Read Samba Leko 1 Korintu 6 Bible Online

1 Korintu 6 - Samba Leko bible

1 Korintu 6

¹Màìgə́, nɛ́ŋə̀ nə́ŋ̀ aí tə́ŋú, álì kə̀ ɔ̀dkudvɛɛ̀l oò gə́, dɛ̀d nɛ́b aa bàg Vɛnɛ́b síndə boò fág bənə́ sùnú. Aa dá sɔɔ̀n də gə́, boò dɛ̀d Vɛnɛ́b nɛ́b gìdń bəd boò fág sə̀n nwɔŋ aa roó.

²Gabm̀bə̀ Vɛnɛ́b nɛ́b gìdń bəd yaà bə̀ dá nɛ́b aa zɔ̀ŋə yɛ́b bərə fágǹ də, íí gàb sínì? Bít dáà íí dá sə̀n nɛ́b aa zɔ̀ŋə yɛ́b bərə fágǹ gə́, ééleè íí bán taà in aa kə̀ pɛ̀sə́ naà gbàákù síndə fágǹmbə̀ gá gú?

³Gabm̀bə̀ báan sə̀n *malaika bəd fágǹ də, íí gàb sínì? Bít in bəraa zɔ̀ŋə yɛ́b bərə, dá bə́n sə̀n pɛ̀rì?

⁴Kə̀ aakíin də kɔ̀, màìgə́, íí mà' álsɛ̀l luùm aarəì gə́, sàà dá íí pàà nɛ́b aa *Eklisiya bəd bə̀ ɛ̀g bə̀ kə̀ nɛ́b bəd kíin síndə, bə̀ fág ii sùnú.

⁵Mə́ bàà nwɔŋ aarə, bɔ̀b sə́ə́mnúù oò mà' ii kúnú. Nɛ́d in bə̀ gabm̀ nə́ŋ̀má zɔ̀ŋə aí tə́ŋú, nwɔŋ aarə fágǹ vədǹmbə̀ ɔ̀dkudvɛɛ̀l íí bəd tə́ŋə́ sínì?

⁶Zá tə́ bée sɔ̀ɔ̀ní, ɔ̀dkudvɛɛ̀l nə́ŋ̀ luùnmbə̀ fágə́nú, nɛ́b fágə́n bə̀ bəraa bə̀ bàg Vɛnɛ́b síndə númúì? Sɔ̀ɔ̀n sé.

⁷Vɛ́nà, in aa ì' gə́, íí yi'ì rə, nɛɛ̀n aa íí tə́ ɔ̀dnə́ŋ̀ luùn dú, íí bòdbə yéroó. Kə̀ níìbə̀ íí sìd taà in aa wɔ̀ɔ̀lə̀ síndə gá gú? Bít kə̀ níìbə̀ íí sìd taà in bɔɔ̀n pa'ǹmbə̀ gá gú?

⁸Zá aí gə́, íí tə́ in aa wɔ̀ɔ̀lə̀ síndə ma'nàá, íí tə́ lííro pa'nàá. Bít íí mà' tə́ kə̀ aakíin, kə̀ ɔ̀dkudvɛɛ̀l íí bərá!

⁹Íí gàb yàá vɛ́nà, nɛ́b aa bə̀ tə́ invaksə́ ma'ǹ də, bə̀ bɔ̀b zɔ̀ŋ *Vɛnɛ́b gààrú gá. Ìì záá yíl íí sí. Nɛ́b invaksə́ kilə̀ bə̀ wáàl bərá, nɛ́b vɔɔm bə̀ pɔ̀bm̀ bərá, nɛ́b labsə̀ bə̀ ma'ǹ bərá, nɛ́b súúsɛ́l bə̀ bəraa bə̀ ləə nɛ́ŋ váàndo kə̀ nɛ́ŋ váàndo roó,

¹⁰lííro bərá, nɛ́b ba' bə̀ í'ǹ bərá, nɛ́b badn bə̀ widǹ bərá, nɛ́b gúsuúm bə̀ bərá, kə̀ lííro ba' bə̀ nyá'ǹ ke'ǹ bəd tá, boò kóólé, bə̀ bɔ̀b zɔ̀ŋ *Vɛnɛ́b gààrú gá.

