Read Samba Leko Filipiya 3 Bible Online

Filipiya 3 - Samba Leko bible

Filipiya 3

¹Bə́ŋyée gə́, ɔ̀dkudvɛɛ̀l bərá, bə́ tə́ kə̀ nwɔŋ ɔ̀d kam naà baàn zəgǹmbə̀ nwɔŋ bəraa bə́ gám yée yílú. Ìì kùm kə̀ tɛ́m làmkèá, kə̀ kuùm wáàlǹmbə̀ kə̀ Báátììkpɛ̀ŋá. Máá gə́, nwɔŋ aa mə́ bàà rə, nwuu mə́ bídǹ baànmbə̀ sé, bít aí gə́, aarə kpɛ́ŋ ii tɛ́mbagké tə́ kúnú.

²Ìì gú' yíl íí kə̀ nɛ́b aa bə̀ tə́ in vaksə́ ma'ǹ doó, yagəd bəraa, nɛ́b aa bə̀ tə́ diìn si' boò bəd wéèlǹmbə̀ kə̀ yɛ́rə̀ tɛdńní yéroó!

³Kàandə, obə́n da bə́n bɔbm̀ sə̀n *gàb naànmbə̀ vɛ́nà bìá, zá boò gá. Kàandə, bə́n káŋ̀ Vɛnɛ́b tə́ kə̀ Nwul oòra. In gbà'á bə́n gə́, wálke bə́n kə̀ Yéésù Krístù ra, bít bə́ zíg tɛ́m bə́ in aa nɛ́b bəd tə́ ma'ǹ boò sisú rə bə sé.

⁴Kàandə máá, má kíìn báàn tɛ́m zígǹmbə̀ máá ba. Dáà nɛ́ŋə̀ sèlì bəǹ dákíìn báàn tɛ́m zígǹmbə̀ tùsaa nɛ́ŋə̀ mà' rə bə gə́, máù sə̀n kaàn kə̀ in aarə seèlǹmbìá.

⁵Sɛŋ aa bə̀ lɛ̀b mə́ rə, bə̀ ná' mə́ gàb sɛŋ dàgwà ba. Mə́ nɛ́d Israila bìá, mə́ Benzamin kun báá wàá, bít mə́ Ibraniŋko nyɛdkè dág. Aa ɛ̀g tə́ Yahudu bəd indaŋ̀mbə̀ rə gə́, mə́ kùmà *Farisa,

⁶bít mə́ vé' tɛ́m indaŋ̀mbə̀ bə yée gə́, mə́ í' taà *Eklisiya bəd búúrá. In aa ɛ̀g tə́ gɔ̀ŋsə́ wɔ̀ɔ̀lə̀ saànmbìá, bít kə̀ indaŋ̀mbə̀ nwɔŋ bəd ləə̀nmbə̀ rə gə́, nɛ́ŋə̀ nə́ŋ̀má bán mə́ álǹmbə̀ bə wərə̀ gá.

⁷Zá in luùm bəraa rə, mə́ ɛ̀g kìínmbə̀ mú'sɛ̀l dùm kíin; bə́ŋyée mə́ ɛ̀g bə̀ tə́ kìínmbə̀ in bɔ̀bke kíin, Krístù bòórú.

⁸Bít aarə in luùm bəraa yée ní gá, zá in bəraa dá nɛ́ŋə̀ gbá'ǹ də gə́ kóólé, mə́ ɛ̀g bə̀ tə́ kìínmbə̀ in bɔ̀bke kíin, insɔ̀ɔ̀nkè gbà'á aa kàŋ kàn nɛɛ̀n də bòórú' ingabké Báá mə́ Tììkpɛ̀ŋ Yéésù Krístù bìá. Oò bòórú, məə mə́ dàà taà in aa dá nɛ́ŋə̀ gbá'ǹ də gə́ kóólé. Mə́ ɛ̀g in bəraa rə kóólé kìínmbə̀ in tɛdń kíin, bɔbm̀ saŋ̀mbə̀ kə̀ Krístù ra,

⁹bít kuùm wáàlǹmbə̀ nyɛdkè kə̀ oòra. Mə́ sèl kuùmbə̀ wɔ̀ɔ̀lə̀ Vɛnɛ́b númú kə̀ indaŋ̀mbə̀ ləə̀nmbə̀ gá. Zá kə̀ tɛ́mbagké aa Krístù naà roó, mə́ kùm taà nɛ́ŋə̀ wɔ̀ɔ̀làá. Mə́ kùm wɔ̀ɔ̀lə̀ rə, kə̀ wɔ̀ɔ̀lə̀ aa vúgà Vɛnɛ́b naà roó. Wɔ̀ɔ̀lə̀ aarə, tɛ́mbagké pii sùnú.

