Read Samba Leko Roma 11 Bible Online

Roma 11 - Samba Leko bible

Roma 11

¹Kə̀ aakíin, mə́ tə́ kíìn dɛràá' Vɛnɛ́b lɛ́' dàà nɛ́b oò bəd yèè? Vɛ́nà, kàan gá! Kàandə, kə̀ yíl máá bə̀ má, mə́ nɛ́d Israila bìá. Mə́ Abraham kuná, Benzamin kun báá wàá.

²Vɛnɛ́b lɛ́' dàà nɛ́b oò bəd sé, nɛ́b aa sààvúŋà nyàamdoorú roó. Íí gàb nɛɛ̀n aa Núúboòd Gìdń bàà, sɛŋ aa *Eliya ál in bə, Vɛnɛ́b númú, nɛ́b Israila bə̀ yílə́ rə yàá.

³*Eliya bàà: «Báátììkpɛ̀ŋá, ìì lòd *Vɛnɛ́b gbantumsə̀ bəd yàá, bít də̀' ìì gbùl *gannyàgə̀l bəd yàá. Máára mə́ kùm sə̀ní mə́ nə́ŋ̀ní tə́ŋtə́ŋ. Bít bə̀ sàà mə́ tə́ lo'ǹmbìá.»

⁴Zá Vɛnɛ́b kè' í'ù leè gú? Vɛnɛ́b bàà: «Mə́ nyɛ́d nɛ́b bəd tə́ laa núnà zɔ̀ŋ kób zɔ̀ŋ nə́ŋsínà, ìì pɔ̀b vɛnɛ́b boò *Bal sé.»

⁵Kə̀ nɛɛ̀n aa yérə kíin, sɛŋ aa bə́ŋyée rə, nɛ́b aa Vɛnɛ́b sààvúŋà kə̀ pə̀dkè oòrə, ká'sɛ́l boò rə, nyɛ́d tə́ vɛlə̀wà kíinní.

⁶Sààvúŋ bà kə̀ pə̀dkè oòra, zá tù' sɔ̀ɔ̀nkè boò aa ìì mà' rə bòórú gá. Tə́ kàangə́, pə̀dkè Vɛnɛ́b bə̀ kùm pə̀dkè vɛ́nà gá.

⁷Bə́ŋyée báan baàn leè gú? Nɛ́b Israila bə̀ bəd ìì bɔ̀b in aa ìì sàà rə sé. Zá nɛ́b aa Vɛnɛ́b sààvúŋ bə̀ rə ní, ìì bɔ̀b sùnú. Nɛ́b kambəd kpɛ́ŋ tɛ́m boò yàá, bə̀ kìì nwɔŋ aarə sé.

⁸Kìínmbə̀ Núúboòd Gìdń bàà dàà rə kíin: «Vɛnɛ́b pii bà nwul aa bə̀ gàb kə̀ in gá roó, lè' bə̀ núù yàá, bít nìb bə̀ túŋ, boò kìì nwɔŋ aarə sí, yaà oò wə́ə́ kə̀ bə́ŋyée kíin zé.»

⁹Dauda kɔ̀ bàà: «Mə́ pà' pɔ̀bsə́, mə́ bàà wálke gbà'á gbèd bə̀ líìn boò oò bíl bə̀ zàŋá, bɔ̀b oò kòd bə̀ kúnú, bít boò bé' búúrá.

¹⁰Núù boò oò kùm tígə́lá, boò bé' núù sí. Ǹ í' bə̀ búúd, kə̀ pɛŋ tɔ̀'ǹmbə̀ sɛŋ gə́ kóólé.»

¹¹Ogə́, má nwɔŋ aa dɛràá: «Sɛŋ aa *Yahudu bəd tàà kə̀ dun wàà yíl lə, yi' bə̀ bɛ́d biníì?» Yi' bə̀ bɛ́d biní sé. Zá invaksə́ boò bəraa ìì mà' rə bòórú, nɛ́b aa bə̀ bàg Vɛnɛ́b síndə, ìì bɔ̀b taà súúke boò ra, bɔbm̀ zá'ǹmbə̀ kisɛ̀l Yahudu bəd tɛ́mú.

