Read Samba Leko Roma 5 Bible Online

Roma 5 - Samba Leko bible

Roma 5

¹Kàandə, tɛ́mbagké bə́n bòórú, Vɛnɛ́b bàà taà bə́n nɛ́b wɔ̀ɔ̀lə̀ bərá. Bít Báá bə́n Tììkpɛ̀ŋ Yéésù Krístù bòórú, bə́n bɔbm̀ taà tɛbə̀ kə̀ oòra.

²Kə̀ Yéésù Krístù ra, bə́n báàn taà gbadǹnà bə̀ kə̀ tɛ́mbagkéá, kə̀ pə̀dkè Vɛnɛ́b bə̀ aa bə̀ zíg bə́n, bə́n tə́ən kuùm dú bə́ŋyée roó. Bít in aa tə́ bə́n tɛ́m làmkè piìn də, tɛ́m aa bə́n zígǹ, bɔ̀b pɛ̀d báan gabm̀ kaŋsɛ́l laa nyɛdkè Vɛnɛ́b bə̀ roó.

³Aa kàn nɛɛ̀n də, kóó bə́n tə́ən búúrú máá, báà kiìn tɛ́m làmkè gbà'á. Kàandə, bə́n gabm̀ yàá, búúd gə́, pii nɛ́ŋə̀ insidkéá;

⁴insidké pii nɛ́ŋə̀ kumsɛ́l və̀'kè tɛ́mbagké rú, kumsɛ́l və̀'kè tɛ́mbagké rú kɔ̀, pii nɛ́ŋə̀ tɛ́m zígkeá.

⁵Kə̀ tɛ́m zígke aa roó, bə́n bɔ̀'ǹ tɛ́mbagké gá sə́g sə́g. Kàandə, Vɛnɛ́b tùmà í'sɛ̀l oò obə́n tɛ́mú, kə̀ Nwul Gìdń oò aa pii bə́nnà roó.

⁶Kə̀ aakíin də, sɛŋ aa bə́n kə̀ kpɛŋsɛ́l naà síndə, Val kò' Krístù nɛ́b vaksə́ bə̀ bəd bòórú, sɛŋ aa Vɛnɛ́b və̀d zíg də ba.

⁷Gbò' tə́ kíìn gbà'ákù, nɛ́ŋə̀ nə́ŋ̀ í'ì val oò kò' bəǹ kíìn nɛ́ŋə̀ wɔ̀ɔ̀lə̀ bòórú gə́ roó. Kamgə́, nɛ́ŋə̀ nə́ŋ̀ dákíìn ke'ǹ val oò kò' bəǹ kíìn nɛ́d insɔ̀ɔ̀nkè bə̀ ma'ǹ bòórú.

⁸Zá Vɛnɛ́b ì' bə́nnà yàá, nɛɛ̀n aa í' bə́n dú gbàákù roó. Kàandə, sɛŋ aa bə́ŋ̀ bə́n tə́ən nɛ́b invaksə́ bə̀ ma'ǹ bəd də, val kò' taà Krístù obə́n bòórú.

⁹Bít kə̀ Krístù nyɛ̀lə́m aa za' roó, mà' bí' bə́n taà bə́ŋyée nɛ́b wɔ̀ɔ̀lə̀ Vɛnɛ́b númú. Dáà aarə tə́ kàangə́, Krístù súú bə́nnì kə̀ yíl oòra, Vɛnɛ́b nɔ̀m aa dáà yaànà númú rə rú.

¹⁰Nyàamdoorú rə, bə́n kuùmmà ɔ̀dmáàn kə̀ Vɛnɛ́bá. Zá bə́ŋyée gə́, bíd bə́n saŋ̀ì kə̀ oòra, Wàà oò val aa kò'ù rə bòórú. Bə́ŋyée bíd bə́n saŋ̀ kə̀ oò yée gə́, báan kíìn báàn súùnmbə̀ vɛ́nà, kə̀ Wàà oò gɔ̀ŋsá.

¹¹Nwɔŋ nə́ŋ̀ ɔ̀d tə́ sɔ̀ŋ' nɛɛ̀n aa Báá bə́n Tììkpɛ̀ŋ Yéésù Krístù mà' rú, bíd bə́n saŋ̀ kə̀ Vɛnɛ́b yérə, bə́n kiìn taà tɛ́m làmkè gbà'á oò númú.

¹²Kə̀ aakíin də, kə̀ nɛ́ŋ váàndo nə́ŋ̀ní tə́ŋtə́ŋ, Adamu ra, invaksə́ pìì taà yɛ́b ba. Bít kə̀ taàbìá, invaksə́ kɔ̀ àà taà nɛ́b bəd val ba. Bít nɛ́b bəd kóólé, bə̀ mà' invaksə́ yée gə́, val kɔ̀ tə́ bə̀ taà kodǹ boò kóólé kɔ̀.

¹³Bɔ̀b bə́ŋ̀ Vɛnɛ́b piià Musa indaŋ̀mbə̀ sé, invaksə́ kùm taà yɛ́b bə gbòód. Zá nɛ́ɛ̀m indaŋ̀mbə̀ kùm sín yée gə́, Vɛnɛ́b gád taà nɛ́b bəd invaksə́ sé.

¹⁴Kóó kàani, sɔ̀d Adamu sɛŋú, yaà wə́ə́ Musa ba, val ləə gààd nɛ́b bəd yílú. Nɛ́b aarə, bə̀ mà' invaksə́ kə̀ Adamu kíin sé; Adamu aa mà' invaksə́, ləə Vɛnɛ́b indaŋ̀mbə̀ síndoó. Adamu kùmsə̀n nɛ́ŋə̀ aa dáà yaànà númú rə nyìsàá. Nɛ́ŋə̀ aarə, Yéésù Krístù ra.

