Read Samba Leko Kolosia 1 Bible Online

Kolosia 1 - Samba Leko bible

Kolosia 1

¹Núúboòraa vúgà máá mə́ Pol naú. Kə̀ nɛɛ̀n aa Vɛnɛ́b í' rə kíin, mə́ kùm taà *Yéésù Krístù gbantumsàá, kə̀ ɔ̀dkudvɛɛ̀l bə́n Timote tá.

²Bə́ bád núúboòraa rə, Vɛnɛ́b nɛ́b *gìdń bəraa Kolosia bìlə́ roó, ɔ̀dkudvɛɛ̀l bə́n bəraa bə̀ bàg Krístù kə̀ tɛ́m nə́ŋ̀ní roó. Mə́ nyɛ̀m Báá bə́n Vɛnɛ́b oò mà' ii pə̀dkèá, bít oò pii ii tɛbàá.

³Bə́ tə́ Vɛnɛ́b, Báá bə́n Tììkpɛ̀ŋ Yéésù Krístù bóò mɔ̀'ǹ, sɛŋ aa bə́ tə́ù nyɛɛ̀m aí yílə́ rə gə́ kóólé.

⁴Bə́ kìì bə̀ gám nwɔŋ aí bə̀ tɛ́mbagké íí aa Yéésù Krístù bərə yílú, bít kə̀ í'sɛ̀l íí aa kə̀ Vɛnɛ́b nɛ́b *gìdń bəd doó.

⁵Sɛŋ aa éèn nwɔŋ sɔ̀ɔ̀n *Nwɔŋ Puu Sɔ̀ɔ̀nkè bə̀ yaà wə́ə́ kə̀ aí səǹ də, bə̀ mà', bɔ̀b ìì bàg tɛ́m zígke aa tə́ piìn doó. Kə̀ aakíin də, tɛ́mbagké íí kə̀ í'sɛ̀l íí tá, bə̀ pá' lígə́d tə́ in aa íí zíg tɛ́m bərə ba. In bəraa rə, Vɛnɛ́b zíg tə́ lɛgə́ poú.

⁶*Nwɔŋ Puu Sɔ̀ɔ̀nkè sa' bɛ́d zɔ̀ŋə yɛ́b bə kóólé, bít lɛ̀b tə́ kíìn tó'nàá, kìínmbə̀ nɛɛ̀n aa lɛ̀b tó' aí kàrú, sɛŋ aa sɔ̀d íí kììà bərə kíin. Sɛŋ aa Nwɔŋ Puu Sɔ̀ɔ̀nkè wə́ə́ kə̀ aí kàrə́ rə, íí gàb pə̀dkè Vɛnɛ́b bə̀ì kə̀ vɛ́nà oò tə́ kóólé.

⁷Ɔ̀dzéd í'sɛ̀lbə̀ bə́n Epafras, nɛ́ŋə̀ aa tə́ tù' ma'ǹ kə̀ obə́n tə́ rə, sán ii sə̀n insɔ̀ɔ̀nkè aa roó. Oòrə, mà' Krístù tù' tə́ kə̀ tɛ́m nə́ŋ̀ní.

⁸Bàà bə́ nwɔŋ aa í'sɛ̀l Nwul Gìdń bə̀ pii ii roó.

⁹Kə̀ taàbìá, bə́ kpɛd taà Vɛnɛ́b nyɛɛ̀mbə̀ aí yílə́ sé, sɛŋ aa bə́ kìì bə̀ gám nwɔŋ aí bə̀ roó. Bə́ dɛ̀d Vɛnɛ́b oò nyíí ii kə̀ ingabkéá, kə̀ nɛɛ̀n aa í' rú rə kíin, kə̀ aí bə̀ ingabké aa Nwul oò tə́ piìn də piìnmbìá.

