Read Samba Leko 1 Korintu 3 Bible Online

1 Korintu 3 - Samba Leko bible

1 Korintu 3

¹Máá gə́, ɔ̀dkudvɛɛ̀l bərá, mə́ báni nwɔŋ gáàmbə̀ kìínmbə̀ nɛ́b aa bə̀ kə̀ Vɛnɛ́b Nwul naà rə kíin sé. Mə́ gámi nwɔŋ kìínmbə̀ nɛ́b invaksə́ bə̀ ma'ǹ bəraa zɔ̀ŋə yɛ́b bərə kíin, kìínmbə̀ yɛb bɛ̀ŋ́sə̀ bəraa bə̀ kùm kə̀ tɛ́mbagké Krístù rú rə kíin.

²Mə́ pii iiyà vuùm wəlá, ìì nyəə kúnú; mə́ pii iiyà inlíìnmbə̀ kpɛŋké gá. Kàandə, íí də́ŋ bə́ŋ̀ inlíìnmbə̀ kpɛŋké líìnmbə̀ sé. Yaà wə́ə́ kə̀ bə́ŋyée kíin zé, íí də́ŋ bə́ŋ̀ inlíìnmbə̀ kpɛŋké líìnmbə̀ sé,

³kàandə, bə́ŋ̀ íí kùm tə́ kìínmbə̀ nɛ́b invaksə́ bə̀ ma'ǹ bəraa zɔ̀ŋə yɛ́b bərə kíin. Íí tə́ kə̀ kisɛ̀l bəd aí tə́ŋú, álsɛ̀l bərá, bít kə̀ pɛlké bəd aí tə́ŋú. Íí ì' yíl íí kìínmbə̀ nɛ́b zɔ̀ŋə yɛ́b bə bə̀ bəd kíin sínì, bít íí mà' kìínmbə̀ boò kíin sínì?

⁴Dáà nɛ́ŋə̀ nə́ŋ̀ bààì: «Máá gə́, má Pol bagàá.» Bít nɛ́ŋə̀ nə́ŋ̀ ɔ̀d kɔ̀ bààì: «Máá gə́, má Apolos bagàá» gə́, íí mà' kìínmbə̀ nɛɛ̀n aa nɛ́b bəd mà' rə kíin sínì?

⁵Ìì bàà mə́ kúnú' Nɛ́ɛ̀réè kùmsə̀n Apolos gú? Bít nɛ́ɛ̀réè kùmsə̀n Pol gú? Obə́ gə́, bə́ nɛ́b Vɛnɛ́b tù' bə̀ ma'ǹ tɛdń bərá. Obə́ra bə́ ààiyà sùnú, bɔ̀b ìì bàg Yéésù ra. Kóó nɛ́ɛ̀réè obə́ tə́ŋú, mà' in aa Báátììkpɛ̀ŋ piiù oò mà' roó.

⁶Máá mə́ wùù kúnú, Apolos kɔ̀ yaà zàd wəlá; zá Vɛnɛ́b káŋ̀ sùnú.

⁷Kə̀ aakíin də, màn aa wùù roó, kə̀ màn aa zàd wəl lə tá, boò iirə kóólé, bə̀ nɛ́b tɛdń bərá. Zá Vɛnɛ́b oò nə́ŋ̀ní tə́ŋtə́ŋ, kùmsə̀n nɛ́d pɛ̀sə́ bìá, oòra mà' káŋ sə̀n in bəraa roó.

⁸Màn aa wùù roó, kə̀ màn aa zàd wəl lə tá, boò iirə kóólé, bə̀ də́ŋ tə́ nə́ŋ̀ní. Vɛnɛ́b dá kóó nɛ́ɛ̀réè, sòò ba' oò káàn kə̀ nɛɛ̀n aa mà' tù' oò rú rə kíin.

⁹Kàandə, bə́ nɛ́b Vɛnɛ́b tù' bə̀ ma'ǹ bərá, bə́ mà' tù' tə́ nə́ŋ̀ní; aí kɔ̀ íí Vɛnɛ́b lɛsá. Íí kùm tə́ kìínmbə̀ wúl aa bə́ tə́ wəə̀n də kíin.

¹⁰Kə̀ pə̀dkè aa Vɛnɛ́b mà' máà roó, mə́ mà' tù' kìínmbə̀ nɛ́d wúl bə̀ wəə̀n sɔ̀ɔ̀n kíin, bít mə́ páá wúl bèlá. Bít bə́ŋyée nɛ́ŋə̀ nə́ŋ̀ yaà wə̀ə̀ wúl tə́ wúl bèl aa mə́ páá rə yílú. Zá kóó nɛ́ɛ̀réè, oò gú' yíl oò nɛɛ̀n aa tə́ wúl aarə wəə̀n dú roó.

