Read Samba Leko Roma 15 Bible Online

Roma 15 - Samba Leko bible

Roma 15

¹Nɛ́b aa tɛ́mbagké bə́n tə́ kə̀ kpɛŋsɛ́l lə, báà láŋ̀ nɛ́b vɛɛmké bəraa tɛ́mbagké boò və̀' síndə, boò dìì tɛ́mbagké rú ní. Báà saàn kuùmbə̀ in aa dá obə́n ní sɔɔ̀n də rú sí.

²Aa dá sɔɔ̀n də, kóó nɛ́ɛ̀réè, zɔ̀ŋə obə́n tə́ŋú, oò sàà insɔ̀ɔ̀n aa dá ɔ̀dnə́ŋ̀ oò sɔɔ̀n doó, bɔ̀b oò kùm kə̀ kpɛŋsɛ́l tɛ́mbagké rú.

³Kə̀ aakíin də, Krístù sàà in aa dá yíl oò sɔɔ̀n də ní sé. Aa dá sɔɔ̀n də, kìínmbə̀ Núúboòd Gìdń bàà rə kíin: «Muud bəraa bə̀ dúú n də, bíd yaà pí' tə́ máá yílú.»

⁴In aa bádmíìn Núúboòd Gìdǹ bərú rə kóólé, bə̀ bád obə́n bə̀ sáànmbìá, bɔ̀b báà bɔbm̀ tɛ́m zígke kə̀ tɛ́m sidkéá, bít kə̀ kpɛŋsɛ́l aa Núúboòd Gìdń bəd bə̀ tə́ bə́n piìn doó.

⁵Mə́ nyɛɛ̀m Vɛnɛ́b aa pii bə́nnà tɛ́m sidké, kə̀ kpɛŋsɛ́l tə́ rə, mà' oò bí'i, bɔbm̀ kuùmbə̀ kə̀ sɔ̀ɔ̀nkè obə́n bòdba, kə̀ bagǹmbə̀ kìínmbə̀ nɛɛ̀n aa Yéésù Krístù mà' rə kíin,

⁶bɔ̀b báà kuùm ɔ̀dba, bít kə̀ gú' nə́ŋ̀ní. Ìì káŋ Vɛnɛ́bá, Báá bə́n Tììkpɛ̀ŋ Yéésù Krístù Báá oòra.

⁷Kə̀ nɛɛ̀n aa Krístù kè' ii rə kíni, aí kɔ̀ ìì kè' ɔ̀dnə́ŋ̀ aí bòdbə kàani, bɔbm̀ Vɛnɛ́b bə̀ káŋ̀á.

⁸Kàandə, mə́ tə́ ii kíìn baanàá, Yéésù Krístù yaà bíl *Yahudu bəd nɛ́b tù' bə̀ ma'ǹná, bɔbm̀ ma'ǹ zə́'ǹmbə̀ nwɔŋ bəraa Vɛnɛ́b bàà dàà doo boò bəd nyàamdoorú roó, bít i'ǹmbə̀ gə́, Vɛnɛ́b gə́, nɛ́ŋə̀ vɛ́nà bìá.

⁹Oò kɔ̀ yaà rə, bɔ̀b oò mà' nɛ́b bəraa bə̀ bàg Vɛnɛ́b síndə, boò káŋ Vɛnɛ́b, sɔ̀ɔ̀nkè oò aa mà' rə bòórú. Kìínmbə̀ Núúboòd Gìdń bàà rə kíin: «Kə̀ taàbìá, má n káŋ̀ nɛ́b aa zɔ̀ŋə yɛ́b bərə tə́ŋú, bít nàà má nə́gə́l ámbə̀ káŋàá.»

¹⁰Núúboòd Gìdń bàà sɔ̀ŋ: «Nɛ́b aa íí bàg Vɛnɛ́b síndoó, ìì kìì tɛ́m làmkè kə̀ Báátììkpɛ̀ŋ nɛ́b bəd tá!»

¹¹Bítsɔ̀ŋ, bàà: «Ìì káŋ Báátììkpɛ̀ŋá, íí nɛ́b aa íí bàg Vɛnɛ́b síndə kóólé; bít nɛ́b bəd kóólé, boò káŋ̀ kúnú!»

¹²Esaya bíd bàà sɔ̀ŋ: «Zesse kun dáà kíìn yaanàá, yaà dá gààd ləə̀n nɛ́b aa bàg Vɛnɛ́b síndə yílú, bít boò kɔ̀ bə̀ dá tɛ́m zígǹ oò ba.»

