Read Samba Leko 2 Korintu 9 Bible Online

2 Korintu 9 - Samba Leko bible

2 Korintu 9

¹Ìì pii mə́ kpaŋ̀, máà bári núúboòraa yée, in piìnmbə̀ aa tùm bá piìn Vɛnɛ́b nɛ́b *gìdń bəraa Yahudiya yɛ́b bərə yílú.

²Kə̀ aakíin də, mə́ gàb nɛɛ̀n aa tɛ́m sɔ̀ɔ̀nkè íí kùm dú rə yàá. Bít mə́ mà' kùlə́ aí yílú, nɛ́b aa Makedoniya yɛ́b bərə sunú, mə́ bàà: «Ɔ̀dkudvɛɛ̀l bəraa Akaya yɛ́b bərə, kùm bə̀ nwán in aa bə̀ dá piìn də piìnmbə̀, bə́ŋyée mà'ì zèd nə́ŋ̀.» Kpɛŋsɛ́l tù' bə̀ ma'ǹ íí rə, zá' nɛ́b zùúm bəd tɛ́mì boò tə́ŋú.

³Bə́ŋyée tùm mə́ tə́ ɔ̀dkudvɛɛ̀l bəraa yée aàn aí sunú, bɔ̀b nwɔŋ sɔ̀ɔ̀n aa bə́ gám aí yílə́ rə, oò bíl gúsuúm nwɔŋ sí. Zá mə́ í' kùd ìì kùd sisá, kə̀ nɛɛ̀n aa mə́ bàà ii rə kíin.

⁴Síngə́, nɛ́b Makedoniya yɛ́b bə bə̀ bəd bə̀ yaaì kə̀ máá tá, bít bə̀ bɔ̀bì íí kùd si' síngə́, bá sə́ə́mnúù kíìn daanàá, nɛɛ̀n aa bə́ bàà nwɔŋ sɔ̀ɔ̀n aí yílú síndoó, bít aí kɔ̀ ìì kùm kə̀ sə́ə́mnúù, sisaa íí kùd síndə bə̀ sí!

⁵Mə́ sèl, mə́ bàà tə́ sɔ̀ɔ̀nkèá, mə́ tùm taà ɔ̀dkudvɛɛ̀l bəraa boò ɛ̀m númú, bɔ̀b wál dá boò zíg in piìnmbə̀ tɛ́m yádke bə̀ aa bàà íí dàà roó. Kə̀ aakíin də, wál íí dákíìn zígàá, sɛŋ aa mááráàn wə́ə̀n bəroó. Bít dá i'ǹ gə́, íí pii tə́ kə̀ tɛ́m sɔ̀ɔ̀nkèá. Zá ìì pii kìínmbə̀ nɛ́ŋə̀ pè' ii tə́ kə̀ kpɛŋsɛ́l kíin sí.

⁶Zá sèl ìì zá' nwɔŋ aa yóo' màn aa wùù tə́ zɔ̀gɔ̀ní rə, dá kɛdǹ zɔ̀gɔ̀ní. Màn aa wùù tə́ gbàákù rə kɔ̀, dá kɛdǹ zùúm.

⁷Kóó nɛ́ɛ̀réè, aa dá sɔ̀ɔ̀n də gə́, oò pii kìínmbə̀ nɛɛ̀n aa tɛ́m oò màg də kíin, kə̀ gàbkíìn gá, sínkɔ̀ kə̀ kpɛŋsɛ́l gá. Kàandə, Vɛnɛ́b í' màn aa pii kə̀ tɛ́m làmkè roó.

⁸Bít Vɛnɛ́b tə́ kə̀ kpɛŋsɛ́l naà pə̀dkə̀ luùm gə́ kóólé ma'ǹmbə̀ gbàákù, bɔ̀b ìì bɔ̀b sɛŋ gə́ kóólé, in aa íí dá kə̀ tù' ma'ǹ doó. Bít in aarə, oò nyɛ́ri gbàákù sɔ̀ŋ, bɔ̀b tù' sɔ̀ɔ̀nkè gə́ kóólé bìá.

⁹Kìínmbə̀ nɛɛ̀n aa Núúboòd Gìdń bàà rə kíin: «Tə́ nɛ́b búúd bə̀ bəd in piìn kə̀ tɛ́m làmkèá. Bít wɔ̀ɔ̀lə̀ oò dá kuùm zèd kə̀ zèrá.»

¹⁰Vɛnɛ́b aa pii nɛ́b in bə̀ wuùn bəd inluùm, bít pii bə̀ inlíìnmbə̀, bɔ̀b boò líí kíìn də, dáá ii inluùm aa íí ɔ̀d də kíìn piìn kóólé. Bít Vɛnɛ́b dá ma'ǹ, tɛ́m buurúm aí bə̀ dá ɛɛ̀m númú.

¹¹Vɛnɛ́b dá ii ma'ǹ bí'ǹ, íí dá kuùm nɛ́b gbaŋə̀ bə̀ bəd sɛŋ gə́ kóólé, bɔ̀b ìì kpɛd tɛ́m buurúm íí i'ǹmbə̀ sí. Kə̀ aakíin də, nɛ́b bəd zùúm, bə̀ dá Vɛnɛ́b mɔ̀'ǹ kə̀ in tɛdńní bə̀ bəraa bə́ tə́ bə̀ aàn doó.

¹²Kàandə, tù' in bə̀ wáàl piìn aa yérə, oò láŋ in aa Vɛnɛ́b nɛ́b *gìdń bəd ɔ̀d də ní sí. Zá aa kàn nɛɛ̀n də, bə̀ dá Vɛnɛ́b mɔ̀'ǹ kə̀ kùrú.

¹³Tùsaa rə, dá nɛɛ̀n aa íí kùm dú rə i'nàá, bít nɛ́b zùúm bəd bə̀ dá Vɛnɛ́b káŋ̀ kə̀ tɛ́m ləəkè íí aa ì' gə́, íí kùm tə́ kə̀ tɛ́mbagké, *Nwɔŋ Puu Sɔ̀ɔ̀nkè Krístù bə̀ aa bàà íí tə́ i'ǹ də bəroó. Bə̀ dáù káŋ̀ kə̀ í'sɛ̀l gbà'á, nɛɛ̀n aa pɛ̀l íí gàb gbaŋə̀ íí bəd kə̀ boò ra, bít kə̀ nɛ́b kambəd kóólé roó.

¹⁴Bít sɛŋ aarə bəní, bə̀ dá Vɛnɛ́b nyɛɛ̀m kə̀ aíra. Bə̀ dá ii í'sɛ̀l gbà'á boò i'nàá, kə̀ pə̀dkè gbà'á aa Vɛnɛ́b mà' aí rú roó.

¹⁵Bə́ŋyée *báà káŋ̀ Vɛnɛ́b kə̀ in tɛdńní bə̀ oò aa pii bə́n, nɛ́ŋə̀ bán də́'ǹmbə̀ kə̀ in nə́ŋ̀ gá roó.