Read Samba Leko Kolosia 2 Bible Online

Kolosia 2 - Samba Leko bible

Kolosia 2

¹Mə́ í' ìì gàb nɛɛ̀n aa nə́gə̀d máa kpɛŋ̀ dú roó. Mə́ tə́ nə́'ǹ aí bòórú, íí nɛ́b bagké bəraa Laodikiya bìlə́ roó, kə̀ nɛ́b aa bé' bə̀ bèd mə́ síndə gə́ kóólé.

²Mə́ nə́', bɔ̀b tɛ́m boò oò nyìì kə̀ váàndoá, boò kùm wálke kə̀ í'sɛ̀lá, bít boò kùm kə̀ gbaŋə̀ vɛ́nà bə̀ aa vɛ́nà ingabké bə̀ tə́ piìn doó. Bə̀ dákíìn báàn *inmə́'ke Vɛnɛ́b bə̀ gabm̀bìá, taà kùmsə̀n baànmbə̀ Krístù kə̀ yíl oò bìá.

³Gbaŋə̀ ingabké bə̀ gə́ kóólé, mə́' tə́ Yéésù Krístù naú, bít kə̀ ingabké aa vúgà Vɛnɛ́b naà roó.

⁴Mə́ bàà ii kàandə, bɔ̀b ìì dàà nɛ́ŋə̀ nə́ŋ̀má oò zá' ii kə̀ gúsuúm nwɔŋ tɛdń bəd sí.

⁵Kóó mə́ tə́ zɔ̀ŋ bùúd kə̀ aí máá, nwul mə́ tə́ kə̀ aí tá. Bít mə́ tə́ tɛ́m làmkè kiìn, bɔbm̀ bé'ǹmbə̀ aí bə̀ íí dìì tə́ ɔ̀dbə və̀'kè kə̀ tɛ́mbagkéá, Krístù rú.

⁶Kə̀ aakíin də, íí kè' Yéésù Krístù sína kìínmbə̀ Báá íí Tììkpɛ̀ŋ kíin gə́, ìì dìì kuùm wáàlǹmbə̀ kə̀ oò tá.

⁷Ìì pá' lígə́d íí oò rú. Ìì mà' gɔ̀ŋsə́ oò kàŋ oò naà sɛŋ gə́ kóólé. Tɛ́mbagké aí bə̀ oò kùm və̀'kèá, oò sɔ̀ɔ̀n kìínmbə̀ nɛɛ̀n aa bə̀ sániyà rə kíin. Bít ìì nyìì kə̀ mɔ̀'keá.

⁸Ìì gú' yíl íí ra, bɔ̀b nɛ́ŋə̀ nə́ŋ̀má záá oò pàà ii kə̀ gúsuúm nwɔŋ tɛdń oò bəd sí, sínkɔ̀ kə̀ ingabké oò tɛdń bəraa vúgà nɛ́b bəd naà rə sí. Aa máá ii baàn də, ingabké aarə vúgà nɛ́b bəd naú, kpɛŋsɛ́l nwulú bə̀ bəraa zɔ̀ŋə yɛ́b bəroó; zá vúgà Krístù yílə́ gá.

⁹Kàandə, in aa Vɛnɛ́b naà rə gə́ kóólé, yaà nyìì tə́ Krístù rú!

¹⁰Íí bɔ̀b in gə́ kóólé tə́ puuá, wálke íí kə̀ oòra. Ləə gààd tə́ *malaika gbàád bəd gə́ kóólé yílú, bít kə̀ *malaika kpɛŋsɛ́l nwulú bə̀ bəd kóólé yílú.

¹¹Kə̀ wálke kə̀ Krístù ra, íí nàà taà gàbá, gàb aa nɛ́b bəd náá sə̀n də gá, zá gàb naaké aa vúgà Krístù naà roó. Bít gàb aarə, bìn lɛ́' sə̀n invaksə́ kpɛŋsɛ́l bəraa aí sisə́ roó.

¹²Kə̀ aakíin də, sɛŋ aa bə̀ pii ii baptisma rə, bə̀ lə̀ə̀iyì kə̀ Krístù tá, bít íí díímì valə́ kə̀ oò tá. Kàandə, íí bàg kpɛŋsɛ́l Vɛnɛ́b bə̀ aa díímə̀ valú, yaà piiù gɔ̀ŋsə́ rə yàá.

