Read Samba Leko 1 Korintu 11 Bible Online

1 Korintu 11 - Samba Leko bible

1 Korintu 11

¹Ìì mà' kìínmbə̀ máá kíin, kìínmbə̀ máá kɔ̀ mə́ tə́ ma'ǹ kə̀ nɛɛ̀n aa Krístù tə́ ma'ǹ də kíin.

²Mə́ mɔ̀' ii yàá, kə̀ nɛɛ̀n aa sèl íí tə́ mə́ zá'ǹ sɛŋ gə́ kóólé doó; kə̀ ko'ǹmbə̀ láŋsə́ Vɛnɛ́b wúu bə̀ aa mə́ dàà ii roó.

³Zá mə́ í' ii in nə́ŋ̀ baàn i'ǹmbìá. Ìì gàb kúnú, Krístù kùmsə̀n nɛ́ŋ váàndo gə́ kóólé gààrá. Bít nɛ́ŋ váàndo kɔ̀ kùmsə̀n nɛ́ŋ kéèndo gààrá. Vɛnɛ́b kɔ̀ kùmsə̀n Krístù gààrá.

⁴Kóó nɛ́ŋ váàndo déè, tə́ Vɛnɛ́b nyɛɛmàá, sínkɔ̀ tə́ Vɛnɛ́b nwɔŋ uràá, dɔ̀b gɔ̀' yílə́ bə̀ì gə́, aarə sɔ̀b Krístù ra.

⁵Zá kóó nɛ́ŋ kéèndo déè, tə́ Vɛnɛ́b nyɛmàá, sínkɔ̀ tə́ Vɛnɛ́b nwɔŋ uràá, tab kág yílə oò síngə́, sɔ̀b váàn oòra, mà' sə́ə́m núù tə́ kìínmbə̀ kə̀' yílə oòì kíin.

⁶Dáà nɛ́ŋ kéèndo tàb kág yílə oò síngə́, kə̀ níìbə̀ kə̀' taà yíl oò gá gú? Zá yíl gí' vəlǹmbìá, sínkɔ̀ kəə̀nmbìá, nɛ́ŋ kéèndo naà gə́, in sə́ə́mnúù bìá. Tə́ kàangə́, tàb oò kág yílə oò kúnú!

⁷Zá nɛ́ŋ váàndo gə́, oò dɔ̀b gɔ̀' yílə́ bə̀ sí. Oòrə, lúŋ tə́ Vɛnɛ́bá, bít tə́ sə̀n Vɛnɛ́b kaŋsɛ́l laa nyɛdkè i'nàá. Zá nɛ́ŋ kéèndo gə́, dá váàn oò kaŋsɛ́l i'nàá.

⁸Kàandə, nɛ́ŋ váàndo vúgà sə̀n nɛ́ŋ kéèndo sisú gá. Zá nɛ́ŋ kéèndo vúgà sə̀n nɛ́ŋ váàndo sisú.

⁹Vɛnɛ́b kùd nɛ́ŋ váàndo nɛ́ŋ kéèndo bə̀ gá, zá kùd nɛ́ŋ kéèndo, nɛ́ŋ váàndo bìá.

¹⁰Kə̀ taàbìá, *malaika bəd bòórú, nɛ́ŋ kéèndo tab oò kág yílə oò, bɔbm̀ i'ǹmbə̀ gə́, bəǹ ləə váàn bəǹ tə́ kúnú.

¹¹Kə̀ aakíin də, wálke obə́n bə̀ kə̀ Báátììkpɛ̀ŋ də, bə́n bé'ǹ gə́, nɛ́ŋ váàndo bán kuùmbə̀ oò nə́ŋ̀ní gá, nɛ́ŋ kéèndo kɔ̀ bán kuùmbə̀ oò nə́ŋ̀ní gá.

¹²Kə̀ aakíin də, nɛ́ŋ kéèndo vúgà nɛ́ŋ váàndo sisú. Kàandə sɔ̀ŋ, nɛ́ŋ váàndo kɔ̀ nɛ́ŋ kéèndo lɛ̀bə̀ sùnú. Zá boò iirə kóólé, bə̀ vúgà Vɛnɛ́b naú.

