Read Samba Leko Efesus 5 Bible Online

Efesus 5 - Samba Leko bible

Efesus 5

¹Zá íí kùmsə̀n Vɛnɛ́b yɛb í'sɛ̀lbə̀ yée gə́, ìì nɔ̀ŋ ma'ǹmbə̀ kə̀ oò kíin.

²Bít nɛɛ̀n aa íí kùm dú rə, í'sɛ̀l oò mà' sə̀n tù' aí tə́ŋú. Ìì də́' kə̀ nɛɛ̀n aa Krístù í' bə́nnà rú roó. Piià gɔ̀ŋsə́ oò bə́n bòórú kə̀ sadaka kíin, bít kə̀ in tɛdńní bə̀ kíin. In aarə, sol oò sɔ̀ɔ̀n Vɛnɛ́b kúnú.

³Aíra íí kùmsə̀n Vɛnɛ́b nɛ́b *gìdń bərá. Kə̀ taàbìá, aa dá sɔɔ̀n də, labsàá, in nyìb bə̀ bərá, sínkɔ̀ í'ǹmbə̀ in zùúm bərá; in bəraa rə kóólé, boò kùm aí tə́ŋə́ sí.

⁴Aí gə́, sɔ̀ɔ̀n nwɔŋ vaksə́ bərá, nwɔŋ kèéd bə̀ bərá, sínkɔ̀ nwɔŋ lígə́d bə̀ bəd gáàmbə̀ sé. Aa dá kaàn də, ìì nyɛ̀m Vɛnɛ́b, bɔ̀b oò bə̀ mɔ̀'ǹmbìá.

⁵Ìì gàb kíìn sɔ̀ɔ̀nkè, nɛ́ŋə̀ labsə̀ bìá, nɛ́ŋə̀ nyìb bìá, sínkɔ̀ nɛ́ŋə̀ in zùúm bə̀ í'ǹná (kàandə, kuùmbə̀ nɛ́ŋə̀ in zùúm bə̀ í'ǹ gə́, mà' tə́ kìínmbə̀ vɔɔm pɔ̀bm̀bə̀ kíin), nɛ́ŋə̀ aarə, bɔ̀b Krístù gààd aa kìínmbə̀ valligə̀ kíin də gá, bɔ̀b *Vɛnɛ́b gààd aa kìínmbə̀ valligə̀ kíin də gá.

⁶Nɛ́ŋə̀ nə́ŋ̀má záá oò lɛ́' ii kə̀ nwɔŋ tɛdń bəd sí. Invaksə́ bəraa rə bòórú, Vɛnɛ́b dá taà nɔ̀m oò sí'ǹ nɛ́b aa məə nwɔŋ oò ləə̀nmbə̀ rə yílú.

⁷In nə́ŋ̀má oò wáli kə̀ nɛ́b luùm bəraa rə sí.

⁸Nyàam də, íí kùmà tígə́lú, zá bə́ŋyée gə́, kə̀ wálke aí bə̀ kə̀ Báátììkpɛ̀ŋá, íí kùmì laa nyɛdkè rú. Kə̀ taàbìá, ìì kùm kìínmbə̀ nɛ́b laa nyɛdkè rú bə̀ bəd kíin.

⁹Kàandə, laa nyɛdkè lɛ̀b sɔ̀ɔ̀nkè luùm gə́ kóólé, kuùmbə̀ wɔ̀ɔ̀làá, bít kə̀ vɛ́nà.

¹⁰Ìì nɔ̀ŋ in aa dá Báátììkpɛ̀ŋ sɔɔ̀n də gabm̀bìá.

¹¹In nə́ŋ̀má oò wáli kə̀ nɛ́b aa bə̀ tə́ tù' tɛdń ma'ǹ tígə́lə́ rə sí. Aa dá sɔɔ̀n də, ìì ál nɛ́b bəraa bə̀ tə́ tù' sɔ̀ɔ̀n sə́n ma'ǹ yérə kúnú.

¹²(Sə́ə́mnúù mà' mə́ tə́ kíìn in aa nɛ́b aarə mə́' bə̀ tə́ ma'ǹ tígə́lə́ rə baànmbìá.)

¹³Màìgə́, tù' bəraa rə vúgə́lì zɔ̀ŋ nyɛdkè rú gə́, nɛ́ŋə̀ dá taà gabàá, tù' sɔ̀ɔ̀n sə́n bərá.

¹⁴Kə̀ aakíin də, in aa i'míìnì nyɛdkè rə gə́ kóólé, yaà bíl zɔ̀ŋ nyɛdkèá. Kə̀ taàbìá, bə̀ bàà taá: «Ǹ lɛ́m kúnú, nɛ́ŋə̀ aa ń tə́ ləəm ləə̀n yóo. Ǹ zá' kíìn val bəd tə́ŋú, bít Krístù dáan zɔ̀ŋ nyɛdkè kíìn piinàá.»

¹⁵Ìì gú' yíl íí ra, kə̀ nɛɛ̀n aa íí tə́ kuùm dú roó. Ìì kùm kìínmbə̀ nɛ́b aa bàg Vɛnɛ́b síndə kíin sí, zá ìì kùm kìínmbə̀ nɛ́b in bə̀ gabm̀ bəd kíin.

