Read Samba Leko Roma 8 Bible Online

Roma 8 - Samba Leko bible

Roma 8

¹Kə̀ taàbìá, bə́ŋyée gə́, nɛ́b aa bə̀ wál kə̀ Yéésù Krístù rə, Vɛnɛ́b fág kò' bə̀ sɔ̀ŋ gá.

²Kàandə, indaŋ̀mbə̀ Nwul Gìdń aa pii gɔ̀ŋsə́ vɛ́nà bə̀ kə̀ wálke kə̀ Yéésù Krístù rə, kè' lɛ́' mə́ì invaksə́ indaŋ̀mbə̀ nɛɛ̀n tɛ́mú, kə̀ val nɛɛ̀n tɛ́mú.

³Vɛnɛ́b mà' in aa Musa indaŋ̀mbə̀ mà' bán gá roó. Kàandə, invaksə́ aa ləə gààd máá tɛ́mú rə, kə̀ kpɛŋsɛ́l naà sé. Vɛnɛ́b fág kò' invaksə́ nɛ́ŋə̀ tɛ́mú bə̀ kə̀ Wàà oò tuùmbìá. Yaà kìínmbə̀ nɛ́ŋə̀ sisaa í' invaksə́ ma'ǹmbə̀ ní rə kíin. Yéésù yaà kìínmbə̀ sadaka kíin, bɔ̀b invaksə́ fágǹ ko'ǹmbìá, bít invaksə́ pa'ǹ zá'ǹmbìá.

⁴Vɛnɛ́b mà' in aarə, bɔ̀b báà kuùm kə̀ nɛɛ̀n aa Nwul Gìdń í' rə kíin, bít báà ma'ǹ in aa tɛ́m bə́n í' rə sí, zá báà ma'ǹ in wɔ̀ɔ̀lə̀ aa indaŋ̀mbə̀ dɛ̀d doó.

⁵Kə̀ aakíin də, nɛ́b aa kùm kìínmbə̀ nɛɛ̀n aa tɛ́m boò í' rə kíin də, bə̀ dá in aa tɛ́m boò dɛ̀d bə̀ rə saanàá. Zá nɛ́b aa kùm kìínmbə̀ nɛɛ̀n aa Nwul Gìdń í' rə kíin də, bə̀ dá in aa Nwul Gìdń dɛ̀d bə̀ rə saanàá.

⁶Nɛ́ŋə̀ aa sàà in aa tɛ́m oò í' rə, val dáù kíìn ko'nàá. Zá nɛ́ŋə̀ aa sàà tə́ in aa Nwul Gìdń dɛ̀d də gə́, Vɛnɛ́b dáù gɔ̀ŋsə́ piìn kə̀ tɛbə̀ tá.

⁷Nɛ́b aa bə̀ sèl tə́ in aa tɛ́m boò í' rə ní rə, bə̀ Vɛnɛ́b ɔ̀dmáàn bərá, bít bə̀ ləə Vɛnɛ́b indaŋ̀mbə̀ nwɔŋ sé; bə̀ bánə̀ ləə̀nmbə̀ gá má.

⁸Nɛ́b aa bə̀ kùm kə̀ nɛɛ̀n aa tɛ́m boò í' rə kíin də, bə̀ sɔ̀ɔ̀n Vɛnɛ́b gá.

⁹Dáà Vɛnɛ́b Nwul Gìdń kùmì aí tɛ́mú vɛ́nà gə́, íí kùm kìínmbə̀ nɛɛ̀n aa tɛ́m íí í' ìì mà' rə kíin gá. Màn aa kə̀ Krístù Nwul naà síndə, nɛ́ŋə̀ oò gá.

¹⁰Kóó dáà Krístù mà' tù' tə́ aí tɛ́mú máá, invaksə́ bòórú, si' íí bəd dákíìn valàá. Bít nɛɛ̀n aarə rú, Vɛnɛ́b Nwul Gìdń dá ii sə̀n gɔ̀ŋsə́ piinàá. Kə̀ taàbìá, Vɛnɛ́b bàà taà íí tə́ wɔ̀ɔ̀lə̀ obəǹ númú.