¹³Nyàamdoorú rə, val kò' ii invaksə́ íí bòórú, bít kàandə, íí nàà gàb sé, íí gàb Vɛnɛ́b sé. Zá bə́ŋyée Vɛnɛ́b mà' ii, bɔ̀b bíd ìì kùm kə̀ Krístù tá' Vɛnɛ́b lɛ́' dàà bə́n invaksə́ bə́n bərì kóólé.

¹⁴Kə̀ bágke wàà oò bə̀ téélɛŋké ba, Vɛnɛ́b lɛ́' dàà bə́n taà núúboòd kpob bə̀ bəraa vúgà indaŋ̀mbə̀ bəraa bə́n kɛdǹ də rú roó.

¹⁵Sɛŋ aa bə̀ bág wàà oò téélɛŋké bərə, Vɛnɛ́b pà' zá' *malaika gbàád vaksə́ bə̀ bəd kpɛŋsɛ́l yàá. Bít Vɛnɛ́b dàà bə̀ sə́ə́mnúù nɛ́b bəd númú. Ìì àà bà kìínmbə̀ kɔ̀' bəraa bə̀ yáá bà kaasə́ bərə kíin, kə̀ kanké oò bìá.

¹⁶Kə̀ aakíin də, ìì dàà nɛ́ŋə̀ oò áli inlíìnmbə̀ íí bòórú, kə̀ in nyəə̀nmbə̀ íí bòórú sí; kóó wálke nyàmú, kóó sòò puu sɛŋú, sínkɔ̀ *nyàm nyi'ǹmbə̀ ba.

¹⁷In bəraa yée kóólé, tə́ kə̀ nɛ́ŋə̀ nə́ŋ̀ nyìsə̀ kíin. Nɛ́ŋə̀ rə, Krístù ra.

¹⁸Nɛ́ŋə̀ nə́ŋ̀ í' yíl oò i'ǹmbə̀, bəǹ nɛ́d Vɛnɛ́b bə̀ nuùnná. Í' *malaika bəd káŋ̀mbìá. Sɛŋ gə́ kóólé, tə́ lədǹ oò bəraa tə́ buùn də nwɔŋ oò uràá. Ìì dàà nɛ́d luùm aarə oò áli tùsaa íí tə́ ma'ǹ də bə sí. Nɛ́d aarə, nyìì tə́ kə̀ yíl pa'kéá, kàandə, inselké oò gə́, inselké zɔ̀ŋə yɛ́b bə bìá.

¹⁹Kùm wál kə̀ Krístù tə́ sé. Krístù rə, sə̀n yíləsá. Kə̀ pə̀dkè Krístù bìá, si' kə̀ zɔ̀ŋtá, bɔ̀b taà inlíìnmbìá, bít wál taà sɔ̀ɔ̀nkè kə̀ zɔ̀ŋ bəraa zàáì túm bəroó, kə̀ zɔ̀ŋ oò bəraa túm sáá níŋsə́ roó. Bít oò dìì kaŋ̀mbìá, kìínmbə̀ nɛɛ̀n aa Vɛnɛ́b í' rə kíin.

²⁰Dáà val kò' iiyì kə̀ Krístù tə́ gə́, íí vúgì in zɔ̀ŋə yɛ́b bə bə̀ rú. Kə̀ aakíin də, kə̀ níìbə̀ íí kùm taà kìínmbə̀ íí nɛ́b zɔ̀ŋə yɛ́b bə bə̀ kíin gú? Kə̀ níìbə̀ íí kè' taà boò pii ii taà indaŋ̀mbə̀ luùm aarə gú? Bə̀ tə́ baàn:

²¹«Ǹ pà' in aa yée sí», «Ǹ bèd in aa yée sí» bít «Ǹ pig in aa yée sí.»

²²Indaŋ̀mbə̀ bəraa rə, tə́ inlíìnmbə̀ yílú. Zá inlíìnmbə̀ gə́, dákíìn bɛ́ràá. Indaŋ̀mbə̀ bəraa rə, kə̀ insánke bəraa rə tá, bə̀ vúgə́là nɛ́b bəd naú.

²³Indaŋ̀mbə̀ bəraa rə, tə́ kìínmbə̀ bə̀ tə́ kə̀ ingabké naà kíin. Bə̀ bàg in pɔ̀bm̀bə̀ boò kə̀ wɔ̀ɔ̀làá, bə̀ pɔ̀b Vɛnɛ́b boò kə̀ tɛ́m lə́ə́keá. Bə̀ í' si' boò búúrá. Zá in bəraa rə kóólé, bán inselké vaksə́ aa boò tɛ́mə́ rə daŋ̀mbə̀ sé.