¹¹Nɛ́b kam aí tə́ŋú, bə̀ kùmà kàani. Zá bə́ŋyée gə́, invaksə́ íí bəd sugmínà yàá. Bə̀ bí' ii ìì kùm nɛ́b *gìdńná, bít Vɛnɛ́b bààì íí nɛ́b wɔ̀ɔ̀lə̀ bəd obəǹ númú, Báátììkpɛ̀ŋ Yéésù Krístù nə́gə́lú, kə̀ Báá bə́n Vɛnɛ́b nwulá.

¹²Nɛ́b kambəd aí tə́ŋú, bə̀ tə́ baàn: «Mə́ tə́ kə̀ kpaŋ̀ naà in gə́ kóólé ma'ǹmbìá.» Zá in gə́ kóólé sə̀n insɔ̀ɔ̀n gá. Má kíìn báàn baànmbə̀: «Mə́ tə́ kə̀ kpaŋ̀ naà in gə́ kóólé ma'ǹmbìá.» Zá mə́ bán in nə́ŋ̀ kɔ̀' bílǹmbə̀ gá.

¹³Mə́ tə́ ii kíìn baanàá: «Inlíìnmbə̀ gə́, bàgə̀l bìá, bít bàgə̀l kɔ̀, inlíìnmbə̀ bìá.» Zá Vɛnɛ́b dá in bəraa iirə yée kóólé kíìn dúŋàá. Zá nɛ́ŋə̀ si' gə́, Vɛnɛ́b kùrə̀ invaksə́ kilə̀ bə̀ wáàl bə̀ ma'ǹ gá. Si' gə́, Báátììkpɛ̀ŋ tù' bə̀ ma'ǹná, bít Báátììkpɛ̀ŋ kɔ̀, nɛ́ŋə̀ si' bìá.

¹⁴Vɛnɛ́b díím Báátììkpɛ̀ŋ bə́nnì valú. Kə̀ aarə kíin, dá bə́n díìm valú kə̀ kpɛŋsɛ́l oòra.

¹⁵Íí gàb yàá, si' íí bəd kùm tə́ kìínmbə̀ zɔ̀ŋ nə́ŋ̀ Yéésù Krístù sisú bə̀ kíin. Má bée Krístù si' pa'ǹ, bídǹ bí'ǹmbə̀ nɛ́ŋ kéèndo labsə̀ bə̀ ma'ǹ sisì.

¹⁶Gabm̀bə̀ nɛ́ŋə̀ aa wál kə̀ nɛ́ŋ kéèndo labsə̀ bə̀ ma'ǹ tə́ rə, tə́ si' nə́ŋ̀ní kə̀ oò tə́ rə, íí gàb sínì? Kə̀ níìbə̀ íí gàb taà sín gú? Kàandə, Núúboòd Gìdń bàà: «Boò iirə kóólé, bə̀ dáá kuùm si' nə́ŋ̀ní.»

¹⁷Zá màn aa wálì kə̀ Báátììkpɛ̀ŋ də, dá kuùm wúl nə́ŋ̀ní rú kə̀ oò tá.

¹⁸Ìì nùù invaksə́ kilə̀ bə̀ wáàlǹná! Invaksə́ kam bəraa nɛ́ŋə̀ mà' rə gə́ kóólé, pig si' oò gá. Zá màn aa tə́ invaksə́ kilə̀ bə̀ wáàl ma'ǹ də gə́, mà' invaksə́ tə́ kə̀ si' oòra.

¹⁹Gabm̀bə̀ si' íí kùmsə̀n láŋsə́ wúl Nwul Gìdń də, íí gàb sínì? Nwul aarə, tə́ aí rú, bít gabm̀bə̀ Nwul aarə Vɛnɛ́b pii ii sə̀n də, íí gàb sínì? Aí gə́, íí kùm kə̀ yíl aí bə̀ ní sé.

²⁰Vɛnɛ́b káákè' ii yàá. Bə́ŋyée gə́, ìì káŋ Vɛnɛ́b kə̀ si' íí ra.