¹¹Wúl bèl páá bɛ́'míìn yàá. Wúl bèl aarə, Yéésù Krístù ra. Nɛ́ŋə̀ nə́ŋ̀má páá wúl bèl ɔ̀d sɔ̀ŋ gá.

¹²Nɛ́b kam wə̀ə̀ bə̀ dá zəgǹ yílú wərà, kə̀ bəŋ zɔsá, kə̀ basá, kə̀ bəŋ aa kə̀ pɛ̀sə́ naà roó; nɛ́b kam kɔ̀ wə̀ə̀ bə̀ dá zəgǹ kə̀ tééá, gàŋàá sínkɔ̀ nyəərá.

¹³Zá kóó nɛ́ɛ̀réè, tù' oò aa mà' rə, dá i'míìn fágə́n nyàmú. Fágə́n nyàm dá sə̀n tù' rə i'nàá. Nyàm aarə, laa dá sə̀n vúgàá. Laa dá kóó nɛ́ɛ̀réè, tù' oò aa mà' rə, nɛɛ̀n aa kùm dú rə i'nàá.

¹⁴Nɛ́ŋə̀ aa laa dú' tù' oò síndə, oò gə́ dá mú'sɛ̀l dùm oò kíìn bɔbàá.

¹⁵Dáà laa dú' tùsaa nɛ́ŋə̀ rə mà' rəì gə́, oò gə́, bɔ̀b mú'sɛ̀l dùm oò gá. Kə̀ aakíin də, oò gə́, kə̀ yíl oò bə̀ gə́, dákíìn súúnàá. Zá tə́ kìínmbə̀ màn aa nùù taà laarú, í' súùnmbə̀ rə kíin.

¹⁶Gabm̀bə̀ íí Vɛnɛ́b láŋsə́ wúl lə, íí gàb sínì, bít gabm̀bə̀ Vɛnɛ́b nwúl kùm tə́ aí rú rə, íí gàb sínì?

¹⁷Dáà nɛ́ŋə̀ nə́ŋ̀ yɛ̀l Vɛnɛ́b láŋsə́ wúlì gə́, Vɛnɛ́b dá nɛ́ŋə̀ rə yɛɛ̀l kɔ̀. Kàandə, Vɛnɛ́b láŋsə́ wúl gə́, tə́ *gìdńná, bít aíra íí kùmsə̀n Vɛnɛ́b láŋsə́ wúl aa roó.

¹⁸Nɛ́ŋə̀ oò záá yíl oò kə̀ nɛɛ̀n oò sí. Dáà nɛ́ŋə̀ nə́ŋ̀ aí tə́ŋú, sèl bàà yàá kə̀ yíl oò bìá, bəǹ nɛ́d in bə̀ gabm̀ zɔ̀ŋə yɛ́b bə gə́, oò bí' yíl oò bə̀ kèérá, bə́ŋ̀ dá in gabm̀ vɛ́nà gə́ roó.

¹⁹Kə̀ taàbìá, ingabké gbà'á aa zɔ̀ŋə yɛ́b bərə, Vɛnɛ́b núùrú gə́, kèéd iná. Kə̀ aakíin də, Núúboòd Gìdń bàà: «Vɛnɛ́b dá nɛ́b in bə̀ gabm̀ bəd kodǹ kə̀ tɔ̀ɔ̀l in boò bəraa bə̀ tə́ ma'ǹ də ní.»

²⁰Bítsɔ̀ŋ, bàà: «Báátììkpɛ̀ŋ gàb nɛ́b in bə̀ gabm̀ bəd inselké boò yàá. Bít gàb yàá, inselké boò in tɛdńná.»

²¹Kə̀ aakíin də, nɛ́ŋə̀ nə́ŋ̀má oò pà' yíl kə̀ nɛ́b bəd sí. Kàandə, in gə́ kóólé, tə́ aí nɛɛ̀n tɛ́mú.

²²Kóó Pol la, kóó Apolos da, kóó Piyɛr ra, kóó yɛ́b aa yóo, kóó gɔ̀ŋsá, kóó valá, kóó kə̀ in bəraa zɔ̀ŋə yɛ́b bəroó, kóó in bəraa dáà yaànà roó, in gə́ kóólé, tə́ aí nɛɛ̀n tɛ́mú.

²³Zá aí gə́, íí tə́ Krístù nɛɛ̀n tɛ́mú. Krístù kɔ̀ tə́ Vɛnɛ́b nɛɛ̀n tɛ́mú.