Read Samba Leko Filipiya 4 Bible Online

Filipiya 4 - Samba Leko bible

Filipiya 4

¹Kə̀ aakíin də kɔ̀, ɔ̀dkudvɛɛ̀l mə́ í'sɛ̀lbə̀ bərá, mə́ í' ii tə́ bé'ǹmbə̀ gbàákù, nɛ́b aa íí kùmsə̀n mú'sɛ̀l dùm mə́ yéroó; bít mə́ tə́ kə̀ tɛ́m yádke gbà'á kə̀ aíra, ɔ̀dzéd mə́ bərá. Aa yérə, sə̀n nɛɛ̀n aa íí dá kuùm dú və̀'kè aí gɔ̀ŋsə́ rú, kə̀ Báátììkpɛ̀ŋ doó.

²Evodia kə̀ Sintaka tá, mə́ nyɛ̀m ii tə́ kúnú, bít mə́ tàŋ ii nɛɛ̀ná, ìì saŋ̀ ɔ̀dba, kìínmbə̀ kunkɛ́ɛ̀m Báátììkpɛ̀ŋ bə̀ bagǹ bəd kíin.

³Bít ám kɔ̀, ń ɔ̀dnə́ŋ̀ mə́ nə́ŋ̀ vɛ́nà bə̀ tùsú bìá, mə́ tə́ən kíìn nyɛmàá, ǹ láŋ bə̀ ba; kə̀ aakíin də, bə̀ nə́' nə́gə̀d kə̀ máá tá, *Nwɔŋ Puu Sɔ̀ɔ̀nkè baànmbə̀ bòórú. Kə̀ aakíin də, Kelemen kɔ̀, kə̀ ɔ̀dnə́ŋ̀ mə́ kam bəraa mə́ tə́ tù' ma'ǹ kə̀ boò tə́ rə gə́ kóólé, nɛ́b aarə nə́gə́l boò tə́ núúboòd gɔ̀ŋsə́ bə̀ rú.

⁴Sɛŋ gə́ kóólé, ìì kùm kə̀ tɛ́m làmkè wáàlǹmbə̀ kə̀ Báátììkpɛ̀ŋá! Mə́ tə́ ii bídǹ baàn sɔ̀ŋ' ìì kùm kə̀ tɛ́m làmkèá!

⁵Ìì kùm kə̀ tɛ́m ɔ̀gke kə̀ nɛ́b bəd gə́ kóólé. Báátììkpɛ̀ŋ tóò yaànà bə́ŋyée ní.

⁶Ìì lɔ̀b tɛ́m in nə́ŋ̀má bə sí, zá sɛŋ gə́ kóólé, ìì dìì Vɛnɛ́b nyɛɛ̀mbə̀ in aa íí ɔ̀d də ba, ìì nyɛ̀mə̀ kə̀ tɛ́m mɔ̀'ke bìá.

⁷Bít Vɛnɛ́b tɛbə̀ aa kàn in aa nɛ́ŋə̀ dá báàn gabm̀bə̀ kóólé rə, dá tɛ́m íí bəd nwáàn kə̀ nyì' íí bəd tá, Yéésù Krístù rú.

⁸Nwɔŋ aa máá bɛ́'ǹ kə̀ naà rə, ɔ̀dkudvɛɛ̀l bərá, ìì zíg inselké íí gə́ kóólé in aa sɔ̀ɔ̀n kàn nɛɛ̀n bít də́ŋì káŋ̀mbə̀ rə ba' in aa tə́ sɔ̀ɔ̀n də gə́ kóólé, in aa nɛ́ŋə̀ dá ləə̀n doó, in wɔ̀ɔ̀làá, in nyɛdkèá, in aa sɔ̀ɔ̀n Vɛnɛ́b doó, bít kə̀ in aa nɛ́ŋə̀ dá káŋ̀ doó.

⁹Ìì mà' tù' kə̀ in aa mə́ sániyà roó, kə̀ in aa íí bɔ̀bà máá naà roó, kə̀ in aa íí kìì mə́ bààiyà roó, bít kə̀ aa íí bé' mə́ mà' roó. Bít Vɛnɛ́b aa tə́ bə́n tɛbə̀ piìn də, dá kùm kə̀ aí tá.