¹³Mə́ nyɛɛ̀m Vɛnɛ́b aa pii bə́n tɛ́m zígke rə, oò nyíí ii tɛ́m kə̀ làmkèá, bít kə̀ tɛbàá, tɛ́mbagké rú, bɔ̀b ìì kùm tɛ́m zígke rú, kə̀ Nwul Gìdń kpɛŋsɛ́lá.

¹⁴Ɔ̀dkudvɛɛ̀l mə́ í'sɛ̀lbə̀ bərá, mə́ gàb yàá kə̀ yíl máá bìá, íí nyìì tə́ kə̀ insɔ̀ɔ̀nkè ma'ǹmbìá, íí nyìì tə́ kə̀ in gabké nyɛdkèá, bít íí dákíìn báàn ɔ̀dnə́ŋ̀ bəd nwɔŋ sɔ̀ɔ̀n udǹmbə̀ íí bòdba.

¹⁵Kə̀ aakíin də kɔ̀, mə́ bàà ii nwɔŋ bəd zùúm kə̀ váàndoá, núúboòd máa yée rú, bɔbm̀ seèlzá'ǹmbə̀ aí bə̀ in aa íí gàb nyàam doó. Mə́ bári kə̀ aakíin də, pə̀dkè aa Vɛnɛ́b mà' máà rə bòórú.

¹⁶Máà kùm Yéésù Krístù nɛ́d tù' bə̀ ma'ǹná, bɔ̀b máà mà' nɛ́b aa bə̀ bàg Vɛnɛ́b síndə tùsá. Mə́ mà' tù' *gìdńná, kə̀ *Nwɔŋ Puu Sɔ̀ɔ̀nkè Vɛnɛ́b bə̀ baànmbìá, bɔ̀b nɛ́b aa bə̀ bàg Vɛnɛ́b síndə, boò bíl sadaka sɔ̀ɔ̀nkèá, Vɛnɛ́b naú; boò bə̀ bí'ǹmbə̀ boò də́ŋ kíìn kuùmbə̀ oò bìá, kə̀ Nwul Gìdńná.

¹⁷Kə̀ wálke máá bə̀ kə̀ Yéésù Krístù ra, máá kíìn báàn kuùmbə̀ kə̀ tɛ́m yádkeá, kə̀ Vɛnɛ́b tùsaa pii mə́ roó.

¹⁸Kə̀ aakíin də, dáà mə́ tə́ kə̀ váàndo naà nwɔŋ bə̀ gáàm gə́, máá gáàm in aa Krístù mà' kə̀ máá, bɔ̀b máà àà nɛ́b aa bə̀ bàg Vɛnɛ́b síndə boò ləə Vɛnɛ́b doó. Krístù mà' kə̀ nwɔŋ bərá, kə̀ tù' mə́ bərá,

¹⁹kə̀ inkɔrə bəd kpɛŋsɛ́lá, in də́dǹ bə̀ tó'ǹ bəd kpɛŋsɛ́lá, bít kə̀ Nwul Gìdń kpɛŋsɛ́lá. Kə̀ aarə kíin, mə́ bàà Krístù *Nwɔŋ Puu Sɔ̀ɔ̀nkèá, kə̀ ɛɛ̀mbə̀ zɔ̀ŋ gə́ kóólé, sɔ̀d Urusalima bìlú, yaà wə́ə́ Iliriya yɛ́b bə zé.

²⁰Zá mə́ dììà Nwɔŋ Puu Sɔ̀ɔ̀nkè gəə̀l baànmbə̀ ní, zɔ̀ŋ bəraa bə́ŋ̀ nɛ́b bəd kìì bə̀ bèd Krístù nə́gə́l síndə ba, bɔ̀b máà páá wúl bèl zɔ̀ŋ aa nɛ́ŋə̀ nə́ŋ̀ ɔ̀d gɔ̀ŋ páá bərə sí,

²¹bít máà mà' kìínmbə̀ nɛɛ̀n aa Núúboòd Gìdń bàà rə kíni: «Nɛ́b aa bàà bə̀ bèd bə̀ nwɔŋ oò síndə, bə̀ dáù kíìn bé'nàá, bít nɛ́b aa kìì bə̀ bèd nwɔŋ oò síndə kɔ̀, bə̀ dákíìn kiinàá.»

²²Aa yée kùmsə̀n in aa dàŋ máà sɛŋ zùúm, dáànmbə̀ aí kàrú roó.

