Read Samba Leko Efesus 4 Bible Online

Efesus 4 - Samba Leko bible

Efesus 4

¹Mə́ tə́ ii kíìn nyɛmàá, máára mə́ kùmsə̀n nɛ́d wúltígə́lú bìá. Kàandə, mə́ tə́ Báátììkpɛ̀ŋ tù' ma'nàá, ìì kùm sɔ̀ɔ̀nkèá, kə̀ nɛɛ̀n aa Vɛnɛ́b í' rə kíin, sɛŋ aa dɛ̀riyà bəroó.

²Ìì kùm sɛŋ gə́ kóólé, kə̀ tɛ́m ləəkèá, kə̀ tɛ́m ɔ̀gkeá, bít kə̀ tɛ́m sidkéá. Ìì sìd ɔ̀dnə́ŋ̀ bəd íí bòdbə kə̀ í'sɛ̀lá.

³Ìì nɔ̀ŋ wálke aa Nwul Gìdń tə́ piìn kə̀ tɛbə̀ aa tə́ ii wáàl aí bòdbə rə ko'ǹmbìá.

⁴Si' tə́ nə́ŋ̀ní, Nwul Gìdń kɔ̀ tə́ nə́ŋ̀ní. Nɛɛ̀n aarə rú, tɛ́m zígke aa Vɛnɛ́b dɛ̀d bə́nnà kə̀ kùrú rə kɔ̀ tə́ nə́ŋ̀ní.

⁵Íí tə́ kə̀ Báátììkpɛ̀ŋ nə́ŋ̀ní, tɛ́mbagké nə́ŋ̀ní, bít kə̀ baptisma nə́ŋ̀ní.

⁶Vɛnɛ́b tə́ nə́ŋ̀ní, Báá in gə́ kóólé bìá. Ləə gààd tə́ in gə́ kóólé yílú. Mà' tù' tə́ zɔ̀ŋ gə́ kóólé, bít kùm tə́ in gə́ kóólé rú.

⁷Kə̀ aakíin də kɔ̀, kóó nɛ́ɛ̀réè obə́n tə́ŋú, bɔ̀b in tɛdń Krístù bə̀ yàá, kə̀ nɛɛ̀n aa Krístù də́' piìnmbə̀ rə kíin.

⁸Kìínmbə̀ nɛɛ̀n aa Núúboòd Gìdń bàà rə kíin: «Sɛŋ aa na' lɛgə́ rə, ɛ̀mà kə̀ nɛ́b wúltígə́lú bə̀ bəd naú, pii nɛ́b bəd in tɛdńní bìá.»

⁹Kə̀ aakíin də: «Na'ì lɛgə́ paà» rə, í' tə́ baànmbə̀ gə́, bə́ŋ̀ bə̀ lɛ̀bə̀ sína yɛ́b bəraa lɔ̀ŋ pí'ke rú zɔ̀ŋə yɛ́b bərə ba.

¹⁰Màn aa símà zɔ̀ŋə yɛ́b bərə, oò ní bít na' sə̀n lɛg ba, bɔ̀b zɔ̀ŋ gə́ kóólé, oòra oò kùm sùnú.

¹¹Oòra pii sə̀n nɛ́b bəd in tɛdńní bə̀ kə̀ nɛɛ̀n aa bə̀ í' rə kíin' pii nɛ́b kambəd kuùmbə̀ *Yéésù gbantumsàá, nɛ́b kambəd gə́, kuùmbə̀ *Vɛnɛ́b gbantumsàá; bít nɛ́b kambəd sɔ̀ŋ, kuùmbə̀ evanzelist, nɛ́b kambəd kɔ̀ kuùmbə̀ Pastɛr, bít nɛ́b ɔ̀d kam kɔ̀ nɛ́b Vɛnɛ́b nwɔŋ bə̀ sáànná.

