Read Samba Leko 1 Korintu 7 Bible Online

1 Korintu 7 - Samba Leko bible

1 Korintu 7

¹Bə́ŋyée kè' mə́ tə́ ii nwɔŋ aa íí bád máà núúboòrú rə í'nàá. Aa dá sɔɔ̀n də gə́, nɛ́ŋ váàndo oò pà' kéèn sí.

²Zá invaksə́ kilə̀ bə̀ wáàl bòórú gə́, aa dá sɔɔ̀n də gə́, nɛ́ŋ váàndo gə́ kóólé, oò pà' kéèná, bít nɛ́ŋ kéèndo kɔ̀, oò pà' váàná.

³Bít nɛ́ŋ váàndo oò mà' in aa kéèn oò í' rə kíìn kóólé, kìínmbə̀ váàn oò kíin. Bít nɛ́ŋ kéèndo kɔ̀, oò mà' kə̀ aarə kíin, kə̀ váàn oòra.

⁴Nɛ́ŋ kéèndo bán in aa í' rə ma'ǹmbə̀ kə̀ si' oò bə̀ gá. Si' oò bə̀ rə, nɛ́ŋ váàndo oò bìá. Nɛ́ŋ váàndo kɔ̀ tə́ kàani, bán in aa í' rə ma'ǹmbə̀ kə̀ si' oò bə̀ gá. Si' oò bə̀ gə́, kéèn bìá.

⁵Ìì məə ɔ̀dnə́ŋ̀ bəd aí bòdbə sí. Zá ìì dúg gú' ɔ̀dba, bɔ̀b Vɛnɛ́b bə̀ nyɛɛ̀mmá. Zá bòórú gə́, bít ìì wál taà kilàá. Íí mà' kàan síngə́, nɛɛ̀n aa íí bán yíl aí bə̀ nwáànmbə̀ síndə, dá *Satan kpaŋ̀ piìn, bɔ̀b aí bə̀ də́'ǹ ɛgǹmbìá.

⁶Mə́ bàà ii nwɔŋ aarə, kìínmbə̀ indaŋ̀mbə̀ kíin sé. Zá mə́ ì' ii kpaŋ̀á.

⁷Máá gə́, mə́ í' nɛ́b bəd kóólé, boò kùm kə̀ máá kíni. Zá kóó nɛ́ɛ̀réè, tə́ kə̀ in tɛdńní bə̀ aa Vɛnɛ́b piiù rə naú, in tɛdńní bə̀ luùm gɔ̀ŋ gɔ̀ŋ.

⁸Ìì zɛ̀ŋ túŋá, mə́ tə́ ii kíìn baanàá, íí nɛ́b vɔ̀ɔ̀m bəraa pà' íí bèd kéèn síndoó, kə̀ val kɛ́ɛ̀m bərá' aa dá sɔɔ̀n də gə́, ìì dìì kuùmbə̀ gòòrá, kìínmbə̀ máá kíin.

⁹Zá dáà íí bán kuùmbə̀ gòòd síngə́, aa dá sɔɔ̀n də gə́, ìì pà' váàná, sínkɔ̀ ìì pà' kéèná. Váàn pa'ǹmbə̀ tə́ sɔ̀ɔ̀ní, kə̀ kuùmbə̀ kə̀ í'sɛ̀l gbà'á kɛ́ɛ̀m bìá, sínkɔ̀ vɔ̀ɔ̀m bə̀ gə́ roó.

¹⁰Nɛ́b bagké bəraa bə̀ pà' kéèn doó, mə́ tə́ ii núúboòd indaŋ̀mbə̀ aa piinàá, indaŋ̀mbə̀ aarə, vúgà máá naà gá. Zá vúgà Báátììkpɛ̀ŋ naú. Nɛ́ŋ kéèndo oò pɛd kə̀ váàn oò sí. Sɛŋ aa bə̀ pɛrì rə, oò pà' váàn ɔ̀d sí, sínkɔ̀ oò pà' kéèn ɔ̀d sí.

¹¹Zá m̀ pɛd kə̀ váàn ń sí. Íí pɛrì gə́, ǹ kùm kàaní, bɔ̀b bíd dá ǹ saŋ̀ kə̀ oò sɔ̀ŋ. Nɛ́ŋ váàndo kɔ̀ oò vúŋ kéèn oò sí.

