Read Samba Leko 2 Korintu 8 Bible Online

2 Korintu 8 - Samba Leko bible

2 Korintu 8

¹Ɔ̀dkuvɛɛ̀l í'sɛ̀lbə̀ bərá, bə́ í' ìì gàb kúnú, nɛɛ̀n aa pə̀dkè Vɛnɛ́b bə̀ mà' tù' rú, nɛ́b *Eklisiya bə̀ bəraa Makedoniya yɛ́b bərə tə́ŋə́ roó.

²Də́' bə̀ ɛ̀g nɛ́b bagké bəd gbàákù, kə̀ búúd bəraa bɔ̀b bə̀ roó. Zá tɛ́m làmkè boò tə́ gbà'á, bə̀ ì' yíl boò gə́, bənə́ tə́ənnə́ kə̀ tɛ́m in bə̀ piìn naú, kə̀ búúd gbà'á boò tə́ kóólé.

³Mə́ tə́ ii kíìn baàn vɛ́nà, bə̀ pii nɛɛ̀n aa bə̀ dá báàn piìnmbə̀ rú roó. Bít kàandə máá, pii bə̀ tá' nɛɛ̀n dú kə̀ yíl boò ní.

⁴Nɛ́b Makedoniya yɛ́b bə bə̀ bəd bə̀ nyɛ̀m bə́ gbàákù, bɔ̀b bənə́ láŋnə́ Vɛnɛ́b nɛ́b *gìdń bəraa Yahudiya yɛ́b bərə kə̀ in piìnmbìá.

⁵Bə̀ pii, kàŋ kàn nɛɛ̀n aa bə́ sèl dú rə yàá. Éèn bə̀ pii yíl boò sína Báátììkpɛ̀ŋ naú, bít bòórú gə́, bə̀ pii taà yíl boò obə́ naú, kə̀ nɛɛ̀n aa Vɛnɛ́b í' rə kíin.

⁶Kə̀ taàbìá, mə́ nyɛ̀m taà Titus oò dáá aí kàrú, bɔ̀b mà' oò dáá tù' rə kə̀ númú, kìínmbə̀ nɛɛ̀n aa sɔ̀rà rə kíin, bɔ̀b mà' oò bɛ́' tù' tɛ́m in bə̀ piìn aarə kə̀ sɔ̀ɔ̀nkèá.

⁷Íí kàn nɛ́b bagké kam bərì kə̀ in gə́ kóólé, kə̀ tɛ́mbagké Krístù rú bìá, kə̀ nɛɛ̀n aa íí tə́ *Nwɔŋ Puu Sɔ̀ɔ̀nkè baàn dú roó, ingabké aí bə̀ vɛ́nà bìá, nɛɛ̀n aa íí mà' Vɛnɛ́b tù' rú kə̀ sɔ̀ɔ̀nkè roó, bít kə̀ í'sɛ̀l aí bə̀ aa kə̀ obə́ roó. Bít kə̀ aakíin də, mə́ í' ìì kàn nɛ́b kambəd kɔ̀ kə̀ tù' tɛ́m in bə̀ piìn aa roó.

⁸Mə́ pè' ii sé. Zá mə́ gám ii nwɔŋ gə̀b nɛ́b *Eklisiya bə̀ bəraa Makedoniya yɛ́b bə, bə̀ kə̀ í'sɛ̀l gbà'á naà in bə̀ wáàl lə yílú, bɔ̀b í'sɛ̀l íí ɛgǹ kudǹmbìá.

⁹Kàandə, íí gàb pə̀dkè Báá bə́n Tììkpɛ̀ŋ Yéésù Krístù bə̀ yàá. Oòrə, kùmà nɛ́d gbaŋə̀ bìá. Zá mà' yaà bí' yíl oò nɛ́d búúd bə̀ aí bòórú, bɔ̀b aí bə̀ ma'ǹ bí'ǹmbə̀, ìì kùm nɛ́b gbaŋə̀ bə̀ bəd kə̀ búúd oò aa roó.

¹⁰Kə̀ aakíin də, mə́ tə́ ii inselké máá bə̀ piinàá, nwɔŋ aa yée rú' tə́ sɔ̀ɔ̀nkèá, in aa sɔ̀d íí mà' nyàam geèn də ma'ǹ dáànmbə̀ kə̀ númú. Íí nɛ́b də̀gə̀ də̀gə̀ bə̀ kə̀ in piìnmbə̀ ní gá. Zá íí kò' tɛ́m sɔ̀ɔ̀n tùsaa rə bə̀ ma'ǹnì kɔ̀.

¹¹Bə́ŋyée gə́, mà' ìì bɛ́' tùsaa rə kúnú. Ìì pii yíl aí bə̀ tùsaa rə ma'ǹ bɛ́'ǹmbìá, kìínmbə̀ nɛɛ̀n aa íí zíg ma'ǹmbə̀ rə kíin. Bít ìì mà' kìínmbə̀ nɛɛ̀n aa íí dá báàn ma'ǹmbə̀ rə kíin.

