Read Samba Leko 1 Korintu 1 Bible Online

1 Korintu 1 - Samba Leko bible

1 Korintu 1

¹Núúboòraa vúgà máá mə́ Pol naú, kə̀ nɛɛ̀n aa Vɛnɛ́b í' rə kíin, dɛ̀d máà yaà máà kùm *Yéésù Krístù gbantumsàá, kə̀ ɔ̀dkudvɛɛ̀l bə́n Sostena tá.

²Mə́ bád núúboòraa yée, *Eklisiya Korintu bìlú bìá, mə́ bád nɛ́b aa bə̀ bí' bə̀ gìdń, kə̀ wálke kə̀ Yéésù Krístù roó, mə́ bád nɛ́b aa Vɛnɛ́b dɛ̀d bə̀, boò kùm *gìdńná, bít zɔ̀ŋ gə́ kóólé, bə̀ tə́ Báá bə́n Tììkpɛ̀ŋ Yéésù Krístù nə́gə́l dɛràá, báá boò Tììkpɛ̀ŋá, bít obə́n kɔ̀ Báá bə́n Tììkpɛ̀ŋ doó.

³Mə́ dɔ̀mi yàá. Báá bə́n Vɛnɛ́b, kə̀ Báá bə́n Tììkpɛ̀ŋ Yéésù Krístù tá, boò mà' ii pə̀dkèá, bít boò pii ii tɛbàá.

⁴Mə́ kpɛd Vɛnɛ́b mɔ̀'ǹmbə̀ aí bòórú sé, kə̀ pə̀dkè aa Vɛnɛ́b mà' iiyà kə̀ Yéésù Krístù roó.

⁵Kə̀ aakíin də, nɛɛ̀n aa kùm íí wál lú kə̀ Yéésù Krístù rə, nyí' ii taà kə̀ gbaŋə̀ zùúm nwɔŋ bə̀ gám̀má, bít in bə̀ gabm̀má.

⁶Nwɔŋ aa bə́ bàà ii Yéésù Krístù yílə́ rə, kùm tə́ və̀'kèá aí tɛ́mú.

⁷Kə̀ taàbìá, Vɛnɛ́b pii ii taà pə̀dkè sɔ̀ɔ̀n gə́ kóólé, nɛ́b aa kùm ìì tə́ sɛŋ aa Báátììkpɛ̀ŋ Yéésù Krístù dáà bídǹnà bərə nwáàn doó, bɔ̀b kóó nɛ́ɛ̀réè, oò bé'ù kúnú.

⁸Bít Vɛnɛ́b kɔ̀ dáá ii kíìn kpɛ́ŋàá, yaà dá wə́ə̀n sɛŋ bɛ́dke bə zé, bɔ̀b nɛ́ŋə̀ nə́ŋ̀má oò pè' ii kə̀ invaksə́ sɛŋ yaaké Báá bə́n Tììkpɛ̀ŋ Yéésù Krístù bə̀ bə sí.

⁹Vɛnɛ́b gə́, mà' in aa bàà bəǹ dá ma'ǹ də kúnú. Dɛ̀d wáliyà, ìì kùm wálke kə̀ Wàà oò Yéésù, Báá bə́n Tììkpɛ̀ŋ tá.

¹⁰Ɔ̀dkudvɛɛ̀l mə́ í'sɛ̀lbə̀ bərá, mə́ tə́ ii nyɛɛ̀m Báá bə́n Tììkpɛ̀ŋ Yéésù Krístù nə́gə́lú. Ìì wál gú' ɔ̀dba, bít bɛŋə̀ oò kùm aí tə́ŋú sí. Zá wál ìì kùm ɔ̀dbə sɔ̀ɔ̀nkè, in aa íí tə́ seèl lə rú kóólé, bít kə̀ in bəraa íí í' ma'ǹmbə̀ rə rú.

¹¹Ɔ̀dkudvɛɛ̀l mə́ í'sɛ̀lbə̀ bərá, mə́ kìì álsɛ̀l zá' tə́ aí tə́ŋú, nɛ́b Kloe yiìl bə̀ bəd yaà bə̀ bàà mə́ sùnú.

¹²Nwɔŋ aa mə́ í' baànmbə̀ rə yóo' íí tə́ŋú máá, íí gám nwɔŋ bəd tə́ gɔ̀ŋ gɔ̀ŋ. Nɛ́ŋə̀ nə́ŋ̀ bàà: «Máá gə́, má Pol bagàá.» Nɛ́ŋə̀ nə́ŋ̀ ɔ̀d kɔ̀ bàà: «Máá gə́, má Apolos bagàá.» Nə́ŋ̀ ɔ̀d kɔ̀ bàà: «Máá gə́, má Piyɛr bagàá.» Bít nɛ́ŋə̀ nə́ŋ̀ ɔ̀d kɔ̀ bàà: «Máá gə́, má Krístù bagàá.»

