Read Samba Leko Galatiya 1 Bible Online

Galatiya 1 - Samba Leko bible

Galatiya 1

¹Núúboòraa vúgà máá, mə́ Pol naú, mə́ *Yéésù gbantumsàá. Mə́ Yéésù gbantumsə̀ kə̀ nɛ́b bəd í'sɛ̀l gá, kə̀ nɛ́ŋə̀ nə́ŋ̀ gú' gá, zá Yéésù Krístù kə̀ Báá bə́n Vɛnɛ́b aa díímà Yéésù valə́ rə tá, bə̀ mà' sùnú, mə́ kùm taà Yéésù gbantumsàá.

²Ɔ̀dkudvɛɛ̀l í'sɛ̀lbə̀ bəraa zɔ̀ŋə də, bə̀ wál tə́ kə̀ máá tá, *Eklisiya bəraa Galatiya yɛ́b bərə, núúboòraa yée bádǹ piìnmbìá.

³Bə́ dɔ̀mi yàá. Bə́ nyɛ̀m Báá bə́n Vɛnɛ́b, kə̀ Báátììkpɛ̀ŋ Yéésù Krístù tá, boò mà' ii pə̀dkèá, bít boò pii ii tɛbàá.

⁴Krístù pii yíl oò, bɔ̀b obə́n bə̀ súùnmbə̀, invaksə́ bə́n bərú, bɔ̀b obə́n bə̀ vú'ǹmbə̀ yɛ́b vaksə́ aa bə́ŋyée rə rú, kə̀ Báá bə́n Vɛnɛ́b í'sɛ̀lá.

⁵Kaŋsɛ́l oò kùm Vɛnɛ́b naú, zèd kə̀ zèrá! Oò kùm kàani.

⁶Nɛɛ̀n aa lɛ́' íí dàà Vɛnɛ́b aa dɛ̀riyà kə̀ Krístù pə̀dkè rə kə̀ báŋ, bít lìb ìì bí' núù *Nwɔŋ Puu sɔ̀ɔ̀nkè nə́ŋ̀ gɔ̀ŋ bə yée, kò' mə́ yíl yàá.

⁷Zá vɛ́nà bə̀ gə́, *Nwɔŋ Puu Sɔ̀ɔ̀nkè ɔ̀d nə́ŋ̀ sɔ̀ŋ sé. Zá mə́ gámi nwɔŋ kə̀ aakíin də, nɛ́b kam túrú, bə̀ nyágə́li tɛ́m tə́ kúnú, bít bə̀ í' Krístù Nwɔŋ Puu Sɔ̀ɔ̀nkè rə tə́ kíìn pɛ́ɛ̀nmbìá.

⁸Zá dáà nɛ́ŋə̀ nə́ŋ̀, kóó obə́ra, sínkɔ̀ *malaika lɛgə́ paà bìá, yaà bàà ii Nwɔŋ Puu Sɔ̀ɔ̀nkè nə́ŋ̀ gɔ̀ŋ yaà, pɛrì kə̀ aa bə́ bàà ii yée gə́, nwɔŋyɛɛ̀l oò kùm màn aarə yílú.

⁹Bə́ bàà ii yàá, bít mə́ tə́ ii bídǹ baàn bə́ŋyée sɔ̀ŋ, dáà nɛ́ŋə̀ nə́ŋ̀ yaà bàà ii Nwɔŋ Puu Sɔ̀ɔ̀nkè ɔ̀d nə́ŋ̀ gɔ̀ŋ nwɔŋ yàá, pɛrì kə̀ aa bə́ bàà ii yée kíin gə́, nwɔŋyɛɛ̀l oò kùm màn aarə yílú!

¹⁰Nɛɛ̀n aa mə́ gám nwɔŋ dú yérə, ì' tə́, mə́ sàà in aa dá nɛ́b bəd sɔɔ̀n deè, sínkɔ̀ in aa dá Vɛnɛ́b sɔɔ̀n deè? Zá máá gə́, mə́ sàà in aa dá Vɛnɛ́b sɔɔ̀n doó. Sii gə́, mə́ sàà in aa dá nɛ́b bəd sɔɔ̀n deè? Ə́ùwə́. Dáà mə́ sàà tə́ in aa dá nɛ́b bəd sɔɔ̀n də gə́, mə́ kùm Krístù nɛ́d tù' bə̀ ma'ǹ gá.

