Read Samba Leko 1 Korintu 12 Bible Online

1 Korintu 12 - Samba Leko bible

1 Korintu 12

¹Bə́ŋyée báà taàn in aa Nwul Gìdń pii rə yílú. Ɔ̀dkudvɛɛ̀l mə́ í'sɛ̀lbə̀ bərá, mə́ í' ìì gàb in vɛ́nà bə̀ aa Nwul Gìdń pii nɛ́b bagké bəd doó.

²Íí gàb yàá, sɛŋ aa bə́ŋ̀ íí bàg Vɛnɛ́b síndə, in nə́ŋ̀ dìŋ àà ii vɔɔm pɔ̀bm̀bə̀ rú.

³Kə̀ taàbìá, mə́ tə́ ii taà baanàá, ìì kìì kúnú: «Dáà Vɛnɛ́b Nwul Gìdń kò' nɛ́ŋə̀ì gə́, oò gə́ bán baànmbə̀ nwɔŋyɛɛ̀l tə́ Yéésù yílə́ gá.» Bít nɛ́ŋə̀ nə́ŋ̀má bán baànmbə̀: «Yéésù kùmsə̀n Báátììkpɛ̀ŋ» gá, dáà kə̀ Vɛnɛ́b Nwul Gìdń oò tɛ́mú síngə́ roó.

⁴Nwul tə́ nə́ŋ̀ní, zá pii nɛ́b bəd yílə gɔ̀ŋ gɔ̀ŋ, insɔ̀ɔ̀nkè zùúm bə̀ ma'ǹná.

⁵Zá nɛ́b bəd tə́ Báátììkpɛ̀ŋ nə́ŋ̀ní aarə tù' ma'nàá.

⁶Nɛ́b bəd tə́ kə̀ kpɛŋsɛ́l tù' bə̀ ma'ǹ naà gɔ̀ŋ gɔ̀ŋ, zá Vɛnɛ́b nə́ŋ̀ní aarə, tə́ sə̀n tù' ma'ǹ boò rú.

⁷Vɛnɛ́b Nwul Gìdń mà' tù' tə́ nɛ́ŋə̀ bagké déè gə́ kóólé yílú, bɔ̀b sɔ̀ɔ̀nkè nɛ́b bəd kóólé bìá.

⁸Nwul Gìdń aarə, pii nɛ́ŋə̀ nə́ŋ̀ ingabké nwɔŋ bə̀ gáàmmá; bít nɛ́ŋə̀ nə́ŋ̀ ɔ̀d kɔ̀, ingabké yíləsú bìá.

⁹Nwul aarə, pii nɛ́ŋə̀ nə́ŋ̀ tɛ́mbagké gbà'á, Báátììkpɛ̀ŋ tù' bə̀ ma'ǹná. Nɛ́ŋə̀ ɔ̀d nə́ŋ̀ kɔ̀, piiù kpɛŋsɛ́l nɛ́b mad bə̀ bəd si' gáŋ̀mbìá.

¹⁰Nwul Gìdń pii nɛ́ŋə̀ nə́ŋ̀ kpɛŋsɛ́l, bɔ̀b oò mà' kə̀ inwulubə̀ bərá. Nɛ́ŋə̀ nə́ŋ̀ kɔ̀, piiù nwɔŋ aa bɔ̀bà Vɛnɛ́b naà rə udǹmbìá. Nɛ́ŋə̀ nə́ŋ̀ ɔ̀d kɔ̀ piiù kpɛŋsɛ́l, gabm̀bə̀ nwul vaksə́ bəd kə̀ nwul vɛ́nà bə̀ bərá. Pii nɛ́ŋə̀ nə́ŋ̀ kɔ̀ kpaŋ̀, nwɔŋ gáàmbə̀ mɛ́l nwɔŋ bərú; bít nɛ́ŋə̀ nə́ŋ̀ ɔ̀d kɔ̀ piiù kpaŋ̀, nwɔŋ bəraa rə baàn bí'ǹmbìá.

¹¹Zá Nwul gìdń nə́ŋ̀ní aarə mà' sə̀n in gə́ kóólé. Pii kóó nɛ́ɛ̀réè, in piìnmbə̀ luùm gɔ̀ŋ gɔ̀ŋ, kìínmbə̀ nɛɛ̀n aa í' rə kíin.

¹²Krístù kùmsə̀n kìínmbə̀ si' nə́ŋ̀ní kíni, zɔ̀ŋ zùúm tə́ oò ba. Vɛ́nà, si' oòrə tə́ nə́ŋ̀ní, zɔ̀ŋ kam gɔ̀ŋ gɔ̀ŋ tə́ oò ba.

¹³Bə́n kóólé, *Yahudu bərá, sínkɔ̀ nɛ́b aa bə̀ bàg Vɛnɛ́b síndoó, kɔ̀sá, sínkɔ̀ nɛ́ŋə̀ aa kɔ̀' síndoó, bə̀ pii bə́n baptisma kə̀ Nwul gìdń nə́ŋ̀ní aarə ní. Kə̀ taàbìá, bə́n wáàl taà Krístù sisú, bə́n kóólé, kə̀ Nwul Gìdńná; bít bə́n nyəə̀n taà nwul nə́ŋ̀ní aarə ní.

¹⁴Si' gə́, kə̀ zɔ̀ŋ nə́ŋ̀ní sé, zá tə́ kə̀ zɔ̀ŋ zùúm.

¹⁵Dáà dun bààì: «Mə́ nɛɛ̀n gá yée gə́, mə́ wál kə̀ si' tə́ sé.» Kàandə, dá bée daàn wáàlǹmbə̀ kə̀ si' tə́ì?

