Read Samba Leko 1 Korintu 4 Bible Online

1 Korintu 4 - Samba Leko bible

1 Korintu 4

¹Boò ɛ̀g bə́ kìínmbə̀ Krístù nɛ́b tù' bə̀ ma'ǹ bəd kíin, bít kìínmbə̀ nɛ́b yíl bə̀ bəraa Vɛnɛ́b ì' bə̀ *inmə́'ke oò bəd də kíin.

²In aa bə̀ sàà nɛ́d yíl bə̀ aa bə̀ piiù tù' naà rə, oò kùm nɛ́d tù' bə̀ ma'ǹ sɔ̀ɔ̀ná.

³Zá máá gə́, kóó ìì fág mə́ sùnú, sínkɔ̀ nɛ́b zɔ̀ŋə yɛ́b bə bə̀ boò fág mə́ sùnú, nwɔŋ bə sé. Zá kə̀ yíl máá bə̀ kɔ̀, mə́ fág yíl mə́ gá.

⁴Vɛ́nà, inselké máá bə̀ ál mə́ in nə́ŋ̀má bə sé. Zá aarə, í' baànmbə̀ mə́ mà' invaksə́ nə́ŋ̀má sín gá. Báátììkpɛ̀ŋ kùmsə̀n màn aa tə́ mə́ fágǹ doó.

⁵Kàandə, gbád ìì fág nɛ́ŋə̀ sí, ìì nwán Báátììkpɛ̀ŋ oò yaà sína. Oòra dá sə̀n inmə́'ke bəraa tígə́lə́ rə vú'nàá, bít sàà dá sə̀n nɛ́b bəd inselké mə́'ke bəraa tɛ́mú rə vú'nàá. Kə̀ aakíin də, kóó nɛ́ɛ̀réè, dá káŋke oò bɔbm̀ kə̀ nɛɛ̀n aa dá bɔbm̀ dú rə kíin.

⁶Ɔ̀dkudvɛɛ̀l mə́ í'sɛ̀lbə̀ bərá, aí bòórú, mə́ gám taà nwɔŋ bəraa Apolos yílú, bít kə̀ máá yílú. Mə́ mà' kə̀ aakíin də, bɔ̀b aí bə̀ nwɔŋ aa bə̀ bàà «Ìì ɛ̀m zɔ̀ŋ bùúd kə̀ nwɔŋ aa Núúboòd bàà rə sí» rə saànmbìá. Nɛ́ŋə̀ nə́ŋ̀má aí tə́ŋú, oò sèl baànmbə̀, nɛ́ŋə̀ bə́ iirə yée, nɛ́ŋə̀ nə́ŋ̀ kànsə̀n nɛ́ŋə̀ nə́ŋ̀ sí.

⁷Nɛ́ɛ̀réè pii n sə̀n gbà'á nɛ́b bəd númú gú? In aa ń kə̀ naà rə kóólé, máàn Vɛnɛ́b pii n sìnì? Zá kàandə, kə̀ níìbə̀ ḿ pà' taà yíl in aa bə̀ pii n də bə gú?

⁸Bə́ŋyée máàn aí gə́, líí íí wùb yèè? Máàn bə́ŋyée íí bíl nɛ́b gbaŋə̀ bə̀ bəd yèè? Mə́ í' ìì ləə gààrá, bɔ̀b obə́ kɔ̀, bá ləə̀n taà kə̀ aí tá!

⁹Lúŋ mə́ tə́ kìínmbə̀ bə́ *Yéésù gbantumsə̀ bəd gə́, Vɛnɛ́b zíg dàà bə́ tə́ zɔ̀ŋ sɔ̀ɔ̀nsín vaksə́ rú, kìínmbə̀ nɛ́b aa kò' bə̀ tə́ lo'ǹ də kíin. Obə́ gə́, kò' bə̀ àà bə́ gààd páárú, *malaika bəd númú, bít kə̀ nɛ́b zùúm bəd númú.

¹⁰Krístù bòórú gə́, bə́ bíl kèéd yàá. Zá aí gə́, íí nɛ́b in bə̀ gabm̀ bərá, Krístù rú. Obə́ gə́, bə́ kə̀ kpɛŋsɛ́l naà sé. Zá aí gə́, íí nɛ́b kpɛŋsɛ́l bə̀ bərá. Aí gə́, íí nɛ́b aa nɛ́b bəd tə́ káŋ̀ doó. Zá obə́ gə́, bə́ nɛ́b aa ɛ̀g bə̀ tə́ gɔɔ̀n doó.

