Read Samba Leko Roma 6 Bible Online

Roma 6 - Samba Leko bible

Roma 6

¹Zá bə́ŋyée báan baàn leè gú? Báan diìn invaksə́ ma'ǹ dáànmbə̀ kə̀ númú, bɔ̀b pə̀dkè Vɛnɛ́b bə̀ tóó oò kàn nɛɛ̀n dúì?

²Vɛ́nà, kàan gá! Bə́n pɛdǹnì kə̀ invaksá. Ééleè báan taà diìn kuùmbə̀ invaksə́ rú sɔ̀ŋì?

³Gabm̀bə̀ baptisma aa bə̀ pii ii yérə, bɔbm̀ wáàlǹmbə̀ kə̀ Yéésù Krístù ra, oò valə́ rə, íí gàb sínì?

⁴Baptisma aa bə̀ pii bə́n də, mà' tə́ kìínmbə̀ bə̀ lə̀ə̀ bə́n tə́ kə̀ oò tá, val aa kò'ù rə bòórú kíin. Kə̀ nɛɛ̀n aa Krístù zá' rú valú, kə̀ kpɛŋsɛ́l gbà'á, bít kə̀ kaŋsɛ́l laa nyɛdkè gbà'á báá oò bə̀ rə kíin, obə́n kɔ̀ báà kuùm kə̀ kumsɛ́l puuá.

⁵Kàandə, dáà bə́n wáàlǹnì kə̀ oòra valú, kìínmbə̀ nɛɛ̀n aa val kò'ù rú rə kíin gə́, báan wáàl tə́ kə̀ nɛɛ̀n aarə kíin sɔ̀ŋ kə̀ oòra, díìmbə̀ valú, kìínmbə̀ nɛɛ̀n aa oò kɔ̀ díím dú rə kíin.

⁶Báà gabm̀ in aa kíìn sɔ̀ɔ̀nkè' nɛɛ̀n aa nɛ́ŋə̀ kùm dú nyàamdoorú rə, bə̀ lò'ù yàá kə̀ Krístù tá, téélɛŋké ba, bɔ̀b si' vaksə́ bə́n aa nyàamdoorú rə, oò yɛɛ̀l kúnú; bɔ̀b bíd báà kuùm invaksə́ kɔ̀' sɔ̀ŋ sí.

⁷Kàandə, nɛ́ŋə̀ aa val kò'ùwì rə, bìn bə̀ lɛ́'ùwì invaksə́ nɛɛ̀n tɛ́mú.

⁸Zá dáà val kòd bə́nì kə̀ Krístù tə́ gə́, bə́n ke'ǹ yàá báan kuùm kə̀ gɔ̀ŋsá, kə̀ Krístù tá.

⁹Kə̀ aakíin də, bə́n gabm̀ yàá, sɔ̀d sɛŋ aa Krístù díím kə̀ valə́ roó, oò gə́, bíd val kò'ù sɔ̀ŋ gá. Val ləə gààd oò yílə́ sɔ̀ŋ sé.

¹⁰Val tə́ù ko'ǹ də, pɛrì kə̀ invaksá, sɛŋ nə́ŋ̀ní tə́ŋtə́ŋ. Zá bə́ŋyée tə́ kə̀ gɔ̀ŋsá, bɔ̀b oò sɔ̀ɔ̀n Vɛnɛ́bá.

¹¹Kə̀ nɛɛ̀n aa yée kíin, aí kɔ̀ ìì zíg yíl íí kìínmbə̀ íí pɛrì kə̀ invaksə́ kíin. Zá kə̀ wálke aí bə̀ kə̀ Krístù ra, íí nɛ́b galə̀ bərá, bɔ̀b ìì sɔ̀ɔ̀n Vɛnɛ́b kúnú.

¹²Kə̀ aakíin də, ìì dàà invaksə́ oò ləə gààd si' íí aa dá vadǹ yée yílə́ sí, bɔ̀b ìì mà' in aa si' íí í' rə sí.

¹³Ìì zíg zɔ̀ŋ bəraa íí sisú rə, kìínmbə̀ in tù' vaksə́ bə̀ ma'ǹ bəd kíin sí. Zá ìì pii yíl íí Vɛnɛ́b naú, kìínmbə̀ nɛ́b aa bə̀ díímà valə́ rə kíin. Bít ìì pii yíl íí kə̀ zɔ̀ŋtá, tù' oò bə̀ ma'ǹmbìá, bɔ̀b tù' wɔ̀ɔ̀lə̀ ma'ǹ zə́'ǹmbìá.

