Read Samba Leko 2 Korintu 12 Bible Online

2 Korintu 12 - Samba Leko bible

2 Korintu 12

¹Mà' má kùlə́ dáàn kə̀ númú, kóó mə́ bɔ̀b in nə́ŋ̀ bə wərə̀ sín kóólé. Zá bə́ŋyée, má nwɔŋ gáàm, nɛɛ̀n aa Vɛnɛ́b kèd máà núù rú rə yílú, bít kə̀ in aa Báátììkpɛ̀ŋ ì' máà rə yílú.

²Mə́ gàb nɛ́d bagké Krístù bə̀ nə́ŋ̀ yàá. Sɛŋ aarə, mà'ì zèd kób zè naara. Pà' bə̀ ná'ù, dáá wə́ə́ lɛgə́ poú (Na' dáá wə́ə́ì lɛgə́ paà vɛ́nàì, sínkɔ̀ Vɛnɛ́b kèrə̀ sə̀n núùì? Mə́ gàb sé. Vɛnɛ́b oò nə́ŋ̀ní gàb sùnú).

³Èè, mə́ gàb yàá, nɛ́ŋ váàndo aarə, na' dáá wə́ə́àì *Vɛnɛ́b yiilú (bít mə́ tə́ baàn sɛŋ nə́ŋ̀ sɔ̀ŋ. Na'ì lɛgə́ paà vɛ́nàì, sínkɔ̀ Vɛnɛ́b kèrə̀ tə́ sə̀n núùì sɔ̀g, mə́ gàb sé. Vɛnɛ́b oò nə́ŋ̀ní tə́ŋtə́ŋ gàb sùnú).

⁴Pà' bə̀ àà mə́ Vɛnɛ́b yiilú, dá mə́ kìì nwɔŋ aa nɛ́ŋə̀ bán gáàmbə̀ gá roó. Bít bə̀ pii nɛ́ŋə̀ nə́ŋ̀má kpaŋ̀, nwɔŋ aarə bídǹ baànmbə̀ sé.

⁵Má kùlə́ ma'ǹ nɛ́ŋ váàndo aarə yílú, zá mə́ mà' kùlə́ máá yílú gá. Sínkɔ̀ mə́ mà' kùlə́ì máá yílə́ gə́, bɔbm̀ baànmbə̀ in aa ì' vɛɛmké mə́ rə gə́ kóólé.

⁶Dáà mə́ í'ì kùlə́ ma'ǹmbə̀ gə́, mə́ kùm kèéd gá. Kàandə, má vɛ́nà baanàá. Zá mə́ nùù tə́ kíìn kùlə́ ma'ǹmbìá. Kàandə, mə́ í' nɛ́ŋə̀ nə́ŋ̀ oò sèl in oò kàn in aa bé' mə́ tə́ ma'ǹ, bít kìì mə́ tə́ baàn də sí.

⁷In bəraa Vɛnɛ́b ì' mə́ rə, in yíl bə̀ ko'ǹná. Kə̀ taàbìá, bə̀ pii mə́ taà búúd nwuukèá, yaà kìínmbə̀ Satan gbantumsə̀ kíin, bɔ̀b yaà oò zìb mə́ kúnú, bít oò dàŋ mə́ máà pà' yíl sí.

⁸Mə́ nyɛ̀m Báátììkpɛ̀ŋ gə̀b toora, bɔ̀b bìn oò lɛ́' mə́ búúraa rə rú.

⁹Zá kè' í' mə́: «Pə̀dkè mə́ kùmsə̀n in aa ń ɔ̀d də gə́ kóólé. Kàandə, kpɛŋsɛ́l mə́ ì' tù' oò bəd, sɛŋ aa ń tə́ ɔ̀gke roó.» Kə̀ tɛ́m mə́ tə́ kóólé, mə́ í' kùlə́ ma'ǹmbə̀ kə̀ vɛɛmsɛ́l mə́ bərá, bɔ̀b Krístù kpɛŋsɛ́l oò tág mə́ kúnú.

¹⁰Kə̀ taàbìá, mə́ tə́ taà tɛ́m làmkè kiìn kə̀ vɛɛmsɛ́l bərá, kə̀ mud bərá, tɛ́m nwuukè bərá, vɔgəlsɛ́l bərá, tɛ́m lɔbkè bəraa mə́ bɔ̀bà Krístù bòórú roó. Kàandə, màìgə́ mə́ ɔ̀gì gə́, bít sɛŋ aarə ba, mə́ kpɛŋ̀ taá.

¹¹Mə́ gám nwɔŋ kìínmbə̀ mə́ kèéd kíin. Zá aíra íí pè' mə́ sùnú. Dáà aíra íí dá sə̀n nwɔŋ sɔ̀ɔ̀nkè gáàm máá yílú. Kàandə, kóó dáà mə́ tə́ nɛ́ŋə̀ tɛdń máá, mə́ kùm nɛ́ŋə̀ bɛ̀ŋ́sə̀wà «*Yéésù gbantumsə̀ gbàárí» bəraa númú sé.

