Read Samba Leko 2 Korintu 4 Bible Online

2 Korintu 4 - Samba Leko bible

2 Korintu 4

¹Vɛnɛ́b kə̀ sɔ̀ɔ̀nkè oòra, Pii bə́n taà tù' *Nwɔŋ Puu Sɔ̀ɔ̀nkè bə̀ baànná. Kə̀ taàbìá, bə́n bɔ̀'ǹ taà váàndo bə́n sé.

²Bə́ dàà tù' mə́'ke bəd yàá, kə̀ tù' sə́ə́mnúù bə̀ bəd tá. Bə́ mà' tɔ̀ɔ̀l in sé, bít bə́ dùg gúsuúm kə̀ Vɛnɛ́b nwɔŋ sé. Zá bə́ tə́ nɛ́b bəd Vɛnɛ́b nwɔŋ sáàn gə́, bàà bə́ vú' vɛ́nà Vɛnɛ́b bìá. Nɛɛ̀n aarə rú, bə́ ì' taà yíl bə́ nɛ́b bəd númú, bɔ̀b boò gàb bə́ kúnú, bə́ nɛ́b wɔ̀ɔ̀lə̀ bə̀ bəd Vɛnɛ́b númú.

³Dáà kàandə, Nwɔŋ Puu Sɔ̀ɔ̀nkè aa bə́ tə́ baàn də kùm tə́ tígə́lú gə́, tígə́l aarə, dá kuùm nɛ́b aa bɔ̀b də bə̀ ní.

⁴Nɛ́b bəd məə bagǹmbə̀ rə, vɛnɛ́b vaksə́ boò aa zɔ̀ŋə yɛ́b bərə, lè' ingabké boò yàá, bɔ̀b boò bé' laa nyɛdkè *Nwɔŋ Puu Sɔ̀ɔ̀nkè bə̀ aa ì' kaŋsɛ́l laa nyɛdkè Krístù bə̀ rə sí. Oòra kùmsə̀n nɛ́ŋə̀ aa tə́ bə́n Vɛnɛ́b i'ǹ doó.

⁵Kə̀ aakíin də, nwɔŋ aa bə́ tə́ udǹ də, bə́ ùd obə́ yílə́ sé. Zá bə́ bàà gə́, Yéésù Krístù kùmsə̀n Báátììkpɛ̀ŋá. Zá obə́ gə́, bə́ bàà gə́, bə́ í' kuùmbə̀ nɛ́b tù' bə̀ ma'ǹ íí bərá, Yéésù bòórú.

⁶Vɛnɛ́b aa bàà «Zɔ̀ŋ nyɛdkè oò nyɛd tígə́lú» rə, kùmsə̀n màn aa tə́ zɔ̀ŋ nyɛdkè oò ma'ǹ nyɛ́'ǹ obə́n tɛ́mú, bɔ̀b obə́n bə̀ ingabké nyɛdkè kaŋsɛ́l laa nyɛdkè oò bə̀ piìnmbìá, aa nyɛd tə́ì vúgǹnà Krístù núùrú roó.

⁷Zá nɛ́b aa bə́n tə́ən gbaŋə̀ nwulú bə̀ aa páàn sisú rə, bə́n tə́ən kìínmbə̀ bun kɛ̀ɛ̀l kíin, bɔ̀b nɛ́ŋə̀ oò bé' kpɛŋsɛ́l gbà'á *Nwɔŋ Puu Sɔ̀ɔ̀nkè bə̀ aa vúgà Vɛnɛ́b naà roó. Bít aarə vúgà obə́n naà gá.

⁸Obə́n gə́, búúd zùúm, bə́n tə́ən taà í'nàá, zá búúd bəraa rə, bə̀ kàn bə́n sé. Bə́n i'ǹ pìrə̀ tə́ obə́n tɛ́mú, zá tɛ́m zígke bə́n bɔ̀b bə sé.