¹²Zá dáà Yahudu bəd invaksə́ bòórú, nɛ́b aa zɔ̀ŋə yɛ́b bərə bə̀ tə́ taà pə̀dkè gbà'á bɔbàá, bít bí'ke boò dùù kɔ̀ pii tə́ sə̀n nɛ́b aa bàg Vɛnɛ́b síndə pə̀dkè gbà'á gə́, sɛŋ aa Yahudu bəd bə̀ dá súúke bɔbm̀ bərə, pə̀dkè rə, kàŋ dá nɛɛ̀n taàn leè!

¹³Bə́ŋyée mə́ gám nwɔŋ aa tə́ kə̀ aíra, íí nɛ́b aa íí bàg Vɛnɛ́b síndoó. Mə́ kùmsə̀n *Vɛnɛ́b gbantumsə̀ aa Vɛnɛ́b tùmà, nɛ́b aa bə̀ bàgə̀ síndə səǹ doó. Tə́ kàangə́, mə́ mɔ̀' Vɛnɛ́b tə́ kə̀ tùsaa pii mə́ máà mà' yóo.

¹⁴Mə́ zíg tɛ́m, kam gə́, mà' má kisɛ̀l zá'ǹ nɛ́b mə́ bəd tɛ́mú, bɔ̀b Vɛnɛ́b oò súú nɛ́b kambəd boò tə́ŋú.

¹⁵Kə̀ aakíin, sɛŋ aa Vɛnɛ́b lɛ́' dàà bə̀ rə, Vɛnɛ́b yaà mà' taà nɛ́b kam bəraa zɔ̀ŋə yɛ́b bərə, bíd bə̀ saŋ̀ taà kə̀ oòra. Níì dá sə̀n wə́ə̀n, sɛŋ aa bíd yaà kè' Yahudu bərì roó? Yaà bə̀ dá kuùm kìínmbə̀ nɛ́b aa díímà valə́ rə kíin!

¹⁶Pà' ḿ pii Vɛnɛ́b dɔ̀ɔ̀ŋə̀ aa éèn ḿ mà' rəì gə́, aa nyɛ́d də gə́ kóólé, oò bìá. Ḿ pii Vɛnɛ́b téé lígə́d bərì gə́, téé nɛɛ̀n bəd kɔ̀ oò bìá.

¹⁷Nɛ́b Israila bə̀ bəd bə̀ tə́ kìínmbə̀ Oliva nyìì aa bə̀ ləg lɛsə́ rə kíin; nɛɛ̀n oò kambəd kɔ̀, vəə̀l yàá. Nɛ́ŋə̀ aa ń bàg Vɛnɛ́b síndə, ń tə́ kìínmbə̀ Oliva nɛɛ̀n fɔ̀gúbə̀ aa və̀d yaà bə̀ túm zɔ̀ŋ boò rə bə kíin, bít bə́ŋyée, ń bɔ̀b taà kuùm zùúm, kə̀ lígə́raa tə́ Oliva nyìì aa bə̀ ləg də zaàn doó.

¹⁸Kə̀ taàbìá, ɛ̀g ǹ gɔ̀n Oliva nɛɛ̀n aa bə̀ və̀d də sí. Ééleè ń dá taà yíl pa'ǹ gú? Ámda ń zàn sə̀n Oliva lígə́d gá, zá Oliva lígə́d zàn n sùnú.

¹⁹Nɛ́ŋə̀ nə́ŋ̀ aí tə́ŋú, dá mə́ baàn: «Zá téé nɛɛ̀n bəraa rə, bə̀ və̀d bə̀, bɔ̀b yaà boò túm mə́ zɔ̀ŋ boò aa və̀d bə̀ dàà rə ba.»