¹⁶Dáà túŋ bààì: «Máá mə́ núùwà gá, kə̀ taàbìá, mə́ wál taà kə̀ si' tə́ sé» gə́, kàandə, dá beè daàn wáàlǹmbə̀ kə̀ si' tə́ì?

¹⁷Dáà si' kə̀ zɔ̀ŋtá, tə́ núùwà gə́, dá leè báàn nwɔŋ kiìnmbə̀ gú? Bít dáà tə́ túŋwà gə́, dá leè báàn in sol bəd kiìnmbə̀ gú?

¹⁸Vɛ́nà, Vɛnɛ́b wál zíg zɔ̀ŋ bəraa sisú rə gə́ kóólé, kìínmbə̀ nɛɛ̀n aa í' rə kíin.

¹⁹Dáà zɔ̀ŋ bəraa sisú rə, kùm tə́ in nə́ŋ̀ní gə́, si' gə́ dá kuùm bá?

²⁰Bə́ŋyée zɔ̀ŋ bəd tə́ sisú zùúm, zá si' gə́ tə́ nə́ŋ̀ní.

²¹Núù bán nɛɛ̀n baànmbə̀: «Mə́ í' nwɔŋ ámbə̀ sə́n» gá! Bít yílə kɔ̀ bán dun bəd baànmbə̀: «Mə́ í' nwɔŋ aí bə̀ sə́n» gá!

²²Zá zɔ̀ŋ sisú bə̀ bəraa bə́n tə́ən bé'ǹ ɔ̀gke yérə, bə̀ kànsə̀n kə̀ tù' ma'ǹmbìá.

²³Zɔ̀ŋ bəraa bə́n ɛgǹ kìínmbə̀ in bɛ̀ŋ́sə̀ yɛb kíin də, bít kò' bə́n kudǹ bə̀, kànsə̀n zɔ̀ŋ kam bərá. Zɔ̀ŋ bəraa dá bə́n sə́ə́mnúù daàn də, kág bə́n kudǹ bə̀ kíìn sɔ̀ɔ̀nkè.

²⁴Zá zɔ̀ŋ sɔ̀ɔ̀nkè bə́n bəraa yée gə́, bə́n í'ǹmbə̀ kágǹmbə̀ sé. Kàanyée gə́, Vɛnɛ́b wál zɔ̀ŋ bəraa bə́n sisú yée kóólé, bít zɔ̀ŋ bəraa nɛ́b bəd ɛ̀g kə̀ pɛ̀sə́ sə́n də gə́, pii bə̀ kaŋsɛ́l aa kàn nɛɛ̀n doó.

²⁵Kə̀ aakíin də, pɛdké oò kùm sisú sí. Zá zɔ̀ŋ bəraa sisú rə, boò káŋ ɔ̀dnə́ŋ̀ bəd boò bòdba, boò də́ŋ nə́ŋ̀ní.

²⁶Zɔ̀ŋ nə́ŋ̀ sisú bə̀ tə́ búúd í'ǹ gə́, kam bəraa kóólé, bə̀ í' búúd kə̀ oò tá. Bít zɔ̀ŋ nə́ŋ̀ sisú bə̀ bɔ̀b káŋkeì gə́, aa bəraa nyɛ́d də gə́ kóólé, bə̀ kìì tɛ́m làmkè kə̀ oò tá.

²⁷Íí kóólé, íí kùmsə̀n Krístù sisá, bít kóó nɛ́ɛ̀réè aí tə́ŋú, kùmsə̀n zɔ̀ŋ nə́ŋ̀ sisaa rə bìá.

²⁸Bít nɛ́b bagké *Eklisiya bə̀ bəraa aí tə́ŋə́ rə yóo' Éèn *Yéésù gbantumsə̀ bərá, yaà zəg kə̀ *Vɛnɛ́b gbantumsə̀ bərá. Bít toorə oòrə, nɛ̀n in bə̀ sáàn bərá. Bítsɔ̀ŋ, nɛ́b kam túrú, mà' bə̀ sáá inwulubìá. Nɛ́b kam kɔ̀, pii bə̀ kpɛŋsɛ́l nɛ́b mad bə̀ bəd gáŋ̀mbìá. Nɛ́b kam kɔ̀, nɛ́b nɛ́b bəd bə̀ láŋ̀ ba. Nɛ́b kambəd nɛ́b nɛ́b bəd bə̀ nwáànná. Nɛ́b kambəd kɔ̀, mɛ́l nwɔŋ bəd gáàm báànmbìá.

²⁹Nɛ́b bəd gə́ kóólé, bə̀ dáá bée kuùm *Yéésù gbantumsə̀ì? Nɛ́b bəd gə́ kóólé, bə̀ dá bée kuùm *Vɛnɛ́b gbantumsə̀ì? Nɛ́b bəd gə́ kóólé, bə̀ dá bée kuùm nɛ̀n in bə̀ sáànnì? Nɛ́b bəd gə́ kóólé, bə̀ dá bée inwulubə̀ ma'nì?

³⁰Nɛ́b bəd gə́ kóólé, bə̀ dá bée nɛ́b mad bə̀ bəd gáŋì? Nɛ́b bəd gə́ kóólé, bə̀ dá bée nwɔŋ gáàm mɛ́l nwɔŋ bərúì? Nɛ́b bəd gə́ kóólé, bə̀ dá bée nwɔŋ baàn bí'nì?

³¹Kə̀ aakíin də, ìì í' inpiìnmbə̀ sɔ̀ɔ̀n bərá. Zá bə́ŋyée máá ii insɔ̀ɔ̀nkè gbà'á aa íí dá ma'ǹ də i'nàá.