Read Samba Leko Efesus 2 Bible Online

Efesus 2 - Samba Leko bible

Efesus 2

¹Nyàam də, val kòri in yɛɛlké íí bəd bòórú, bít kə̀ invaksə́ íí bəd bòórú.

²Nyàam də, íí kùmà kìínmbə̀ nɛɛ̀n aa nɛ́b zɔ̀ŋə yɛ́b bə bə̀ kùm dú rə kíin. Íí kè' *malaika vaksə́ bəd gààraa nwuulú rə nwɔŋá. Malaika vaksə́ aarə, tə́ sə̀n tù' ma'ǹ nɛ́b aa bə̀ məə Vɛnɛ́b ləə̀nmbə̀ bə́ŋyée rə tɛ́mú.

³Bə́n kóólé, obə́n kɔ̀ bə́n kuùmmà kìínmbə̀ boò kíin, bə́n kuùmmà kə̀ nɛɛ̀n aa tɛ́m bə́n í' rə kíin; bít bə́n ma'ǹnà invaksə́ aa tɛ́m bə́n í' roó, kə̀ aa nwul bə́n í' roó. Nɛɛ̀n aa bə́n kuùmmà rú kə̀ nɛɛ̀n aa tɛ́m bə́n í' rú rə kíin yérə bòórú, Vɛnɛ́b dá bə́n taà dú'ǹ laarú, kə̀ nɛ́b kambəd kíin.

⁴Zá sɔ̀ɔ̀nkè Vɛnɛ́b bə̀ tə́ gbàákù. Kə̀ taàbìá, í' bə́n taà gbàákù.

⁵Kàandə kɔ̀, val kòd bə́n invaksə́ bə́n bəd bòórú. Pii bə́n gɔ̀ŋsə́ kə̀ Krístù ra. Kə̀ pə̀dkè Vɛnɛ́b bìá, íí súú taá!

⁶Wálke obə́n bə̀ kə̀ Yéésù Krístù ra, Vɛnɛ́b díím bə́nnà taà valú, kə̀ oò tá, bɔ̀b dá báà kuùm kə̀ oò tə́ lɛgə́ poú.

⁷Mà' in aarə, bɔbm̀ i'ǹmbə̀ sɛŋ bəraa dáà yaànà rə kóólé, pə̀dkè gbà'á, kə̀ sɔ̀ɔ̀nkè aa ì' bə́nnà Yéésù Krístù rú roó.

⁸Kàandə, kə̀ pə̀dkè Vɛnɛ́b bìá, íí bɔ̀b taà súúkeá, kə̀ tɛ́mbagkéá. Súúke aarə, vúgà aí naà gá, Vɛnɛ́b piià sə̀n tɛdńní.

⁹Aarə vúgà tùsaa íí mà' rə bə gá, bít kə̀ aakíin də, nɛ́ŋə̀ nə́ŋ̀má bán kùlə́ ma'ǹmbə̀ bə wərə̀ gá.

¹⁰Kàandə, Vɛnɛ́b kùd bə́nnà sùnú; séé bə́nnà kə̀ wálke kə̀ Yéésù Krístù ra, bɔ̀b báà ma'ǹ tù' sɔ̀ɔ̀n bəraa kùd zígà nyàamdoorú báà ma'ǹ kíìn doó.

¹¹Íí nɛ́b aa nɛ́b *Israila bə̀ bəd bə̀ tə́ baàn íí nàà gàb síndoó (Kàandə, boò gə́, bə̀ zíg yíl boò bənə́ naanə́ gàb yàá, kə̀ lèm aa boò sisú roó), sèl ìì zá' nɛɛ̀n aa nyàamdoorú íí kùmà nɛ́b aa bə̀ bàg Vɛnɛ́b síndoó.

¹²Sɛŋ aarə bərə, íí kùmà zɔ̀ŋ bùúd kə̀ Krístù ra. Íí kùmà sɛ̀ɛ́ná, bít íí kùm kə̀ nɛ́b *Israila bə̀ bəd tə́ sé. Íí kùmà zɔ̀ŋ bùúd kə̀ gú'dúgke bəraa Vɛnɛ́b bàà dàà nɛ́b *Israila bə̀ bəd doó. Íí kùm zɔ̀ŋə yɛ́b bərə, íí zíg tɛ́m íí in nə́ŋ̀má bə sé. Bít íí kùm kə̀ Vɛnɛ́b tə́ sé.