¹²Mà' kə̀ aakíin də, bɔbm̀ kudǹmbə̀ Vɛnɛ́b nɛ́b *gìdń bəd mà' boò zə́' kə̀ tùsaa Krístù pii roó; bɔbm̀ ma'ǹmbə̀ Krístù si' kàŋ oò dáá númú.

¹³Nɛɛ̀n aa bə́ kóólé bə́ í' rú rə, yaà báan wáàl bəd nə́ŋ̀ní bə́n kóólé, obə́n tɛ́mbagké rú, kə̀ ingabké bə́n Vɛnɛ́b Wàà bìá. Báan kuùm nɛ́b gbàád bərá, kàŋ yaà báan də́ŋ̀ kə̀ Krístù kíin zé.

¹⁴Kə̀ aakíin də, bə́n báàn kuùmbə̀ kə̀ yɛb bɛ̀ŋ́sə̀ bəd kíin sɔ̀ŋ gá. Boò gə́, bə̀ tə́ kìínmbə̀ wəl aa nwul pú' tə́ aàn zɔ̀ŋ gə́ kóólé rə kíin. Záá bə̀ lɛ́l bə̀ tə́ kə̀ insánke gúsuúm bə̀ bəraa nɛ́b bəd tə́ nɛ́b bəd sáàn, bít kə̀ tɔ̀ɔ̀l in bəraa nɛ́b bəd tə́ ma'ǹ doó.

¹⁵Zá aa dá sɔɔ̀n də gə́, bə́n tə́ən ɔ̀dnə́ŋ̀ vɛ́nà baàn kə̀ í'sɛ̀l gə́, kàŋ báan dáàn kə̀ númú, Krístù sunú, in gə́ kóólé rú. Krístù kùmsə̀n yílá.

¹⁶Kə̀ pə̀dkè oòra, zɔ̀ŋ bəraa sisú gɔ̀ŋ gɔ̀ŋ də, wál bə̀ kùm taà və̀'kèá; bít si' kə̀ zɔ̀ŋtá wál taà kə̀ nɛɛ̀n aa kùm dú yérə kíin. Kə̀ aakíin də, màìgə́, zɔ̀ŋ sisú bə̀ déè gə́ kóólé mà' tù' oòì kə̀ nɛɛ̀n aa dáà dá ma'ǹ dú rə kíin gə́, si' kə̀ zɔ̀ŋtá, kàŋ ɛ̀m númú kə̀ í'sɛ̀lá.

¹⁷Ìì zɛ̀ŋ nwɔŋ aa bàà mə́ tə́ ii nyɛ́'ǹ Báátììkpɛ̀ŋ nə́gə́lə́ yóo' ìì kùm kìínmbə̀ nɛ́b aa bə̀ bàg Vɛnɛ́b síndə kíin sí. Boò gə́, inselké boò àà bə̀ in nə́ŋ̀má bə sé.

¹⁸Inselké boò tə́ tígə́lú. Bə̀ bɔ̀b gɔ̀ŋsə́ aa Vɛnɛ́b tə́ nɛ́b oò bəd piìn də gá. Kàandə, bə̀ gàb in nə́ŋ̀má sé, bít tɛ́m boò bəd kpɛŋ̀ yàá.

¹⁹Bə̀ bɔ̀' inselké sə́ə́mnúù bə̀ì kóólé. Bə̀ pii yíl boò tə́ tù' vaksə́ bərú, bə̀ tə́ in nyìb bə̀ luùm gə́ kóólé ma'nàá, bə̀ dàà bə sé.

²⁰Zá íí nɛ́b bagké bəd gə́, in aa íí sánà Krístù naà rə, kə̀ aakíin sé!

²¹Íí kììà bə̀ gám nwɔŋ oòì vɛ́nà; íí nɛ́b bagké bəd yée gə́, bə̀ sániyà vɛ́nà aa Yéésù naà rə yàá.

