Read Samba Leko 2 Korintu 3 Bible Online

2 Korintu 3 - Samba Leko bible

2 Korintu 3

¹Nwɔŋ bəraa rə, í' tə́ baànmbə̀ bə́n sɔ̀dǹ tə́ kùlú bídǹ ma'ǹmbə̀ puuní sɔ̀ŋì? Sínkɔ̀, íí í' báà ì' bənə́ kə̀ nɛ́b kambəd kíin, núúboòraa ì' gə́, bə́ nɛ́b sɔ̀ɔ̀n bəd deè? Sínkɔ̀, bə́ bàà tə́ bárì pii bə́ núúboòraa dá i'ǹ gə́, bə́ nɛ́b sɔ̀ɔ̀n bəd deè?

²Aíra, kə̀ yíl aí bìá, íí kùmsə̀n núúboòraa ì' gə́, bə́ nɛ́b sɔ̀ɔ̀n bəd doó. Bít nɛ́b bəd kóólé, bə̀ dákíìn báàn gabm̀bìá, bít bə̀ dákíìn gáràá.

³Èè, tə́ nyɛdkèá, íí kùmsə̀n núúboòraa Krístù bárà roó, bít obə́ra pà' bə́ àà sùnú. Núúboòraa rə, bə̀ bád kə̀ kátá wəl sé, sínkɔ̀ bə̀ bád bəŋ pɛgə́l bə sé. Zá Vɛnɛ́b gɔ̀ŋsə́ bə̀ Nwul *Gìdń bárà sə̀n nɛ́b bəd tɛ́mú.

⁴Bə́ bàà kàandə, kə̀ tɛ́m aa bə́ zíg Vɛnɛ́b bərə ba, kə̀ Krístù ra.

⁵Kə̀ aakíin də, kóó leè, bə́ bán yíl obə́ bə̀ zígǹmbə̀, tù' luùm aarə ma'ǹ bɛ́'ǹmbə̀ kə̀ yíl obə́ bə̀ ní gá. Zá in aa bə́n báàn ma'ǹmbə̀ rə, vúgà Vɛnɛ́b naú.

⁶Kàandə, oòra mà' bí' bə́n sə̀n nɛ́b kpɛŋsɛ́l bə̀ bərá, bɔ̀b báà kuùm nɛ́b tù' bə̀ ma'ǹ *gú'dúgke puu bìá. Gú'dúgke aarə, dìì indaŋ̀mbə̀ aa bə̀ bád də bə sé, zá dìì tə́ Nwul Gìdń ba. Indaŋ̀mbə̀ aa bə̀ bád kə̀ nɛɛ̀n də, lò' nɛ́ŋə̀ kúnú. Zá Nwul Gìdń gə́, pii gɔ̀ŋsá.

⁷Indaŋ̀mbə̀ rə, bə̀ bád tə́ bəŋ pɛgə́l aa bə̀ kùd də ba, bít Vɛnɛ́b kaŋsɛ́l laa nyɛdkè nyɛd sɛŋ aa bə̀ bád indaŋ̀mbə̀ rə ba. Musa núù nyɛd bìd, bít nɛ́b Israila bə̀ bəd bə̀ bán núù ɛgǹmbə̀ oò naà sé. Kàandə máá, zɔ̀ŋ nyɛdkè aarə, tə́ kíìn bɔ̀bm̀ zá'nàá. Dáà indaŋ̀mbə̀ aarə, tù' oò bə̀ tə́ nɛ́ŋə̀ aànmbə̀ valú, bít yaà vúg tə́ taà kə̀ kaŋsɛ́l laa nyɛdkè aarə gə́,

⁸zá kaŋsɛ́l laa nyɛdkè gə́, sɛŋ aa Nwul Gìdń tù' sɔ̀d də, kàŋ kànsə̀n kə̀ gbà'á!

⁹Kàandə, dáà fágə́n tù' tə́ kə̀ kaŋsɛ́l naà gə́, ééleè tùsaa bí' nɛ́ŋə̀ wɔ̀ɔ̀lə̀ rə, kàŋ kàn taà kə̀ gbà'á gá gú!

¹⁰Báan kíìn báàn baànmbə̀ kaŋsɛ́l laa nyɛdkè aa nyàam nyɛd doorú rə, nɛ́ŋə̀ bán də́'ǹmbə̀ kə̀ kaŋsɛ́l bə́ŋyée bə̀ gá. Kaŋsɛ́l bə́nyée bə̀ kàŋ kàn sùnú.

¹¹Kə̀ aakíin də, in aa nyàam kùm sɛŋ zɔ̀gɔ̀ní rə máá, bə̀ káŋ̀ yàá, ééleè in aa dá kuùm zèd kə̀ zèd də gə́, bə̀ káŋ̀ taà gá gú!

¹²Bə́n tə́ən kə̀ tɛ́m zígke luùm aarə naú. Kə̀ taàbìá, bə́n nyiìn taà kə̀ váàndoá.

¹³Obə́ gə́, bə́ kə̀ Musa kíin sé. Oò gə́, kág núù oò kə̀ gɔ̀sá, bɔ̀b daŋ̀mbə̀ nɛ́b Israila bə̀ bəd boò bé' zɔ̀ŋ nyɛdkè aa tə́ bɛ́dǹ oò núùrú kə̀ báŋ də sí.

¹⁴Zá ingabké boò bán nwɔŋ gabm̀bə̀ sɔ̀ŋ sé. Bít yaà wə́ə́ bə́ŋyóo, ingabké boò kágmíìn tə́ kə̀ gɔ̀saa rə ní, sɛŋ aa bə̀ tə́ núúboòd *gú'dúgke doo bə̀ gádǹ bəroó. Gɔ̀saa rə dá bɔ̀bm̀ gə́, nɛ́ŋə̀ rə dá sína wáàl kə̀ Krístù ra.

¹⁵Bə́ŋyée sɔ̀ŋ, sɛŋ aa bə̀ tə́ Musa núúboòd bəd gádǹ dú rə gə́ kóólé, gɔ̀saa rə kág tɛ́m boò kúnú.

¹⁶Zá kìínmbə̀ nɛɛ̀n aa Núúboòd Gìdń bàà rə kíin: «Sɛŋ aa nɛ́ŋə̀ lìb bí' núùì Báátììkpɛ̀ŋ naà rə, gɔ̀saa rə záá kúnú.»

¹⁷Báátììkpɛ̀ŋ də, zɔ̀ŋə gə́, í' tə́ baànmbə̀ Nwul Gìdńná. Bít zɔ̀ŋ aa Báátììkpɛ̀ŋ Nwul kùm bərə, nɛ́b aa wərə̀ rə, bə̀ nɛ́b yíl bə̀ bərá.

¹⁸Bít bə́n kóólé, nɛ́b aa gɔ̀' biìn dàà bə́n núù rə, nɛ́b bəd boò bé' kaŋsɛ́l laa nyɛdkè Báátììkpɛ̀ŋ bə̀ obə́n núùrú. Kə̀ aakíin də, bə́n tə́ən si' pɛ́ɛ̀n, bɔ̀b Báátììkpɛ̀ŋ lúŋ̀mbìá. Bə́n taàn kaŋsɛ́l laa nyɛdkè bə̀ nə́ŋ̀ú, yaà bə́n piìn tə́ kaŋsɛ́l laa nyɛdkè bə̀ ɔ̀raa kàŋ kàn nɛɛ̀n də rú sɔ̀ŋ. Kə̀ aakíin də, aa yée kùmsə̀n tùsaa Báátììkpɛ̀ŋ Nwul mà' roó.