²⁰Aarə, vɛ́nà nwɔŋ sɔ̀ɔ̀ná, Vɛnɛ́b və̀d bə̀ rə, bə̀ kə̀ tɛ́mbagké naà síndoó. Ám kɔ̀ tɛ́mbagké ń bòórú, ń kùm taà boò zɔ̀ŋ ba. Ǹ gú' yíl ń kə̀ yíl pa'ǹmbìá! Aa dá kàan də, ǹ nùù kúnú.

²¹Zá kàandə, *Yahudu bəraa bə̀ kùmà kìínmbə̀ téé nɛɛ̀n aa Vɛnɛ́b séé rə kíin də, Vɛnɛ́b kág bə̀ síngə́, ám kɔ̀ kág n gá kɔ̀.

²²Ɛ̀g ǹ bé' nɛɛ̀n aa Vɛnɛ́b ì' sɔ̀ɔ̀nkè oò kə̀ vé'ke oò rú roó' kùm tə́ vé'ke kə̀ téé nɛɛ̀n bəraa və̀l bə̀ lɛ́l loó, bít kùm tə́ sɔ̀ɔ̀nkè kə̀ ámda. Zá aa dá sɔ̀ɔ̀n də, ǹ kùm sɔ̀ɔ̀nkè oò rú; síngə́, və̀d yaà dáan kíìn lɛ́'ǹ kə̀ téé nɛɛ̀n kíin.

²³Bít dáà *Yahudu bəd pɛ́n tɛ́m, bə̀ bagì gə́, Vɛnɛ́b dá bə̀ dáàn túùm zɔ̀ŋ aa və̀d dàà nyàamdoorú rə ba. Kàandə, Vɛnɛ́b tə́ kə̀ kpɛŋsɛ́l naà, boò bə̀ túùmbə̀ puu ní sɔ̀ŋ.

²⁴Bít aa dùg kə̀ bòd də, nɛ́ŋə̀ aa ń bàg Vɛnɛ́b síndə, ám gə́, ń tə́ kìínmbə̀ téé nɛɛ̀n aa Vɛnɛ́b séé Oliva nyìì fɔ̀gúbə̀ bərə kíin. Dùb bə̀ və̀rə̀ yàá, bít yaà bə̀ túmə̀ kìínmbə̀ nɛɛ̀n aa Vɛnɛ́b sééùwà rə kíin sé. Bə̀ túmə̀ tə́ Oliva nyìì aa bə̀ ləg də ba. *Yahudu bəd gə́, bə̀ kùmsə̀n téé nɛɛ̀n aa Vɛnɛ́b séé, bə̀ və̀d síndə bìá. Dá kuùm ɔ̀gke gbàákù, boò bə̀ bídǹ yaàn túùmbə̀ puu ní sɔ̀ŋ, téé nyìì aa nyàam bə̀ və̀rə̀wà rə ba.

²⁵Ɔ̀dkudvɛɛ̀l mə́ í'sɛ̀lbə̀ bərá, aa yée inmə́'ke aa mə́ í' ii baànmbə̀ ìì gàb, bɔ̀b ìì zíg yíl íí nɛ́b in bə̀ gabm̀ bəd sí roó. Nɛ́b gə̀b nə́ŋ̀ Israila bə̀ məə kíìn bagǹmbìá. Zá aarə náŋ gá, yaà dá wə́ə̀n sɛŋ aa nɛ́b kun kam bəraa bə̀ bàg Vɛnɛ́b síndə kóólé, yaà bə̀ dá súùn bərə zé.

²⁶Ìì ɛ̀g nɛɛ̀n aa Vɛnɛ́b dá nɛ́b Israila bə̀ bəd súùn də́ kóólé roó. Kìínmbə̀ Núúboòd Gìdń bàà rə kíni: «Nɛ́d Nɛ́ŋə̀ bə̀ Súùn dáà vúgǹnà nɛ́b *Siyona bìlú bə̀ bəd tə́ŋú, dá Yakubu kun bəd invaksə́ boò bəraa ìì mà' rə bí'ǹ bòórú.

