Read Samba Leko 1 Korintu 2 Bible Online

1 Korintu 2 - Samba Leko bible

1 Korintu 2

¹Ɔ̀dkudvɛɛ̀l mə́ í'sɛ̀lbə̀ bərá, sɛŋ aa mə́ dáà aí kàrú, Vɛnɛ́b nwɔŋ mə́'ke vɛ́nà bə̀ dáàn baànmbə̀ rə, mə́ gámi nwɔŋ gbò'kè sé, sínkɔ̀ mə́ gámi nwɔŋ kə̀ ingabké aa kàn nɛɛ̀n də sé.

²Sɛŋ aa mə́ kùmà kə̀ aí tə́ rə, mə́ sèlà in ɔ̀d nə́ŋ̀má gabm̀bə̀ sé, mə́ ùri Yéésù Krístù nwɔŋ ní, Yéésù Krístù aa val kò'ù téélɛŋké bəroó.

³Kə̀ taàbìá, mə́ yaà taà aí səǹ kə̀ si' vɛɛmkéá, mə́ nyìì kə̀ də́dǹná, bít kə̀ niŋ̀mbìá.

⁴Sɛŋ aa mə́ tə́ nwɔŋ gáàm dú roó, bít kə̀ sɛŋ aa mə́ tə́ Vɛnɛ́b nwɔŋ udǹ də, mə́ gám nwɔŋ aa nɛ́b zɔ̀ŋə yɛ́b bə bə̀ tə́ gáàm kə̀ ingabké rə gá. Zá mə́ dàà Nwul Gìdń oò ì' kpɛŋsɛ́l oòra,

⁵bɔ̀b tɛ́mbagké íí aa Krístù rú rə, oò kùm ingabké nɛ́b bəd bə̀ bə sí; zá oò kùm kpɛŋsɛ́l Vɛnɛ́b bə̀ ba.

⁶Zá kàandə máá, mə́ tə́ nɛ́b aa bə̀ doo tɛ́mbagké rú rə, ingabké sánàá. Zá aarə, ingabké zɔ̀ŋə yɛ́b bə bə̀ rə gá, sínkɔ̀ nɛ́b aa bə̀ tə́ gààd ləə̀n zɔ̀ŋə yɛ́b bərə ingabké gá. Bít in bəraa rə, boò gə́, bə̀ zíg bə̀, bə̀ dákíìn bɔ̀bm̀ dugàá.

⁷Zá obə́ gə́, bàà bə́ vú' ii Vɛnɛ́b ingabké aa mə́', bɔ̀b bə́ŋ̀ séé yɛ́b síndoó, bɔ̀b obə́n bə̀ kaŋsɛ́l piìnmbìá.

⁸Kóó nɛ́b kpɛŋsɛ́l bə̀ bəraa bə̀ tə́ gààd ləə̀n zɔ̀ŋə yɛ́b bəroó, nə́ŋ̀má gàb Vɛnɛ́b ingabké aarə sé. Dáà bə̀ gàbì gə́, bə̀ bág Báátììkpɛ̀ŋ kaŋsɛ́l bə̀ téélɛŋké bə gá.

⁹Zá kìínmbə̀ nɛɛ̀n aa bádmíìn Núúboòd Gìdńnú rə kíin: «In aa nɛ́ŋə̀ nə́ŋ̀má bé' bèd sé, sínkɔ̀ kìì bèd síndə, aarə in aa nɛ́ŋə̀ nə́ŋ̀má sèl bèd oò tɛ́mú síndoó. Vɛnɛ́b kùrà in aarə nɛ́b aa bə̀ tə́ù í'ǹ də bìá.»

¹⁰Zá obə́n gə́, Vɛnɛ́b ì' bə́n inmə́'ke oò bəraa rə kə̀ Nwul Gìdńná. Kə̀ aakíin də, Nwul Gìdń gə́, sàà in aa mə́' rə kíìn kóólé. Oò gə́, gàb in aa Vɛnɛ́b sèl mə́' oò tɛ́mú rə yàá.

¹¹Nɛ́ɛ̀réè zɔ̀ŋə aí tə́ŋú, gàb sə̀n in aa nɛ́ŋə̀ sèl lə gú? Nwul oò dá sə̀ní gabm̀ gá roó. Kə̀ aarə kíin, nɛ́ŋə̀ nə́ŋ̀má gàb in aa Vɛnɛ́b sèl lə sé, Vɛnɛ́b Nwul Gìdń gàb sə̀ní.

¹²Bə́ŋyée obə́n gə́, bə́n bɔbm̀ nwul aa zɔ̀ŋə yɛ́b bərə gá. Zá obə́n gə́, bə́n bɔbm̀ Nwul Gìdń aa vúgà Vɛnɛ́b naà roó; bɔ̀b báà gabm̀ pə̀dkè aa Vɛnɛ́b pii bə́nnà rə kíìn kóólé.

¹³Zá obə́ gə́, bə́ gám nwɔŋ kìínmbə̀ nɛ́b zɔ̀ŋə yɛ́b bə bə̀ tə́ nɛ́b bəd ingabké boò sáàn də kíìn gá. Zá bə́ gám kə̀ nɛɛ̀n aa Vɛnɛ́b Nwul Gìdń sán bə́ rə kíni. Kə̀ aarə kíin, bàà bə́ tə́ taà nɛ́b aa kə̀ Nwul Gìdń naà rə, vɛ́nà aa Nwul Gìdń pii rə i'nàá.

¹⁴Zá nɛ́ŋə̀ aa kə̀ Nwul Gìdń naà síndə, kè' nwɔŋ sɔ̀ɔ̀n bəraa vúgà Nwul Gìdń naà rə gá. Oò naà gə́, in aa vúgà Nwul Gìdń naà rə, kèéd tùsá. Bán nwɔŋ aarə kiìnmbə̀ gá. Kàandə, màn aa kə̀ nwul naà rə, dá sə̀n báàn in bəraa rə gabm̀bìá.

¹⁵Nɛ́ŋə̀ aa kə̀ Vɛnɛ́b Nwul Gìdń naà rə, dákíìn báàn in gə́ kóólé fágǹmbìá. Zá oò gə́, nɛ́ŋə̀ nə́ŋ̀má bánə̀ fágǹmbə̀ gá.

¹⁶Kìínmbə̀ Núúboòd Gìdń bàà rə kíni: «Nɛ́ɛ̀réè gàb sə̀n inselké Báátììkpɛ̀ŋ bìá, bít dáù taà báàn tɔ̀gǹmbə̀ gú?» Zá obə́n gə́, inselké bə́n tə́ kìínmbə̀ Krístù bə̀ kíin.