¹¹Dáà Vɛnɛ́b aa díímà Yéésù valə́ rə, Nwul oò kùm tə́ aí rú gə́, oò ní sɔ̀ŋ, dá sə̀n si' íí bəraa dá vaàl yérə gɔ̀ŋsə́ piìn kə̀ Nwul Gìdń aa kùm aí rú yéroó.

¹²Tə́ kàangə́, ɔ̀dkudvɛɛ̀l mə́ bərá, bə́n tə́ən kə̀ kpob naú. Zá kpob aa bə́n kə̀ naà rə, mà' bə́n, bə́n kuùm kìínmbə̀ nɛɛ̀n aa tɛ́m bə́n í' rə kíin gá.

¹³Kàandə, dáà íí kùm tə́ kìínmbə̀ nɛɛ̀n aa tɛ́m íí í' rə kíin gə́, val dá ii kíìn koràá. Zá dáà kə̀ láŋke Nwul bìá, íí tə́ taà invaksə́ aa si' íí í' ma'ǹmbə̀ rə lo'ǹ gə́, íí dá kuùm kə̀ gɔ̀ŋsá.

¹⁴Nɛ́b aa bə̀ tə́ Vɛnɛ́b Nwul Gìdń ləə̀n də, bə̀ kùmsə̀n Vɛnɛ́b yɛbá.

¹⁵Kàandə, nwul aa íí bɔ̀b də, kùmsə̀n nwul aa bí' ii kɔ̀sá, bít tə́ ii nyí'ǹ kə̀ də́dǹ sɔ̀ŋ də gá. Zá Nwul Gìdń mà' bí' ii sə̀n Vɛnɛ́b yɛbá, bít tə́ bə́n kpaŋ̀ piìn báà dɛdǹ Vɛnɛ́b: «Báá!»

¹⁶Vɛnɛ́b Nwul kə̀ nwul obə́n bə̀ tá, wál bə̀ bàà gə́, bə́n Vɛnɛ́b yɛbá.

¹⁷Bə́n kuùm Vɛnɛ́b yɛb yée gə́, báan taà insɔ̀ɔ̀n aa Vɛnɛ́b bàà dàà nɛ́b oò bəd də bɔbm̀ kìínmbə̀ valligə̀ kíin. Báan bɔbm̀ kə̀ Krístù tá. Kàandə, bə́n bé'ǹ búúrì kə̀ oò tə́ gə́, báan kuùm kə̀ oò tá, oò kaŋsɛ́lú.

¹⁸Mə́ gàb yàá vɛ́nà, búúraa bə́n tə́ən bé'ǹ bə́ŋyée rə, nɛ́ŋə̀ bán də́'ǹmbə̀ kə̀ kaŋsɛ́l laa nyɛdkè bə̀ aa Vɛnɛ́b dá bə́nnà piìn də gá.

¹⁹In bəraa Vɛnɛ́b séé rə gə́ kóólé, bə̀ tə́ nwáàn bé'ǹmbə̀ kə̀ niŋsɛ́lá, sɛŋ aa Vɛnɛ́b dá yɛb oò bəd kaŋsɛ́l i'ǹ bəroó.

²⁰Kàandə, in bəraa Vɛnɛ́b séé rə gə́ kóólé, bíl in tɛdń bəd yàá. Aarə, bə̀ í' sə̀n kə̀ yíl boò bə̀ gá, zá Vɛnɛ́b zíg bə̀ sə̀n kàani. In bəraa Vɛnɛ́b séé rə, bə̀ tə́ tɛ́m zígàá,

²¹kàandə, bìn bə̀ dá bə̀ kíìn lɛ́'nàá, bə̀ kùm innwɔnké kɔ̀' sɔ̀ŋ gá. Nɛɛ̀n aarə rú, bìn bə̀ dá Vɛnɛ́b yɛb kíìn lɛ́'nàá, bít bə̀ dá kaŋsɛ́l laa nyɛdkè boò kíìn bɔbàá.

