Read Samba Leko Roma 16 Bible Online

Roma 16 - Samba Leko bible

Roma 16

¹Mə́ tə́ ii núúboòd bádǹ piìn, kun kéèn bə́n Febe aa tə́ tù' ma'ǹ *Eklisiya Sɛŋkreya bə̀ rú rə yílú.

²Ìì kè'ù kíìn Báátììkpɛ̀ŋ nə́gə́lú, kìínmbə̀ nɛɛ̀n aa nɛ́ŋə̀ oò mà' rú, Vɛnɛ́b nɛ́b gìdń bəd tə́ŋə́ rə kíin. Bít ìì láŋ̀ ba, in aa dá í'ǹ aí naà roó. Kə̀ yíl oò bə̀ máá, láŋ nɛ́b bəd zùúm, bít láŋ kàn nɛɛ̀n máára.

³Ìì dɔ̀m Priskila kə̀ Akilas tá, ɔ̀b mə́ Yéésù Krístù tùsú bə̀ bərá.

⁴Dáà bə̀ dá yíl boò bɔ̀'ǹ, bɔ̀b máá bə̀ súùnmbìá. Máára mə́ kùmsə̀n nɛ́ŋə̀ aa mɔ̀' bə̀ rə ní gá. Zá *Eklisiya bəraa bə̀ bàg Vɛnɛ́b síndə kóólé, bə̀ mɔ̀'ùwì kɔ̀.

⁵Ìì dɔ̀m nɛ́b bagké bəraa wál ìì sáá kìínmbə̀ *Eklisiya kíin, boò wúu rə kɔ̀. Ìì dɔ̀m ɔ̀d mə́ nə́ŋ̀ Epaynetus, màn aa éèn sɔ̀d Krístù bagǹmbə̀ Aziya yɛ́b bərə kɔ̀.

⁶Ìì dɔ̀m Mariyama aa mà' ii tù' gbàákù, kə̀ tɛ́m nə́ŋ̀ní rə kɔ̀.

⁷Ìì dɔ̀m Andronikus kə̀ Yuniyas tá, ìì kun mə́ bərá. Bít boò rə, ìì kùmà wúltígə́l bə̀ rú kə̀ máá tá. Bə̀ káŋ bə̀ tə́ sɔ̀ɔ̀n *Yéésù gbantumsə̀ bəd tə́ŋú, bít éèn bə̀ kùmsə̀n nɛ́b Krístù bə̀ bagǹ máá númú.

⁸Ìì dɔ̀m ɔ̀dzéd mə́ Ampiliyatus da. Oò kɔ̀ tə́ wálke kə̀ Báátììkpɛ̀ŋá.

⁹Ìì dɔ̀m ɔ̀dnə́ŋ̀ mə́ Krístù tù' bə̀ ma'ǹ Urbain dú, kə̀ ɔ̀dkudvɛɛ̀l mə́ í'sɛ̀lbə̀ Istakis da.

¹⁰Ìì dɔ̀m Apelesa ra, màn aa də́' ɛ̀g tɛ́mbagké oò vɛ́nà bə̀, Krístù rú roó. Ìì dɔ̀m nɛ́b aa Aristobul yiìl lə kɔ̀.

¹¹Ìì dɔ̀m kun mə́ Hirodiyon dú. Ìì dɔ̀m nɛ́b aa Narkis yiìl, bə̀ tə́ Báátììkpɛ̀ŋ bagǹ doó.

¹²Ìì dɔ̀m kun kɛ́ɛ̀m mə́ bəd Tirifena kə̀ Tirifosa tá. Bə̀ tə́ Báátììkpɛ̀ŋ tù' ma'nàá, bít kə̀ kun kéèn mə́ Perside ra, oò kɔ̀ mà' Báátììkpɛ̀ŋ tùsì gbàákù.

¹³Ìì dɔ̀m Rufus, màn aa Báátììkpɛ̀ŋ sàà vúŋ̀ roó; bít nà'á oòrə kɔ̀, tə́ kìínmbə̀ nà' mə́ kíin.

¹⁴Ìì dɔ̀m Asiŋkirit da, Felegon da, Hermes da, Patrobas da, Hermas da, bít kə̀ ɔ̀dkudvɛɛ̀l bəraa bə̀ kùm kə̀ boò tə́ rə tá.

¹⁵Ìì dɔ̀m Filologus da, Yuliya ra, Neriyus kə̀ kun kéèn oò Olimpas tá, bít kə̀ Vɛnɛ́b nɛ́b gìdń bəraa bə̀ kùm kə̀ boò tə́ rə gə́ kóólé.

¹⁶Ìì dɔ̀m ɔ̀dnə́ŋ̀ bəd íí bòdba, ìì kò' bə̀ nɛɛ̀n kìínmbə̀ ɔ̀dkudvɛɛ̀l bəd kíin. *Eklisiya Krístù bə̀ bəd gə́ kóólé, bə̀ dɔ̀mi yàá.