¹³Krístù rə, pɛd tə́ naì? Val kò' sə̀n Pol téélɛŋké bə aí bòórúì? Bə́ pii ii baptisma Pol nə́gə́lúì?

¹⁴Mə́ mɔ̀' Vɛnɛ́b yàá, kə̀ nɛɛ̀n aa mə́ pii kóó nɛ́ŋə̀ nə́ŋ̀má baptisma aí tə́ŋə́ sín yéroó. Zá mə́ pii baptisma rə Kripus kə̀ Gayus tə́ ní.

¹⁵Kə̀ aakíin də, kóó nɛ́ŋə̀ nə́ŋ̀má bán baànmbə̀ íí bɔ̀b baptisma máá nə́gə́lə́ gá.

¹⁶(Èè, vɛ́nà! Mə́ pii nɛ́b bəd baptisma Estefanas yiìl kɔ̀. Zá nɛ́b kam bəraa nyɛ́d də, nɛ́ŋə̀ nə́ŋ̀má sèl mə́ zá' mə́ piiù baptisma sé.)

¹⁷Kə̀ taàbìá, Krístù tùm máà, máà pii nɛ́b bəd baptisma gá. Kə̀ taàbìá, bàà mə́ gəə̀l máà bàà *Nwɔŋ Puu Sɔ̀ɔ̀nkèá. Bít mə́ tə́ Nwɔŋ Puu Sɔ̀ɔ̀nkè gəə̀l baàn gə́, mə́ gám nwɔŋ aa nɛ́b zɔ̀ŋə yɛ́b bə bə̀ tə́ gáàm ingabké yílə́ rə gá, bɔ̀b máà dàŋ Krístù kpɛŋsɛ́l aa vàd téélɛŋké bərə sí.

¹⁸Kə̀ aakíin də, nwɔŋ aa bə̀ ùd Yéésù Krístù val aa kò'ù téélɛŋké bərə yílə́ rə, nɛ́b aa bə̀ tə́ bɔ̀bə̀l də gə́, bə̀ ɛ̀g nwɔŋ aarə tə́ kìínmbə̀ kèéd nwɔŋ kíin. Zá nɛ́b aa bə́n tə́ən kpaŋ̀ súúke bə̀ bərə, nwɔŋ aarə kùmsə̀n kpɛŋsɛ́l Vɛnɛ́b bìá.

¹⁹Núúboòd Gìdń bàà: «Má nɛ́b in bə̀ gabm̀ bəd ingabké boò kíìn bɔ̀'nàá. Bít vúŋ má nɛ́b aa bə̀ kə̀ yílə naà rə, ingabké kíìn lɛ́'nàá.»

²⁰Bít bə́ŋyée nɛ́d in bə̀ gabm̀ aa Grɛg bəd tə́ŋə́ rə, dá níì nwɔŋ baàn sɔ̀ŋ gú? Nɛ̀n indaŋ̀mbə̀ *Yahudu bəd bə̀ dá níì nwɔŋ baàn sɔ̀ŋ gú? Nɛ́d gú' làmkè bə̀ gáàm dá níì nwɔŋ baàn sɔ̀ŋ gú? Vɛnɛ́b bàà ì' gə́, ingabké boò bəraa zɔ̀ŋə yɛ́b bərə, tù' kèéd bərá.

²¹Kə̀ aakíin də, nɛ́ŋə̀ zɔ̀ŋə yɛ́b bə bə̀ bán Vɛnɛ́b gabm̀bə̀ kə̀ ingabké oò gá, bán zɔ̀ŋ aa ingabké Vɛnɛ́b bə̀ vúg bərə gabm̀bə̀ gá. Nɛ́b bəd bə̀ gàb Vɛnɛ́b kə̀ ingabké boò sín yée gə́, Vɛnɛ́b sèl níì ma'ǹmbə̀ gú? Vɛnɛ́b sèl boò bə̀ súùnmbə̀ kə̀ in aa nɛ́b zɔ̀ŋə yɛ́b bə bə̀ tə́ ɛgǹ kìínmbə̀ in kèéd kíin yéroó. Taà kùmsə̀n baànmbə̀ nwɔŋ aa bə̀ ùd Yéésù val aa kò'ù téélɛŋké bərə yílú roó. Kàandə, nɛ́b aa bə̀ bàg Yéésù rə, boò ra bə̀ súú sùnú.