²²Bə́ gàb yàá, kàandə, bə́ŋyée sɔ̀ŋ, in bəraa Vɛnɛ́b séé rə gə́ kóólé, bə̀ tə́ kíìn dəənàá, bít bə̀ tə́ nwukè kiinàá, kìínmbə̀ nɛ́ŋ kéèndo aa tə́ wàà lɛbm̀ də kíin.

²³In bəraa Vɛnɛ́b séé rə ní gá, zá bə́n nɛ́b aa bə́n kə̀ Nwul Gìdń naà, kìínmbə̀ in tɛdńní bə̀ aa éèn Vɛnɛ́b pii rə kíin də kɔ̀, bə́n dəə̀n tə́ tɛ́mú. Bə́n nwáàn Vɛnɛ́b oò kè' bə́n kìínmbə̀ yɛb oò bəd kíin, bít bìn oò lɛ́' bə́n kíìn val nɛɛ̀n tɛ́mú.

²⁴Kə̀ aakíin də, Vɛnɛ́b súú bə́nnà yàá. Zá aarə sɔ̀ŋ, in tɛ́m bə̀ zígǹná. In aa ń bé' núùrú rə, bít ń dáù tɛ́m zígǹ bə sɔ̀ŋì?

²⁵Zá dáà bə́n zígǹ tɛ́mì in aa bə́n bé'ǹ núùrú síndə bə gə́, bə́n nwáànnə̀ tə́ kə̀ tɛ́m sidkéá.

²⁶Kə̀ nɛɛ̀n aa yée kíin, Nwul Gìdń kɔ̀ yaà láŋ bə́n tə́ ba, nɛ́b aa bə́n kə̀ kpɛŋsɛ́l naà tɛ́m zígǹmbə̀ Vɛnɛ́b bə síndoó. Kàandə, bə́n gabm̀ Vɛnɛ́b nyɛɛ̀mbə̀ kə̀ nɛɛ̀n aa dá sɔɔ̀n dú rə kíin sé. Zá Nwul Gìdń kə̀ yíl oòra, nyɛ̀m Vɛnɛ́b tə́ kə̀ obə́n da, kə̀ dəə̀nmbə̀ bə́n aa bə́n báàn gáàmbə̀ kə̀ gú' gá roó.

²⁷Bít Vɛnɛ́b gə́, ɛ̀g bé' in aa nɛ́b bəd tɛ́mú rə yàá. Gàb in aa Nwul Gìdń í' dɛdǹmbə̀ rə yàá. Kə̀ aakíin də, Nwul Gìdń nyɛ̀m Vɛnɛ́b tə́ kə̀ Vɛnɛ́b nɛ́b bərá, kìínmbə̀ nɛɛ̀n aa Vɛnɛ́b í' rə kíin.

²⁸Bə́n gabm̀ yàá, in gə́ kóólé, Vɛnɛ́b mà' tù' sɔ̀ɔ̀nkè tə́ kə̀ nɛ́b aa tə́ù í'ǹ doó. Nɛ́b aa dɛ̀d bà, kə̀ nɛɛ̀n aa í' rú rə kíin doó.

²⁹Kə̀ aakíin də, nɛ́b aa Vɛnɛ́b sààvúŋ bà nyàamdoorú rə, zíg bà nyàamdoorú, boò lúŋ Wàà bəǹ da, bɔ̀b Wàà bəǹ kɔ̀ oò kùm wàà éèn də̀gə̀ də̀gə̀ bìá, ɔ̀dkudvɛɛ̀l zùúm bəd tə́ŋú.

³⁰Nɛ́b aa Vɛnɛ́b sàà zíg bà nyàamdoorú rə, dɛ̀d bà sə̀ní kɔ̀. Nɛ́b aa dɛ̀d bə̀ rə kɔ̀, pà' bí' bə̀ sə̀ní nɛ́b wɔ̀ɔ̀lə̀ bəd oò númú. Bít nɛ́b aa bí' bə̀ nɛ́b wɔ̀ɔ̀lə̀ rə kɔ̀, pɛ̀d gàbà sə̀ní kaŋsɛ́l oò kə̀ boò ra.