²²Aa dá sɔɔ̀n də gə́, lɛ́' ìì dàà si' doo íí aa ì' nɛɛ̀n aa nyàam íí kùm dú rə kúnú. Si' doo aarə, inlɛ'kè vaksə́ aa tə́ù záàn də, àà sáá nɛ́ŋə̀ bɔ̀bke rú.

²³Aa dá sɔɔ̀n də, ìì kùm nɛ́ŋə̀ puuá, aí tɛ́mú, bít kə̀ nwul íí rú.

²⁴Ìì páá gɔ̀ŋsə́ puu aa Vɛnɛ́b séé, lúŋ yíl oòra, bít ì' yíl oò kumsɛ́l aa *gìdńná bít wɔ̀ɔ̀làá, kə̀ vɛ́nà roó.

²⁵Kə̀ taàbìá, lɛ́' ìì dàà gúsuúmá! Kóó nɛ́ɛ̀réè, oò bàà ɔ̀dnə́ŋ̀ nwɔŋ sɔ̀óná. Kàandə, bə́n kóólé bə́n tə́ən si' nə́ŋ̀ní.

²⁶Íí mà' nɔ̀mì gə́, ìì gú' yíl íí ra, kə̀ nyi'ǹmbə̀ invaksə́ rú. Nɔ̀m aí bə̀ rə, náŋ oò wə́ə́ nyàmbírə́m sí.

²⁷Ìì pii Sámbàŋyɛ́rə̀ kpaŋ̀, bɔ̀b oò záá ii sí.

²⁸Nɛ́ŋə̀ aa nyàam bɔ̀n pà' sáá lííro rə, oò dàà kíìn lííro pa'ǹmbìá. Zá aa dá sɔɔ̀n də, oò pìì tù' ma'ǹmbə̀ kə̀ nɛɛ̀n oòra, oò zàn taà kə̀ yíl oòra. Kə̀ kpaŋ̀ nyɛdkèá, oò bɔ̀b taà in aa dá kə̀ nɛ́b búúd bə̀ bəd láŋ̀ bəroó.

²⁹Ìì gám nwɔŋ vaksə́ nə́ŋ̀má sí. Ìì gám nwɔŋ sɔ̀ɔ̀nkè aa dá nɛ́b kambəd báàn gbá'ǹmbə̀ tɛ́mbagké rú rə ní, bít kə̀ aa dá dáàn kə̀ in aa nɛ́b bəd í' roó, bɔ̀b nɛ́b aa bə̀ tə́ ii kiìn də sɔ̀ɔ̀nkè ma'ǹmbìá.

³⁰Ìì díŋ Vɛnɛ́b Nwul Gìdń tɛ́m sí; kə̀ aakíin də, Nwul Gìdń kùmsə̀n bírə́ aa Vɛnɛ́b bárà aí yílə́ roó. Oòra kùmsə̀n kə̀ dun ko'ǹmbə̀ kíin. Nyàm də wə́ə́ì gə́, Vɛnɛ́b bìn yaà dá ii lɛ́'ǹ invaksə́ rú, íí kóólé.

³¹Inselké nyáákeá, gbə̀' tabm̀bìá, nɔ̀m ma'ǹmbìá, in bəraa kóólé, boò kùm aí naà sí. Ìì dàà mud bərá, bít kə̀ nwɔŋ kpaàmbə̀ kə̀ ɔ̀dnə́ŋ̀ bərá. Ìì gú' yíl íí kə̀ tɛ́m vaksə́ gə́ kóólé.

³²Aa dá sɔɔ̀n də, ìì mà' sɔ̀ɔ̀nkè kə̀ nɛ́b bərá, bít ìì nyìì kə̀ í'sɛ̀l íí bòdba. Lɛ́' ìì dàà ɔ̀dnə́ŋ̀ invaksə́ aa mà' ii rə íí bòdba, kìínmbə̀ Vɛnɛ́b kɔ̀ lɛ́' dàà ii invaksə́ kə̀ Krístù rə kíni.