¹⁴Kàandə, invaksə́ oò ləə gààd aí yílə́ sɔ̀ŋ sí. Kə̀ aakíin də, íí kùm indaŋ̀mbə̀ kɔ̀' sɔ̀ŋ sé, zá ìì dàà pə̀dkè Vɛnɛ́b bə̀ oò ləə sə̀n gààd aí yílú.

¹⁵Zá bə́ŋyée báan baàn leè gú? Vɛnɛ́b indaŋ̀mbə̀ ləə gààd obə́n yílə́ sé. Pə̀dkè Vɛnɛ́b bə̀ ləə sə̀n gààd obə́n yílə́ yée gə́, mà' báan taà invaksə́ dáàn kə̀ númúì? Vɛ́nà, kàan gá.

¹⁶Íí gàb aarə sínì? Dáà íí pii yílə́ì nɛ́ŋə̀ nə́ŋ̀ naú, oò bə̀ tù' ma'ǹmbə̀ gə́, íí dá nwɔŋ oò bə̀ ləənàá; bít íí bíl kɔ̀'vɔ̀ɔ̀m oò bəd yàá, oò kɔ̀ kùmì nɛ̀n íí ra. Íí dá nwɔŋ oò ləənàá. Íí tə́ invaksə́ nwɔŋ ləə̀n gə́, val dá ii kíìn ko'nàá. Zá íí tə́ Vɛnɛ́b nwɔŋ ləə̀n gə́, íí dá kuùm wɔ̀ɔ̀lə̀ Vɛnɛ́b númú.

¹⁷Zá báà piìn Vɛnɛ́b mɔ̀'keá. Nyàamdoorú rə, íí kùmà invaksə́ kɔ̀' bərá. Zá bə́ŋyée gə́, íí ləə insánke Vɛnɛ́b bə̀ aa íí bɔ̀bà rəì kə̀ tɛ́m íí tə́ kóólé.

¹⁸Vɛnɛ́b káákè' iiyàì invaksə́ nɛɛ̀n tɛ́mú. Bít bə́ŋyée kɔ̀, íí bíl Vɛnɛ́b kɔ̀' yàá, bɔ̀b ìì mà' in aa dá kuùm wɔ̀ɔ̀lə̀ roó.

¹⁹Mə́ gámi kɔ̀' nwɔŋ kàandə, mə́ í' kìì ìì gàb nwɔŋ aa mə́ tə́ ii baàn doó. Nyàamdoorú rə, íí piià si' íí kóólé kìínmbə̀ innyìbbə̀ kɔ̀' kíin, bít íí dìì in aa sɔ̀ɔ̀nsín də ma'ǹ dáànmbə̀ kə̀ númú. Kə̀ aakíin də, bə́ŋyée gə́, ìì pii yílí kə̀ zɔ̀ŋtá, kìínmbə̀ kɔ̀' kíin, tù' wɔ̀ɔ̀lə̀ ma'ǹmbìá, bɔbm̀ ma'ǹmbə̀ in aa tə́ gìdń doó.

²⁰Sɛŋ aa íí kùmà invaksə́ kɔ̀' rə, nɛ́ŋə̀ nə́ŋ̀má pè' ii, bɔ̀b ìì mà' in aa tə́ wɔ̀ɔ̀lə̀ rə sé.

²¹Íí bɔ̀bà níì kə̀ tù' bəraa íí mà', bít tə́ ii sə́ə́mnúù piìn bə́ŋyée rə bə gú? Tù' bəraa rə, àà nɛ́ŋə̀ valú!

²²Zá bə́ŋyée Vɛnɛ́b káákè' iiyì invaksə́ nɛɛ̀n tɛ́mú, bít íí tə́ Vɛnɛ́b tù' ma'nàá. Íí bɔ̀b Vɛnɛ́b tə́ ii sə̀n gubàá, kuùmbə̀ kə̀ gɔ̀ŋsə́ *gìdńná, bídǹ bɔbm̀bə̀ *gɔ̀ŋsə́ aa bɛ́d bə gá rə bòórú.

²³Kàandə, invaksə́ dùm gə́, valá. Zá in aa Vɛnɛ́b pii nɛ́ŋə̀ tɛdńní rə gə́, *gɔ̀ŋsə́ aa bɛ́d bə gá roó, wálke kə̀ Báá bə́n Tììkpɛ̀ŋ Yéésù Krístù ra.