Read Samba Leko Roma 3 Bible Online

Roma 3 - Samba Leko bible

Roma 3

¹Kuùmbə̀ *Yahudu rə, ń dá níì bɔbm̀ bə wərə̀ gú? Sínkɔ̀ gàb naànmbə̀ rə, pɛ̀sə́ oòrə níì gú?

²Èè, pɛ̀sə́ oòrə, kàŋ kàn nɛɛ̀n yàá, nɛ́b bəd kóólé núùrú. Bə́ŋ̀ kə̀ Yahudu bərá, Vɛnɛ́b piià taà nwɔŋ oò bərá.

³Báan baàn leè gú, dáà nɛ́b kambəd boò tə́ŋú, ìì bàg nwɔŋ aa Vɛnɛ́b bàà rə síngə́ roó? Nɛ́ɛ̀m bə̀ mà' in aa Vɛnɛ́b bàà rə sín yée gə́, aarə í' baànmbə̀ gə́, Vɛnɛ́b kɔ̀ dá taà daàn in aa bàà dàà rə ma'ǹmbèì?

⁴Vɛ́nà, kàan gá. Aa dá sɔ̀ɔ̀n də gə́, íí gàb yàá, Vɛnɛ́b gə́, sɛŋ gə́ kóólé, gám nwɔŋ sɔ̀ɔ̀ná, kóó dáà nɛ́b bəd gə́ kóólé, bə̀ tə́ gúsuúm gə́ roó. Kìínmbə̀ Núúboòd Gìdń bàà rə kíin: «Nɛ́b bəd dá gabm̀ ń tə́ wɔ̀ɔ̀lə̀ gə́, sɛŋ aa ń tə́ nwɔŋ gáàm dú roó. Bít dáà bə̀ fágnnì fágə́nú gə́, ǹ kàn kúnú.»

⁵Zá dáà invaksə́ aa bə́n ma'ǹ də, ì' nɛ́b bəd Vɛnɛ́b tə́ wɔ̀ɔ̀lə̀ gə́, bə́ŋyée báan baàn leè gú? Vɛnɛ́b tə́ bə́n fágǹ də, kùm taà wɔ̀ɔ̀lə̀ sínì? (Mə́ gám nwɔŋ tə́ kìínmbə̀ nɛ́b bəraa zɔ̀ŋə yɛ́b bərə kíin.)

⁶Kàan gá! Kàandə, dáà Vɛnɛ́b kə̀ wɔ̀ɔ̀lə̀ naà síngə́, ééleè dá taà nɛ́b bəd fágǹ zɔ̀ŋə yɛ́b bə kóólé gú?

⁷Zá dáà gúsuúm mə́ mà' vúŋ vɛ́nà Vɛnɛ́b bə̀ tə́ nyɛdkèá, bít láŋ Vɛnɛ́b tə́ kaŋsɛ́l laa nyɛdkè oò i'ǹmbə̀ nɛ́b bəd núùrú gə́, kə̀ níìbə̀ má taà fágə́n bɔbm̀, kìínmbə̀ nɛ́d invaksə́ bə̀ ma'ǹ kíin gú?

⁸Bít kàandə, kə̀ níìbə̀ bə́n baàn taà: «Báà ma'ǹ invaksá, bɔ̀b sɔ̀ɔ̀n oò vúg kíin gá gú?» Kə̀ aakíin də, nɛ́b kambəd í'ì nwɔŋ vaksə́ gáàmbə̀ máá yílə́ gə́, bə̀ və̀d gúsuúm nwɔŋ bərá, bə̀ bàà mə́ sán nɛ́b bəd in tə́ nɛɛ̀n aarə rú. Nɛ́b bəraa rə, Vɛnɛ́b dá bə̀ kíìn fágǹ ko'nàá, bít bə̀ də́ŋì fágə́n aarə bɔbm̀bə̀ sɔ̀ɔ̀nkè!

