Read Samba Leko Efesus 3 Bible Online

Efesus 3 - Samba Leko bible

Efesus 3

¹Kə̀ taàbìá, máára mə́ Pol la, mə́ pìì wúltígə́l bə̀ rú, nɛ́b aa íí bàg síndə bòórú. Yéésù Krístù tùm máà sùnú, bɔ̀b yaà máà bàà ii *Nwɔŋ Puu Sɔ̀ɔ̀nkèá.

²Íí kìì yàá vɛ́nà, nwɔŋ aa bə̀ gám tùsaa Vɛnɛ́b pii máà kə̀ sɔ̀ɔ̀nkè oòra, mà' máà bɛ́' aí bə̀ roó.

³Vɛnɛ́b kèd mə́ núù, bɔ̀b máà gàb *inmə́'ke oò aa zíg doó; (mə́ báriyà nwɔŋ oò bəd tə́ in aarə yílú,

⁴bít íí tə́ nwɔŋ bəraa rə gádǹ gə́, íí dákíìn báàn *inmə́'ke aa mə́ kə̀ naà Krístù yílə́ rə gabm̀bìá).

⁵Nyàamdoorú rə, Vɛnɛ́b bàà ì' nɛ́b bəd *inmə́'ke aarə sé, zá bə́ŋyée kə̀ nwul oòra, Vɛnɛ́b vúŋ yaà ì' taà *inmə́'ke aarə *gbantumsə̀ gìdń oò bərá, kə̀ nɛ́b aa bə̀ tə́ nwɔŋ oò baàn doó.

⁶Aa yée *inmə́'ke roó' kə̀ *Nwɔŋ Puu Sɔ̀ɔ̀nkèá, nɛ́b aa bàg Vɛnɛ́b síndə, bə̀ dá taà insɔ̀ɔ̀nkè aa Vɛnɛ́b zíg nɛ́b oò bəd də bɔbm̀ kə̀ *Yahudu bəd tá. Bə̀ kùm bəd tə́ si' nə́ŋ̀ní, bít boò kɔ̀ bə̀ wál tə́ nwɔŋ baàn daànmbə̀ luùm nə́ŋ̀ní aa Vɛnɛ́b mà' kə̀ wálke kə̀ Yéésù Krístù roó.

⁷Mə́ bíl nɛ́d Nwɔŋ Puu Sɔ̀ɔ̀nkè tù' bə̀ ma'ǹ, kə̀ in tɛdńní bə̀ aa Vɛnɛ́b kə̀ sɔ̀ɔ̀nkè oò bìá, pii máà kə̀ kpɛŋsɛ́l oò roó.

⁸Máára mə́ kùmsə̀n nɛ́ŋə̀ aa lè' tɔ̀l Vɛnɛ́b nɛ́b *gìdń bəd tə́ŋə́ roó. Vɛnɛ́b mà' máà pə̀dkè aarə, bɔ̀b máà bàà nɛ́b aa bàg bəǹ síndə *Nwɔŋ Puu Sɔ̀ɔ̀nkè Krístù bə̀ aa nɛ́ŋə̀ bán gabm̀ bɛ́'ǹmbə̀ gá roó,

⁹bít i'ǹmbə̀ nɛ́b bəd kóólé núùrú, bɔbm̀ gabm̀bə̀ nɛɛ̀n aa Vɛnɛ́b *inmə́'ke aa zíg də, dá ma'míìn dú roó. Vɛnɛ́b kùmsə̀n nɛ́ŋə̀ aa séé in gə́ kóólé roó. Zíg *inmə́'ke aarə nyàamdoorú kpɔ̀ɔ̀m,

¹⁰bɔ̀b bə́ŋyée gə́, *Eklisiya bòórú, *malaika gbàád bəd, kə̀ kpɛŋsɛ́l bəraa lɛgə́ paà rə tá, boò gàb Vɛnɛ́b ingabkéá, kə̀ nɛɛ̀n aa kùm dú rə tə́ kóólé.