⁹Nɛ́b bəd bə̀ tə́ bə́ búúd í'nàá, zá Vɛnɛ́b lɛ́' dàà bə́ sé. Nɛ́b bəd pà' bə̀ tə́ bə́ laàl yɛ́b ba. Zá lòd bə̀ dúŋ bə́ sé.

¹⁰Sɛŋ gə́ kóólé, bə́n tə́ən val nɛɛ̀n tɛ́mú, kə̀ Yéésù kíin, bɔ̀b Yéésù gɔ̀ŋsə́ oò i'míìn kə̀ yíl oò bə̀ ní, si' bə́n aa dákíìn vadmíìn yée rú.

¹¹Kə̀ aakíin də, bə́ nɛ́b aa bə́ kə̀ gɔ̀ŋsə́ rə gə́, bə̀ pii bə́ tə́ val nɛɛ̀n tɛ́mú, sɛŋ gə́ kóólé, Yéésù bòórú, bɔ̀b Yéésù gɔ̀ŋsə́ oò mà' tù' si' bə́ aa dákíìn vadmíìn yée rú kɔ̀.

¹²Kə̀ aakíin də, val mà' tù' tə́ obə́n dú. Zá gɔ̀ŋsə́ gə́, mà' tù' tə́ aí rú.

¹³Núúboòd Gìdń bàà: «Mə́ bàg Vɛnɛ́b yàá; kə̀ taàbìá, mə́ gám taà nwɔŋ Vɛnɛ́b yílú.» Obə́ kɔ̀ bə́ tə́ kə̀ tɛ́mbagké luùm nə́ŋ̀ní aarə naú. Bə́ tə́ kíìn bagàá, kə̀ taàbìá, bə́ tə́ taà *Nwɔŋ Puu Sɔ̀ɔ̀nkè baanàá.

¹⁴Kə̀ aakíin də, bə́n gabm̀ yàá, Vɛnɛ́b aa díímà Báátììkpɛ̀ŋ Yéésù valə́ rə, dá bə́n díìm valú kɔ̀, kə̀ Yéésù tá, bít dá bə́ zígǹ kə̀ aí tá, oò sunú.

¹⁵In bəraa rə kóólé, yaà aí bìá. Kə̀ aakíin də, pə̀dkè Vɛnɛ́b bə̀ tə́ nɛ́b bəd súùn zùúm, bɔ̀b nɛ́b bəd mɔ̀' boò dáá Vɛnɛ́b kə̀ númú, bít Vɛnɛ́b kaŋsɛ́l oò ɛ̀m númú.

¹⁶Kə̀ taàbìá, bə́n bɔ̀'ǹ taà váàndo sé. Kóó dáà si' bə́n tə́ bɛ́dǹ zɔ̀gɔ̀ zɔ̀gɔ̀ máá, zá nwul bə́n gə́, dá kuùm puuá.

¹⁷Bít gbò'kè bɛ̀ŋ́sə̀wà aa náŋ bə gá, aa tə́ bə́n búúd í'ǹ də, dá bə́n aàn kaŋsɛ́l laa nyɛdkè gbà'á aa bɛ́d bə gá rə rú. Kaŋsɛ́l laa nyɛdkè aarə, nɛ́ŋə̀ bánə̀ də́'ǹmbə̀ kə̀ gbò'kè bɛ̀ŋ́sə̀ yɛb aa nɛ́ŋə̀ tə́ búúd í'ǹ bə bə́ŋyée rə gá.

¹⁸Bít kə̀ aakíin də, bə́ ɛ̀g núù bə́ in aa bá bé'ǹ də bə sé. Zá bə́ ɛ̀g núù bə́ tə́ in aa bə́ bé' gá rə ba. Kàandə, in aa bə́ tə́ bé'ǹ bə́ŋyée rə, kùm sɛŋ bùúd gá. Zá in bəraa bə́ bé' gá rə gə́, dá ləə̀n zèd kə̀ zèrá.