¹³Zá bə́ŋyée nɛ́b aa nyàam íí kùmà zɔ̀ŋ bùúd kə̀ Vɛnɛ́b də, yaà ìì wálì kə̀ Yéésù Krístù ra, Yéésù Krístù gbá'iyàì oò sunú, kə̀ nyɛ̀lə́m oòra.

¹⁴Kə̀ aakíin, Yéésù kə̀ yíl oò bìá, kùmsə̀n tɛbə̀ bə́n da. Mà' sə̀n nɛ́b aa *Yahudu bəd doó, kə̀ nɛ́b aa bə̀ bàg Vɛnɛ́b síndə tá, wál bə̀ kùm taà kun nə́ŋ̀ní. Pii si' oòra, kə̀ wɔbm̀bə̀ mawol aa pɛ̀d bə̀, bít bə̀ zèè kə̀ ɔ̀dnə́ŋ̀ bəd doó.

¹⁵Lò' Yahudu bəd indaŋ̀mbìá, kə̀ nwɔŋ oò bəd tá, bɔbm̀ ma'ǹmbə̀ Yahudu bəd kə̀ nɛ́b aa bàg Vɛnɛ́b síndə tá, boò kùm si' nə́ŋ̀ní tə́ŋtə́ŋ, kə̀ wálke boò kə̀ oòra. Kə̀ aakíin, yaà mà' taà tɛbə̀ boò tə́ŋú.

¹⁶Kə̀ val oò téélɛŋké ba, Krístù lò' zeeké yàá; kə̀ téélɛŋkéá, yaà wál kun bəraa iirə yéeì si' nə́ŋ̀ní, bít yaà wál bə̀ yílì kə̀ Vɛnɛ́bá.

¹⁷Kə̀ aakíin, Krístù yaà nɛ́b aa íí bàg Vɛnɛ́b sé, íí kùm zɔ̀ŋ bùúd kə̀ Vɛnɛ́bá, bít kə̀ Yahudu bəraa bə̀ kùm Vɛnɛ́b səǹ də, *Nwɔŋ Puu Sɔ̀ɔ̀nkè tɛbə̀ baànmbìá.

¹⁸Aarə kə̀ pə̀dkè Krístù bìá, bə́n kóólé, kə̀ nɛ́b aa bə̀ bàg Vɛnɛ́b síndə tá, báan kíìn báàn yaàn diìnmbə̀ Báá Vɛnɛ́b sunú. Nwul Gìdń luùm nə́ŋ̀ní tə́ŋtə́ŋ aarə ní, dá sə̀ní ma'nàá.

¹⁹Kə̀ aakíin də, nɛ́b aa íí bàg Vɛnɛ́b síndə, íí sɛ̀ɛ́n bəd sɔ̀ŋ gá, sínkɔ̀ íí nɛ́b aa vúgə́là zɔ̀ŋ nə́ŋ̀ gɔ̀ŋ bərə gá. Zá bə́ŋyée íí sɛ̀ɛ́n bəd sɔ̀ŋ gá, íí kùm tə́ yɛ́b nə́ŋ̀ní ba, kə̀ Vɛnɛ́b nɛ́b *gìdń bəd tá, bít íí kùmsə̀n Vɛnɛ́b nɛ́b bərá.

²⁰Aí kɔ̀ íí wúl aa *Vɛnɛ́b gbantumsə̀ bəd kə̀ *Yéésù gbantumsə̀ bəd tá, bə̀ páá sə̀n bèl loó. Yéésù Krístù kə̀ yíl oò bìá, kùmsə̀n bəŋ yíl bə̀ aa bə̀ páá kə̀ wúl bèl loó.

²¹Yéésù Krístù dí' sə̀n wúl aa bə̀ wə̀ə̀ rə gə́ kóólé və̀'kèá. Bít wál kò' sə̀n wúl aarə ɔ̀dbə sɔ̀ɔ̀nkè, bɔ̀b kàŋ oò də́ŋ Báátììkpɛ̀ŋ láŋsə́ wúl *gìdńná.

²²Kə̀ wálke kə̀ oòra, aí kɔ̀ bə̀ wə̀ə̀ ii tə́ wúl aarə rú kɔ̀, bɔbm̀ bílǹmbə̀ kə̀ nɛ́b kambəd tə́ kóólé wúl aa Vɛnɛ́b kùm dú kə̀ nwul oò roó.