²²Sɛŋ aa *Yahudu bəd tə́ inkɔrə bəd saàn də, Grɛg bəd kɔ̀ bə̀ sàà ingabkéá.

²³Zá obə́ gə́, bə́ tə́ nwɔŋ aa bə̀ bág kə̀ Krístù téélɛŋké bərə baanàá. Yahudu bəd naà gə́, nwɔŋ aarə tə́ kìínmbə̀ bəŋ aa nɛ́ŋə̀ dá dunwà yíl ta'ǹ bərə kíin. Bít nɛ́b aa bə̀ bàg Vɛnɛ́b síndə gə́, bə̀ ɛ̀g nwɔŋ aarə tə́ kìínmbə̀ nwɔŋ kèéd bə̀ kíin.

²⁴Zá nɛ́b aa Vɛnɛ́b dɛ̀d bə̀ rə gə́ kóólé, kóó dáà boò kùm *Yahudu bərá, sínkɔ̀ nɛ́b aa bə̀ bàgə̀ síndoó, boò kóólé bə̀ gàb yàá, oòra kùmsə̀n Krístù. Oòra kùmsə̀n Vɛnɛ́b kpɛŋsɛ́lá, bít kə̀ Vɛnɛ́b ingabkéá.

²⁵In aa Vɛnɛ́b mà' rə, lúŋ tə́ in kèéd bə̀ nɛ́b bəd núùrú. Zá aarə kàn nɛ́b bəd ingabké yàá. Bít in aa Vɛnɛ́b mà' nɛ́b bəd ɛ̀g kìínmbə̀ Vɛnɛ́b kə̀ kpɛŋsɛ́l naà síndə kíin də, kànsə̀n nɛ́b bəd kə̀ kpɛŋsɛ́lá.

²⁶Ɛ̀g ìì gàb kúnú, ɔ̀dkudvɛɛ̀l mə́ bərá, aí gə́, íí nɛ́ɛ̀réè, nɛ́b aa Vɛnɛ́b dɛ̀riyà roó. Nɛ́b bəd núùrú gə́, nɛ́b in bə̀ gabm̀ bəd bə̀ ká' aí tə́ŋú sé, nɛ́b kpɛŋsɛ́l bə̀ bəd máá, bə̀ ká' sé. Nɛ́b gbaŋə̀ bə̀ bəd kɔ̀, bə̀ ká' aí tə́ŋú sé.

²⁷Zá Vɛnɛ́b sààvúŋ in aa nɛ́b bəd ɛ̀g kə̀ kèéd kíin də, bɔ̀b nɛ́b in bə̀ gabm̀ bəd boò dàà kə̀ sə́ə́mnúùá. Vɛnɛ́b sààvúŋ in aa nɛ́b bəd ɛ̀g tə́ vɛɛmké roó, bɔ̀b nɛ́b kpɛŋsɛ́l bə̀ bəd boò dàà kə̀ sə́ə́mnúùá.

²⁸Vɛnɛ́b sààvúŋ nɛ́b aa nɛ́b zɔ̀ŋə yɛ́b bə bə̀, bí' bə̀ dùù roó, bít bə̀ tə́ bə̀ ɛgǹ gɔɔ̀n doó. Bə̀ ɛ̀g bə̀ kə̀ nɛ́b tɛdń bəd kíin, bɔ̀b in aa nɛ́b zɔ̀ŋə yɛ́b bə bə̀ zíg in pɛ̀sə́ bə̀ rə, kaŋsɛ́l oò bí'ǹmbə̀ bòórú;

²⁹bɔ̀b nɛ́ŋə̀ nə́ŋ̀má oò bán yíl pa'ǹmbə̀ Vɛnɛ́b númú sí.

³⁰Zá Vɛnɛ́b wál bə́n Yéésù Krístù rú. Yéésù Krístù kùmsə̀n ingabké bə́n aa vúgà Vɛnɛ́b naà roó. Kə̀ Krístù ra, bə́n kuùm taà wɔ̀ɔ̀lə̀ Vɛnɛ́b númú, bə́n kuùm taà Vɛnɛ́b nɛ́b gìdń bərá. Krístù káá kè' bə́n taà invaksə́ rú.

³¹Vɛnɛ́b í' bə̀ oò kùm kìínmbə̀ nɛɛ̀n aa bádmíìn yée kíin: «Nɛ́ŋə̀ aa í'ì kùlə́ ma'ǹmbə̀ rə, oò mà' kùlə́ kə̀ tùsaa Báátììkpɛ̀ŋ mà' roó.»