Read Samba Leko Roma 12 Bible Online

Roma 12 - Samba Leko bible

Roma 12

¹Kə̀ taàbìá, ɔ̀dkudvɛɛ̀l mə́ bərá, bə́ŋyée Vɛnɛ́b ì'à sɔ̀ɔ̀nkè oò obə́n yílə́ yée gə́, ogə́ mə́ nyɛ̀m ii kúnú, ìì pii yíl ii Vɛnɛ́b naú, kìínmbə̀ sadaka kíin. Aa kùmsə̀n nɛɛ̀n aa nɛ́ŋə̀ dá Vɛnɛ́b pɔ̀bm̀ dú sɔ̀ɔ̀nkè roó. Ìì pii gɔ̀ŋsə́ íí kə̀ zɔ̀ŋtə́ kóólé, bɔ̀b Vɛnɛ́b tù' bə̀ ma'ǹná. Bít in aa íí tə́ ma'ǹ də gə́ kóólé, oò kùm *Gìdńná, bít oò sɔ̀ɔ̀nə̀ kúnú.

²Ìì dìì in aa nɛ́b zɔ̀ŋə yɛ́b bə bə̀ tə́ ma'ǹ də ma'ǹmbə̀ ní sí. Zá ìì dàà Vɛnɛ́b oò pɛ́n ii tɛ́má; ìì dàà Vɛnɛ́b pɛ́n oò bɛ́' ii tɛ́m bəní, kə̀ aí bə̀ ingabké puu piìnmbìá. Kə̀ aakíin, íí dá taà báàn in aa Vɛnɛ́b í' rə gabm̀bìá. In aa tə́ sɔ̀ɔ̀nkè roó, in aa sɔ̀ɔ̀n Vɛnɛ́b kə̀ zɔ̀ŋ tə́ kóólé roó.

³Pə̀dkè aa Vɛnɛ́b mà' mə́ rə bòórú, mə́ tə́ ii taà baanàá íí kóólé' Ǹ gú' baànmbə̀ kə̀ yíl ń ní, bəǹ nɛ́ŋ gbàároá, sɛŋ aa bə́ŋ̀ ń kùm sín vɛ́nà roó. Aa dá sɔɔ̀n də, ìì kùm nɛ́d yíl bə̀ pa'ǹ sí. Kóó nɛ́ɛ̀réè aí tə́ŋú, ɛ̀g oò gàb pɛ̀sə́ tɛ́mbagké bə̀ aa Vɛnɛ́b pɛ̀d piiù zɔ̀gɔ̀ roó.

⁴Kə̀ aakíin də, kə̀ si' nə́ŋ̀ní tə́ŋtə́ŋ, bə́n tə́ən kə̀ zɔ̀ŋ zùúm. Kóó zɔ̀ŋ déè, tə́ kə̀ tù' oò gɔ̀ŋ.

⁵Kə̀ nɛɛ̀n aa yérə kíin, kóó bə́n tə́ən zùúm má, bə́n kuùm tə́ si' nə́ŋ̀ní tə́ŋtə́ŋ, wálke kə̀ Krístù ra. Bít bə́n kuùm tə́ wálke obə́n bòdba, kìínmbə̀ zɔ̀ŋ bəraa kùm si' nə́ŋ̀ní tə́ŋtə́ŋ bərə kíni.

⁶Vɛnɛ́b mà' bə́n pə̀dkè kə̀ obə́n bə̀ in luùm gɔ̀ŋ gɔ̀ŋ piìnmbìá. Dáà nɛ́ŋə̀ nə́ŋ̀ Vɛnɛ́b piiù tə́ nwɔŋ aa vúgà oò naà rə udǹmbə̀ gə́, oò ùd kə̀ tɛ́mbagké aa kə̀ naà roó.

⁷Dáà Vɛnɛ́b pii nɛ́ŋə̀ nə́ŋ̀ pə̀dkè yàá, nɛ́b bəd tù' bə̀ láŋ̀ ma'ǹ gə́, láŋ oò mà' bə̀ kúnú. Màn aa Vɛnɛ́b piiù pə̀dkè yàá, oò sán nɛ́b bəd nwɔŋ bəǹ də, oò sán bə̀ kúnú.

⁸Màn aa Vɛnɛ́b piiù pə̀dkè nɛ́b bəd bə̀ tɔ̀gǹ, bít boò bə̀ váàndo piìnmbə̀ rə, oò mà' kúnú. Màn aa tə́ nɛ́b bəd gbaŋə̀ oò piìn də, oò pii bə̀ kə̀ tɛ́m yádkeá. Màn aa tə́ nɛ́b bəd nwáàn də, oò nwán bə̀ kə̀ tɛ́m yɛdkèá. Màn aa tə́ nɛ́b búúd bə̀ bəd láŋ̀ də, oò láŋ bə̀ kə̀ tɛ́m làmkèá.