²⁷Ìì ɛ̀g nɛɛ̀n aa má gú' dúgǹ kə̀ boò, sɛŋ aa má bə̀ invaksə́ boò lɛ́'ǹ daàn dú roó.»

²⁸*Yahudu bəd məə bə̀ dàà *Nwɔŋ Puu Sɔ̀ɔ̀nkè yàá. Tə́ kàangə́, bə̀ Vɛnɛ́b ɔ̀dmáàn bərá. In aa wə́ə́ kàandə, bɔbm̀ láŋ̀mbə̀ nɛ́b aa íí bàg Vɛnɛ́b síndoó. Zá Yahudu bəd bə̀ kùmsə̀n nɛ́b aa Vɛnɛ́b sààvúŋà roó, bít Vɛnɛ́b í' bə̀ tə́ gbàákù. Vɛnɛ́b í' bə̀, nwɔŋ aa bàà dàà doo boò bəd də bòórú.

²⁹Kàandə, Vɛnɛ́b gə́, bíd kè' in aa pii nɛ́ŋə̀ doorú rə gá. Pɛ́n inselké oò nɛ́b aa dɛ̀rà rə yílə́ gá.

³⁰Nyàamdoorú rə, nɛ́b aa íí bàg Vɛnɛ́b síndə, íí ləə Vɛnɛ́b sé. Zá bə́ŋyée gə́, íí gàb nɛɛ̀n aa Vɛnɛ́b ɛ̀g bé' nɛ́ŋə̀ búúd dú rə yàá. Kàandə, Yahudu bəd bə̀ ləə Vɛnɛ́b sé.

³¹Kə̀ nɛɛ̀n aarə kíin, bə̀ məə Vɛnɛ́b ləə̀nmbə̀ bə́ŋyée rə, bɔ̀b Vɛnɛ́b ɛ̀g oò bé' ii búúrá, bít bɔ̀b Yahudu bəd kɔ̀, bə́ŋyée boò gàb búúd ɛgǹ bé'ǹmbə̀ luùm aa roó.

³²Kàandə, Vɛnɛ́b mà' bí' nɛ́b bəd kóólé, boò ləə bəǹ sí, bɔ̀b boò bə̀ i'ǹmbə̀ boò kóólé, nɛɛ̀n aa ɛ̀g bəǹ tə́ bə̀ búúd bé'ǹ dú roó.

³³Vɛnɛ́b gbaŋə̀ káá taà nɛɛ̀n yàá! Ingabké oò bəd káá kàn nɛɛ̀n yàá! Nɛ́ɛ̀réè dá sə̀n pìrə̀ oò aa páá rə baàn i'ǹ gú? Nɛ́ɛ̀réè dá sə̀n in aa tɛ́m oò zíg də gabm̀ gú?

³⁴Kìínmbə̀ Núúboòd Gìdń bàà dàà rə kíin: «Nɛ́ɛ̀réè dá sə̀n Báátììkpɛ̀ŋ Vɛnɛ́b in aa sèl lə gabm̀ gú? Nɛ́ɛ̀réè dá sə̀n kuùm nɛ́ŋə̀ nwɔŋ bə̀ udǹ oò gú?»

³⁵«Éèn nɛ́ɛ̀réè sɔ̀d piiù sə̀n in nə́ŋ̀, bɔ̀b káá oò bí' bəǹ taà gú?»

³⁶Kàandə, in gə́ kóólé, vúgà oò naú. In gə́ kóólé, kùm kə̀ oòra, bít in gə́ kóólé, oò bìá. Kaŋsɛ́l oò kùm Vɛnɛ́b naú, zèd kə̀ zèrá! Oò kùm kàani.