Read Samba Leko 1 Korintu 15 Bible Online

1 Korintu 15 - Samba Leko bible

1 Korintu 15

¹Ɔ̀dkudvɛɛ̀l mə́ í'sɛ̀lbə̀ bərá, mə́ í' ii seèl zá'ǹmbə̀ bə́ŋyóo, *Nwɔŋ Puu Sɔ̀ɔ̀nkè aa mə́ bààiyà, íí bɔ̀bà, bít tɛ́mbagké aí bə̀ dìì bə wərə̀ kə̀ váàndo roó.

²Bít kə̀ oòra, íí dá taà súúnàá, dáà íí kò'ùwì kə̀ nɛɛ̀n aa mə́ bàà ii rə kíìn doó. Kàan síngə́, tɛ́mbagké aí bə̀ súú ii gá.

³Mə́ bààiyà nwɔŋ aa éèn mə́ bɔ̀bà kə̀ yíl máá bə̀ ní roó. Val kò' Krístù invaksə́ bə́n bəd bòórú, kìínmbə̀ nɛɛ̀n aa Núúboòd Gìdń bəd bàà rə kíin.

⁴Bə̀ lə̀ə̀ù yàá, sɛŋ toorə bə gə́, Vɛnɛ́b díímə̀wì valú; tə́ kə̀ gɔ̀ŋsá, kìínmbə̀ Núúboòd Gìdń bəd bàà bə̀ dàà rə kíin.

⁵Vúg yaà ì' yíl oò Piyɛr núùrú, bít yaà ì' yíl oò, *gbantumsə̀ oò bəraa kób zè iirə rə núùrú.

⁶Bòórú oòrə, vú' yaà ì' yíl oò ɔ̀dkudvɛɛ̀l mə́ bəd núùrú. Bə̀ kàn laa núnà zɔ̀ŋ núnə̀ yàá. Nɛ́b kambəd boò tə́ŋú, val kòd bə̀ bəd yàá, nɛ́b zùúm kambəd tə́ kə̀ gɔ̀ŋsá.

⁷Bít bòórú oòrə, yaà ì' yíl oò Yakuba núùrú, bít gbantumsə̀ oò bəd kóólé núùrú.

⁸Bít bòórú ì' yíl oò boò núùrú kóólé gə́, yaà ì' yíl oò máá núùrú kɔ̀. Bít kàandə, mə́ tə́ kìínmbə̀ wàà aa gbád bə̀ lɛ̀b bə́ŋ̀ sòò oò də́ŋ sə́n də kíin.

⁹Kàandə, máára mə́ kùmsə̀n wàà bɛ̀ŋ́sə̀wà *Yéésù gbantumsə̀ bəd tə́ŋú, máá rə mə́ də́ŋ dɛdǹmbə̀ Yéésù gbantumsə̀ sé; kàandə, mə́ í' nɛ́b bagké *Eklisiya bə̀ bəd búúrá.

¹⁰Zá Vɛnɛ́b pə̀dkè mà' mə́ sùnú, mə́ kùm taà Yéésù gbantumsàá. Vɛnɛ́b pə̀dkè aa máá yílə́ rə, taà tɛdńní sé. Mə́ mà' tù' mə́ kàn sə̀n Yéésù gbantumsə̀ kambəd kóólé. Kàandə, vɛ́nà bə̀ gə́, mə́ mà' sə̀n tù' rə kə̀ yíl máá bə̀ gá; zá Vɛnɛ́b pə̀dkè aa máá rú rə, mà' sùnú.

¹¹Bə́ŋyóo, kóó oò kùm máára, kóó oò kùm boò ra, aa yée nwɔŋ aa bə́ ùd n díímke val bəd bə̀ yílú, bít íí kè' roó.

¹²Bə́ bàà Vɛnɛ́b díím Krístùì valú, ééleè nɛ́b kam aí tə́ŋú, bə̀ tə́ taà baàn díímke val bə̀ sɔ̀ŋ sín gú?