¹⁵Zá invaksə́ aa Adamu mà' rə, nɛ́ŋə̀ bán də́'ǹmbə̀ kə̀ in aa Vɛnɛ́b pii nɛ́ŋə̀ tɛdńní rə gá. Vɛ́nà, nɛ́b bəd zùúm val kòd bə̀ invaksə́ aa nɛ́ŋə̀ nə́ŋ̀ní tə́ŋtə́ŋ mà' rə bòórú. Zá pə̀dkè aa bə̀ bɔ̀b Vɛnɛ́b naà rə, kàŋ kàn sùnú. Nɛ́b bəd zùúm, bə̀ bɔ̀b in tɛdńní bə̀ gɔ̀ŋsə́ bə̀ aa Vɛnɛ́b pii roó, kə̀ pə̀dkè nɛ́ŋə̀ nə́ŋ̀ní bìá, Yéésù Krístù ra.

¹⁶Bít in tɛdńní bə̀ aa Vɛnɛ́b pii rə, wál kə̀ invaksə́ aa Adamu mà' rə sé. Íí bé' yàá, fágə́n Vɛnɛ́b bə̀ dáà yaànà invaksə́ aa nɛ́ŋə̀ nə́ŋ̀ní tə́ŋtə́ŋ mà' rə bòórú. Bít fágə́n aarə, dá nɛ́b bəd kóólé ko'ǹ, bít bə̀ dá piìn laa aa fə́' gá rə rú, zèd kə̀ zèrá. Zá in tɛdńní bə̀ aa Vɛnɛ́b piià rə, lɛ̀b fágə́n sɔ̀ɔ̀n Vɛnɛ́b bìá, bít fágə́n sɔ̀ɔ̀n aarə, bàà gə́, íí tə́ wɔ̀ɔ̀làá. Bít in tɛdńní bə̀ aa yaà sɛŋ aa invaksə́ zùúm ma'míìn sína yérə, lɛ̀b súúkeá.

¹⁷Vɛ́nà, val sɔ̀d gààd ləə̀nmbə̀ nɛ́b bəd yílú, invaksə́ aa nɛ́ŋə̀ nə́ŋ̀ní tə́ŋtə́ŋ mà' rə bòórú. Zá kə̀ Yéésù Krístù oò nə́ŋ̀ní, bə́n bɔbm̀ taà in aa kàŋ kàn nɛɛ̀n doó. Nɛ́b aa bə̀ bɔ̀b Vɛnɛ́b pə̀dkè gbà'á, bít Vɛnɛ́b ɛ̀g bə̀ kə̀ nɛ́b wɔ̀ɔ̀lə̀ bəd kíin oò númú rə, bə̀ dá kuùm kə̀ *gɔ̀ŋsə́ aa bɛ́d bə gá roó, bít bə̀ dá gààd ləə̀n Yéésù Krístù bòórú.

¹⁸Kə̀ aakíin, invaksə́ aa nɛ́ŋə̀ nə́ŋ̀ní tə́ŋtə́ŋ, Adamu, mà' rə, àà sə̀n nɛ́b bəd kóólé fágə́nú. Bít nɛɛ̀n aarə rú ní sɔ̀ŋ, tù' wɔ̀ɔ̀lə̀ aa nɛ́ŋə̀ nə́ŋ̀ní, Yéésù Krístù, mà' rə, bìnlɛ́' nɛ́b bəd kóólé fágə́nú, bít Vɛnɛ́b bàà boò tə́ wɔ̀ɔ̀làá, bít boò dá *gɔ̀ŋsə́ aa bɛ́d bə gá rə bɔbàá.

¹⁹Kə̀ aakíin, nɛɛ̀n aa nɛ́ŋə̀ nə́ŋ̀ní tə́ŋtə́ŋ məə Vɛnɛ́b ləə̀nmbə̀ rə bòórú, mà' bí' taà nɛ́b bəd zùúm, nɛ́b invaksə́ bə̀ ma'ǹ bərá. Bít nɛɛ̀n aarə rú ní sɔ̀ŋ, nɛɛ̀n aa nɛ́ŋə̀ nə́ŋ̀ní ləə Vɛnɛ́b dú rə, kə̀ oòra, mà' bí' taà nɛ́b bəd zùúm wɔ̀ɔ̀lə̀ Vɛnɛ́b númú.

²⁰Indaŋ̀mbə̀ yaà zɔ̀ŋ yɛ́b bərə, bɔ̀b invaksə́ oò tóó kúnú. Zá zɔ̀ŋ aa invaksə́ tóó bərə, pə̀dkè Vɛnɛ́b bə̀ kɔ̀ tóó dá nɛɛ̀n taàn dú zɔ̀ŋ də ba.

²¹Kə̀ aakíin də, nɛɛ̀n aa invaksə́ ləə gààd dú nɛ́b bəd yílú kə̀ val lə, nɛɛ̀n aarə rú, pə̀dkè Vɛnɛ́b bə̀ kɔ̀ ləə taà gààd nɛ́b bəd yílú, bɔbm̀ bí'ǹmbə̀ obə́n bə̀ wɔ̀ɔ̀làá, bɔbm̀ aànmbə̀ obə́n bə̀ *gɔ̀ŋsə́ aa bɛ́d bə gá rə rú, kə̀ Báá bə́n Tììkpɛ̀ŋ Yéésù Krístù ra.