Read Samba Leko Efesus 6 Bible Online

Efesus 6 - Samba Leko bible

Efesus 6

¹Yɛb bərá, aarə tù' aí bə̀ Báátììkpɛ̀ŋ númú, ləə̀nmbə̀ báá íí bərá, kə̀ nà' íí bərá. Aarə kùmsə̀n in wɔ̀ɔ̀lə̀ Vɛnɛ́b númú.

²«Ǹ káŋ báá ḿ da, kə̀ nà' ḿ da;» aarə kùmsə̀n indaŋ̀mbə̀ éèn də̀gə̀ də̀gə̀ bə̀ aa bàà bə̀ dá zəgǹ nwɔŋ baàn daànmbə̀ yílə́ roó:

³«bɔ̀b ǹ kùm kə̀ tɛ́m làmkèá, bít m̀ bɔ̀b gɔ̀ŋsə́ bùúd zɔ̀ŋə yɛ́b ba.»

⁴Bít íí yɛb báá bəd kɔ̀, ìì díŋ yɛb íí bəd tɛ́m sí. Zá íí tə́ bə̀ zaàn gə́, ìì tɔ̀g bə̀ kúnú, bít ìì ùd bə̀ nwɔŋ aa vúgà Báátììkpɛ̀ŋ Vɛnɛ́b naà roó.

⁵Kɔ̀' bərá, ìì ləə nɛ̀n íí bəraa zɔ̀ŋə yɛ́b bərə kə̀ də́dǹná, bít kə̀ tɛ́m ɔ̀gkeá, kìínmbə̀ íí tə́ Krístù tù' ma'ǹ kíin.

⁶Ìì mà' sɛŋ aa bə̀ tə́ ii nwáàn də bə, bɔ̀b oò sɔ̀ɔ̀n nɛ́b bəd sí. Zá ìì mà' kə̀ nɛɛ̀n aa Vɛnɛ́b í' rə kíin, kə̀ tɛ́m íí tə́ kóólé, kìínmbə̀ Krístù kɔ̀'vɔ̀ɔ̀m bəd kíin.

⁷Ìì mà' kɔ̀' tù' íí kə̀ tɛ́m sɔ̀ɔ̀ná, kìínmbə̀ íí tə́ Báátììkpɛ̀ŋ tù' ma'ǹ kíin. Ìì mà' kìínmbə̀ íí tə́ nɛ́b bəd tù' ma'ǹ kíin sí.

⁸Sèl ìì gàb kúnú, Báátììkpɛ̀ŋ Vɛnɛ́b dá kóó nɛ́ɛ̀réè, mú'sɛ̀l dùm oò káánàá. Kóó kɔ̀sá, kóó nɛ́d yíl bìá, dáù káàn kə̀ nɛɛ̀n aa mà' tù' rú sɔ̀ɔ̀nkè rə kíin.

⁹Bít aí kɔ̀, íí kɔ̀' bəd nɛ̀n boò bərá, ìì kùm sɔ̀ɔ̀nkè kə̀ kɔ̀' íí bərá. Ìì dàà bə̀ kíìn búúd í'ǹmbìá. Sèl ìì zá' kúnú, íí kóólé, aíra íí kə̀ kɔ̀' íí bəd tá, íí tə́ kə̀ Báátììkpɛ̀ŋ nə́ŋ̀ní lɛgə́ poú. Báátììkpɛ̀ŋ íí rə, nɛ́ŋə̀ aa mà' inì gə́, pɛ̀d nɛ́ŋə̀ bə gá roó.

¹⁰Nwɔŋ aa bàà máá ii dugǹ kə̀ bòd də, ìì dàà yíl íí Vɛnɛ́b oò kpɛ́ŋi kúnú, kə̀ wálke íí kə̀ Báátììkpɛ̀ŋá, bít kə̀ kpɛŋsɛ́l gbà'á oòra.

¹¹Ìì páá in bùm bə̀ nə́'ǹ bəraa Vɛnɛ́b pii ii rə gə́ kóólé sisú. Ìì dìì kə̀ váàndoá, bɔbm̀ nə́'ǹmbə̀ kə̀ Sámbàŋyɛ́rə̀ nyììrə̀ bərá, bɔ̀b boò kàn bə́n sí.

¹²Kàandə, bə́ nə́' nə́gə̀d kə̀ nɛ́b bəd sé, zá bə́ nə́' tə́ kə̀ kpɛŋsɛ́l nwul vaksə́ bə̀ bəraa lɛgə́ paà roó. Bə́ nə́' tə́ kə̀ nɛ́b gbàád nwul vaksə́ bə̀ bərá, nɛ́b aa kə̀ kpɛŋsɛ́l naà zɔ̀ŋə yɛ́b bəroó, bít kə̀ nɛ̀n bəraa kùm zɔ̀ŋə yɛ́b bə tígə́lə́ roó.