¹⁰Mə́ kìì tɛ́m làmkèì gbàákù, kə̀ wálke kə̀ Báátììkpɛ̀ŋá' bə́ŋyée gə́, íí bɔ̀b kpaŋì máá bə̀ láŋ̀mbə̀ bə puu ní sɔ̀ŋ. Mə́ í' baànmbə̀ íí dàà mə́ seèlǹmbə̀ gá, zá íí bɔ̀b dáàn wə́ə̀nmbə̀ sé.

¹¹In nə́ŋ̀ kpán mə́ sə̀n, mə́ gám taà nwɔŋ aarə gá. Kàandə, mə́ lɛɛ̀mì kuùmbə̀ kə̀ in aa mə́ kə̀ naà roó.

¹²Mə́ gàbì kuùmbə̀ búúrú, bít mə́ gàbì kuùmbə̀ yàámú. Mə́ sánì kuùmbə̀ kə̀ tɛ́m làmkè sɛŋ gə́ kóólé, kóó líí mə́ wùb kúnú, kóó mə́ tə́ kə̀ gulùmá, kóó sɛŋ aa mə́ tə́ kə̀ in zùúm naà roó, sínkɔ̀ sɛŋ aa in tə́ mə́ kpáàn doó.

¹³Máá kíìn báàn in bəraa kóólé sidǹmbìá, kə̀ kpɛŋsɛ́l aa Krístù tə́ mə́ piìn doó.

¹⁴Zá kàandə má, íí mà' insɔ̀ɔ̀nkè yàá, íí láŋ mə́ì sɛŋ aa mə́ tə́ gbò'kè rú roó.

¹⁵Íí gàb yàá sɔ̀ɔ̀nkè kə̀ yíl aí bìá, íí nɛ́b Filipiya bə̀ bərá. Sɛŋ aa mə́ sɔ̀d *Nwɔŋ Puu Sɔ̀ɔ̀nkè udǹmbə̀ aí kàrú rə, mə́ zá'à Makedoniya yɛ́b ba, bít aíra íí kùmsə̀n *Eklisiya nə́ŋgùm aa láŋ mə́ bəroó. Láŋke aí bə̀ ní, mə́ kè' taá.

¹⁶Bə́ŋ̀ sɛŋ aa mə́ tóò Tesalonika bìlə́ rə, tùm íí pii mə́ láŋke aa mə́ í' rə sɛŋ zùúm.

¹⁷Mə́ sàà in tɛdńní bə̀ bɔbm̀bə̀ aí naà gá; zá mə́ í' ìì bɔ̀b mú'sɛ̀l dùm gbà'á Vɛnɛ́b bìá.

¹⁸Mə́ bɔ̀b in aa tùm íí pii máà Epafrodite nɛɛ̀n tɛ́mú rəì kóólé, bít kàn aa mə́ í' rə yàá. Bə́ŋyée Epafrodite àà máà in tɛdńní bə̀ aa tùm íí pii máà rə yàá, wál mə́ zíg in aa máá kə̀ tù' ma'ǹ dəì kóólé. In tɛdńní bə̀ íí bəd də, bə̀ tə́ kìínmbə̀ in piìnmbə̀ sol sɔ̀ɔ̀nkè bə̀ kíin, kìínmbə̀ sadaka aa Vɛnɛ́b kè', bít sɔ̀ɔ̀nə̀ rə kíin.

¹⁹Zá Vɛnɛ́b dá ii in aa íí ɔ̀d də kíìn piìn kóólé, kə̀ gbaŋə̀ gbà'á oòra, Yéésù Krístù rú.

²⁰Zá kaŋsɛ́l oò kùm Báá bə́n Vɛnɛ́b naú, zèd kə̀ zèrá. Oò kùm kàani.

²¹Ìì dɔ̀m Vɛnɛ́b Nɛ́b Gìdń bəd gə́ kóólé, kə̀ wálke kə̀ Yéésù Krístù ra. Ɔ̀dkudvɛɛ̀l í'sɛ̀lbə̀ bəraa bə̀ kùm kə̀ máá tə́ rə gə́ kóólé, bə̀ dɔ̀mi yàá.

²²Vɛnɛ́b Nɛ́b Gìdń bəraa bə̀ kùm zɔ̀ŋə də gə́ kóólé, bə̀ dɔ̀mi yàá; bít aa kàn nɛɛ̀n də, nɛ́b aa bə̀ tə́ tù' ma'ǹ gààd gbà'á Roma bə̀ yiìl loó.

²³Mə́ nyɛ̀m pə̀dkè Báátììkpɛ̀ŋ Yéésù Krístù bə̀, oò kùm kə̀ aí tə́ kóólé.