Read Samba Leko 1 Korintu 8 Bible Online

1 Korintu 8 - Samba Leko bible

1 Korintu 8

¹Bə́ŋyée, ɛ̀g báà kudǹ gɔ̀g aa bə̀ pii vɔɔm kìínmbə̀ sadaka kíin də nwɔŋ oòra. Aarə tə́ vɛ́nà: «Bə́n kóólé, bə́n tə́ən kə̀ ingabké naú», kìínmbə̀ nɛɛ̀n aa íí bàà rə kíin. Zá ingabké aarə, pii nɛ́ŋə̀ yílə pa'kéá. Zá í'sɛ̀l Vɛnɛ́b bə̀ gə́, àà nɛ́ŋə̀ númú, tɛ́mbagké rú.

²Dáà nɛ́ŋə̀ nə́ŋ̀ sèl bàà yàá, bəǹ nɛ́d in bə̀ gabm̀ gə́, bə́ŋ̀ gàb in kìínmbə̀ nɛɛ̀n aa dáà dá gabm̀ dú rə kíin sé.

³Zá dáà nɛ́ŋə̀ nə́ŋ̀ í' Vɛnɛ́bì gə́, Vɛnɛ́b kɔ̀ gàbə̀ yàá.

⁴Bə́ŋyée kè' mə́ tə́ nwɔŋ aa íí dɛ̀d də í'nàá. Nɛ́b bagké bəd bə̀ dá béení gɔ̀g aa wéé bə̀ pii vɔɔm də funì? Bə́n gabm̀ yàá sɔ̀ɔ̀nkè, vɔɔm gə́, ì' insɔ̀ɔ̀n nə́ŋ̀má zɔ̀ŋə yɛ́b bə sé. Bít Vɛnɛ́b gə́, tə́ nə́ŋ̀ní tə́ŋtə́ŋ.

⁵Kóó dáà nɛ́b bəd tə́ baàn, vɛnɛ́b bəd tə́ lɛgə́ poú, bít zɔ̀ŋə yɛ́b aa bə máá, kə̀ aakíin də, vɛnɛ́b bəd tə́ zùúm, kə̀ báátììkpɛ̀ŋ bəd tá.

⁶Zá bə́n nɛ́b bagké bəd gə́, Vɛnɛ́b bə́n tə́ nə́ŋ̀ní tə́ŋtə́ŋ, Báá bə́n aa in gə́ kóólé vúgà oò naà roó. Séé bə́n də, bɔ̀b báà ma'ǹ bəǹ tùsá. Bə́n tə́ən kə̀ Báátììkpɛ̀ŋ nə́ŋ̀ní tə́ŋ tə́ŋ, Yéésù Krístù ra. Kə̀ oòra, in gə́ kóólé kummíìn taá, bít kə̀ oòra, bə́n kuùm taá.

⁷Zá nɛ́b bagké kambəd bə̀ gàb vɛ́nà aarə sé. Bə̀ lɛɛ̀mì kə̀ vɔɔmá, yaà wə́ə́ bə́ŋyée zé. Bə́ŋyée sɔ̀ŋ, bə̀ tə́ gɔ̀g aa bə̀ mà' kə̀ sadaka rə líínàá, kìínmbə̀ gɔ̀g aa wéé bə̀ pii vɔɔm də kíin. Vɛ́nà, inselké boò və̀' sé. Bít bə̀ díŋ taà yíl boò kə̀ inlíìnmbə̀ aa roó.

⁸Inlíìnmbə̀ dá bə́n sə̀n aàn Vɛnɛ́b səǹ gá. Kóó dáà bə́n líìn sínmá, in nə́ŋ̀má bə́n bɔ̀'ǹ gá. Bít dáà bə́n líìnnì má, bə́n bɔbm̀ in nə́ŋ̀má rú wərə̀ gá kɔ̀.

⁹Kə̀ aakíin də, ìì gú' yíl aí bìá, kə̀ nɛɛ̀n aa íí tə́ ma'ǹ dú, kə̀ nɛɛ̀n aa íí í' rə kíìn yéroó; bɔ̀b ìì páá nɛ́b aa tɛ́mbagké boò ká' síndə, invaksə́ rú sí.

¹⁰Kə̀ aakíin də, dáà nɛ́ŋə̀ aa kə̀ tɛ́mbagké və̀'kè naà sé, bé' nɛ́ŋə̀ aa kə̀ «ingabké» naà rə tə́ in líìn vɔɔm wúu gə́, pii nɛ́ŋə̀ aa kə̀ tɛ́mbagké və̀'kè naà síndə, váàndo vɔɔm gbèd dáàn líìnmbə̀ kɔ̀ géè?

¹¹Bít kə̀ aakíin də, ɔ̀dkudvɛɛ̀l aa kə̀ tɛ́mbagké və̀'kè naà sé, val kò' Krístù oò bòórú rə, dá bɔ̀bm̀ «ingabké» ń aarə bòórú!

¹²Bə́ŋyée ḿ mà' invaksə́ì kə̀ aakíin, kə̀ ɔ̀dkudvɛɛ̀l ń aa kə̀ tɛ́mbagké və̀'kè naà síndə gə́, ḿ mà' invaksə́ tə́ kə̀ Krístù ra.

¹³Kə̀ taàbìá, dáà inlíìnmbə̀ bòórú, ɔ̀dkudvɛɛ̀l í'sɛ̀lbə̀ mə́ dá taà yi'ǹ invaksə́ rú gə́, mə́ líí inlíìnmbə̀ aarə sɔ̀ŋ gá. Kə̀ aakíin də, bɔ̀b máà páá ɔ̀dkudvɛɛ̀l mə́ invaksə́ rú sí.