¹³Dáà díímke val bəd bə̀ síngə́, ogə́ Krístù kɔ̀ díím valə́ sé.

¹⁴Bít dáà Krístù díím valə́ síngə́, Vɛnɛ́b nwɔŋ aa bə́n tə́ən udǹ də, in tɛdńná, bít tɛ́mbagké aí bə̀ kɔ̀ in tɛdńná.

¹⁵Aa kàn nɛɛ̀n də, bə́n ma'ǹ sedako gúsuúm bə̀ tə́ Vɛnɛ́b yílú. Kàandə kɔ̀, bə́n baàn Vɛnɛ́b díímà Krístù valú, aarə kɔ̀ ma'míìn sé. Dáà tə́ vɛ́nà gə́, val bəd díím gá.

¹⁶Kàandə, dáà val bəd díím síngə́, ogə́, Krístù kɔ̀ díím valə́ sé.

¹⁷Bít dáà Krístù díím valə́ síngə́, tɛ́mbagké aí bə̀ kɔ̀ in tɛdńná. Íí kùm tə́ invaksə́ íí bərú ní, bə́ŋyóo.

¹⁸Nɛ́b aa bə̀ bàg Krístù, val kòd bə̀ rə, boò kɔ̀ bə̀ bɔ̀bə́l yàá.

¹⁹Dáà bə́n zígǹ tɛ́m bə́n tə́ Krístù bə, gɔ̀ŋsə́ aarə ní bɔbm̀ bə̀ gə́, báan sə̀n nɛ́b bəd kóólé kaàn kə̀ búúrá.

²⁰Zá vɛ́nà gə́, Krístù díímì valú. Oòra kùmsə̀n nɛ́ŋə̀ aa éèn díím valə́ roó, bɔbm̀ i'ǹmbə̀ gə́, nɛ́b aa bə̀ bàgə̀, val kòd bə̀ rə, bə̀ dákíìn díìm valə́ kɔ̀.

²¹Kə̀ aakíin də, val yaà zɔ̀ŋə yɛ́b ba, nɛ́ŋə̀ nə́ŋ̀ní bòórú. Kàandə sɔ̀ŋ, díímke val bəd bə̀ kɔ̀ yaà nɛ́ŋə̀ nə́ŋ̀ní bòórú.

²²Nɛ́b bəd kóólé, val dá bə̀ kíìn kodǹ kə̀ wálke boò bə̀ kə̀ Adamu ra. Kə̀ nɛɛ̀n aarə kíin, nɛ́b bəd kóólé bə̀ dá gɔ̀ŋsə́ bɔbm̀ kə̀ wálke boò bə̀ kə̀ Krístù ra.

²³Zá kóó nɛ́ɛ̀réè, kə̀ zɔ̀ŋ oòra. Krístù kùmsə̀n nɛ́ŋə̀ éèn də̀gə̀ də̀gə̀ bə̀ aa díím valə́ roó. Bít bòórú nyàm aa Krístù dáà bídǹnà bərə, nɛ́b aa bə̀ bagə̀ rə, bə̀ dákíìn díìm valú.

²⁴Bít bòórú gə́, yɛ́b dákíìn bɛ́ràá. Krístù kpɛŋsɛ́l gə́ kóólé, dá nɛ́b gbàád yɛ́b bə bəd kíìn bɔ̀'nàá, bít kə̀ kpɛŋsɛ́l nwulú bə̀ bəd tə́ kóólé. Bít dá *Vɛnɛ́b gààd piìn Báá Vɛnɛ́b naú.

²⁵Kàandə, aa dá sɔɔ̀n də gə́, Krístù oò ləə gààrá, bít oò nád ɔ̀dmáàn oò bəd gə́ kóólé kə̀ duná.

²⁶Ɔ̀dmáàn bòórú bə̀ aa bə̀ dáù bɔ̀'ǹ də, taà kùmsə̀n valá.