⁹Zá bə́ŋyée gə́, báan baàn leè gú? Bə́n *Yahudu bəd, bə́n kaànsə̀n nɛ́b kun kam bəraa yéeì? Ə́ùwə́, kàan gá! Éèn sɔ̀d mə́ bàà yàá. Invaksə́ ləə gààd tə́ Yahudu bəd yílú; bít Grɛg bəd yílə́ kɔ̀, də́ŋ tə́ nə́ŋ̀ní.

¹⁰Kìínmbə̀ nɛɛ̀n aa Núúboòd Gìdń bàà rə kíin: «Nɛ́ŋə̀ nə́ŋ̀má nɛ́ŋə̀ wɔ̀ɔ̀lə̀ Vɛnɛ́b númú sé, kóó nə́ŋ̀má sé.

¹¹Nɛ́ŋə̀ nə́ŋ̀má kə̀ tɛ́m nwɔŋ bə̀ gabm̀ naà sé, nɛ́ŋə̀ nə́ŋ̀má sàà Vɛnɛ́b sé.

¹²Boò kóólé, áá bə̀ dàà Vɛnɛ́b kpaŋ̀ yàá, bə̀ bɔ̀' yíl boò bəd yàá. Nɛ́ŋə̀ nə́ŋ̀má mà' insɔ̀ɔ̀n sé, kóó nə́ŋ̀má sé.»

¹³«Gú' boò tə́ kìínmbə̀ sàà aa bə̀ dàà wə̀ə́l lə kíni. Mɛ́ɛ́l boò kɔ̀, tə́ bə̀ láŋ̀ gúsuúm vaksə́ bəd gáàmbìá.» «Nwɔŋ aa tə́ vúgǹ boò gú' bərə, tə́ kìínmbə̀ bi' mɛ̀n kíin.»

¹⁴«Gú' boò nyìì tə́ kə̀ nwɔŋyɛɛ̀l vaksə́ bərá.»

¹⁵«Bə̀ nùù kə̀ báŋ, bɔ̀b yíl dáàn lo'ǹmbìá.

¹⁶Kpaŋ̀ bəraa bə̀ bàg də gə́ kóólé, bə̀ yɛ̀l in bərá, bít bə̀ dàà nɛ́b bəd búúrú,

¹⁷bít bə̀ gàb tɛbə̀ kpaŋ̀ sé»

¹⁸«Vɛnɛ́b də́dǹ nə́ŋ̀má boò tɛ́mú kɔ̀ sé.»

¹⁹Bə́n gabm̀ yàá sɔ̀ɔ̀nkè, nwɔŋ bəraa indaŋ̀mbə̀ bàà rə gə́ kóólé, bàà tə́ kə̀ nɛ́b aa tə́ indaŋ̀mbə̀ ləə̀n doó. Nwɔŋ nə́ŋ̀má oò vúg nɛ́b bəd gú' bə, bɔ̀b yíl boò bə̀ tágǹmbə̀ sí; bɔ̀b nɛ́b bəd kóólé, Vɛnɛ́b oò fág bə̀ kúnú.

²⁰Kàandə, kóó nɛ́ŋə̀ nə́ŋ̀má Vɛnɛ́b ɛ̀g gàbə̀ wɔ̀ɔ̀lə̀ oò númú, kə̀ indaŋ̀mbə̀ nwɔŋ aa kò' rə sé. Zá indaŋ̀mbə̀ gə́, bàà nɛ́ŋə̀ oò gàb invaksə́ oò aa mà' roó.

²¹Zá bə́ŋyée gə́, Vɛnɛ́b ì' bə́n nɛɛ̀n aa bí' nɛ́ŋə̀ rú wɔ̀ɔ̀lə̀ oò númú roó. Kə̀ indaŋ̀mbə̀ gá; bít indaŋ̀mbə̀ kə̀ *Vɛnɛ́b gbantumsə̀ bəd tá, ìì gámà nwɔŋ oò yàá.