¹²Mə́ tə́ nɛ́b kambəd baanàá (máá ra mə́ tə́ sə̀n baanàá, Báátììkpɛ̀ŋ gá) dáà ɔ̀dkudvɛɛ̀l nə́ŋ̀ pà' kéèn aa bàg Yéésù síndə yàá, bít kéèn də kè'ì kuùmbə̀ kə̀ oò tə́ sɔ̀ɔ̀nkè gə́, nìŋ oò vúŋ̀ sí.

¹³Bít dáà nɛ́ŋ kéèndo nə́ŋ̀ pà' váàn aa bàg Yéésù síndə yàá, bít váàn də kè'ì kuùmbə̀ kə̀ oò tə́ sɔ̀ɔ̀nkè gə́, nìŋ oò vúŋ̀ sí.

¹⁴Kə̀ aakíin də, nɛ́ŋ váàndo aa bàg Yéésù síndə, mà' bə̀ bí'ùwì gìdń nɛɛ̀n aa pà' nɛ́ŋ kéèndo aa bàg Yéésù rə bòórú. Nɛɛ̀n aarə rú, nɛ́ŋ kéèndo aa nɛ́d bagké síndə kɔ̀, mà' bə̀ bí'ùwì gìdń, nɛɛ̀n aa pà' nɛ́ŋ váàndo aa bàg Yéésù rə bòórú. Kə̀ aakíin síngə́, yɛb boò bəd bə̀ dá kuùm yɛb nyìb bə̀ bərá. Zá bə́ŋyée gə́, bə̀ tə́ *gìdńná.

¹⁵Kàandə kɔ̀, dáà nɛ́ŋə̀ aa nɛ́d bagké sé, í'ì pɛdǹmbə̀ kə̀ nɛ́d ligə̀ bə̀ oòrə, boò dààù oò mà' kíìn kə̀ nɛɛ̀n aa í' rə kíin. Kə̀ aarə kíin də, nɛ́d ligə̀ bə̀ bagké rə, kóó oò kùm nɛ́ŋ váàndoá, sínkɔ̀ nɛ́ŋ kéèndoá, tə́ kə̀ yíl oòra. Kàandə, Vɛnɛ́b dɛ̀riyà, bə̀ yaà ìì kùm kə̀ tɛbàá.

¹⁶Ámda ń nɛ́ŋ kéèndo bagkéá, ń gàbì ń dá váàn ń kíìn súúnì? Ámda ń nɛ́ŋ váàndo bagkéá, ń gàbì vɛ́nà ń dá kéèn ń kíìn súùn wa? Nɛ́ŋə̀ nə́ŋ̀má gàb sé.

¹⁷Kóó nɛ́ɛ̀réè, oò kùm kìínmbə̀ nɛɛ̀n aa Vɛnɛ́b piiù rə kíin. Oò kùm nɛɛ̀n aa dá sɔɔ̀n dú roó, kə̀ nɛɛ̀n aa kùmà rú rə kíin, sɛŋ aa Vɛnɛ́b dɛ̀rə̀wà roó. Aa yée indaŋ̀mbə̀ aa mə́ zíg nɛ́b bagké *Eklisiya bə̀ bəd gə́ kóólé roó.

¹⁸Nɛ́ŋə̀ nə́ŋ̀ nàà gàbì gə́, oò sàà *gàb naaké oò bɔ̀'ǹmbə̀ sí. Nɛ́ŋə̀ aa nàà gàb síndə, oò sàà gàb naànmbə̀ sɔ̀ŋ sí.

¹⁹Kóó ǹ kùm nɛ́ŋə̀ aa nàà gàb doó, sínkɔ̀ nɛ́ŋə̀ aa nàà gàb síndoó, aarə pɛ̀sə́ bə sé. In pɛ̀sə́ bə̀ rə, ləə̀nmbə̀ Vɛnɛ́b indaŋ̀mbə̀ bərá.

²⁰Kóó nɛ́ɛ̀réè, oò kùm kìínmbə̀ nɛɛ̀n aa Vɛnɛ́b dɛ̀rə̀wà rə kíin.