²³Zá bə́ŋyée gə́, mà' mə́ bɛ́' tù' mə́ì zɔ̀ŋə yɛ́b bəraa yée ba. Zèd bəd zùúm, mə́ í' ii dáàn dɔ̀ɔ̀mbìá,

²⁴bít mə́ í' ma'ǹmbə̀ sɛŋ aa máá ɛɛ̀m Espaniya yɛ́b bəroó. Kàandə, mə́ zíg tə́, sɛŋ aa máá ɛɛ̀m də, taà máá ii taà bé'nàá, bít máá taà láŋke bɔbm̀ aí naú, bɔbm̀ ɛɛ̀mbə̀ kə̀ yɛ́b aarə ba, mə́ kùmì kə̀ aí tə́ sɛŋ zɔ̀ŋə zɔ̀gɔ̀ gə́ roó.

²⁵Zá bə́ŋyée gə́, mə́ tə́ ɛɛ̀m Urusalima bìlú, Vɛnɛ́b nɛ́b gìdń bəraa wərə̀ rə dáàn láŋ̀mbə̀ bə kə̀ tùsá.

²⁶Kə̀ aakíin də, nɛ́b bagké bəraa Makedoniya yɛ́b ba, bít kə̀ Akaya yɛ́b bərə, bə̀ dúg gú' in wáàlǹmbìá, bít tuùm piìnmbə̀ Vɛnɛ́b nɛ́b gìdń búúd bə̀ bəraa bə̀ kùm Vɛnɛ́b nɛ́b bəd tə́ŋú, Urusalima bìlə́ roó.

²⁷Bə̀ tə́ kə̀ tɛ́m làmkè in aarə ma'ǹmbə̀ kə̀ yíl boò bə̀ ní. Zá vɛ́nà bə̀ gə́, boò ra boò láŋ sə̀n nɛ́b búúd bə̀ bəraa roó. Kə̀ aakíin də, *Yahudu bəd nɛ́b bagké bəraa Urusalima bìlə́ rə, pɛ̀l bə̀ gàb insɔ̀ɔ̀n aa Nwul Gìdń pii bà rə, kə̀ nɛ́b aa bə̀ bàg Vɛnɛ́b síndoó. Nɛ́b aa bə̀ bàg Vɛnɛ́b síndə, boò kɔ̀ boò mà' bə̀ tùsá. Boò láŋ bə̀ kə̀ boò bə̀ in aa bə̀ kə̀ naà zɔ̀ŋə yɛ́b bərə pɛɛ̀l piìnmbìá.

²⁸Màìgə́, mà' mə́ bɛ́' tùsaa yàá, mə́ pii bə̀ in aa ìì wál ləì nɛɛ̀n tɛ́mú gə́, taà má ɛɛ̀m Espaniya yɛ́b ba, bít taà má bagǹ aí kàrú.

²⁹Mə́ gàb yàá, mə́ tə́ dáàn aí kàrú gə́, máráàn wə́ə̀n kə̀ pə̀dkè gbà'á Krístù bìá.

³⁰Zá aa yée in aa mə́ tə́ ii dɛdǹ doó, ɔ̀dkudvɛɛ̀l bərá, kə̀ Báá bə́n Tììkpɛ̀ŋ Yéésù Krístù ra, bít kə̀ í'sɛ̀l aa Nwul Gìdń pii roó' Láŋ yaà ìì nə́' mə́ nə́gə̀d ba. Ìì nyɛ̀m Vɛnɛ́b máá yílú.

³¹Ìì nyɛ̀m Vɛnɛ́b, bɔ̀b máà súú kíìn nɛ́b tɛ́m kpɛŋké bəraa bə̀ bàg Vɛnɛ́b sé, Yahudiya yɛ́b bərə nɛɛ̀n tɛ́mú, bɔ̀b láŋke bəraa mə́ àà Urusalima bìlə́ rə, Vɛnɛ́b nɛ́b gìdń bəraa wərə̀ rə, boò kè' kíìn kə̀ tɛ́m làmkèá.

³²Kə̀ nɛɛ̀n aarə kíin, máráàn wə́ə̀n aí kàrú gə́, tɛ́m mə́ dá nyiìn kə̀ làmkèá, Vɛnɛ́b í'ì gə́ roó; bít kùm mááráàn nyi'ǹ aí tə́ŋú.

³³Mə́ nyɛ̀m Vɛnɛ́b aa pii ii tɛbə̀ rə, oò kùm kə̀ aí tá, íí kóólé! Oò kùm kàani.