⁹Í'sɛ̀l oò kùm vɛ́nà. Ìì zèè vaksá, ìì dìì insɔ̀ɔ̀nkè ma'ǹmbìá.

¹⁰Ìì í' ɔ̀dnə́ŋ̀ bəd íí bòdbə gbàákù. Ìì ləə ɔ̀dnə́ŋ̀ bəd íí bòdba.

¹¹Ìì kùm nɛ́b murə̀ bə̀ bəd sí. Zá ìì mà' tù' kə̀ kpɛŋsɛ́lá. Ìì mà' Báátììkpɛ̀ŋ tù' kə̀ tɛ́m nyɛdkèá.

¹²Ìì kùm kə̀ tɛ́m làmkè, tɛ́m zígke rú. Ìì kùm kə̀ tɛ́m sidké búúd bərú. Ìì dìì Vɛnɛ́b nyɛɛ̀mbə̀ sɛŋ gə́ kóólé.

¹³Ìì láŋ ɔ̀dkudvɛɛ̀l Vɛnɛ́b nɛ́b gìdń búúd bə̀ bəraa bə̀ kə̀ in naà síndə, kə̀ gbaŋə̀ íí bəraa íí kə̀ naà roó, bít ìì kè' Krístù nɛ́b sɛ̀ɛ́n bəraa bə̀ yaà aí kàrú rə kúnú.

¹⁴Ìì nyɛ̀m Vɛnɛ́b, oò zíg nɛ́b aa tə́ ii búúd í'ǹ də nɛɛ̀n yílú. Ìì nyɛ̀m Vɛnɛ́b oò zíg bə̀ nɛɛ̀n yílú, zá ìì yɛ̀l bə̀ nwɔŋ yɛɛ̀l sí.

¹⁵Ìì kìì tɛ́m làmkè kə̀ nɛ́b aa tə́ tɛ́m làmkè kiìn də tá. Ìì kpə̀ə̀ kə̀ nɛ́b aa tə́ kpə̀ə́ǹ kpəə̀n də tá.

¹⁶Ìì kùm sɔ̀ɔ̀nkè kə̀ ɔ̀dnə́ŋ̀ bəd íí bòdba. Ìì pà' yíl sí, zá ìì ɛ̀m kə̀ nɛ́b tɛ́m ɔ̀gke bəd tá. Ìì sèl baànmbə̀ gàb bənə́ taannə́ sə̀n nɛ́b bəd kóólé kə̀ in sí.

¹⁷Ìì bí' nɛ́ŋə̀ vaksə́ kə̀ vaksə́ sí. Ìì sàà sɔ̀ɔ̀n ma'ǹmbə̀ nɛ́b bəd kóólé númú.

¹⁸Dáà dákíìn ma'míìn gə́, íí dákíìn báàn kuùmbə̀ kə̀ tɛbàá, kə̀ nɛ́b bəd kóólé.

¹⁹Ɔ̀dzéd mə́ í'sɛ̀lbə̀ bərá, ìì pɛ́n nɛɛ̀n kə̀ yíl aí bə̀ sí, zá ìì dàà Vɛnɛ́b nɔ̀m oò mà' sùnú, kìínmbə̀ Núúboòd Gìdń bàà dàà rə kíin. Báátììkpɛ̀ŋ bàà: «Nɛɛ̀n pɛ́ɛ̀nmbə̀ tə́ máá naú, máá nə́ŋ̀ní. Máára má sə̀n káàn bí'nàá.»

²⁰Bít Núúboòd Gìdń bàà sɔ̀ŋ: «Dáà ɔ̀dmáàn ń kìì gulùmì gə́, ǹ piiù inlíìnmbìá. Bít dáà wəl súd nwuù tə́ sə̀n kɔ̀, ǹ piiù wəlá, oò nyəə kúnú. Dáà ḿ mà'ì kə̀ aakíin gə́, dá kuùm tə́ kìínmbə̀ wál ń dóù laa nyàgə̀l tə́ yílə́ kíni.»

²¹Ǹ dàà invaksə́ oò kàn n sí. Aa dá sɔɔ̀n də gə́, ǹ kànsə̀n invaksə́ kə̀ insɔ̀ɔ̀n ma'ǹmbìá.