Read Samba Leko 1 Korintu 9 Bible Online

1 Korintu 9 - Samba Leko bible

1 Korintu 9

¹Mə́ bán ma'ǹmbə̀ kə̀ nɛɛ̀n aa mə́ í' rú rə kíin géè? Mə́ kùmsə̀n *Yéésù gbantumsə̀ géè? Mə́ bé' Báá bə́n Tììkpɛ̀ŋ Yéésù sínì? Íí bíl nɛ́b bagké rə, *Nwɔŋ Puu Sɔ̀ɔ̀nkè aa mə́ bàà ii rə bòórú géè?

²Kóó dáà nɛ́b kambəd məə mə́ì gabm̀bə̀ kìínmbə̀ Yéésù gbantumsə̀ kíin má, dáà aí gə́, íí dá nɛɛ̀n aa mə́ kùm dú rə kíìn gabm̀ vɛ́nà. Tùsaa mə́ mà' rə bòórú, íí wál taà kə̀ Yéésù Krístù ra. Taà ì' sə̀n mə́ Yéésù gbantumsàá.

³Ìì ɛ̀g nɛɛ̀n aa mə́ tə́ yíl mə́ tágǹ, kə̀ nɛ́b aa bə̀ tə́ mə́ àlǹ loó'

⁴Mə́ kə̀ kpaŋ̀ naà inlíìnmbə̀ bə̀ bɔbm̀má, sínkɔ̀ wəl bə̀ nyəə̀n, tù' máá aa bə sínì?

⁵Mə́ kə̀ kpaŋ̀ naà nɛ́ŋ kéèndo bagké nə́ŋ̀ pa'ǹ ɛɛ̀mbà bə̀ kə̀ naà, kìínmbə̀ *Yéésù gbantumsə̀ kambəd bə̀ tə́ ma'ǹ də kíin, kə̀ ɔ̀dkudvɛɛ̀l bəd kíin, bít kə̀ Piyɛr kíin sínì?

⁶Máára kə̀ Barnabas tá, bá sə̀ní tù' ma'nàá, bɔ̀b bá taà kə̀ yíl bə́ zanì?

⁷Kìì íí bèrì sóózè nə́ŋ̀ tə́ tù' ma'ǹ Gɔ̀mnà naú, líí in kə̀ ba' oò níì? Nɛ́ŋə̀ nə́ŋ̀ dá béení téé ləgàá, bít yɛ̀b líí tééwà aa lɛ̀b də géè? Sínkɔ̀ nàà yibə̀ nə́ŋ̀ dá béení nàà uunàá, kòd nyəə nàà aa tə́ uùn də vuùm géè?

⁸Ìì gú' seèl baànmbə̀, nwɔŋ aa də́' mə́ ì' yérə, mə́ gám tə́ in aa nɛ́b bəd tə́ ma'ǹ zɔ̀ŋə yɛ́b bərə yílú. Kàandə, Musa indaŋ̀mbə̀ má, bàà tə́ kə̀ aarə kíin.

⁹Musa indaŋ̀mbə̀ bàà: «Ǹ tàb nàà aa tə́ yɛd tiìn də saad wàà gú' bə sí.» Kàandə, Vɛnɛ́b sèl nàà bəd níì?

¹⁰Máàn gám nwɔŋ aarə tə́ obə́n yílə́ níì? Èè, nwɔŋ aarə bə̀ bád tə́ obə́n yílú. Kàandə, màn aa tə́ in laàm də, oò zíg tɛ́m in aa tə́ laàm də ba. Bít màn aa tə́ yɛd tiìn də, oò zíg tɛ́m yɛd aa tə́ tiìn də ba, bɔ̀b dùm oò bɔbm̀bìá.

¹¹Dáà bə́ sáni Vɛnɛ́b nwɔŋ yàá, bít bə́ bɔ̀b in zɔ̀ŋə yɛ́b bə bə̀ì aí naà gə́, aarə insɔ̀ɔ̀n géè?