¹¹Ɔ̀dkudvɛɛ̀l mə́ í'sɛ̀lbə̀ bərá, mə́ tə́ ii kíìn baanàá' *Nwɔŋ Puu Sɔ̀ɔ̀nkè aa mə́ bàà ii yérə, nɛ́ŋə̀ séé sə̀n gá.

¹²Mə́ kììà nwɔŋ aarə nɛ́ŋə̀ nə́ŋ̀ naà gá, bít nɛ́ŋə̀ nə́ŋ̀má sán máà nwɔŋ aarə sé. Zá Yéésù Krístù bàà ì' máà sùnú.

¹³Íí kìì bə̀ gám nwɔŋì nɛɛ̀n aa mə́ kùm dú rə yílú, sɛŋ aa mə́ tə́ *Yahudu bəd indaŋ̀mbə̀ bə́ bagǹ dú roó. Íí kìì nɛɛ̀n aa nyàamdoorú mə́ í' *Eklisiya bəd búúd dú kə̀ kpɛŋsɛ́lá, bít mə́ nɔ̀ŋ boò bə̀ dúŋ̀mbə̀ rə yàá.

¹⁴Mə́ kànsə̀n ɔ̀dmàŋká mə́ bəd kə̀ Yahudu bəd indaŋ̀mbə̀ bagǹmbìá. Mə́ vé' tɛ́m, mə́ kàn bə̀ sə̀n kə̀ doo bə́ bəd láŋsə́ ma'ǹmbìá.

¹⁵Zá Vɛnɛ́b sààvúŋ máà, bɔ̀b bə́ŋ̀ mə́ tə́ nà'á bàgəlú, bít dɛ̀d máà kə̀ pə̀dkè oòra, bɔ̀b yaà máà mà' bəǹ tùsá,

¹⁶bəǹ dá mə́ Wàà bəǹ i'ǹ, bɔ̀b máà gàbə̀ kúnú, bít máà bàà nɛ́b aa bàg bəǹ síndə *Nwɔŋ Puu Sɔ̀ɔ̀nkè bəǹ da. Dá mə́ dɛ̀d nɛ́ŋə̀ nə́ŋ̀má oò ùd mə́ nwɔŋ Yéésù yílə́ sé.

¹⁷Bít mə́ dáá Urusalima bìlú, bɔ̀b dáàn bé'ǹmbə̀ nɛ́b aa éèn bə̀ kùm *Yéésù gbantumsə̀ máá númú rə sínkɔ̀. Zá mə́ ɛ̀m kə̀ báŋ Arabiya yɛ́b ba, bít kid mə́ bírà Damas bìlú.

¹⁸Bítsɔ̀ŋ, zèd taà toorə gə́, mə́ ɛ̀m Urusalima bìlú, bɔ̀b Piyɛr dáàn gabm̀bìá. Bít mə́ kùm oò səǹ sɛŋ kób zè núnà.

¹⁹Sɛŋ aa mə́ kùm oò səǹ yérə, mə́ bé' *Yéésù gbantumsə̀ ɔ̀d nə́ŋ̀ sɔ̀ŋ sé. Nɛ́ŋə̀ aa mə́ bé' rə, Yakuba oò nə́ŋ̀ní. Yakuba rə, Báátììkpɛ̀ŋ kudvɛɛ̀lá.

²⁰Nwɔŋ aa mə́ bári yérə, mə́ bàà tə́ Vɛnɛ́b númú, mə́ dùg gúsuúm sé.

²¹Bítsɔ̀ŋ, mə́ dáà zɔ̀ŋ bəraa Siriya yɛ́b bərə ba, kə̀ zɔ̀ŋ bəraa Silikiya yɛ́b bəroó.

²²Zá sɛŋ aarə bərə, Krístù *Eklisiya bəraa Yahudiya yɛ́b bərə, bə̀ gàb mə́ sé.

²³Bə̀ kìì nɛ́b kam tə́ baàn: «Màn aa nyàam í' bə́n búúd də, tə́ nwɔŋ tɛ́mbagké bə̀ aa sàà yɛɛ̀lǹmbə̀ rə nɛ́b bəd baàn bə́ŋyóo.»

²⁴Bít máá bòórú, bə̀ káŋ Vɛnɛ́bá.