²¹Ń kùmà kɔ̀', sɛŋ aa Vɛnɛ́b dɛdnnà reè? Oò nyágə́l n tɛ́m sí. Zá dáà ḿ bɔ̀b kpaŋì nɔŋ̀ vúgǹmbə̀ rú wərə̀ gə́, nɔ̀ŋ ǹ vúg kúnú.

²²Kàandə, kɔ̀saa Báátììkpɛ̀ŋ dɛ̀d də, kùmsə̀n nɛ́ŋə̀ aa Báátììkpɛ̀ŋ bìn lɛ́'ù roó. Kə̀ aarə kíin sɔ̀ŋ, nɛ́ŋə̀ aa kɔ̀' síndə, kùmsə̀n Krístù kɔ̀sá.

²³Báátììkpɛ̀ŋ káákè' bə́nnàì kə̀ pɛ̀sá. Bə́ŋyée gə́, ìì bí' yíl aí bə̀ nɛ́b bəd kɔ̀' sí.

²⁴Ɔ̀dkudvɛɛ̀l mə́ í'sɛ̀lbə̀ bərá, kóó nɛ́ɛ̀réè aí tə́ŋú, oò kùm Vɛnɛ́b númú, kə̀ nɛɛ̀n aa nyàam kùmà rú, sɛŋ aa Vɛnɛ́b dɛ̀rə̀wà rə kíni.

²⁵Mə́ gám nwɔŋ aa tə́ nɛ́b aa pà' bə̀ bèd kéèn sé, sínkɔ̀ pà' bə̀ bèd váàn síndə yílú. Aarə Báátììkpɛ̀ŋ indaŋ̀mbə̀ gá. Zá mə́ tə́ ii kíìn tɔ̀gàá, kìínmbə̀ nɛ́ŋə̀ aa Báátììkpɛ̀ŋ mà'ù pə̀dkè, nɛ́b bəd bə̀ dákíìn báàn tɛ́m zígǹmbə̀ oò bərə kíin.

²⁶Búúraa bə́ŋyée rə bòórú gə́, in aa mə́ sèl lə yóo. Tə́ sɔ̀ɔ̀ní, nɛ́ŋə̀ oò kùm nɛɛ̀n aa nyàam kùm dú rə ní.

²⁷Ń tə́ kə̀ kéèn naàì? Ǹ sààù vúŋ̀ lɛ́'ǹmbə̀ sí. Ḿ pà' kéèn sínì? Ḿ pà' síngə́, ǹ sàà kéèn pa'ǹmbə̀ sí.

²⁸Kə̀ aakíin də, dáà íí pà' kéènì gə́, íí mà' invaksə́ nə́ŋ̀má sé. Bít dáà wàà kéèn bèlzá pà' váànì gə́, mà' invaksə́ nə́ŋ̀má sé. Zá nɛ́b aa bə̀ pà' kéèn də, bə̀ dá gbo'kè bɔbm̀ nyàm gə́ kóólé boò yiilú, bít mə́ tə́ ii láŋ̀ bə, bɔ̀b ìì vúg kíìn gbò'kè aarə rú.

²⁹Ɔ̀dkudvɛɛ̀l í'sɛ̀lbə̀ mə́ bərá, aa yée nwɔŋ aa mə́ í' ii baànmbə̀ roó' sɛŋ nyɛ́d tə́ zɔ̀gɔ̀ní. Sɔ̀d bə́ŋyóo, aa dá sɔɔ̀n də gə́, nɛ́b vɔ̀ɔ̀m bəraa pàl kɛ́ɛ̀m də, boò kùm kìínmbə̀ bə̀ pàl kɛ́ɛ̀m sín kíin.

³⁰Nɛ́b aa bə̀ tə́ kpə̀ə́ǹ kpəə̀n də, bə̀ mà' tə́ kìínmbə̀ bə̀ kpə̀ə̀ kpə̀ə́ǹ sə́n kíin. Bít nɛ́b aa bə̀ tə́ lód loòn də, bə̀ mà' tə́ kìínmbə̀ bə̀ lòò lód sə́n kíin. Nɛ́b aa bə̀ tə́ in lɛ́bm̀ də kɔ̀, bə̀ mà' tə́ kìínmbə̀ in aa bə̀ tə́ lɛ́bm̀ də, bə̀ kə̀ naà sín kíin.

