Read Samba Leko Galatiya 4 Bible Online

Galatiya 4 - Samba Leko bible

Galatiya 4

¹Zá ìì kìì nwɔŋ ɔ̀d kam bəraa mə́ í' ii baànmbə̀ roó' wàà váàndo aa dá báá oò valligə̀ pa'ǹ də, kóó dáà in bəraa bóò kə̀ naà rə kóólé tə́ oò bə̀ má, də́ŋ tə́ kìínmbə̀ kɔ̀'váàn nə́ŋ̀ kíin, bə́ŋ̀ sɛŋ aa tə́ wàà bɛ̀ŋ́sə̀wà roó.

²Bə́ŋ̀ tə́ wàà bɛ̀ŋ́sə̀wà gə́, nɛ́b aa bə̀ tə́ù nwáàn, bít bə̀ tə́ gbaŋə̀ oò bəd nwáàn də, bə̀ ləə gààd tə́ oò yílú, bə̀ nwánə̀ yaà wə́ə́ sɛŋ aa báá oò və̀d zíg bərə zé.

³Bít obə́n kɔ̀, sɛŋ aa bə́ŋ̀ bə́n tə́ən yɛb bɛ̀ŋ́sə̀ bəd də, nwul vaksə́ bəd ləə sə̀n gààd obə́n yílú, zɔ̀ŋə yɛ́b ba. Bə́n kuùmmà kɔ̀' bərá.

⁴Zá sɛŋ aa Vɛnɛ́b və̀d zíg də yaà wə́ə́ gə́, Vɛnɛ́b tùm piià Wàà oòra' nɛ́ŋ kéèndo nə́ŋ̀ lɛ̀bə̀ sùnú, bít yaà ləə *Yahudu bəd indaŋ̀mbìá.

⁵Káákè' bə́n indaŋ̀mbə̀ aa tab bə́n kə̀ kɔ̀' kíìn də nɛɛ̀n tɛ́mú, bɔ̀b báà bíìl taà Vɛnɛ́b yɛb vɛ́nà.

⁶Vɛnɛ́b tùm piià Wàà oò nwul obə́n tɛ́mú, bɔbm̀ i'ǹmbə̀ íí kùmsə̀n yɛb bəǹ bərá. Nwul aarə, tə́ sə̀n kpəə̀n dɛdǹ: «Báá mə́ra!»

⁷Kə̀ aakíin də, bə́ŋyée gə́, ń kɔ̀' sɔ̀ŋ gá, zá ń Vɛnɛ́b Wàá. Bít ń kùm sína wàà oò yée gə́, ń dá valligə̀ oòrə pa'ǹ kɔ̀. Aarə Vɛnɛ́b tùsá.

⁸Nyàamdoorú sɛŋ aa íí gàb bə́ŋ̀ Vɛnɛ́b síndə, íí kùmà vɛnɛ́b bəraa Vɛnɛ́b vɛ́nà bəd gá rə kɔ̀sá.

⁹Zá bə́ŋyée íí gàb Vɛnɛ́b yàá, sínkɔ̀ Vɛnɛ́b gàb bə ìì yée gə́, ééleè íí dá taà báàn kidǹ bídǹmbə̀ in tɛdń bəraa ba, in búúd bə̀ bəraa nwuulú yée ba, bít íí í' taà dáàn bílǹmbə̀ kɔ̀' bəd sɔ̀ŋ gú?

¹⁰Íí pii yíl íí tə́ nyàm wálke bə̀ bəraa *Yahudu bəd zíg də ba' nyàm bərá, sòò bərá, bísə̀ nyàm kə̀ nwan sɛŋá, bít kə̀ zèd bərá.

¹¹Mə́ nùù də́dǹ tə́ kə̀ aíra! Tù' bəraa mə́ mà' ii rə gə́ kóólé, oò kùm tù' tɛdń wa?

¹²Ɔ̀dkudvɛɛ̀l í'sɛ̀lbə̀ bərá, mə́ tə́ ii kíìn nyɛmàá, ìì kùm kìínmbə̀ máá kíin, kìínmbə̀ nɛɛ̀n aa máá kɔ̀ mə́ tə́ nɔŋ̀ kuùmbə̀ kìínmbə̀ aí kíin də kíin. Íí mà' mə́ invaksə́ nə́ŋ̀má sé.

¹³Íí gàbì sɔ̀ɔ̀nkè, sɛŋ aa mə́ ləə mad də, sɔ̀d mə́ bàà ii taà *Nwɔŋ Puu Sɔ̀ɔ̀nkèá.

¹⁴Íí í' búúrì kə̀ maraa mə́ ləə rə gbàákù. Bít kàandə máá, íí ɛ̀g mə́ kə̀ nɛ́ŋə̀ tɛdń kíin sé, sínkɔ̀ məə íí dàà mə́ sé. Zá íí kè' máà kìínmbə̀ *malaika kíin, sínkɔ̀ kìínmbə̀ Yéésù Krístù kíin.

¹⁵Tɛ́m làmkè íí rə, tə́ bínì gú? Kàandə, mə́ tə́ ii sedako aa yée ma'ǹ i'nàá' dáà sɛŋ də íí dákíìn báàn gə́, íí dá núù íí bəd sɔràá, íí dá mə́ taà piinàá.

¹⁶Bə́ŋyée gə́, mə́ bíl ɔ̀dmáàn íí bərì vɛ́nà aa mə́ bààì rə bòórúì?

