Read Samba Leko Roma 13 Bible Online

Roma 13 - Samba Leko bible

Roma 13

¹Kóó nɛ́ɛ̀réè, oò ləə nɛ́b gbàád yɛ́b bə̀ bəraa bə̀ tə́ yɛ́b nwáàn doó. Kàandə, baànmbə̀ nɛ́ŋ gbàáro yɛ́b bə̀ aa kùm kúnú, Vɛnɛ́b zígə̀ sə̀n gá rə gə́ sé. Bít nɛ́b gbàád yɛ́b bə̀ bəraa bə̀ kùm də gə́ kóólé, Vɛnɛ́b zíg bà sùnú.

²Kə̀ aakíin də, màn aa məə nɛ́b gbàád yɛ́b bə̀ bəd nwɔŋ də, məə in aa Vɛnɛ́b wál zíg doó. Nɛ́b aa bə̀ məə rə kɔ̀, dɛ̀d bə̀ àà fágə́n tə́ boò yílú, kə̀ yíl boò ní.

³Kə̀ aakíin də, nɛ́b aa bə̀ mà' sɔ̀ɔ̀nkè rə, ìì nùù sə̀n nɛ́b gbàád bəd gá, zá nɛ́b aa mà' bə̀ sáá invaksə́ roó. Ń í' nɛ́ŋ gbàáro yɛ́b bə̀ nuùnmbə̀ sínì? Tə́ kàangə́, ǹ mà' sɔ̀ɔ̀nkèá, bít oò kɔ̀ dáan kíìn káŋàá.

⁴Kàandə, oòrə tə́ Vɛnɛ́b tù' ma'nàá, bɔ̀b ám bə̀ láŋ̀mbə̀ ba. Zá dáà ń tə́ invaksə́ ma'ǹ gə́, ǹ nùù kúnú! Kàandə, tɛdńní bɔ̀b taà kpɛŋsɛ́l nɛ́b bəd bə̀ fágǹ gá. Oòrə, tə́ Vɛnɛ́b tùsú, bɔbm̀ i'ǹmbə̀ Vɛnɛ́b nɔ̀m, nɛ́ŋə̀ aa tə́ invaksə́ ma'ǹ də yílú.

⁵Kə̀ taàbìá, aa dá sɔɔ̀n də gə́, nɛ́ŋə̀ oò ləə nɛ́b gbàád yɛ́b bə̀ bəd kúnú. Kàandə, nuùnmbə̀ Vɛnɛ́b nɔ̀m ní gá. Zá kàandə, inselké aí tɛ́mú bə̀ máá, bàà ii yàá, ìì mà' kúnú.

⁶Kə̀ taàbìá sɔ̀ŋ, íí káá taà ba'káámá. Kə̀ aakíin də, nɛ́b aa ìì tə́ gɔ̀mnà tù' ma'ǹ də, ìì tə́ Vɛnɛ́b tùsú, ìì mà' taà tùsaa rə kə̀ tɛ́m nə́ŋ̀ní, sɛŋ gə́ kóólé.

⁷Ìì káá gààd bəd in aa íí dá bə̀ káàn də kúnú. Ìì káá bə̀ ba'káám aa íí dá bə̀ káàn də kúnú. Bít ìì káá in kam bəraa íí dá bə̀ káàn də kúnú. Ìì nùù nɛ́ŋə̀ aa íí dá nuùn də kúnú, bít ìì káŋ nɛ́ŋə̀ aa íí dáù káŋ̀ də kúnú.

⁸Nɛ́ŋə̀ bàg ii kpobì gə́, ìì kááù kúnú. Zá in aa íí dá ɔ̀dnə́ŋ̀ bəd bagǹ kə̀ kpob kíin də gə́, í'sɛ̀lá. Màn aa í' ɔ̀dnə́ŋ̀ bəd də gə́, mà' zə́' in aa indaŋ̀mbə̀ dɛ̀d dəì kóólé.

⁹Vɛnɛ́b indaŋ̀mbə̀ nwɔŋ bəd bàà: «Ǹ mà' labsə̀ sí, ǹ lò' yíl sí, ǹ pà' lííro sí, ɔ̀dnə́ŋ̀ ń in oò lɛ' n sí.» Indaŋ̀mbə̀ bəraa yée kə̀ ɔ̀d kambəd tá, ìì wál tə́ indaŋ̀mbə̀ nə́ŋ̀ní aa yée rú: «Ǹ í' ɔ̀dnə́ŋ̀ ń da, kìínmbə̀ yíl ámbə̀ kíin.»

¹⁰Nɛ́ŋə̀ aa í' ɔ̀dnə́ŋ̀ də, mà' invaksə́ nə́ŋ̀má ɔ̀dnə́ŋ̀ oò yílə́ gá. Ń tə́ ɔ̀dnə́ŋ̀ ń í' ǹ gə́, ń ləə indaŋ̀mbə̀ nwɔŋ bərì kóólé.

¹¹Ìì mà' in bəraa rə kóólé, kə̀ nɛɛ̀n aa íí gàb dú rə kíin, sɛŋ aa bə́n tə́ən kuùm dú bə́ŋyée roó. Sɛŋ wə́ə́ì aí bə̀ lɛ́ɛ̀mbə̀ ləəmú. Kə̀ aakíin də, súúke gbad yaà wə́ə́ì obə́n səǹ bə́ŋyóo, sɛŋ aa bə́n bagǹ Báátììkpɛ̀ŋ doó.

¹²Tígə́l gbà'á taà yàá, nwúun tə́ kíìn nyɛràá. Lɛ́' báà daàn tù' tígə́lə́ bìá. Báà pa'ǹ in aa dá bə́n kpɛŋsɛ́l piìn bùm nə́'ǹmbə̀ zɔ̀ŋ nyɛdkè rú roó.

¹³Báà kuùm kìínmbə̀ nɛɛ̀n aa dá sɔɔ̀n də kíin, nyàámbəràá. Báà gú'ǹ yíl bə́n kə̀ gəə̀l widǹmbə̀ yée zé, kə̀ labsə̀ ma'ǹmbìá, bít kə̀ invaksə́ kambəd ma'ǹmbìá. Báà daàn álsɛ̀l bərá, bít kə̀ kisɛ̀lá.

¹⁴Ìì dàà Báá íí Tììkpɛ̀ŋ Yéésù Krístù oò ləə gààd aí tɛ́mú. Ìì dàà tɛ́m íí oò dìŋ ii, bɔbm̀ ma'ǹmbə̀ in aa íí í' rə sí.