Read Samba Leko 2 Korintu 13 Bible Online

2 Korintu 13 - Samba Leko bible

2 Korintu 13

¹Aa yée sɛŋ toorə oò roó, mə́ tə́ taà dáàn aí kàrú. Kìínmbə̀ Núúboòd Gìdń bàà rə kíin: «Nɛ́ŋə̀ pè'nnì kə̀ nwɔŋ gə́, oò kùm kə̀ sedako bəd iira, sínkɔ̀ toora.»

²Mə́ tə́ kə̀ nwɔŋ nə́ŋ̀ naà baànmbə̀ kə̀ nɛ́b aa bə̀ mà' invaksə́ nyàam doó, bít kə̀ nɛ́b kambəd gə́ kóólé. Mə́ bàà bə̀ yàá, sɛŋ aa mə́ dááà aí kàrú sɛŋ iirúb oò roó. Zá bə́ŋyée mə́ tə́ ii bídǹ baàn sɔ̀ŋ, sɛŋ aa mə́ kùm kə̀ aí tə́ sín yóo. Sɛŋ aa bíd má ii dáàn bé'ǹ də, ɛ̀g mə́ gàb nɛ́ŋə̀ nə́ŋ̀má búúd gá.

³Íí í' in aa ì' gə́, Krístù gám nwɔŋ tə́ kə̀ máá rə gabm̀bìá; zá íí dá bé'ǹ gə́, Krístù rə, nɛ́ŋə̀ vɛɛmké gá, zá nɛ́ŋə̀ kpɛŋsɛ́l bìá, aí tə́ŋú.

⁴Vɛ́nà, bə̀ bág Krístù téélɛŋké ba, kìínmbə̀ nɛ́ŋə̀ vɛɛmsɛ́l bə̀ zɔ̀ŋə yɛ́b bə bə̀ kíin. Zá bə́ŋyée gə́, tə́ kə̀ kpɛŋsɛ́l Vɛnɛ́b bə̀ naú. Tùsaa bə́ tə́ ma'ǹ aí tə́ŋə́ roó, bít kə̀ wálke obə́ bə̀ kə̀ Krístù ra, kóó dáà bə́ tə́ nɛ́b vɛɛmké bəd máá, bə́ tə́ kə̀ Vɛnɛ́b kpɛŋsɛ́l naú.

⁵Də́' ìì ɛ̀g yíl íí ra. Bít ìì ɛ̀g yíl íí kə̀ yíl aí bə̀ ní, bɔbm̀ bé'ǹmbìá, íí kùm tə́ tɛ́mbagké rú gə́ roó. Máàn íí gàb yàá, Krístù kùm tə́ aí rúì? Íí gàb kàan síngə́, ogə́, íí kə̀ tɛ́mbagké naà sé.

⁶Mə́ zíg tɛ́m, íí dákíìn gabàá, obə́ gə́, bə́ nɛ́b tɛ́mbagké vɛ́nà bə̀ bərá.

⁷Bə́ nyɛ̀m Vɛnɛ́b, bɔ̀b ìì mà' sɔ̀ɔ̀ná. Bə́ í' ii i'ǹmbə̀ kìínmbə̀ bá ii kíìn báàn búúd í'ǹmbə̀ kíin gá.

⁸Kàandə, obə́ gə́, bə́ mà' tù', bɔ̀b *Nwɔŋ Puu Sɔ̀ɔ̀nkè aànmbə̀ númú, zá bɔ̀b oò bə̀ daŋ̀mbə̀ gá.

⁹Obə́ gə́, bə́ tə́ tɛ́m làmkè kiìn sɛŋ aa bə́ kə̀ kpɛŋsɛ́l naà síndoó. Zá aí gə́, íí tə́ kə̀ kpɛŋsɛ́l naú. Kə̀ taàbìá, bə́ tə́ taà Vɛnɛ́b nyɛɛ̀m, bɔ̀b ìì kùm nɛ́b nyɛdkè bərá.

¹⁰Kə̀ taàbìá, mə́ tə́ ii taà in bəraa yée báràá, bə́ŋ̀ mə́ tə́ zɔ̀ŋ bùúd kə̀ aíra, bɔ̀b mə́ yaaì aí səǹ gə́, máà í' ii búúd kə̀ kpɛŋsɛ́l aa Báátììkpɛ̀ŋ pii mə́ rə sí. Kàandə, kpɛŋsɛ́l aa Báátììkpɛ̀ŋ pii mə́ rə, bɔ̀b aí bə̀ gbá'ǹmbə̀ númú, zá aí bə̀ yɛɛ̀lǹmbə̀ gá.

¹¹Bít bə́ŋyée ɔ̀dkudvɛɛ̀l mə́ bərá, ìì kùm sɔ̀ɔ̀ní! Ìì dìì kuùmbə̀ nyɛdkèá. Ìì pii ɔ̀dnə́ŋ̀ bəd váàndo íí bòdba. Ìì saŋ̀ ɔ̀dba. Ìì kùm kə̀ tɛbàá. Bít Vɛnɛ́b í'sɛ̀lbə̀, bít tɛbə̀ bə̀, dá kuùm kə̀ aí tá.

¹²Dɔ̀m ìì pàl ɔ̀dnə́ŋ̀ bəd naú, kə̀ í'sɛ̀lá. Vɛnɛ́b Nɛ́b *Gìdń bəd gə́ kóólé, bə̀ dɔ̀m ii yàá.

¹³Pə̀dkè Báátììkpɛ̀ŋ Yéésù Krístù bìá, í'sɛ̀l Vɛnɛ́b bìá, kə̀ wálke Nwul Gìdń bə̀ tá, boò kùm kə̀ aí tə́ kóólé.