Read Samba Leko 1 Korintu 5 Bible Online

1 Korintu 5 - Samba Leko bible

1 Korintu 5

¹Bə́ kìì bə̀ tə́ baàn zɔ̀ŋ gə́ kóólé, invaksə́ kilə̀ bə̀ wáàl tə́ aí tə́ŋú. Invaksə́ kilə̀ bə̀ wáàl aarə, sɔ̀ɔ̀n sín gbàákù. Kóó nɛ́b aa bə̀ bàg Vɛnɛ́b síndə máá, bə̀ mà' invaksə́ kilə̀ bə̀ wáàl aarə gá. Kə̀ aakíin, bə̀ bàà gə́, nɛ́ŋə̀ nə́ŋ̀ aí tə́ŋú, ləə tə́ kə̀ báá oò kéèná, kìínmbə̀ kéèn oò kíin!

²Bít íí nyìì tə́ kə̀ yíl pa'kéá! Dáà aa dá sɔɔ̀n də, ìì nyìì bəd kə̀ tɛ́m nwuukèá, bít dáà nɛ́ŋə̀ aa mà' in luùm aarə, nìŋ ìì vúŋ̀ kíìn aí tə́ŋú.

³Máá gə́, kóó dáà mə́ kùm tə́ zɔ̀ŋ bùúd kə̀ aíra, nwul mə́ gə́, tə́ zɔ̀ŋə aí tə́ŋú. Máá gə́, mə́ fág nɛ́ŋə̀ aa mà' invaksə́ aí tə́ŋə́ yérəì gbòód, kìínmbə̀ mà' invaksə́ aarə tə́ máá səǹ kíin.

⁴Kə̀ aakíin də, sɛŋ aa íí wál lə́ rə gə́ kóólé, Báátììkpɛ̀ŋ Yéésù kpɛŋsɛ́l kùmì kə̀ aí tə́ gə́,

⁵ìì vúŋ nɛ́ŋə̀ aarə kíìn nɛ́b bagké bəd tə́ŋú, bít ìì piiù *Satan nɛɛ̀n tɛ́mú, bɔ̀b Satan oò yɛ̀l si' invaksə́ bə̀ ma'ǹ oò aa roó, bɔ̀b oò bɔ̀b kə̀ *gɔ̀ŋsə́ aa bɛ́d bə gá rə sɛŋ aa Báátììkpɛ̀ŋ dáà bídǹnà bəroó.

⁶Íí kə̀ in nə́ŋ̀má naà yíl bə̀ pa'ǹ sé! Íí gàb zagəm aarə yàá: «*Inváàndo zɔ̀gɔ̀ní, zá' bɛ́' zəəm aa bə̀ lə̀g də kíìn kə̀ zɔ̀ŋtá.»

⁷Pà' ìì zá' inváàndo doo aarə kúnú, taà kùmsə̀n baànmbə̀ invaksə́ íí bərá, bɔ̀b ìì kùm nyɛdkèá. Kàandə, Krístù kùmsə̀n sadaka Bɛ̀rə̀wà bə́n aa bə̀ wéé *Paska bəroó.

⁸Báà ma'ǹ *Paska rə kúnú. Báà ma'ǹ kə̀ inváàndo doo, tɛ́m yɛɛ̀l bə̀ bít invaksə́ bə̀ ma'ǹ sí, báà ma'ǹ kə̀ *bə̀rɛ́d aa inváàndo rú síndoó, bə̀rɛ́d nyɛdkèá, bít bə̀rɛ́d vɛ́nà bìá.

⁹Núúboòraa bád mə́ piiiyà númú yérə, mə́ í' ìì wál kə̀ nɛ́b invaksə́ kilə̀ bə̀ wáàl ma'ǹ bəd tə́ sí.

¹⁰Zá vɛ́nà bə̀ gə́, núúboòraa mə́ bári yérə, mə́ í' baànmbə̀ ìì pɛd kə̀ nɛ́b aa bə̀ tə́ invaksə́ ma'ǹ zɔ̀ŋə yɛ́b bərə kóólé gá. Mə́ bári nɛ́b labsə̀ bə̀ ma'ǹ bəd yílə́ gá, nɛ́b aa bə̀ tə́ nɛ́b kambəd in í'ǹ də yílə́ gá, lííro bəd yílə́ gá, sínkɔ̀ nɛ́b vɔɔm bə̀ pɔ̀bm̀ bəd yílə́ gá. Íí dá pɛdǹ kə̀ in bəraa yée kóólé gə́, ìì vúg kíìn zɔ̀ŋə yɛ́b ba!

¹¹Mə́ bári núúboòd də, bɔ̀b ìì wál kə̀ nɛ́b luùm bəraa yée tə́ sí' nɛ́ŋə̀ aa kè' nɛ́d bagké nə́gə́lá, bít tə́ invaksə́ kilə̀ bə̀ wáàl ma'ǹ doó, nɛ́d ba' bə̀ í'ǹná, nɛ́d vɔɔm bə̀ pɔ̀bm̀má, nɛ́ŋə̀ gú' vaksə́ bìá, nɛ́d badn bə̀ widǹná, lííroá. Nɛ́b luùm bəraa rə, wál ìì líí inlíìnmbə̀ kə̀ boò tə́ sí.

¹²In nə́ŋ̀má wál mə́ kə̀ nɛ́b aa bə̀ bàg Yéésù síndə fágǹmbə̀ sé. Vɛnɛ́b kə̀ yíl oòra, dá bə̀ sə̀n fágàá. Aí gə́, íí bán nɛ́b aa aí wálke rú rə fágǹmbə̀ géè? Kìínmbə̀ nɛɛ̀n aa Núúboòd Gìdń bàà rə kíin: «Nìŋ ìì vúŋ nɛ́d vaksə́ kíìn aí tə́ŋú.»