Read Samba Leko Galatiya 5 Bible Online

Galatiya 5 - Samba Leko bible

Galatiya 5

¹Krístù bìn lɛ́' bə́nnà, bɔ̀b báan kuùm nɛ́b yíl bə̀ bərá. Ìì kùm və̀'kèá bít ìì gú' yíl íí bídǹ bílǹmbə̀ kɔ̀' bəd sɔ̀ŋ.

²Ìì zɛ̀ŋ túŋá, máára mə́ Pol la, mə́ tə́ ii kíìn baanàá' Dáà íí dàà bə̀ ná' ii gàbì gə́, Krístù mà' in nə́ŋ̀má aí bə̀ láŋ̀mbə̀ sɔ̀ŋ gá.

³Bít mə́ tə́ ii baàn sɔ̀ŋ' kóó nɛ́ɛ̀réè, bə̀ ná'ù gàbì gə́, bə̀ dáù pe'ǹ dá indaŋ̀mbə̀ nwɔŋ ləə̀n kə̀ zɔ̀ŋtá.

⁴Nɛ́b aa íí sàà kuùmbə̀ wɔ̀ɔ̀lə̀ Vɛnɛ́b númú kə̀ indaŋ̀mbə̀ ləə̀nmbə̀ rə, íí pɛrì kə̀ Krístù ra, bít íí bɔ̀b pə̀dkè Vɛnɛ́b bə̀ gá.

⁵Obə́n gə́, bə́n zígǹ tɛ́m tə́ Vɛnɛ́b ba, dá bə́n bí'ǹ wɔ̀ɔ̀lə̀ oò númú. Aarə, bə́n tə́ən taà nwánàá, kə̀ Nwul Gìdń kpɛŋsɛ́l aa tə́ tù' ma'ǹ kə̀ tɛ́mbagké bə́n doó.

⁶Kàandə, dáà bə́n wáàlǹnì kə̀ Yéésù Krístù gə́, kuùmbə̀ màn aa nàà gàb doó, sínkɔ̀ màn aa nàà gàb síndə, aarə in pɛ̀sə́ bə̀ gá' in pɛ̀sə́ bə̀ rə, tɛ́mbagké aa tə́ tù' ma'ǹ kə̀ í'sɛ̀l loó.

⁷Íí ɛ̀mì númú sɔ̀ɔ̀nkè! Nɛ́ɛ̀réè mà' ii sə̀n, bɔ̀b ìì dàà vɛ́nà ləə̀nmbə̀ gú?

⁸Nwɔŋ aa bə̀ bàà ii, bɔ̀b aí bə̀ zó'ǹmbə̀ yérə, vúgà Vɛnɛ́b aa dɛ̀ri rə naà gá.

⁹Ìì gú' yíl íí ra! Inváàndo zɔ̀gɔ̀ ní, zá' bɛ́' zəəm aa bə̀ lə̀g də kíìn kóólé.

¹⁰Báátììkpɛ̀ŋ pà' zá' mə́ də́dǹ aa kə̀ aí rə yàá. Bə́ŋyée gə́, mə́ gàb yàá, inselké aí bə̀ dá kuùm kə̀ máá bə̀ kíin, wálke bə́n kə̀ Báátììkpɛ̀ŋá. Zá màn aa tə́ ii tɛ́m nyágə̀l lə, kóó oò kùm nɛ́ɛ̀réè, Vɛnɛ́b dáù búúd í'nàá.

¹¹Máá gə́, ɔ̀dkudvɛɛ̀l mə́ í'sɛ̀lbə̀ bərá, dáà mə́ ùd tə́ gàb na'ǹmbə̀ nwɔŋ gə́, kə̀ níìbə̀ bə̀ í' mə́ taà búúd gú? Tə́ kàangə́, nwɔŋ aa mə́ tə́ baàn Krístù, màn aa bə̀ bágə̀ téélɛŋké bərə yílə́ rə, oò bíl in nwɔŋ bə̀ nɛ́ŋə̀ nə́ŋ̀má naà sí.

¹²Mə́ pà' pɔ̀bsə́, nɛ́b aa bə̀ tə́ ii vɔ̀gə̀l yérə, boò dáá númú ní, kə̀ tù' boò aa roó' Bə̀ŋ boò bɛ́' si' númú bə̀ boò bəd də kúnú (Aarə í' baànmbə̀ gə́, nɛ́b luùm bəraa rə, boò wál kə̀ nɛ́b bagké bəd tə́ sɔ̀ŋ sí.)

¹³Ɔ̀dkudvɛɛ̀l mə́ í'sɛ̀lbə̀ bərá, bə́ dɛ̀riyà, bɔ̀b ìì kùm nɛ́b yíl bə̀ bərá. Zá nɛɛ̀n aa íí kùm nɛ́b yíl bə̀ bəd yérə, lìb ìì bí' yíl íí in aa tɛ́m íí í' ìì mà' rə bə sí. Zá kə̀ í'sɛ̀lá, ìì pí' ɔ̀dnə́ŋ̀ tù' ma'ǹmbə̀ íí bòdba, kìínmbə̀ kɔ̀' kíin.