³¹Báan níì báàn baànmbə̀ sɔ̀ŋ gú? Dáà Vɛnɛ́b tə́ kə̀ obə́n tə́ gə́, nɛ́ɛ̀réè dá sə̀n nə́gə̀d nə́'ǹ kə̀ obə́n gú?

³²Wàà oò má, məəù kò'ǹ piìnmbə̀ kìínmbə̀ sadaka kíin, obə́n bòórú sé. Kò' piiù obə́n bòórú, bə́n kóólé. Ééleè pii bə́n taà in bəd kóólé, kə̀ wàà oò gá gú?

³³Nɛ́ɛ̀réè dá sə̀n báàn nɛ́b aa Vɛnɛ́b sààvúŋà rə pe'ǹmbə̀ kə̀ gú' gú? Nɛ́ŋə̀ nə́ŋ̀má sé. Kàandə, Vɛnɛ́b kə̀ yíl oòra, bàà sə̀n boò tə́ wɔ̀ɔ̀làá.

³⁴Kàandə, nɛ́ɛ̀réè dá bə̀ sə̀n báàn fágǹ ko'ǹmbə̀ gú? Nɛ́ŋə̀ nə́ŋ̀má sé. Krístù kùmsə̀n nɛ́ŋə̀ aa val kò'ù obə́n bòórú roó. Bítsɔ̀ŋ, díímì valú. Bə́ŋyée kùm tə́ Vɛnɛ́b nɛɛ̀n váànú, bít nyɛ̀m Vɛnɛ́b tə́ kə̀ obə́n da.

³⁵Nɛ́ɛ̀réè dá bə́n sə̀n báàn pɛdm̀bə̀ kə̀ í'sɛ̀l Krístù bə̀ gú? Nwuukè dá sə̀n bánì, sínkɔ̀ tɛ́m nyágə́lkeì, vɔgəlkéì, kóó gulùmì, invaksə́ aa dá bə́n wə́ə̀n deè, kóó yɛ́rə̀ bùúrì?

³⁶Kìínmbə̀ bád bə̀ dàà Núúboòd Gìdńnú rə kíni: «Nɛɛ̀n aa bə́ tə́ən bagǹ də bòórú, bə́ tə́ taà val bɔbm̀ nyàm gə́ kóólé, bít bə̀ tə́ bə́ taà bí'ǹ kìínmbə̀ bɛ̀rə̀ bəraa gùb bə̀ tə́ aàn zɔ̀ŋ wéènmbə̀ bərə kíin.»

³⁷Zá kóó kə̀ in bəraa tə́ kóólé, nɛ́ŋə̀ aa í' bə́nnà rə, pii bə́nnà kpɛŋsɛ́lì, bɔ̀b báà kaàn in gə́ kóólé.

³⁸Kàandə, mə́ gàb yàá vɛ́nà, in nə́ŋ̀má bán bə́n pɛdǹmbə̀ kə̀ í'sɛ̀l oò gá' Kóó valá, kóó gɔ̀ŋsá, kóó *malaika bərá, kóó nɛ́b gbàád yɛ́b bə̀ bərá, kóó bə́ŋyóo, kóó nwúndùá, kóó kpɛŋsɛ́l bərá,

³⁹kóó kpɛŋsɛ́l bəraa lɛgə́ paà roó, kóó kpɛŋsɛ́l bəraa yɛ́b dùù roó, kóó in ɔ̀ɔ̀raa Vɛnɛ́b séé roó, in nə́ŋ̀má dá bə́n báàn pɛdǹmbə̀ kə̀ í'sɛ̀l aa Vɛnɛ́b ì' bə́nnà kə̀ Yéésù Krístù, Báá bə́n Tììkpɛ̀ŋ də gá.