¹²Tù' bəraa ì' gə́, mə́ *Yéésù gbantumsə̀ rə, ma' zə́'míìn aí tə́ŋú, kə̀ insidké gbà'á. Mə́ mà' tù' kə̀ inkɔrə bərá, kə̀ in də́dǹ bə̀ tó'ǹ bərá, bít kə̀ inwulubə̀ bərá.

¹³Mə́ ɛ̀gi kə̀ *Eklisiya kam bəraa kíin. Mə́ dɛ̀ri ba' sé! Mə́ tàŋ ii nɛɛ̀n in aarə bìá.

¹⁴Bə́ŋyée mə́ kùd si' bídǹ yaànmbə̀ aí kàrú sɛŋ toorə oò roó. Bít mə́ yaàì gə́, mə́ nyɛ̀m in nə́ŋ̀má aí naà gá. Mə́ sàà yíl aí bìá, mə́ sàà basaa íí kə̀ naà rə gá. Vɛ́nà, yɛb bəd zàn sə̀n báá boò gá. Zá yɛb báá bəd bə̀ zàn sə̀n yɛb boò bərá.

¹⁵Má kuùm kə̀ tɛ́m làmkè gbà'á, in aa mə́ kə̀ naà rə kóólé bɔ̀'ǹmbìá, kə̀ yíl máá bə̀ tá, bɔ̀b aí bə̀ láŋ̀mbə̀ ba. Zá máá gə́, mə́ í' iiyì gbàákù. Kə̀ níìbə̀ aí gə́, íí í' mə́ taà zɔ̀gɔ̀ní gú?

¹⁶Íí gàb yàá, sɛŋ aa mə́ kùmà kə̀ aí tə́ rə, mə́ kè'à in nə́ŋ̀má aí naà sé. Zá nɛ́ŋə̀ nə́ŋ̀ dá baàn gə́, záá mə́ páá ii tə́ gɔ̀'wà rú kə̀ gúsuúm bərá.

¹⁷Sii gə́, nɛ́b aa mə́ tùmà rə, nɛ́ŋə̀ nə́ŋ̀ boò tə́ŋú, yaà kè' in nə́ŋ̀ì aí naà, bɔ̀b máá bə̀ aàn beì?

¹⁸Mə́ nyɛ̀m Titus oò dáá aí kàrú, bít ɔ̀dkudvɛɛ̀l aa mə́ tùm kə̀ oò tə́ rə, íí gàbə̀ yàá. Íí dá bée baàn Titus kè' in nə́ŋ̀ì obənə́ naì? Tùsaa bə́ mà' kə̀ Titus tə́ rə, tù' luùm nə́ŋ̀ní géè? Bít bə́ ɛ̀m kpaŋ̀ nə́ŋ̀ní kə̀ oò tə́ sínì?

¹⁹Kamgə́, nyàam kpɔ̀ɔ̀m də, íí sèl gə́, íí bàà bə́ sàà yíl bə́ tágǹmbə̀ aí númúì? Ə́ùwə́, kàan gá! Bə́ gám nwɔŋ tə́ kìínmbə̀ nɛɛ̀n aa Krístù í' rə kíin, Vɛnɛ́b númú. Bít bə́ tə́ ii kíìn baàn kóólé, ɔ̀dzéd í'sɛ̀lbə̀ bərá, bɔ̀b aí bə̀ gbá'ǹmbə̀ tɛ́mbagké rú.

²⁰Mə́ nùù də́dǹ, mə́ dáá ìì aí kàrú gə́, dáá mə́ bɔ̀b ii kə̀ nɛɛ̀n aa mə́ í' rú rə kíìn gá, bít aí kɔ̀ dá íí bɔ̀b mə́ kə̀ nɛɛ̀n aa íí í' rú rə kíìn gá. Mə́ nùù aí bə̀ dáàn bɔbm̀bə̀ álsɛ̀lú, kisɛ̀lú, nɔ̀mú, kuùmbə̀ kìínmbə̀ ɔ̀dmáàn kíin, mud bəd dúlǹmbìá, nwɔŋ vaksə́ bəd gáàmbìá, yíl pa'ké rú, bít kə̀ nwànkènú.

²¹Mə́ nùù də́dǹ sɛŋ aa kid máà bídǹnà aí səǹ sɔ̀ŋ də, sə́ə́mnúù dá mə́ kíin ma'ǹ kə̀ aíra, bít má kpə̀ə́ǹ kpəə̀n nɛ́b zùúm bəraa bə̀ mà' invaksə́ nyàamdoorú, bə̀ sɔ̀g kə̀ labsə̀ luùm gɔ̀ŋ gɔ̀ŋ bərá, bít kə̀ invaksə́ kambəd ma'ǹmbə̀ síndə yílú.