¹²Kàandə, dáà nɛ́ŋə̀ pii inì kə̀ tɛ́m sɔ̀ɔ̀nkè gə́, Vɛnɛ́b kè' kúnú. Nɛ́ŋə̀ aa tə́ kə̀ naà zɔ̀gɔ̀ rə, dá piìn zɔ̀gɔ̀, nɛ́ŋə̀ aa tə́ kə̀ naà gbàákù rə, dá piìn gbàákù.

¹³Mə́ í' ii záànmbə̀, bɔ̀b ìì kùm búúd nɛ́b bəd núùrú gá. Zá mə́ í' ìì də́ŋ nə́ŋ̀ní kə̀ boò ra.

¹⁴Kə̀ bə́ŋyée kíin gə́, íí kùm tə́ in zùúmú. Bít kàandə kɔ̀, yaà íí dákíìn báàn nɛ́b aa in tə́ bə̀ kpáàn də láŋ̀mbə̀ ba. Bítsɔ̀ŋ, dáà nyàm nə́ŋ̀ íí kùmì in gbò'kè rú, bít boò kɔ̀, bə̀ tə́ kə̀ in zùúm naà gə́, yaà bə̀ dá ii kíìn láŋ̀ ba. Aarə kə̀ aakíin, íí dá taà də́ŋ̀ nə́ŋ̀ní.

¹⁵Kìínmbə̀ nɛɛ̀n aa Núúboòd Gìdń bàà rə kíin: «Màn aa wálì zùúm də, kə̀ naà gbàákù sé. Bít màn aa wálì zɔ̀gɔ̀ní rə, in nə́ŋ̀má kpánə̀ sé.»

¹⁶Mə́ mɔ̀' Vɛnɛ́b yàá, tɛ́m tù' bə̀ ma'ǹ aa pii Titus kə̀ máá kíin, bɔ̀b tù' aí bə̀ ma'ǹmbə̀ yéroó.

¹⁷Titus kè' nyɛmsɛ́l bə́ yàá. Bít aa kàn nɛɛ̀n də, nyìì kə̀ kpɛŋsɛ́l tù' bə̀ ma'ǹná, sèl zíg kə̀ yíl oò bə̀ ní, bəǹ dááráàn aí kàrú.

¹⁸Kə̀ oò tə́ rə, bə́ tùm ɔ̀dkudvɛɛ̀l aa *Eklisiya bəd nàà bə̀ káŋ̀, *Nwɔŋ Puu Sɔ̀ɔ̀nkè aa tə́ udǹ də bòórú roó.

¹⁹Aa sɔ̀ɔ̀n kàn nɛɛ̀n də, *Eklisiya bəraa Makedoniya yɛ́b bərə, sàà bə̀ pà'ù sùnú, bɔ̀b láŋ oò àà bə́ ba' bəraa bə̀ wál lə aànmbìá; bɔ̀b báà káŋ Báátììkpɛ̀ŋ Yéésù ra, bít ma'ǹmbə̀ bɔ̀b í'sɛ̀l bə́ oò láŋ nɛ́b bərá.

²⁰Bə́ tə́ yíl bə́ gú'ǹ, bɔ̀b nɛ́b bəd boò ál bə́ kə̀ tù' ba' gbà'á bə̀ aa bə̀ pii bə́, báà kò' naà yée sí.

²¹Bə́ sàà insɔ̀ɔ̀n ma'ǹmbə̀ Báátììkpɛ̀ŋ núùrú ní gá, zá nɛ́b bəd núùrú kɔ̀.

²²Bə́ tùm ɔ̀dkudvɛɛ̀l nə́ŋ̀ ɔ̀d tə́ kə̀ boò tá. Oòrə, mà' Báátììkpɛ̀ŋ tù' tə́ sɔ̀ɔ̀nkè. Ì' yíl oò, bəǹ nɛ́d váàndo bìá. Zá bə́ŋyée gə́, váàndo oò tə́ gbàákù kə̀ nɛɛ̀n aa zíg tɛ́m dú gbàákù aí bəroó.

²³Titus də, ɔ̀d mə́ nə́ŋ̀ tùsú bìá, mə́ mà' tù' íí kə̀ oò tá. Bít ɔ̀dkudvɛɛ̀l mə́ kam bəraa láŋ bə̀ tə́ù aàn də gə́, bə̀ kùmsə̀n nɛ́b aa *Eklisiya bəd bə̀ tùmà roó. Tù' bəraa bə̀ tə́ ma'ǹ də, ì' Krístù kaŋsɛ́l laa nyɛdkè tə́ kúnú.

²⁴Ìì ì' bə̀ gə́, íí í' bə̀ tə́ kíìn vɛ́nà, bɔ̀b *Eklisiya bəd boò gàb kúnú, bə́ tə́ kə̀ vɛ́nà, kùlə́ ma'ǹmbə̀ aí yílú.