²²Kə̀ bagǹmbə̀ Yéésù Krístù ra, Vɛnɛ́b mà' bí' taà nɛ́b bəd boò kùm wɔ̀ɔ̀lə̀ oò númú. Mà' in aarə, kə̀ nɛ́b aa bə̀ bàg Yéésù Krístù rə gə́ kóólé. Mà' kàandə, pɛ̀d nɛ́b bəd bə sé.

²³Nɛ́b bəd kóólé, bə̀ mà' invaksə́ yàá, bít bə̀ bé' kaŋsɛ́l laa nyɛdkè Vɛnɛ́b bə̀ gá.

²⁴Zá Vɛnɛ́b gə́, kə̀ pə̀dkè oòra, bàà taà nɛ́b bəd gə́, boò tə́ wɔ̀ɔ̀lə̀ obəǹ númú, tɛdńní, kə̀ Yéésù Krístù, nɛ́ŋə̀ aa káákè' nɛ́b bəd invaksə́ rú roó!

²⁵Vɛnɛ́b piià Yéésù kìínmbə̀ sadaka kíin, bɔ̀b kə̀ nyɛ̀lə́m oòra, nɛ́b bəd boò bɔ̀b taà daaké invaksə́ boò bəd bìá. Vɛnɛ́b mà' kə̀ aakíin də, bɔbm̀ i'ǹmbə̀ nɛɛ̀n aa kùm dú wɔ̀ɔ̀lə̀ roó. Nyàamdoorú rə, sìrà yàá, bít fág nɛ́b bəd invaksə́ boò bəraa ìì mà' rə sé. Zá bə́ŋyée gə́, ì' nɛ́b bəd nɛɛ̀n aa bí' bə̀ rú wɔ̀ɔ̀lə̀ oò númú roó. Kàandə, kə̀ yíl oò bə̀ máá, tə́ wɔ̀ɔ̀làá. Bít bàà nɛ́b bəd gə́, boò tə́ wɔ̀ɔ̀lə̀ bəǹ númú, nɛ́b aa boò tə́ Yéésù bagǹ də gə́ kóólé.

²⁷Sáad nə́ŋ̀ túrú, nɛ́b bəd dá taà yíl pa'nì? Ə́ùwə́, kóó in nə́ŋ̀má sé. Kə̀ níìbə̀ gú? Ìì bàg indaŋ̀mbə̀ nwɔŋ deè? Ə́ùwə́, zá ìì bàg Yéésù Krístù roó.

²⁸Kə̀ aakíin də, sèl bə́ gàb bə́ tɛ́mú gə́, Vɛnɛ́b bàà nɛ́ŋə̀ oò kùm wɔ̀ɔ̀lə̀ bəǹ númú, kə̀ bagǹmbə̀ Yéésù ra, zá kə̀ tùsaa indaŋ̀mbə̀ bàà rə ma'ǹmbə̀ gá.

²⁹Síngə́, Vɛnɛ́b də, dá kuùm *Yahudu bəd Vɛnɛ́b níì? Máàn oò kɔ̀ kùmsə̀n nɛ́b aa bə̀ bàg Vɛnɛ́b síndə Vɛnɛ́b kɔ̀ì? Vɛ́nà, Vɛnɛ́b kùmsə̀n nɛ́b aa bə̀ bàgə̀ síndə Vɛnɛ́b kɔ̀.

³⁰Vɛ́nà, Vɛnɛ́b gə́, tə́ nə́ŋ̀ní, bít dá nɛ́b bəd baàn boò tə́ wɔ̀ɔ̀lə̀ obəǹ númú, kə̀ bagǹmbə̀ Yéésù ra, *Yahudu bəd kə̀ nɛ́b kun gɔ̀ŋ bəraa bə̀ bàg Vɛnɛ́b síndə tá.

³¹Kə̀ aakíin də, pà' bə́n zá'ǹ indaŋ̀mbə̀ pɛ̀sə́ tə́ kíìn kə̀ tɛ́mbagké kpaŋ̀ bagǹmbèì? Ə́ùwə́, kàan gá! Bə́n piìn indaŋ̀mbə̀ pɛ̀sə́ vɛ́nà bə̀ oòra.