¹⁰In aa mə́ í' rə, gabm̀bə̀ Krístù ra, bít kə̀ kpɛŋsɛ́l aa zá' kə̀ valə́ roó, bɔbm̀ wáàl bé'ǹmbə̀ búúd kə̀ oò tá, bít oò bə̀ lúŋ̀mbə̀ val oò rú,

¹¹bɔ̀b máá kɔ̀ máà díím valú, bít máà kùm kə̀ gɔ̀ŋsə́ kə̀ oò kíin.

¹²Mə́ zíg yíl mə́, baànmbə̀ nìŋ mə́ kò' in aa mə́ zíg númú rəì sé, sínkɔ̀ baànmbə̀ mə́ kùmì nyɛdkè sé. Kàandə, Yéésù Krístù mà'ì nyàamdoorú, bɔ̀b máà kùm obəǹ bìá, bɔ̀b nùù máà bɔ̀b nɔg dùm mə́ roó.

¹³Ə́ùwə́, ɔ̀dkudvɛɛ̀l bərá, mə́ sèl baànmbə̀ mə́ bɔ̀b dùm də ìì sé. Zá mə́ mà' in nə́ŋ̀' yid mə́ bɔ̀m in aa máá bòórú roó, bít mə́ nɔ̀ŋ in aa máá númú rə bɔbm̀bìá.

¹⁴Kə̀ aakíin də, nùù mə́ tə́ ɛɛ̀m in aa mə́ zíg númú rə ba, bɔ̀b dáàn bɔbm̀bə̀ dùm aa Vɛnɛ́b pii bə́nnà lɛgə́ paà kə̀ Yéésù Krístù roó.

¹⁵Bə́n kóólé, nɛ́b aa bə́n doòn Vɛnɛ́b Nwulú roó, báà kuùm kə̀ inselké luùm nə́ŋ̀ní. Zá dáà nɛ́b kam aí tə́ŋú, bə̀ sèl tə́ gɔ̀ŋ gə́, Vɛnɛ́b bàà dá ii nwɔŋ aarə kíìn nyɛ́'nàá.

¹⁶Kóó leè, báà diìn ɛɛ̀m dáànmbə̀ númú, kə̀ bagǹmbə̀ zɔ̀ŋ aa bə́n də́'ǹ gbə̀' bə, yaà wə́ə́ bə́ŋyée zé roó.

¹⁷Ɔ̀dkudvɛɛ̀l mə́ í'sɛ̀lbə̀ bərá, íí kóólé, ìì kùm kìínmbə̀ nɛɛ̀n aa mə́ kùm dú rə kíin, bít ìì ɛ̀g núù, nɛ́b aa bə̀ tə́ kuùm kə̀ obə́ kíin də ba.

¹⁸Màìgə́ mə́ bàà ii kúnú, bít mə́ tə́ ii bídǹ baàn sɔ̀ŋ kə̀ kpə̀ə́ǹá' nɛ́b bəd zùúm, bə̀ í' Krístù val aa kò'ù téélɛŋké bərə, nwɔŋ oò bə̀ kiìnmbə̀ sé.

¹⁹Nùù bə̀ tə́ ɛɛ̀m zɔ̀ŋ aa bə̀ dá gɔ̀ŋsə́ boò bɔ̀'ǹ bə laarú rə ba. Kàandə, in aa tɛ́m vaksə́ boò í' rə, kùmsə̀n vɛnɛ́b boò ra. Bə̀ tə́ tɛ́m yádǹ in aa dáà dá bə̀ sə́ə́mnúù daàn də ba, bít tɛ́m boò ləə tə́ in zɔ̀ŋə yɛ́b bə bə̀ ba.

²⁰Obə́n gə́, bə́n nɛ́b lɛgə́ paà bə̀ bərá, bít bə́n tə́ən nwáàn kə̀ niŋsɛ́lá, Nɛ́d Nɛ́ŋə̀ bə̀ Súùn bə́n aa lɛgə́ paà rə, oò yaà kúnú. Nɛ́d Nɛ́ŋə̀ bə̀ Súùn bə́n də, Báátììkpɛ̀ŋ Yéésù Krístù ra.

²¹Dá si' búúd bə̀ bə́n aa zɔ̀ŋə yɛ́b bə yée pɛ́ɛ̀n, yaà dá si' kaŋsɛ́l bə̀ oò lúŋàá, kə̀ ma'ǹmbə̀ tù' kə̀ kpɛŋsɛ́l aa dáù kpaŋ̀ piìn, bɔ̀b oòra oò ləə sə̀n gààd in gə́ kóólé yílə́ roó.