¹⁰Kə̀ aakíin, íí dákíìn báàn ɛɛ̀mbə̀ kìínmbə̀ nɛɛ̀n aa Báátììkpɛ̀ŋ í' rú rə kíin, bít in aa dáù sɔɔ̀n də ma'ǹmbə̀ sɛŋ gə́ kóólé. Kə̀ aakíin, íí dá taà báàn tù' sɔ̀ɔ̀nkè gə́ kóólé ma'ǹmbìá, bít íí dá taà ɛɛ̀m númú, kə̀ ingabké aa Vɛnɛ́b pii ii roó.

¹¹Bə́ tə́ Vɛnɛ́b nyɛmàá, bɔ̀b oò kpɛ́ŋi kə̀ kpɛŋsɛ́l kaŋsɛ́l laa nyɛdkè bə̀ oòra. Kə̀ aakíin, íí dá taà báàn búúd bəd sidǹmbə̀ sɛŋ gə́ kóólé.

¹²Ìì mɔ̀' Báá Vɛnɛ́b kə̀ tɛ́m làmkè aa pii ii kpaŋ̀, bɔ̀b ìì bɔ̀b gbaŋə̀ oò bəraa zíg nɛ́b *gìdń oò bəd oò gààrú, zɔ̀ŋə nyɛdkè rú roó.

¹³Kə̀ aakíin də, nyá'kè' bə́nnà tígə́l kpɛŋsɛ́lú, yaà páá bə́nnì Wàà oò í'sɛ̀lbə̀ gààrú.

¹⁴Kə̀ wàà oòra, bìnlɛ́' bə́nnì invaksə́ rú, bít invaksə́ bə́n bəd daamíìn yàá.

¹⁵Krístù kùmsə̀n Vɛnɛ́b nyìsə̀ aa bé'míìn gá roó. Oòra kùmsə̀n wàà éèn də̀gə̀ də̀gə̀ bìá, bít oòra kànsə̀n in bəraa Vɛnɛ́b séé rə gə́ kóólé.

¹⁶Kàandə, Vɛnɛ́b séé in gə́ kóólé kə̀ oòra, in bəraa lɛgə́ paà roó, bít kə̀ aa bəraa zɔ̀ŋə yɛ́b bəroó; in bəraa nɛ́ŋə̀ bé' roó, bít kə̀ aa bəraa nɛ́ŋə̀ bé' gá roó. Gààd mə̀ə̀rá, *malaika gààd bərá, nɛ́b gbàád yɛ́b bə̀ bərá, bít kə̀ *malaika kpɛŋsɛ́l bərá. Vɛnɛ́b séé in bəraa rə kóólé kə̀ oòra, bít oò bìá.

¹⁷Krístù kùmsə̀n in bəraa éèn séémíìn də kóólé númú. In gə́ kóólé, wál tə́ oò rú.

¹⁸Oòra kùmsə̀n yíləsá, *Eklisiya bəd kɔ̀, bə̀ kùmsə̀n sisá. Oòrú, gɔ̀ŋsə́ Puu sɔ̀d taá. Oòra kùmsə̀n wàà éèn də̀gə̀ də̀gə̀ bìá. Oòra éèn sɔ̀d díím sə̀n valú, bɔ̀b dáàn kuùmbə̀ nɛ́d éèn də̀gə̀ də̀gə̀ bə̀ in bəd kóólé númú.

¹⁹Kàandə, sɔ̀ɔ̀n Vɛnɛ́b yàá, bít Vɛnɛ́b kə̀ yíl oò tə́ kóólé, tə́ oò rú.

²⁰Vɛnɛ́b zíg tɛbə̀ zɔ̀ŋə yɛ́b bə kə̀ wàà oò nyɛ̀lə́m aa za' téélɛŋké bəroó. Bít Vɛnɛ́b wál in gə́ kóólé yíl kə̀ wàà oòra, zɔ̀ŋə yɛ́b ba, bít kə̀ lɛgə́ poú.