¹³Sèl ìì ɛ̀g nwɔŋ aa kə̀ yíl aí bìá. Màìgə́, nɛ́ŋ kéèndo tə́ Vɛnɛ́b nyɛɛ̀m nɛ́b zùúm tə́ŋə́ gə́, sɔ̀ɔ̀n béení oò bə̀ bé'ǹmbə̀ yílə tɛdńníì?

¹⁴Nɛɛ̀n aa Vɛnɛ́b séé nɛ́ŋə̀ rú rə máá, bə́n gabm̀ yàá. Nɛ́ŋ váàndo kuùmbə̀ kə̀ yíl gí' bùúd gə́, in sə́ə́mnúù bìá.

¹⁵Zá kàandə kɔ̀, nɛ́ŋ kéèndo gə́, aarə piiù kansɛ́l tə́ kúnú, bɔ̀b oò kùm kàani. Kə̀ aakíin də, yíl gí' bùúraa nɛ́ŋ kéèndo kə̀ naà rə, bɔ̀b oò láŋ̀ yílə kágǹmbìá.

¹⁶Zá dáà nɛ́ŋə̀ í'ì pìrə̀ zibm̀bə̀ nwɔŋ aa yée yílə́ gə́, oò gàb kúnú, obə́ gə́, bə́ kə̀ indaŋ̀mbə̀ nə́ŋ̀ naà nwɔŋ aa yée yílə́ sé, Vɛnɛ́b *Eklisiya bəd kɔ̀, bə̀ kə̀ indaŋ̀mbə̀ nə́ŋ̀ naà nwɔŋ aa yée yílə́ sé.

¹⁷Nwɔŋ nə́ŋ̀ tə́ aí tə́ŋú. Kə̀ taàbìá, mə́ báni taà mɔ̀'ǹmbə̀ gá. Kàandə, wálke íí bəd mà' invaksə́ kàn tə́ sə̀n insɔ̀ɔ̀ná.

¹⁸Bə́ŋ̀ sɔ̀d bə̀ bàà mə́ gə́, màìgə́ íí mà' wálkeì gə́, pɛlké bəd túrú aí tə́ŋú. Bít mə́ sèl lə, nwɔŋ kambəd gə́, nwɔŋ sɔ̀ɔ̀ná.

¹⁹(Aa dá sɔɔ̀n də, pɛlké bəd boò kùm aí tə́ŋú kàani, bɔ̀b kóó nɛ́ɛ̀réè, oò bé' nɛ́b bagké vɛ́nà bə̀ bəraa aí tə́ŋə́ roó.)

²⁰Zá sɛŋ aa íí wál ɔ̀d bərə, in aa íí líí rə, íí líí Báátììkpɛ̀ŋ Gbèd Gìdń gá.

²¹Kàandə, nɛ́b kam aí tə́ŋú, bə̀ tə́ niŋsíìn inlíìnmbə̀ boò líìnmbə̀ kə̀ báŋ báŋ. Nɛ́b kambəd bə̀ tə́ kuùm kə̀ gulùmá. Bít nɛ́b kam kɔ̀ bə̀ tə́ kíìn wiràá.

²²Íí kə̀ ligə̀ naà in bə̀ líìnná, bít badn bə̀ nyəə̀n sínì? Sínkɔ̀ ɛ̀g íí gɔ̀n Vɛnɛ́b *Eklisiya, bít íí í' nɛ́b búúd bə̀ bəd sə́ə́mnúù daàn bèì? Máà bàà ii leè gú? Máà káŋi kínì? Ə́ùwə́, nwɔŋ aa yée bə gə́, mə́ báni mɔ̀'ǹmbə̀ gá.