¹¹Yaà wə́ə́ kə̀ bə́ŋyée kíin zé, bə́ tə́ kə̀ gulùmá, bít kə̀ wəl súurá. Bə́ tə́ záání, bə̀ í' bə́ búúd tə́ kúnú, gəə̀l bə́ ɛ̀m tə́ kàaní.

¹²Bə́ mà' tù' kə̀ kpɛŋsɛ́l bə́ ra, bə́ zàn taà yíl bə́ ra. Màìgə́, bə̀ dúl bə́ì gə́, bə́ zíg bə̀ nɛɛ̀n yílú. Bə̀ í' bə́ búúrì gə́, bə́ sìd kúnú.

¹³Màìgə́, nɛ́ŋə̀ gám nwɔŋ vaksə́ì obə́ yílə́ gə́, kè' bə́ í'ù kə̀ tɛ́m làmkèá. Yaà wə́ə́ kə̀ bə́ŋyée kíin zé, bə̀ ɛ̀g bə́ tə́ kìínmbə̀ saal aa pú' bə̀ tə́ za'ǹ də kíin, bít kìínmbə̀ insɔ̀ɔ̀nsín bəraa làà bə̀ tə́ lɛ́ɛ̀l lə kíin.

¹⁴Mə́ bári núúboòraa, bɔ̀b aí bə̀ sə́ə́mnúù daànmbə̀ gá. Zá mə́ í' ii tɔgnmbìa, íí yɛb í'sɛ̀lbə̀ mə́ bərá.

¹⁵Kə̀ aakíin də, nɛ́b bəd laa núnà zɔ̀ŋ laa núnà dá ii kíìn báàn in sáànmbə̀ Krístù yílú. Zá máára mə́ kùmsə̀n báá íí ra, máá nə́ŋ̀ní. Kàandə, máára mə́ lɛ̀bi sə̀n kə̀ *Nwɔŋ Puu Sɔ̀ɔ̀nkèá, Yéésù Krístù rú.

¹⁶Kə̀ aakíin də, mə́ tə́ ii kíìn nyɛɛ̀m kə̀ tɛ́m ɔ̀gkeá, ìì mà' kə̀ nɛɛ̀n aa mə́ tə́ ma'ǹ də kíin.

¹⁷Kə̀ taàbìá, tùm mə́ àà taà Timote aí sunú. Oòra kùmsə̀n wàà í'sɛ̀lbə̀ mə́ra, bít nɛ́d tù' bə̀ ma'ǹ sɔ̀ɔ̀ná, kə̀ walke kə̀ Báátììkpɛ̀ŋá. Sèl dá ii nɛɛ̀n aa mə́ kùm dú, kìínmbə̀ nɛ́d bagké kíin, Yéésù Krístù rú rə zá'nàá, kìínmbə̀ nɛɛ̀n aa mə́ tə́ nɛ́b bəd in sáàn dú, *Eklisiya bərú kóólé rə kíin.

¹⁸Nɛ́b kam aí tə́ŋú, bə̀ pà' yílá, sèl ìì bàà mə́ yaà aí səǹ sɔ̀ŋ gá.

¹⁹Zá Báátììkpɛ̀ŋ kè'ì gə́, máà kíìn yaànà kə̀ báŋ aí sunú. Kàandə, mə́ í' nɛ́b yíl pa'ké bəd nwɔŋ gámke boò gabm̀bə̀ ní gá, zá mə́ í' gabm̀bə̀ bə̀ tə́ kə̀ kpɛŋsɛ́l Vɛnɛ́b bə̀ naà gə́ roó!

²⁰Kàandə, Vɛnɛ́b ləə gààrì nɛ́ŋə̀ nə́ŋ̀ tɛ́mú gə́, kə̀ nwɔŋ aa tə́ gáàm gú' bərə gá, zá kə̀ Vɛnɛ́b kpɛŋsɛ́l aa tə́ tù' ma'ǹ oò gɔ̀ŋsə́ rú roó.

²¹Íí í' níì gú? Máà yaà aí səǹ kə̀ nyɛ́gsə̀ì, kóó sínkɔ̀ tɛ́m aa nyìì kə̀ í'sɛ̀l, bít kə̀ ɔ̀gke reè?