ìì láŋ mə́ kə̀ tɛ́mbagké íí ra, bít máá kɔ̀ máá ii láŋ̀ kə̀ tɛ́mbagké mə́ra.

¹³Ɔ̀dkudvɛɛ̀l í'sɛ̀lbə̀ mə́ bərá, mə́ í' ìì gàb kúnú' sɛŋ gə́ kóólé, mə́ zíg yaànmbə̀ aí kàrú, yaà wə́ə́ kə̀ bə́ŋyée kíin zé; in nə́ŋ̀ dàŋ mə́ yàá. Mə́ í' nɛ́b kambəd boò bíl nɛ́b bagké nɛ́b Roma bə̀ bəd tə́ŋú, kìínmbə̀ bə̀ bílà nɛ́b kun kam bəraa bə̀ bàg Vɛnɛ́b síndə tə́ŋə́ rə kíin.

¹⁴Kə̀ aakíin də, aarə tù' máá bìá, *Nwɔŋ Puu Sɔ̀ɔ̀nkè dáàn baànmbə̀ nɛ́b bəd səǹ kóólé. Mááráàn baàn nɛ́b aa gàb inì rə sunú, kə̀ nɛ́b aa gàb in nə́ŋ̀má síndə sunú. Mááráàn baàn nɛ́b aa sán núúboòd də sunú, bít kə̀ nɛ́b aa sán núúboòd síndə səǹ kɔ̀.

¹⁵Kə̀ taàbìá, mə́ í' taà aí bə̀ *Nwɔŋ Puu Sɔ̀ɔ̀nkè baànmbə̀ kɔ̀, íí nɛ́b aa íí ləə Roma bìlə́ roó.

¹⁶Sə́ə́mnúù mà' mə́ kə̀ *Nwɔŋ Puu Sɔ̀ɔ̀nkè baànmbə̀ sé. Aarə kùmsə̀n kpɛŋsɛ́l aa Vɛnɛ́b mà', bɔbm̀ súùnmbə̀ nɛ́b aa tə́ù bagǹ də gə́ kóólé invaksə́ nɛɛ̀n tɛ́mú roó. Bə́ŋ̀ sɔ̀d kə̀ *Yahudu bərá, bít kə̀ nɛ́b aa bə̀ bàg Vɛnɛ́b síndoó.

¹⁷Kə̀ aakíin də, Nwɔŋ Puu Sɔ̀ɔ̀nkè ì' nɛɛ̀n aa Vɛnɛ́b bí' nɛ́b bəd dú wɔ̀ɔ̀lə̀ oò númú roó; kə̀ tɛ́mbagké oò nə́ŋ̀ní tə́ŋtə́ŋ, sɛŋ aa sɔ̀d dú roó, yaà bɛ́d zé. Kìínmbə̀ Núúboòd Gìdń bàà rə kíin: «Màn aa tə́ wɔ̀ɔ̀lə̀ Vɛnɛ́b númú kə̀ tɛ́mbagké rə, dá kuùm kə̀ gɔ̀ŋsá.»

¹⁸Kə̀ aakíin də, Vɛnɛ́b mà' sí'à nɔ̀m oò tə́ lɛgə́ poú, invaksə́ gə́ kóólé yílú. Bít invaksə́ aa nɛ́b bəd mà' rə gə́ kóólé, kə̀ tù' vaksə́ boò bəraa ìì mà' rə tá, bə̀ dàŋ vɛ́nà tə́ kíìn vúgǹmbìá, bɔ̀b nɛ́b bəd boò gàb sí.

¹⁹Vɛnɛ́b í' bə̀ búúd də, in aa nɛ́ŋə̀ dá báàn gabm̀bə̀ Vɛnɛ́b naà rə, tə́ nyɛdkè boò naú. Vɛnɛ́b kə̀ yíl oò bə̀ máá, ì' bə̀ yàá nyɛdkè.

²⁰Íí bé' yàá, sɔ̀d sɛŋ aa Vɛnɛ́b séé yɛ́b dú roó, nɛ́b bəd dákíìn báàn in nə́ŋ̀ gabm̀bə̀ Vɛnɛ́b yílú. Bə̀ bán Vɛnɛ́b bé'ǹmbə̀ kə̀ núù boò gá. Aarə í' baànmbə̀ gə́, nɛ́ŋə̀ ɛ̀g in bəraa Vɛnɛ́b séé rəì gə́, nɛ́b bəd dákíìn báàn Vɛnɛ́b kpɛŋsɛ́l zèd kə̀ zèd bə̀ bé'ǹmbìá, bít in aa ì' gə́, oòra kùmsə̀n Vɛnɛ́b doó. Kə̀ taàbìá, bə́ŋyée gə́, nɛ́b bəd bán taà baànmbə̀ bənə́ gabmnə́ Vɛnɛ́b sín gá.

²¹Bə̀ gàb Vɛnɛ́b yàá, zá bə̀ káŋ̀ sé; bít bə̀ mɔ̀'ù kìínmbə̀ nɛɛ̀n aa bə̀ dá ma'ǹ, dáù sɔɔ̀n dú rə kíin sé. Zá inselké boò yaà bíl tə́ in tɛdńná. Bít tɛ́m boò aa gàb insɔ̀ɔ̀n seèlǹmbə̀ sín yérə, yaà bíl tə́ tígə́lá.

²²Ìì zíg yíl boò bənə́ nɛ́b in bə̀ gabm̀ bərá, zá bə̀ kèéd bərá.