²⁷Kə̀ aakíin də, Núúboòd Gìdń bàà: «Vɛnɛ́b lə́ə́ in gə́ kóólé tə́ oò dun dùú.» Zá tə́ nyɛdkèá, nwɔŋ aa bə̀ bàà «kóólé» rə, páá Vɛnɛ́b kɔ̀ sé. Kàandə, oòra lə́ə́ sə̀n in gə́ kóólé Krístù dùú.

²⁸Màìgə́, Vɛnɛ́b lə́ə́ in gə́ kóóléì Krístù dun dùù gə́, Wàà oò Krístù kɔ̀ dá yíl oò lə́ə̀n oò dùú. Kə̀ aakíin də, Vɛnɛ́b dá gààd ləə̀n zɔ̀ŋ gə́ kóólé, bít in gə́ kóólé yílú.

²⁹Dáà kàan síngə́, nɛ́b aa bə̀ tə́ bə̀ baptisma piinàá, nɛ́b aa val kòd bə̀ Krístù nə́gə́lə́ rə, bə̀ sàà níì gú? Dáà val bəd bə̀ díím síngə́, kə̀ níìbə̀ bə̀ pii bə̀ taà baptisma kə̀ aakíin gú?

³⁰Bít kə̀ yíl obə́n bə̀ rə, kə̀ níìbə̀ ba'wà nə́ŋ̀ gə́ kóólé, bə́n tə́ən taà yíl bə́n daàn val nɛɛ̀n tɛ́mú gú?

³¹Ɔ̀dkudvɛɛ̀l mə́ í'sɛ̀lbə̀ bərá, sɛŋ gə́ kóólé, val kò' tə́ mə́ kíìn kəràá. Mə́ tə́ ii kíìn baanàá, vɛ́nà, íí kùmsə̀n nɛ́b aa mə́ tə́ kùlə́ ma'ǹ boò bòórú roó, kə̀ wálke bə́n kə̀ Yéésù Krístù Báá bə́n Tììkpɛ̀ŋá.

³²Dáà mə́ nə́' nə́gə̀rì kə̀ gɔ̀g fɔ̀gú bə̀ bəraa Efesus bìlú roó, bít dáà mə́ kùmì kə̀ nɛɛ̀n aa nɛ́b bəd sèl lə kíin gə́, dá mə́ níì gbá'ǹ gú? Dáà val bəd díím síngə́, kə̀ aakíin də, kìínmbə̀ zagəm bàà rə kíin: «Báà líìn kúnú, bít báà nyəə̀n kúnú, kàandə, nwúndù gə́, val dá bə́n kíìn koràá.»

³³Ìì záá yíl íí sí: «Kumké kə̀ nɛ́b vaksə́ bəd tə́ gə́, dá ii kíìn yɛlàá.»

³⁴Kid ìì bírà kíìn vɛ́nà íí ba, kə̀ gɔ̀ŋsə́ wɔ̀ɔ̀lə̀ ba, bít ìì dàà kíìn invaksə́ ma'ǹmbìá. Kàandə, nɛ́b kam aí tə́ŋú, bə̀ gàb Vɛnɛ́b sé. Mə́ bàà ii kə̀ aakíin də, bɔ̀b sə́ə́mnúù oò mà' ii kúnú.

³⁵«Zá bə̀ dá dɛdǹ, ééleè val bəd dá taà díìm gú? Níì si' luùm, bə̀ dáà taà bídǹnà kə̀ naà gú?»

³⁶Ń kèérá! Inluùm aa ń wùù yɛ́b bərə, dá sína varàá, vúg dá taà kuùm kə̀ gɔ̀ŋsá.

³⁷In aa ń wùù yɛ́b bərə, inluùm tɛdńná. Kamgə́, inlíìnmbə̀ aa bə̀ dɛ̀d blé roó, sínkɔ̀ inluùm nə́ŋ̀ gɔ̀ŋá. Zá téé yɛsə̀ bə̀ dá sə̀n vúgǹ gá.