³¹Nɛ́b aa bə̀ tə́ tù' ma'ǹ kə̀ gbaŋə̀ zɔ̀ŋə yɛ́b bərə, boò mà' kìínmbə̀ gbaŋə̀ boò bə̀ kíin sí. Kàandə, nɛɛ̀n aa yɛ́b aa kùm dú yérə, dákíìn bɛ́ràá.

³²Mə́ í' ìì kùm inselké rú sí. Màn aa pà' kéèn síndə, dá nɔŋ̀ Báátììkpɛ̀ŋ tù' ma'ǹmbìá, bɔ̀b bəǹ sɔ̀ɔ̀n Báátììkpɛ̀ŋá.

³³Zá nɛ́ŋə̀ aa pà' kéèn də, dá nɔŋ̀ in zɔ̀ŋə yɛ́b bə bə̀ ma'ǹmbìá. Dá in aa dá kéèn oò sɔɔ̀n də ma'nàá.

³⁴Kə̀ aakíin də, tɛ́m oò pɛrì iira. Kə̀ nɛɛ̀n aarə kíin sɔ̀ŋ, nɛ́ŋ kéèndo aa pà' váàn síndoó, sínkɔ̀ wàà kéèn bèlzá, tə́ nɔŋ̀ Báátììkpɛ̀ŋ tù' ma'ǹmbìá, bɔ̀b si' bəǹ oò kùm *gìdńná, kə̀ nwul bəǹ tá. Zá nɛ́ŋ kéèndo aa pà' váàn də, tə́ in zɔ̀ŋə yɛ́b bə bə̀ selàá. Tə́ saàn in aa dá váàn oò sɔɔ̀n də ma'ǹmbìá.

³⁵Mə́ gám nwɔŋ aa kə̀ aakíin də, mə́ í' ii láŋ̀mbə̀ ba, bít mə́ pè' ii, bɔ̀b ìì mà' in nə́ŋ̀ gá. Zá mə́ í' ìì mà' kìínmbə̀ nɛɛ̀n aa dá sɔɔ̀n dú rə kíin, bɔ̀b kuùm dugǹmbə̀ Báátììkpɛ̀ŋ tùsú. Bít ìì sèl in ɔ̀d nə́ŋ̀ gɔ̀ŋ sí.

³⁶Dáà wàà váàndo nə́ŋ̀ tab wàà kéèndo nə́ŋ̀ yàá, pà'ù sé, zèd boò tə́ dáàn númú gə́, boò pà' ɔ̀dnə́ŋ̀ kúnú, bə̀ í'ì ɔ̀dnə́ŋ̀ pa'ǹmbə̀ gə́ roó. Aarə invaksə́ gá.

³⁷Zá dáà nɛ́ŋə̀ nə́ŋ̀, sèl bàà yàá oò tɛ́mú, bəǹ pà' wàà kéèn bèlzá rə gá gə́, dákíìn báàn yíl oò bə̀ nwáànmbìá, bít sèl yàá kə̀ yíl oò bìá, nɛɛ̀n aa bəǹ dá ma'ǹ dú rə gə́, aarə mà' insɔ̀ɔ̀ná, pà' wàà kéèn bèlzá aarə síngə́ roó.

³⁸Kə̀ aakíin də, nɛ́ŋə̀ aa pà' wàà kéèn bèlzá aa gám dəì rə, mà' insɔ̀ɔ̀ná. Zá nɛ́ŋə̀ aa pà' síndə gə́, mà' kàn sə̀n kə̀ in sɔ̀ɔ̀ná.

³⁹Nɛ́ŋ kéèndo aa pà' váàn də, bə̀ tə́ nə́ŋ̀ní kə̀ váàn oò tá, sɛŋ aa bə́ŋ̀ váàn oò tə́ kə̀ gɔ̀ŋsə́ roó. Zá val kò' váàn oòì gə́, tə́ kə̀ yíl oò bìá, dákíìn báàn váàn aa í' rə pa'ǹmbìá. Zá oò pà' nɛ́ŋ váàndo bagkéá.

⁴⁰Kə̀ aakíin də, wàà kéèn aarə dá kuùm kə̀ tɛ́m làmkè gbà'á, dáà kùmì kə̀ nɛɛ̀n aa kùm dú yée kíin gə́ roó. Aarə inselké máá bìá, bít mə́ gàb də, Vɛnɛ́b Nwul tə́ kə̀ máá tá.