Read Samba Leko 2 Korintu 5 Bible Online

2 Korintu 5 - Samba Leko bible

2 Korintu 5

¹Kàandə, bə́n gabm̀ yàá, si' bə́n aa zɔ̀ŋə yɛ́b bə, kə̀ dìí kíin də, yɛɛ̀lì gə́, Vɛnɛ́b zíg bə́n zɔ̀ŋ ləə̀nmbə̀ tə́ lɛgə́ poú. Zɔ̀ŋ ləə̀nmbə̀ aarə, kùd kə̀ nɛɛ̀n oò bə̀ ní, bít dá ləə̀n zèd kə̀ zèrá.

²Sɛŋ aa bə́n tə́ən kuùm zɔ̀ŋə yɛ́b bərə, bə́n tə́ən kíìn duumàá, bə́n í'ǹ dáàn kuùmbə̀ wúl aa lɛgə́ rə rú.

³Aa dá sɔɔ̀n də gə́, báan bɔbm̀ zɔ̀ŋ ləə̀nmbìá. Zá báan kuùm tɛdńní sí.

⁴Sɛŋ aa bə́n kuùm zɔ̀ŋə yɛ́b ba, kə̀ si' zɔ̀ŋə yɛ́b bə bə̀ rə, bə́n tə́ən kíìn duumàá, bə́n tə́ən kə̀ búúrá. Bə́n í'ǹ sisaa dákíìn vadmíìn də nyadǹmbə̀ sé. Bə́n í'ǹ si' puu páàn zəgǹmbə̀ si' aa dá kuùm zèd kə̀ zèd də yílú. Kə̀ taàbìá, bə́n í'ǹ taà gɔ̀ŋsə́ puu oò tə̀ə̀m sisaa dá vadmíìn də kúnú.

⁵Kóó kə̀ bə́ŋyée kíni, Vɛnɛ́b kə̀ yíl oòra, tə́ tù' ma'ǹ obə́n dú, bɔ̀b oò ma'míìn kə̀ aakíin. Éèn pii bə̀ Nwul Gìdń oò kìínmbə̀ dun ko'ǹmbə̀ insɔ̀ɔ̀nkè bə̀ aa zíg bə́n də bə̀ kíin.

⁶Obə́n gə́, sɛŋ gə́ kóólé, bə́n nyiìn tə́ kə̀ tɛ́m gágkeá. Bə́n gabm̀ yàá, bə́n kuùmmì sisaa yée rú gə́, bə́n kuùmmì zɔ̀ŋ bùúd kə̀ zɔ̀ŋ aa Báátììkpɛ̀ŋ kùm bəroó.

⁷Kə̀ aakíin də, bə́ ɛ̀m tə́ kə̀ tɛ́mbagkéá, bít bə́ŋ̀ bə́n bé'ǹnə̀ kə̀ núù sé.

⁸Bə́n nyiìn tə́ kə̀ tɛ́m gágkeá, bít bə́n í'ǹ sisaa yée zá'ǹ daànmbìá, dáàn kuùmbə̀ Báátììkpɛ̀ŋ sunú.

⁹Kóó báan kuùm sisaa yée rú, kóó sínkɔ̀ zá' báan daànnə̀ kúnú, bə́ŋ̀ bə́n í'ǹ báá n sɔɔ̀nə̀ kúnú.

¹⁰Kàandə, bə́n kóólé, báá n dáàn diìn Krístù númú, bɔ̀b oò fág bə́n kúnú; bɔ̀b kóó nɛ́ɛ̀réè, oò bɔ̀b mú'sɛ̀l dùm oò aa mà' tù' bɔ̀b zɔ̀ŋə yɛ́b ba, sɛŋ aa tə́ kə̀ gɔ̀ŋsə́ roó, kóó sɔ̀ɔ̀nkèá, kóó vaksá.

¹¹Kə̀ aakíin də, bə́n gabm̀ nwɔŋ aa í' baànmbə̀, nuùnmbə̀ Báátììkpɛ̀ŋ də yàá. Bít bə́n tə́ən saàn nɛ́b bəd ma'ǹmbə̀, boò nùù Vɛnɛ́b kə̀ obə́n kíin. Vɛnɛ́b gàb bə́n yàá nyɛdkè, bít mə́ zíg tɛ́m mə́ bàà gə́, aí kɔ̀ íí gàb mə́ yàá.