³⁸Zá Vɛnɛ́b pii inluùm gə́ kóólé, si' luùm oò aa í' roó. Kóó inluùm déè, dá kuùm kə̀ si' luùm aa Vɛnɛ́b pììù roó.

³⁹In bəraa tə́ kə̀ gɔ̀g naà rə gə́ kóólé, gɔ̀g boò bəd tə́ gɔ̀ŋ gɔ̀ŋ. Nɛ́ŋə̀ gɔ̀g tə́ gɔ̀ŋ, gɔ̀g bəd gɔ̀g tə́ gɔ̀ŋ, núú bəd gɔ̀g tə́ gɔ̀ŋ, bít díb bəd kɔ̀ gɔ̀g boò tə́ gɔ̀ŋ.

⁴⁰Si' lɛgə́ paà bə̀ bəd tə́ túrú, kə̀ si' zɔ̀ŋə yɛ́b bə bə̀ bəd tá. Si' lɛgə́ paà bə̀ bəd bə̀ tə́ kə̀ sɔɔnsɛ́l boò gɔ̀ŋ, si' zɔ̀ŋə yɛ́b bə bə̀ bəd kɔ̀, sɔɔnsɛ́l boò tə́ gɔ̀ŋ.

⁴¹Nyàm tə́ kə̀ nyɛdkè oò gɔ̀ŋ, sòò kɔ̀ tə́ kə̀ nyɛdkè oò gɔ̀ŋ, dùdù yɛb kɔ̀ bə̀ tə́ kə̀ nyɛdkè boò gɔ̀ŋ. Dùdù yɛb boò bòdbə máá, nyɛdkè boò pɛd yàá.

⁴²Dá kuùm kə̀ aarə kíin, sɛŋ aa val bəd dá díìm bəroó. Bə̀ páá sisì yɛ́b bə gə́, dákíìn nwɔɔnàá. Zá sɛŋ aa dá díìm bərə gə́, kùm in nwɔɔnké sɔ̀ŋ gá.

⁴³Sɛŋ aa bə̀ lə̀ə̀ù yɛ́b bərə, kə̀ pɛ̀sə́ naà sé, bít kə̀ kpɛŋsɛ́l naà sé. Sɛŋ aa dáà díìmmà valú rə, dá kuùm kə̀ kaŋsɛ́l laa nyɛdkè naú, bít kə̀ kpɛŋsɛ́l naú.

⁴⁴Sɛŋ aa bə̀ lə̀ə̀ù yɛ́b bərə, nɛ́ŋə̀ sisá, sɛŋ aa dáà díìmmà valə́ rə, dá kuùm si' nwulú bìá. Nɛ́ŋə̀ si' kùm sína gə́, si' nwulú bə̀ kɔ̀ dákíìn kumàá.

⁴⁵Kə̀ aakíin də, Núúboòd Gìdń bàà: «Adamu, nɛ́ŋə̀ éèn də̀gə̀ də̀gə̀ bə̀ rə, yaà bíl nɛ́d gɔ̀ŋsə́ bə̀ yàá.» Zá Adamu aa dùg kə̀ bòd də, yaà bíl nɛ́ŋə̀ si' nwulú bə̀ aa pii bə́n gɔ̀ŋsə́ roó.

⁴⁶Éèn si' nwulú bə̀ dáà sə̀n yaàn gá, zá nɛ́ŋə̀ si' dá sə̀n kpaŋ̀ ké'ǹ númú, bít Nwul dáà taà yaànnà bòórú.

⁴⁷Nɛ́ŋə̀ éèn də̀gə̀ də̀gə̀ bə̀ rə, bə̀ kùrə̀ kə̀ yɛ́bá. Nɛ́ŋə̀ iirúb də gə́, vúgà lɛgə́ poú.