¹⁷Nɛ́b aa bə̀ tə́ ii baàn ìì ləə Yahudu bəd indaŋ̀mbə̀ yérə, bə̀ pii yíl boò tə́ aí bə gbàákù, zá inselké boò tɛ́mú bə̀ gə́, sɔ̀ɔ̀n sé. In aa bə̀ í' rə, aí bə̀ pɛdǹmbə̀ kə̀ máára, bɔ̀b ìì pii yíl íí kə̀ zɔ̀ŋtá boò naú.

¹⁸Kóó mə́ kə̀ aí tə́ sé, tə́ sɔ̀ɔ̀ní, yíl íí bí'ǹmbə̀ in pɛ̀sə́ bə̀ ba, sɛŋ gə́ kóólé.

¹⁹Yɛb mə́ bərá, mə́ kìì tɛ́m nwuukè tə́ gbàákù puuní sɔ̀ŋ kə̀ aíra. Tɛ́m nwuukè aarə, tə́ kìínmbə̀ nɛ́ŋ kéèndo aa tə́ wàà lɛbm̀ də kíni, yaà dá wəə̀n sɛŋ aa Krístù dá kuùm aí tɛ́mú bərə zé.

²⁰Mə́ í' dáàn kuùmbə̀ aí səǹ bə́ŋyóo, bɔ̀b aí bə̀ nwɔŋ aa sɔ̀ɔ̀n də dáàn baànmbìá. Tɛ́m nwuu mə́ tə́ kə̀ aí gbàákù!

²¹Ìì bàà mə́ báána, nɛ́b aa íí í' kuùmbə̀ Musa indaŋ̀mbə̀ dùù roó. Íí kìì nwɔŋ aa indaŋ̀mbə̀ aarə tə́ baàn də sínì?

²²Musa indaŋ̀mbə̀ bàà gə́, Abraham lɛ̀b yɛb vɔ̀ɔ̀m bəd iira, nə́ŋ̀ gə́, kɔ̀'kíìn Agar lɛ̀bə̀ sùnú, bít nə́ŋ̀ ɔ̀d kɔ̀, nɛ́ŋ kéèndo yíl bə̀ Saratu lɛ̀bə̀ sùnú.

²³Wàà váàndo aa kɔ̀'kíìn lɛ̀b də gə́, bə̀ lɛ̀bə̀ kìínmbə̀ nɛɛ̀n aa nɛ́b bəd tə́ lɛbm̀ də kíin. Zá wàà váàndo aa nɛ́ŋ kéèndo yíl bə̀ lɛ̀b də gə́, bə̀ lɛ̀bə̀ kə̀ nwɔŋ aa Vɛnɛ́b bàà dàà roó.

²⁴Nwɔŋ aa yée nwɔŋ wàà nə́ŋ̀ mə́' tə́ túrú wərà' nɛ́b kɛ́ɛ̀m bəraa iirə yée, ìì kùm tə́ kìínmbə̀ gú' bəraa Vɛnɛ́b dúg iirə rə kíin. Nwɔŋ wàà mə́'ke nə́ŋ̀ gə́, Agar ra. Oòra kùmsə̀n gú'dúgke aa vúgà Sinai kɔ̀l bəroó. Oò gə́, lɛ̀b kɔ̀' bərá.

²⁵Zá Agar rə, Sinai kɔ̀lá. Kɔ̀l aarə tə́ Arabiya yɛ́b ba. Tə́ kìínmbə̀ Urusalima bìl aa bə́ŋyée rə kíin. Yɛb oò bəraa lɛ̀b də, kə̀ oò tá, bə̀ kɔ̀' bərá.

²⁶Zá Urusalima aa dáà vúgǹnà lɛgə́ paà rə gə́, tə́ kìínmbə̀ nà' bə́n kíin, Saratu ra. Oòrə, nɛ́ŋ kéèndo yíl bìá.

²⁷Kàandə Núúboòd Gìdń bàà: «Ǹ kìì tɛ́m làmkèá, nɛ́ŋ kéèndo aa ń kə̀ wàà naà síndoó. Ǹ páá kpə̀ə́ǹ kə̀ tɛ́m làmkèá, ámda ń nɛ́ŋə̀ aa kìì ń bèd nwuukè wàà bə̀ lɛbm̀ síndoó! Kə̀ aakíin də, nɛ́ŋ kéèndo aa məə bə̀ dàà rə, dá sə̀n nɛ́ŋ kéèndo aa kə̀ váàn naà rə kaàn kə̀ wàà lɛbm̀bìá.»

²⁸Bít aí gə́, ɔ̀dkudvɛɛ̀l mə́ í'sɛ̀lbə̀ bərá, Vɛnɛ́b lɛ̀b ii kə̀ nwɔŋ aa bàà dàà roó, kìínmbə̀ Isiyaku kíin.

²⁹Nyàamdoorú rə, wàà aa bə̀ lɛ̀b kìínmbə̀ wàà aa lɛ̀b bə̀ sáá rə kíin də, í' wàà aa bə̀ lɛ̀bə̀ kə̀ Vɛnɛ́b Nwul Gìdń də búúrá. Bə́ŋyée kɔ̀ tə́ nɛɛ̀n aarə rú.

³⁰Zá Núúboòd Gìdń bàà leè gú? Núúboòd Gìdń bàà nwɔŋ aa yóo: «Nìŋ ǹ vúŋ kɔ̀'kíìn aarə kə̀ wàà oò tá. Kàandə, kɔ̀'kíìn wàà gə́, pà' báá oò valligə̀ kə̀ nɛ́ŋ kéèndo yíl bə̀ wàà tə́ gá.»

³¹Kə̀ aakíin də, ɔ̀dkudvɛɛ̀l mə́ bərá, obə́n gə́, bə́n kɔ̀'kíìn yɛb gá. Zá bə́n kuùm sə̀n kéèn yíl bə̀ yɛbá.