¹¹Vɛnɛ́b mà' kə̀ aakíin, kə̀ nɛɛ̀n aa sèl zíg nyàamdoorú kpɔ̀ɔ̀m, in aa mà' kə̀ Báá bə́n Tììkpɛ̀ŋ Yéésù Krístù roó.

¹²Kə̀ wálke obə́n bə̀ kə̀ Krístù ra, bít kə̀ tɛ́mbagké bə́n aa oò bəroó, bə́n bɔbm̀ taà kpaŋ̀ dáàn wə́ə̀nmbə̀ Vɛnɛ́b sunú, kə̀ tɛ́m gágkeá.

¹³Kə̀ aarə kíin, mə́ tə́ ii kíìn dɛràá, lɛ́' ìì dàà yíl aí bə̀ búúraa mə́ tə́ bé'ǹ aí bòórú yérə oò kàni sí. Búúd bəraa rə, bə̀ kùmsə̀n kaŋsɛ́l íí aa bɛ́d bə gá, lɛgə́ paà roó.

¹⁴Kə̀ taàbìá, mə́ kùm taà kə̀ dunlígə̀rá, Báá Vɛnɛ́b númú, bɔ̀b oò bə̀ nyɛɛ̀mbìá.

¹⁵Oòrə, kun bəraa lɛgə́ paà rə gə́ kóólé, kə̀ aa bəraa zɔ̀ŋə yɛ́b bərə tá, bə̀ bɔ̀b nə́gə́l sɔ̀ɔ̀n boò kə̀ oòra.

¹⁶Mə́ dɛ̀rə̀ gə́, kə̀ gbaŋə̀ káŋke oò bìá, oò pii ii kpɛŋsɛ́lá, bɔ̀b ìì kpɛŋ̀ kə̀ kpɛŋsɛ́l oòra, kə̀ nwul oòra, aí tɛ́mú.

¹⁷Bít Krístù oò ləə aí tɛ́mú kə̀ tɛ́mbagkéá. Mə́ dɛ̀d gə́, kùm ìì pá' lígə́d, bít ìì kùm və̀'kè kə̀ wúl bèl kíìn, í'sɛ̀lú.

¹⁸Mə́ dɛ̀d in tɛdńní bə̀ aarə, bɔ̀b íí dá taà kpɛŋsɛ́l bɔbm̀ gabm̀bìá, kə̀ nɛ́b *gìdń bəd gə́ kóólé, nɛɛ̀n aa í'sɛ̀l Vɛnɛ́b bə̀ yád dú roó, nɛɛ̀n aa bùùd dú roó, nɛɛ̀n aa bùùd dú lɛgə́ roó, bít kə̀ nɛɛ̀n aa pí' rú yɛ́b bəroó.

¹⁹Èè, íí dákíìn báàn í'sɛ̀l oò gabm̀bìá; kə̀ aakíin də, nɛ́ŋə̀ nə́ŋ̀má bán gabm̀ bɛ́'ǹmbə̀ kə̀ zɔ̀ŋ tə́ kóólé sé. Bít kə̀ aakíin də, bɔ̀b íí dá taà nyiìn kə̀ í'sɛ̀lá, kìínmbə̀ Vɛnɛ́b kíin.

²⁰Vɛnɛ́b dá sə̀n báàn, tù' ma'ǹmbə̀ obə́n dú, kə̀ kpɛŋsɛ́l oò bìá, bít mà' dá nɛɛ̀n tá'àn dú sɔ̀ŋ. In aa bə́n tə́ən kíìn nyɛmàá, bít bə́n tə́ən seèl də, mà' dá nɛɛ̀n tá'àn dú, bɛ́d bə gá.

²¹Kaŋsɛ́l laa nyɛdkè oò kùm oò naú, *Eklisiya rú, bít kə̀ wálke kə̀ Yéésù Krístù ra, sɛŋ gə́ kóólé, bít zèd kə̀ zèrá! Oò kùm kàani.