¹⁶Ìì mà' sɔ̀ɔ̀nkè kə̀ in aa tə́ vúgǹ bə́ŋyée aí númú rə gə́ kóólé. Kàandə, sɛŋ bəraa bə́n tə́ən kuùm dú bə́ŋyée rə, sɛŋ vaksá.

¹⁷Kə̀ taàbìá, ìì kùm kìínmbə̀ nɛ́b aa bə̀ kə̀ yílə naà síndə kíin sí. Zá ìì nɔ̀ŋ nɛɛ̀n aa Báátììkpɛ̀ŋ í' ìì mà' rú rə gabm̀bìá.

¹⁸Nyəə ìì wìd badn sí, aarə dá ii aàn bɔ̀bke rú. Zá ìì nyìì kə̀ Nwul Gìdńná.

¹⁹Ìì pii ɔ̀dnə́ŋ̀ bəd váàndo íí bòdbə kə̀ Dauda nábá, kə̀ náb Vɛnɛ́b bə̀ káŋ̀á, bít kə̀ náb *gìdń bərá. Nàà ìì káŋ Báátììkpɛ̀ŋ kə̀ tɛ́m làmkè íí tə́ kóólé.

²⁰Ìì mɔ̀' Vɛnɛ́b sɛŋ gə́ kóólé, bít in gə́ kóólé ba, Báá bə́n Tììkpɛ̀ŋ Yéésù Krístù nə́gə́lú.

²¹Nɛ́b aa íí tə́ Yéésù nuùn də, ìì ləə ɔ̀dnə́ŋ̀ bəd aí bòdba.

²²Nɛ́b kɛ́ɛ̀m bərá, ìì ləə vɔ̀ɔ̀m íí bərá, kìínmbə̀ nɛɛ̀n aa íí ləə Báátììkpɛ̀ŋ də kíin.

²³Kə̀ aakíin də, nɛ́ŋ váàndo kùmsə̀n kéèn oò gààrá, kìínmbə̀ Krístù kɔ̀ *Eklisiya bəd gààd də kíin. Krístù kə̀ yíl oò bə̀ máá, kùmsə̀n Nɛ́d Nɛ́ŋə̀ bə̀ Súùn *Eklisiya bìá. *Eklisiya rə, si' oòra.

²⁴Kə̀ aakíin də, nɛ́b kɛ́ɛ̀m bəd boò ləə vɔ̀ɔ̀m boò bəd sɛŋ gə́ kóólé, kìínmbə̀ *Eklisiya kɔ̀ ləə Krístù rə kíin.

²⁵Íí nɛ́b vɔ̀ɔ̀m bərá, ìì í' kɛ́ɛ̀m íí bəd kə̀ nɛɛ̀n aa Krístù í' *Eklisiya rú, bít pii gɔ̀ŋsə́ oò, oò bòórú rə kíin.

²⁶Krístù mà' kə̀ aakíin də, í' *Eklisiya *bí'ǹmbə̀ *gìdńná, kə̀ oò bə̀ sugǹ nyɛ́'ǹmbə̀ kə̀ wəlá, bít kə̀ nwɔŋá.

²⁷Kàandə, í' *Eklisiya i'ǹmbə̀ oò númú, kə̀ sɔɔnsɛ́l oò tə́ kóólé, nyɛdkèá, invaksə́ nə́ŋ̀má bə gá, lígə́d bə gá, bít boò bɔ̀b in ɔ̀d nə́ŋ̀má oò bə̀ álǹmbə̀ bə sí.

²⁸Nɛ́b vɔ̀ɔ̀m bəd boò í' kɛ́ɛ̀m boò bəd kìínmbə̀ bə̀ í' yíl boò rə kíin. Màn aa í' kéèn oòrə, í' yíl oò bìá.

²⁹Kə̀ aakíin də, nɛ́ŋə̀ nə́ŋ̀má zèè bèd si' oò sé; zá zànə̀ kúnú, bít nwánə̀ kúnú, kìínmbə̀ Krístù tə́ ma'ǹ kə̀ *Eklisiya rə kíin.

³⁰Kàandə, bə́n kuùm sə̀n zɔ̀ŋ bəraa oò sisú roó.

³¹Kìínmbə̀ Núúboòd Gìdń bàà rə kíin: «Kə̀ taàbìá, nɛ́ŋ váàndo zá' dá báá oò daàn kə̀ nà'á oò tá, bít yaà dá pe'ǹ kə̀ kéèn oò tá, bít boò iirə kóólé, yaà bə̀ dá bíìl si' nə́ŋ̀ní.»

³²Aarə *inmə́'ke gbà'á i'míìn sə̀n yéroó. Máá naà gə́, nwɔŋ aarə ɛ̀g tə́ Krístù ra, kə̀ *Eklisiya.

³³Zá gám nwɔŋ aarə tə́ aí yílú kɔ̀. Aa dá sɔɔ̀n də gə́, nɛ́ŋ váàndo oò í' kéèn oò kə̀ nɛɛ̀n aa í' yíl oòrə kíin. Bít nɛ́ŋ kéèndo déè gə́ kóólé, oò ləə váàn oòra.