¹²Dáà nɛ́b kambəd bə̀ tə́ kə̀ kpaŋ̀ naà mú'sɛ̀l dùm bɔbm̀bə̀ aí naà gə́, obə́ gə́, mú'sɛ̀l dùm obə́ bə̀ dá sə̀n boò bə̀ kanàá. Zá obə́ gə́, bə́ pe' ii sé. Zá bə́ sìd in bəd gə́ kóólé, bɔ̀b *Nwɔŋ Puu Sɔ̀ɔ̀nkè oò ɛ̀m númú.

¹³Íí gàb yàá vɛ́nà, nɛ́b aa bə̀ tə́ tù' ma'ǹ láŋsə́ wúu rə, bə̀ dá in aa láŋsə́ wúu rə líínàá. Bít nɛ́b aa bə̀ tə́ in wéèl piìn *gannyàgə̀lú rə, bə̀ dá in aa wéé bə̀ pii *gannyàgə̀lú rə líínàá.

¹⁴Kə̀ nɛɛ̀n aarə kíin, Báátììkpɛ̀ŋ bàà gə́, nɛ́b aa bə́ tə́ *Nwɔŋ Puu Sɔ̀ɔ̀nkè udǹ də, báà líí Nwɔŋ Puu Sɔ̀ɔ̀nkè aa bə́ tə́ udǹ də bòórú.

¹⁵Zá máá gə́, mə́ mà' kàan sé. Bít mə́ bád in aa yée, bɔ̀b in nə́ŋ̀ bɔbm̀bə̀ boò naà gá. Val oò kò' mə́ kúnú, kə̀ nɛ́ŋə̀ tɛ́m yádke mə́ aa pa'ǹ zá'ǹmbə̀ gə́ roó.

¹⁶Máá naà gə́, Nwɔŋ Puu Sɔ̀ɔ̀nkè baànmbə̀ rə, in kùlə́ bə̀ ma'ǹ gá. Kə̀ aakíin də, Vɛnɛ́b pè' pii mə́ sə̀n tùsaa rə kə̀ kpɛŋsɛ́lá. Bít búúd tə́ máá yílú, mə́ ùd Nwɔŋ Puu Sɔ̀ɔ̀nkè sə́n gə́ roó.

¹⁷Dáà sàà mə́ pà' tə́ sə̀n kə̀ yíl mə́ra, tùsaa ma'ǹmbə̀ gə́, má kíìn báàn baànmbə̀ boò káá mə́ sòò ba' ba. Zá Vɛnɛ́b pii máà sə̀n tùsaa rə ma'ǹmbə̀ yée gə́, mə́ tə́ taà tùsaa rə ma'nàá.

¹⁸Kàandə, sòò ba' mə́ rə, níì gú? Sòò ba' mə́ rə, *Nwɔŋ Puu Sɔ̀ɔ̀nkè aa mə́ tə́ baàn tɛdńní roó, bɔ̀b nɛ́b bəd boò káá mə́ ba' Nwɔŋ Puu Sɔ̀ɔ̀nkè aa mə́ tə́ baàn də bòórú sí.

¹⁹Mə́ tə́ kə̀ yíl mə́ra, mə́ nɛ́ŋə̀ kɔ̀' gá. Zá mà' mə́ bí' yíl mə́ kɔ̀' nɛ́b bəd kóólé númú, bɔ̀b máà àà nɛ́b zùúm bəraa bɔ̀b də Krístù sunú.