²¹Aí kɔ̀, nyàam də, íí kùmà zɔ̀ŋ bùúd kə̀ Vɛnɛ́bá, íí kùmà Vɛnɛ́b ɔ̀dmáàná, in vaksə́ aa íí sèl, bít íí mà' rə bòórú.

²²Zá bə́ŋyée, Wàà oò val aa kò'ù kə̀ nɛ́ŋə̀ si' rə bòórú, Vɛnɛ́b yaà wáli yílì kə̀ oòra, bɔ̀b aí bə̀ ma'ǹ *bí'ǹmbə̀ ìì kùm nɛ́b *gìdń bəd oò númú, nɛ́b nyɛdkè bərá, bít nɛ́b aa kə̀ invaksə́ nə́ŋ̀má naà síndoó.

²³Zá aa dá sɔɔ̀n də gə́, kə̀ tɛ́mbagkéá, ìì kùm kpɛŋkéá, bít və̀'kèá. Lɛ́' ìì dàà tɛ́m zígke aa íí kììà *Nwɔŋ Puu Sɔ̀ɔ̀nkè bə̀ rə sí, Nwɔŋ Puu Sɔ̀ɔ̀nkè aa bə̀ bàà nɛ́b zɔ̀ŋə yɛ́b bə bə̀ bəd kóólé roó. Bít máá mə́ Pol la, mə́ kùmsə̀n nɛ́d tù' bə̀ ma'ǹ Nwɔŋ Puu Sɔ̀ɔ̀nkè aarə bìá.

²⁴Bə́ŋyée, mə́ kìì tɛ́mlàmkè tə́ kə̀ búúd bəraa mə́ tə́ bé'ǹ aí bòórə́ roó. Kə̀ aakíin də, kə̀ yíl máá bìá, láŋ mə́ tə́ búúd bəraa nyɛ́d Krístù sisə́ rə í'ǹ bɛ́'nàá. Si' oòrə, *Eklisiya.

²⁵Yaà mə́ bíl nɛ́d tù' bə̀ ma'ǹ *Eklisiya bəd bə̀, kə̀ tùsaa Vɛnɛ́b pii dàà mə́, máà mà' aí tə́ŋə́ roó. Zíg mə́, máà bàà nwɔŋ bəǹ zɔ̀ŋ gə́ kóólé.

²⁶*Inmə́'ke aa Vɛnɛ́b mə́' zíg nyàamdoorú kpɔ̀ɔ̀m də, bə́ŋyée vúŋ yaà ì'ì nɛ́b *gìdń oò bəd núùrú.

²⁷Vɛnɛ́b í' ma'ǹmbə̀, boò gàb kúnú, nɛɛ̀n aa inmə́'ke bəǹ kùm dú gbà'á, bít kə̀ pɛ̀sá, nɛ́b aa bə̀ bàg bəǹ síndə tə́ŋə́ roó. Krístù tə́ aí tə́ŋú, bít bàà nyɛ́' ii gə́, íí dá kaŋsɛ́l laa nyɛdkè Vɛnɛ́b bə̀ kíìn bɔbàá.

²⁸Kə̀ aakíin də, bə́ tə́ nɛ́b bəd kóólé Krístù nwɔŋ baanàá. Bə́ tə́ nɛ́b bəd tɔ̀gàá, bít bə́ tə́ kóó nɛ́ɛ̀réè sánàá, kə̀ ingabké luùm gə́ kóólé, bɔ̀b yaàn i'ǹmbə̀ kóó nɛ́ɛ̀réè Vɛnɛ́b númú, kìínmbə̀ nɛ́ŋə̀ úúke kíin, kə̀ wálke kə̀ Krístù ra.

²⁹Tùsaa ma'ǹ bɛ́'ǹmbə̀ rə, mə́ nə́' nə́gə̀d tə́ kə̀ kpɛŋsɛ́l gbà'á aa Krístù tə́ piìn doó, kpɛŋsɛ́l aa tə́ tù' ma'ǹ máá rú roó.