⁴⁸Nɛ́b zɔ̀ŋə yɛ́b bə bəd lúŋ tə́ nɛ́ŋə̀ aa bə̀ kùrə̀ kə̀ yɛ́b doó. Nɛ́b lɛgə́ paà bə̀ bəd kɔ̀, bə̀ lúŋ tə́ nɛ́ŋə̀ aa vúgà lɛgə́ roó.

⁴⁹Bít kə̀ nɛɛ̀n aarə kíin, bə́n pa'ǹ nɛ́ŋə̀ zɔ̀ŋə yɛ́b bə bə̀ sisá, bít báan nɛ́ŋə̀ aa vúgà lɛgə́ paà rə, si' pa'ǹ kə̀ nɛɛ̀n aarə kíin kɔ̀.

⁵⁰Ɔ̀dkudvɛɛ̀l mə́ í'sɛ̀lbə̀ bərá, si' bə́n aa kə̀ gɔ̀g lúgúrá, bít kə̀ nyɛ̀lə́m də, bán *Vɛnɛ́b gààd bɔbm̀bə̀ gá. Sisaa dá nwɔɔ̀n də kɔ̀, bán Vɛnɛ́b gààd bɔbm̀bə̀ gá.

⁵¹Máá ii *inmə́'ke nə́ŋ̀ i'nàá. Val kòd bə́n kóólé gá, zá bə́n kóólé báan si' pɛ́nàá.

⁵²Zɔ̀ŋ də bəní, bít kə̀ nwɔŋ aa nuù yée kíin ní, sɛŋ aa bə̀ dá yaa gà' aa yɛ́b dá dugǹ kə̀ naà rə íìl bərə, báan si' pɛ́ɛ̀n kə̀ báŋ. Kàandə, sɛŋ aa yaa gà' dá ílmíìn bərə, val bəd dákíìn díímàá, val kòd bə̀ sɔ̀ŋ gá. Bít bə́n kóólé, si' bə́n dákíìn pɛ́nàá.

⁵³Sisaa nwɔ̀n də, oò páá sisaa nwɔ̀n gá roó, bít sisaa vàd də kɔ̀, oò páá sisaa vàd gá roó.

⁵⁴Sɛŋ aa sisaa nwɔ̀n də, tə̀ə̀m sisaa nwɔ̀n gá rə yàá, bít sisaa vàd də kɔ̀, tə̀ə̀m sisaa vàd gá rəì rə, ogə́ nwɔŋ aa Núúboòd Gìdń bàà rə, dákíìn ma'mínàá: «Kansɛ́l pà' tə̀ə̀m val yàá.»

⁵⁵«Valá, kpɛŋsɛ́l aa ń kàn bə́ kə̀ kùrú rə tóó? Valá, kpɛŋsɛ́l aa ń tə́ bə́ lodǹ kə̀ kùrú rə tə́ bá?»

⁵⁶Val gə́, bɔ̀b kpɛŋsɛ́l oò tə́ invaksə́ naú, nɛ́ŋə̀ bə̀ lo'ǹná. Invaksə́ kɔ̀, bɔ̀b kpɛŋsɛ́l tə́ indaŋ̀mbə̀ naú.

⁵⁷Zá báà mɔ̀'ǹ Vɛnɛ́b aa pii bə́nnà kpɛŋsɛ́l val bə̀ kaàn, Báá bə́n Tììkpɛ̀ŋ Yéésù Krístù rú roó!

⁵⁸Kə̀ aakíin də, ɔ̀dkudvɛɛ̀l mə́ í'sɛ̀lbə̀ bərá, ìì kùm və̀'kèá. Ìì wá' si' sí. Sɛŋ gə́ kóólé, ìì nɔ̀ŋ kə̀ Báátììkpɛ̀ŋ tù' ma'ǹmbìá. Kàandə kɔ̀, íí gàb yàá, tùsaa íí tə́ ma'ǹ kə̀ wálke kə̀ Báátììkpɛ̀ŋ də, taà tɛdńní sé.