¹⁴Kə̀ aakíin də, indaŋ̀mbə̀ gə́ kóólé, yaà wál tə́ nwɔŋ aa nə́ŋ̀ní yée ba: «Ń í' ɔ̀dnə́ŋ̀ ń da, kìínmbə̀ ń í' yíl ámbə̀ rə kíin.»

¹⁵Zá dáà íí tə́ diìn ɔ̀dnə́ŋ̀ bəd luùmbìá, bít íí tə́ ɔ̀dnə́ŋ̀ bəd təə̀m kìínmbə̀ gɔ̀g fɔ̀gúbə̀ bəd kíin gə́, ìì gú' yíl íí ra, síngə́, íí dá ɔ̀dnə́ŋ̀ bəd kíìn lodǹ dúŋ̀ íí bòdba.

¹⁶Aa yée nwɔŋ aa mə́ í' ii baànmbə̀ roó' Ìì dàà Nwul Gìdń oò nwán sə̀n gɔ̀ŋsə́ íí ra, bít ìì ləə in aa tɛ́m íí tə́ í'ǹ də sí.

¹⁷Kàandə in aa tɛ́m bə́n í' rə, dáá kə̀ in aa Nwul Gìdń í' rə sé. Bít in aa Nwul Gìdń í' rə kɔ̀, dáá kə̀ in aa tɛ́m bə́n í' rə sé. Boò iirə kóólé, bə̀ nə́' nə́gə̀d tə́ boò bòdba, bít íí bán in aa íí í' rə ma'ǹmbə̀ gá.

¹⁸Zá dáà Nwul Gìdń tə́ ii sə̀n nwáàn gə́, íí kùm indaŋ̀mbə̀ kɔ̀' gá.

¹⁹Bə́n gabm̀mì sɔ̀ɔ̀nkè, nɛɛ̀n aa in aa tɛ́m bə́n í' rə, mà' tù' rú roó' tə́ labsə̀ rú, tù' nyìb bə̀ bərú,

²⁰tə́ vɔɔm bəd pɔ̀bàá, kə̀ gan vaksə́ bəd ma'ǹmbìá. Nɛ́b bəd kùm tə́ kə̀ ɔ̀dmáàn kíìn boò bòdba, bə̀ tə́ kíìn álàá, bít bə̀ tə́ kə̀ kisɛ̀lá, bə̀ nyìì tə́ kə̀ nɔ̀ɔ̀má, selké ɔ̀dnə́ŋ̀ bə̀ kaànná, bɔ̀b oò bə̀ kèéd lo'ǹ bí'ǹmbìá. Bə̀ tə́ bəd kíìn pɛɛ̀l boò bòdba, bít bə̀ tə́ kun bəd pɛlàá,

²¹bə̀ tə́ in bəd ɔràá, bə̀ tə́ yíl boò páàn badn nyəə̀n widǹmbə̀ rú, kə̀ líísɛ̀lú, bít bə̀ tə́ invaksə́ kam bəraa lúŋ aa bəraa rə ma'nàá. Mə́ tə́ ii kíìn gbádǹ baàn bə́ŋyóo, kìínmbə̀ mə́ mà' rə kíin. Nɛ́b bəraa bə̀ tə́ diìn ma'ǹmbə̀ kə̀ aakíin də, bə̀ bɔ̀b *Vɛnɛ́b gààd gá.

²²Zá aa yée in aa Nwul Gìdń lɛ̀b sáá roó' Í'sɛ̀lá, tɛ́m làmkèá, tɛbàá, tɛ́m sidkéá, kuùmbə̀ nɛ́ŋə̀ sɔ̀ɔ̀ná, sɔ̀ɔ̀nkè ma'ǹmbìá, in ma'ǹmbə̀ kə̀ tɛ́m nə́ŋ̀ní,

²³tɛ́m ɔ̀gkeá, bít kə̀ yíl nwáànmbìá. Vɛ́nà gə́, indaŋ̀mbə̀ zá' nə́gə̀d kə̀ in bəraa rə sé!

²⁴Zá Yéésù Krístù nɛ́b bəd gə́, bə̀ lò' si' boòì kə̀ in aa si' boò í' pɛ̀d də tá.

²⁵Dáà bə́n tə́ən kə̀ gɔ̀ŋsə́ puu Nwul Gìdń naà gə́, báà ɛɛ̀m kìínmbə̀ nɛɛ̀n aa Nwul Gìdń tə́ bə́n baàn də kíin.

²⁶Báà pa'ǹ yíl sí, báà ma'ǹ in aa dá ɔ̀dnə́ŋ̀ bə́n bəd tɛ́m nwu'ǹ də sí, sínkɔ̀ báà ɔdǹ ɔ̀dnə́ŋ̀ in bə́n bòdbə sí.