²⁰Sɛŋ aa mə́ tə́ tù' ma'ǹ *Yahudu bəd tə́ŋə́ rə, mə́ kùm kə̀ Yahudu bəd kíni, bɔ̀b máà àà bə̀ Yéésù sunú. Kóó bə̀ bé' mə́, mə́ tə́ Musa indaŋ̀mbə̀ ləə̀n sə́n má, mə́ mà' kìínmbə̀ mə́ ləəàì kíin. Sɛŋ aa mə́ tə́ tù' ma'ǹ nɛ́b aa bə̀ tə́ indaŋ̀mbə̀ aa ləə̀n də tə́ŋə́ rə, mə́ mà' nɛɛ̀n aa bə̀ mà' rə rú, bɔ̀b máà àà bə̀ Yéésù sunú.

²¹Kə̀ nɛɛ̀n aarə kíin, sɛŋ aa mə́ kùm kə̀ nɛ́b aa bə̀ gàb Musa indaŋ̀mbə̀ síndə tə́ rə, mə́ kùm kə̀ boò kíin, bɔ̀b máà àà bə̀ Yéésù sunú. Aarə í' baànmbə̀ gə́, mə́ ləə Vɛnɛ́b indaŋ̀mbə̀ sín gá. Zá mə́ ləə Krístù indaŋ̀mbə̀ tə́ kúnú.

²²Dáà mə́ kùm tə́ kə̀ nɛ́b bagké bəraa tɛ́mbagké boò kə̀ kpɛŋsɛ́l naà síndə tə́ gə́, mə́ kùm tə́ kìínmbə̀ máá kɔ̀ mə́ kə̀ kpɛŋsɛ́l naà sé, kə̀ boò kíin, bɔ̀b máà àà bə̀ Yéésù sunú. Kə̀ aakíin də, nɔ̀ŋ mə́ mà' in gə́ kóólé, bɔ̀b nɛ́b kambəd súùnmbə̀ boò tə́ŋú.

²³Mə́ mà' in bəraa kóólé, *Nwɔŋ Puu Sɔ̀ɔ̀nkè bòórú, bɔ̀b máà bɔ̀b gbaŋə̀ oò bərá.

²⁴Íí gàb yàá vɛ́nà, zɔ̀ŋ aa nɛ́b bəd nùù bə̀ tə́ nɔg də́'ǹ bərə, nɛ́b bəd kóólé bə̀ nùù kúnú. Zá nɛ́ŋə̀ nə́ŋ̀ní tə́ŋtə́ŋ, bɔ̀b sə̀n dùmá. Ogə́, ìì nùù kúnú, nɛɛ̀n aa íí dá dùm bɔbm̀ dú roó.

²⁵Nɛ́b aa nùù bə̀ tə́ nɔg sáàn də gə́ kóólé, bə̀ nwán yíl boò in gbò'kè aa bə̀ sán bə̀ rə rú. Bə̀ mà' kàandə, bɔ̀b mə̀ə̀lə̀ aa bɛ́d náŋ gá rə bɔbm̀bìá. Zá bə́n nɛ́b bagké bəd gə́, bə́n tə́ən yíl bə́n nwáàn in gbò'kè rú, bɔ̀b báà bɔbm̀ mə̀ə̀lə̀ aa dá ləə̀n zèd kə̀ zèd doó.

²⁶Kə̀ taàbìá, nùù mə́ də́' núù mə́ tə́ zɔ̀ŋ aa mááráàn dugǹ bərə ba. Mə́ tə́ kìínmbə̀ nɛ́d nə́gə̀d bə̀ nə́'ǹ aa də̀' nɛɛ̀n oò zɔ̀ŋ tɛdń bə gá rə kíin.

²⁷Zá mə́ í' si' mə́ búúd kìínmbə̀ kɔ̀' kíin. Mə́ mà' kàandə, bɔ̀b mə́ nɛ́ŋə̀ aa mə́ sán nɛ́b bəd in də, Vɛnɛ́b nìŋ oò lɛ́' mə́ sɛŋ aa dá bɛ́dǹ kə̀ naà rə sí. Nɔg nuùnmbə̀ sɛŋə́ gə́, máà bɔ̀b *gɔ̀ŋsə́ aa bɛ́d bə gá rə kɔ̀.