²³Lɛ́' bə̀ dàà Vɛnɛ́b kaŋsɛ́l laa nyɛdkè aa dá kuùm zèd kə̀ zèd doó, bít bə̀ káŋ vɔɔm bəraa kùd bə̀ də́' kə̀ nɛ́ŋə̀ aa val kò' náŋ̀ gá roó, kə̀ núú bərá, kə̀ ingalə̀ bəraa ɛ̀m kə̀ dun naarə roó, bít kə̀ kam bəraa gub kə̀ bàgə̀l loó.

²⁴Kə̀ taàbìá, Vɛnɛ́b lɛ́' dàà bə̀ taà tù' vaksə́ bərú, kìínmbə̀ tɛ́m boò í' rə kíin. Bə̀ yɛ̀l taà si' boò bəd kə̀ in sə́ə́mnúù bə̀ ma'ǹmbə̀ boò bòdba.

²⁵Pà' bə̀ pɛ́n Vɛnɛ́b nwɔŋ sɔ̀ɔ̀n kə̀ gúsuúmá. Bə̀ tə́ in aa Vɛnɛ́b séé kə̀ nɛɛ̀n oòrə káŋàá, bít bə̀ tə́ù tù' ma'nàá. Zá Vɛnɛ́b aa séé in gə́ kóólé rə, bə̀ káŋ̀ sé; dáà nɛ́ŋə̀ aa bə̀ dá káŋ̀ sɛŋ gə́ kóólé rə, oòra. Oò kùm kàani.

²⁶Kə̀ taàbìá, Vɛnɛ́b lɛ́' dàà bə̀ taà í'sɛ̀l sisə́ bə̀ oò bəraa tə́ bə̀ sə́ə́mnúù piìn də rú. Kɛ́ɛ̀m boò bəd kə̀ yíl boò máá, bə̀ pɛ́n kilə̀ ləə̀nmbə̀ yàá. Bə̀ mà' kìínmbə̀ nɛɛ̀n aa Vɛnɛ́b séé bà rə kíin sé, bít bə̀ wál kilə̀ tə́ kə̀ ɔ̀dnə́ŋ̀ bərá, boò bòdba.

²⁷Bít kə̀ aakíin, nɛ́b vɔ̀ɔ̀m bəd kɔ̀ lɛ́', ìì dààì kilə̀ wáàlǹmbə̀ kə̀ nɛ́b kɛ́ɛ̀m bərá. Bít ìì vé' tɛ́m kilə̀ wáàlǹmbə̀ nɛ́b vɔ̀ɔ̀m bəd boò bòdba. Nɛ́b vɔ̀ɔ̀m bəd bə̀ tə́ tù' sə́ə́mnúù bə̀ ma'ǹ boò bòdba. Bít kə̀ aakíin, ìì bɔ̀b taà kə̀ yíl boò ra, búúraa ìì dá də́ŋ̀ bɔbm̀bə̀ kə̀ bɔ̀bke boò roó.

²⁸Nɛ́ɛ̀m bə̀ məə Vɛnɛ́b seèl gabm̀bə̀ yée gə́, Vɛnɛ́b lɛ́' dàà bə̀ taà inselké boò aa bàg kpaŋ̀ síndoó, bɔ̀b boò mà' in bəraa dáà bə̀ mà' gá roó.

²⁹Bə̀ nyìì tə́ kə̀ in bəraa wɔ̀ɔ̀lə̀ síndoó' invaksá, í'sɛ̀l gbaŋə̀ bìá, tɛ́m vaksá. Bə̀ nyìì tə́ kə̀ kisɛ̀lá, ɔ̀dnə́ŋ̀ bəd lodǹmbìá, álsɛ̀l bərá, ɔ̀dnə́ŋ̀ bəd zóònmbìá, bɔ̀b in nə́ŋ̀ bɔbm̀bə̀ boò naú, nɛ́b bəd yɛɛ̀lǹmbìá, nwɔŋ vaksə́ gáàmbə̀ nɛ́b bəd yílú.

³⁰Bít bə̀ gám ɔ̀dnə́ŋ̀ bəd nwɔŋ vaksá. Bə̀ kùm ɔ̀dmáàn kə̀ Vɛnɛ́bá. Bə̀ nùù sə́ə́mnúù gá. Bə̀ nɛ́b yíl bə̀ pa'ǹ bərá, bə̀ nɛ́b kùlə́ bə̀ bərá. Bə̀ sàà nɛɛ̀n aa ìì dá kə̀ ɔ̀dnə́ŋ̀ invaksə́ ma'ǹ puu ní roó. Bə̀ ləə báá boò bəd nwɔŋ gá.

³¹Bə̀ kə̀ inselké sɔ̀ɔ̀n boò tɛ́mú sé. Bít in aa bàà bə̀ dàà bənə́ dáánnə́ ma'ǹ də kɔ̀, ìì mà' sé. Bə̀ nɛ́b tɛ́m kpɛŋké bə̀ bərá. Bít ɛ̀g bə̀ bé' ɔ̀dnə́ŋ̀ boò bəd búúd sé.

³²Bə̀ gàb Vɛnɛ́b indaŋ̀mbə̀ wɔ̀ɔ̀lə̀ yàá. Nɛ́b aa bə̀ tə́ in bəraa ma'ǹ kàandə, bə̀ də́ŋì val bɔbm̀bìá. Bít kàandə, bə̀ dàà tù' vaksə́ ma'ǹmbə̀ sé. Bítsɔ̀ŋ, nɛ́b aa tə́ in bəraa ma'ǹ də kɔ̀, bə̀ kè' bə̀ tə́ kíìn sɔ̀ŋ.