²³Máá gə́, aa yée in aa mə́ bɔ̀bà Báátììkpɛ̀ŋ naà roó, bít aa mə́ bààiyà roó' Báátììkpɛ̀ŋ Yéésù, tígə́l aa bə̀ dáù ko'ǹ piìn nɛ́b zeeké oò bəd naà rə, pà' bə̀rɛ́d,

²⁴bít bòórú oòrə, mɔ̀' Vɛnɛ́b gə́, wèè kúnú, bít bàà: «Aa yée kùmsə̀n si' mə́ra, mə́ pii aí bòórú. Ìì mà' kàani, bɔ̀b sèl ìì zá' kə̀ in aa mə́ mà' ii roó.»

²⁵Nɛɛ̀n aarə rú, líí bə̀ bɛ́' gbèd nyàmbídń bə̀ gə́, pà' badn magə̀wàá, bít bàà: «Badn magə̀wà aa yée, kùmsə̀n *gú'dúgke puu aa Vɛnɛ́b tab zígà kə̀ nyɛ̀lə́m mə́ roó. Ìì mà' kàani, kóó sɛŋ déè, íí tə́ nyəə̀n gə́, bɔ̀b sèl ìì zá' in aa mə́ mà' ii roó.»

²⁶Kə̀ aakíin də, ìì bàà val nwɔŋ oòra, yaà oò wə́ə́ nyàm aa Báátììkpɛ̀ŋ dáà bídǹnà bərə zé, sɛŋ aa íí tə́ bə̀rɛ́d aa líínàá, bít íí tə́ badn magə̀wà aa nyə'ǹ doó.

²⁷Kàanyée gə́, dáà nɛ́ŋə̀ líí Báátììkpɛ̀ŋ Gbèd Gìdń yàá, bít nyəə badn magə̀wà oò yàá, zá mà' tə́ kə̀ in ságǹ kíin gə́, mà' invaksə́ tə́ kə̀ Báátììkpɛ̀ŋ sisá, bít kə̀ nyɛ̀lə́m oòra.

²⁸Kóó Nɛ́ɛ̀réè, bə́ŋ̀ oò ɛ̀g yíl oò sína, yaà dá bə̀rɛ́d líìn, bít dá badn magə̀wà nyəə̀n gə́ roó.

²⁹Kàandə, dáà nɛ́ŋə̀ nə́ŋ̀ líí bə̀rɛ́d yàá, bít nyəə badn magə̀wà yàá, gàb wálke boò kə̀ Báátììkpɛ̀ŋ si' síngə́, dìŋ àà yíl oò tə́ fágə́nú, kə̀ yíl oò bə̀ ní, nɛɛ̀n aa líí Báátììkpɛ̀ŋ si' rú, bít nyəə nyɛ̀lə́m oò rú yéroó.

³⁰Kə̀ taàbìá, nɛ́b zùúm bəd aí tə́ŋú, bə̀ tə́ taà mad ləənàá, si' valá, bít nɛ́b zùúm kam val kòd bə̀ taá.

³¹Dáà bə́n ɛgǹ yíl bə́nnì kə̀ yíl obə́n bə̀ ní gə́, Vɛnɛ́b fág bə́n gá.

³²Zá Báátììkpɛ̀ŋ fág bə́n yàá, bít í' bə́n búúd yàá, bɔ̀b boò fág bə́n kə̀ nɛ́b zɔ̀ŋə yɛ́b bə bə̀ tə́ sí.

³³Kə̀ aakíin də, ɔ̀dkudvɛɛ̀l mə́ bərá, wál íí tə́ Báátììkpɛ̀ŋ gbèd líìn gə́, kùm ìì nwán ɔ̀dnə́ŋ̀ bəd sína.

³⁴Dáà nɛ́ŋə̀ kìì gulùmì gə́, oò lííà inlíìnmbə̀ rə oò yiilú, bɔ̀b dìŋ oò àà fágə́n Vɛnɛ́b bə̀ oò yílú, wálke íí rú sí. Nwɔŋ bəraa nyɛ́d də, yaà mə́ wə́ə́ì gə́, báan taà gámàá.