¹²Bə́ sɔ̀d kùlú bídǹ ma'ǹmbə̀ aí númú sé. Zá bə́ í' ii kpaŋ̀ piìnmbə̀, ìì kùm kə̀ tɛ́m yádke kə̀ obə́ra. Kə̀ aakíin də, íí dá taà báàn nɛ́b aa bə̀ tə́ kùlə́ ma'ǹ kə̀ in gbaarú bə̀ bəd də nwɔŋ ke'ǹ í'ǹmbìá, zá kə̀ in aa tɛ́mú rə gá.

¹³Kóó dáà bə́ tə́ kèéd vɛ́nà máá, aarə Vɛnɛ́b bìá, bə́ kùm taá. Zá bə́ tə́ kə̀ yílə sɔ̀ɔ̀n bə́ naà gə́, aarə aí bìá.

¹⁴Kàandə, Krístù í'sɛ̀l ləə gààd tə́ obə́n yílú. Nɛ́b aa bə́n gabm̀ yàá, nɛ́ŋə̀ nə́ŋ̀ní val kò'ù nɛ́b bəd kóólé bòórú rə, aarə í' baànmbə̀ gə́, nɛ́b bəd kóólé, val kòd bə̀ yàá.

¹⁵Val kò' Yéésù nɛ́b bəd kóólé bòórú, bɔ̀b nɛ́b aa bə̀ kə̀ gɔ̀ŋsə́ rə, boò ɛ̀g yíl boò bə̀ ní sí, zá boò pii yíl boò nɛ́ŋə̀ aa val kò'ù bít díím boò bòórú rə bìá.

¹⁶Kə̀ aakíin də, bə́ ɛ̀g nɛ́ŋə̀ nə́ŋ̀má kə̀ nɛ́ŋə̀ zɔ̀ŋə yɛ́b bə bə̀ kíin sɔ̀ŋ gá. Kóó dáà nyàam də, bə́ ɛ̀g Krístù tə́ kìínmbə̀ nɛ́ŋə̀ zɔ̀ŋə yɛ́b bə bə̀ kíin máá, bə́ŋyée gə́, bə́ ɛ̀gə̀ nɛɛ̀n aarə rú sɔ̀ŋ gá.

¹⁷Sɛŋ aa nɛ́ŋə̀ sɔ̀d wálì kə̀ Krístù rə, oò gə́, bíl nɛ́ŋə̀ puu yàá. In aa nyàam doo rə, taà yàá, bə́ŋyée gə́, in puu kùm tə́ sùnú.

¹⁸In bəraa rə kóólé, vúgà Vɛnɛ́b naú. Oòra mà' sùnú, bíd bə́n saŋ̀ taà kə̀ oòra, Krístù bòórú. Bít pii bə́n tù', báà aàn nɛ́b bəd, bɔ̀b bíd boò saŋ̀ kə̀ obəǹ da.

¹⁹Kàandə, Vɛnɛ́b kùm Krístù rú, bɔ̀b nɛ́b bəd kóólé bíd boò saŋ̀ kə̀ obəǹ da. Bít gád invaksə́ boò bəraa bə̀ mà' rə sɔ̀ŋ gá. Bít zíg bə́, báà mà' tù' nwɔŋ aa báan saŋ̀ kə̀ oòrə bìá.

²⁰Aarə kɔ̀ Krístù zɔ̀ŋ ba, bə́n gáàm taà nwɔŋá, kìínmbə̀ Vɛnɛ́b kə̀ yíl oò bə̀ má, dɛ̀ri nwɔŋ kə̀ obə́ rə kíin. Bə́ tə́ ii kíìn nyɛmàá, Krístù nə́gə́lú, ìì kè' kíìn bídǹ saŋ̀mbə̀ kə̀ Vɛnɛ́bá.

²¹Krístù kùmà kə̀ invaksə́ naà sé. Zá Vɛnɛ́b pà' dəəù invaksə́ bə́n bəd yílú, bɔ̀b báà bíìl taà nɛ́b wɔ̀ɔ̀lə̀ bəd Vɛnɛ́b númú, kə̀ wálke obə́n bə̀ kə̀ Krístù ra.