¹³Kə̀ taàbìá, bə́ŋyée kò' ìì kùd in bùm bə̀ nə́'ǹ bəraa Vɛnɛ́b pii ii rə kíìn kóólé! Kə̀ aakíin də, nyàm vaksə́ yaà wə́ə́ì gə́, íí dákíìn báàn diìnmbə̀ və̀'kè, sɛŋ aa ɔ̀dmáàn íí bəd yaà bə̀ dá ii bɔbm̀ dú kə̀ bùm doó; bít bòórú gə́, íí dá bùm nə́'ǹ dá bɛ́dǹ zé. Íí dá taà diìn və̀'kè sɔ̀ŋ, nɛɛ̀n aa íí dìì rú roó.

¹⁴Tab ìì kùd sisá' ìì kò' vɛ́nà oò kùm kìínmbə̀ yɛ́rə̀ gɔ̀saa íí tab sə́gú rə kíin; wɔ̀ɔ̀lə̀ Krístù bə̀ oò kùm kìínmbə̀ gɔ̀' bùm bə̀ nə́'ǹ íí kíin.

¹⁵Ìì páá kpɛŋsɛ́l *Nwɔŋ Puu Sɔ̀ɔ̀nkè tɛbə̀ bə̀ baàn kìínmbə̀ tábə́ aa íí páá dunú rə kíin.

¹⁶Sɛŋ gə́ kóólé, ìì kò' tɛ́mbagké kìínmbə̀ páán kíin. Kə̀ oòra, íí dá taà báàn sííd laa bə̀ aa Sámbàŋyɛ́rə̀, Nɛ́ŋə̀ Vaksə́, tə́ taàn də fə́'ǹmbìá.

¹⁷Ìì kè' súúke kìínmbə̀ gɔ̀' yílə́ bə̀ aa bə̀ kùd kə̀ ba' rə kíin. Bít Vɛnɛ́b nwɔŋ kɔ̀ kìínmbə̀ yɛ́rə̀ bùúraa Vɛnɛ́b Nwul Gìdń pii rə kíin.

¹⁸Ìì mà' in bəraa rə kóólé kə̀ Vɛnɛ́b nyɛɛ̀mbìá, ìì dɛ̀d Vɛnɛ́b oò láŋ ii ba. Ìì nyɛ̀m Vɛnɛ́b sɛŋ gə́ kóólé, Vɛnɛ́b Nwul Gìdń oò nwán ii sùnú. Bít kə̀ aakíin də, kùm ìì nwán kúnú, bít sɛŋ gə́ kóólé, ìì dìì Vɛnɛ́b nyɛɛ̀mbə̀ ní.

¹⁹Ìì nyɛ̀m Vɛnɛ́b máá yílú kɔ̀, bɔ̀b Vɛnɛ́b oò pii mə́ nwɔŋ wɔ̀ɔ̀lə̀, sɛŋ aa mə́ í' nwɔŋ oò bə̀ baànmbə̀ roó. Máà gàb nwɔŋ oò bə̀ kə̀ tɛ́m gágkeá, bɔ̀b máà ì' nɛ́b bəd boò gàb *inmə́'ke *Nwɔŋ Puu Sɔ̀ɔ̀nkè rú bìá.

²⁰Kóó bə́ŋyée mə́ wúltígə́l bə̀ rú yóo, máára mə́ kùmsə̀n gbantumsə̀ Nwɔŋ Puu Sɔ̀ɔ̀nkè aarə bìá. Ìì nyɛ̀m Vɛnɛ́b, bɔ̀b máà gám nwɔŋ kə̀ tɛ́m gágkeá, kìínmbə̀ nɛɛ̀n aa máá gáàm dú rə kíin.

²¹Ɔ̀dkudvɛɛ̀l bə́n í'sɛ̀lbə̀ Tikikus, nɛ́ŋə̀ aa tə́ bə́n láŋ̀ bə kə̀ tù' sɔ̀ɔ̀nkè ma'ǹmbə̀ Báátììkpɛ̀ŋ tùsú rə, dá ii nwɔŋ bəraa máá yílə́ rə kóólé kíìn baanàá, bɔ̀b ìì gàb nɛɛ̀n aa mə́ kùm dú roó.

²²Gáŋ tùm mə́ ààù kíìn aí sunú, bɔ̀b dá oò bàà ii nɛɛ̀n aa bə́ kùm dú roó, bít oò pii ìì váàndo tɛ́mú.

²³Mə́ nyɛ̀m Báá bə́n Vɛnɛ́b, kə̀ Báátììkpɛ̀ŋ Yéésù Krístù tá, boò pii ɔ̀dkudvɛɛ̀l bəd gə́ kóólé tɛbàá, í'sɛ̀lá, bít kə̀ tɛ́mbagkéá.

²⁴Mə́ nyɛ̀m pə̀dkè Vɛnɛ́b bə̀ oò kùm kə̀ nɛ́b aa bə̀ tə́ Báátììkpɛ̀ŋ Yéésù Krístù í'ǹ, kə̀ í'sɛ̀l aa bɛ́d bə gá rə tə́ kóólé.