¹⁷Mə́ tə́ ii kíìn baanàá, ɔ̀dkudvɛɛ̀l bərá. Ìì gú' yíl íí kə̀ nɛ́b aa bə̀ tə́ bɛŋə̀ pá'ǹ, bít bə̀ tə́ nɛ́b bagké bəd zá'ǹ, bɔ̀b lɛ́' boò dàà tɛ́mbagké boò roó. Kàandə, bə̀ bàg insánke aa íí bɔ̀bà rə sé. Ìì kùm zɔ̀ŋ bùúd kə̀ boò ra,

¹⁸kàandə, nɛ́b luùm bəraa rə, bə̀ mà' Báá bə́n Tììkpɛ̀ŋ Yéésù Krístù tù' sé, zá ìì sàà tə́ bàgə̀l boò ní, kə̀ nwɔŋ sɔ̀ɔ̀nkè bəraa ìì tə́ gáàm doó, bít kə̀ nwɔŋ bəraa bə̀ tə́ udǹ doó; bɔ̀b nɛ́b bəd bə̀ káŋ̀á, bít zó'ǹ pa'ǹmbə̀ nɛ́b aa bə̀ gàb invaksə́ ma'ǹmbə̀ síndə tɛ́má.

¹⁹Nɛ́b bəd kóólé, bə̀ kìì nɛɛ̀n aa íí ləə Báátììkpɛ̀ŋ dú rə yàá. Mə́ kìì tɛ́m làmkè tə́ kə̀ aíra. Zá mə́ í' ìì kùm nɛ́b in bə̀ gabm̀ bərá, bɔ̀b insɔ̀ɔ̀nkè ma'ǹmbìá, bít ìì mà' invaksə́ sí.

²⁰Vɛnɛ́b aa tə́ bə́n tɛbə̀ piìn də, záàn zɔ̀gɔ̀ gə́, dá *Satan naàm aí dun dùú. Mə́ nyɛ̀m pə̀dkè Báá bə́n Tììkpɛ̀ŋ Yéésù Krístù bə̀, oò kùm kə̀ aí tá!

²¹Ɔ̀d mə́ nə́ŋ̀ tùsú bə̀ Timote dɔ̀mi yàá. Kun mə́ Lukius da, Yason da, kə̀ Sosipata tá, bə̀ dɔ̀mi yàì kɔ̀.

²²Bít máára, mə́ Tertius da, mə́ bád sə̀n núúboòraaú. Mə́ dɔ̀mi yàá, Báátììkpɛ̀ŋ aa wál bə́n də nə́gə́lú.

²³Gayus, màn aa kè' lə́ə́ mə́ oò kàrú, bít *Eklisiya gə́ kóólé wál sáá oò kàrú rə, dɔ̀mi yàá. Erastus, màn aa kò' sáá ba' bìlú bə̀ kə̀ zɔ̀ŋtə́ roó, kə̀ ɔ̀dkudvɛɛ̀l bə́n Kartus tá, bə̀ dɔ̀miyì kɔ̀. [

²⁴Mə́ nyɛ̀m pə̀dkè Báá bə́n Tììkpɛ̀ŋ Yéésù Krístù bə̀, oò kùm kə̀ aí tə́ kóólé. Oò kùm kàani.]

²⁵*Báà káŋ̀ Vɛnɛ́bá! Tə́ kə̀ kpɛŋsɛ́l naà aí bə̀ bí'ǹmbə̀ də̀gə̀mkè tɛ́mbagké rú, kìínmbə̀ *Nwɔŋ Puu Sɔ̀ɔ̀nkè aa mə́ tə́ baàn də bàà rə kíin, kìínmbə̀ nwɔŋ aa mə́ tə́ udǹ Yéésù Krístù yílə́ rə bàà rə kíin, kìínmbə̀ ingabké aa bə́n bɔbm̀mà kə̀ inmə́'ke aa Vɛnɛ́b ì'à nɛ́b bəd kóólé rə bàà rə kíin. Vɛnɛ́b zíg inmə́'ke aarə nyàamdoorú kpɔ̀ɔ̀m.

²⁶Zá bə́ŋyée gə́, Vɛnɛ́b yaà vúŋ̀ tə́ zɔ̀ŋ nyɛdkè ba, *gbantumsə̀ oò bəd núúboòrú, kìínmbə̀ nɛɛ̀n aa Vɛnɛ́b zèd kə̀ zèd bə̀ bàà rə kíin. Bə̀ bàà nɛ́b bəraa bə̀ ləə yɛ́b gə́ kóólé bərə boò gàb kúnú, bɔ̀b boò bàg Vɛnɛ́bá, bít boò ləəù kúnú.

²⁷Kaŋsɛ́l oò kùm Vɛnɛ́b, nɛ́b in bə̀ gabm̀ oò nə́ŋ̀ní naú, kə̀ Yéésù Krístù ra, zèd kə̀ zèrá! Oò kùm kàani.